Éksondo̱ 20 - Xo̱jo̱n eén Néná

Néná bi̱ tsꞌén katsjaá xota̱ Israee̱l nga tie kjo̱a̱botíxomaa̱

¹ Kó Néná bi̱ katsoó xota̱ Israee̱l nga tsíchji̱a̱jo:

² «Án boá xi Nejnú án, kó án boá xi tsꞌaxiéjnúꞌun ki̱a̱ nangi Ejipto̱, nínga moso̱ kamájnú.

³ »Ngata̱ ꞌbejínjnú kje̱ꞌe Ne tsi ánjín.

⁴ »Ngata̱ niꞌándajínjnú a̱sie̱én ngo ne, ko̱jo tsi ngo ni xi bo̱a̱ má kjiꞌi xikoó ni xi síndo nkꞌa jàn, ko̱jo tsi xikoó ni xi síndo tꞌanangii̱, ko̱jo tsi xikoó ni xi síndo nínga ꞌniú na̱nga̱a̱ ndáchíkoón.

⁵ Ngata̱ bosiéntꞌajínjnúu̱ tikójnú kui nii̱, ti̱nde ngata̱ niꞌándikónjínjnú. Án boá xi Nejnú an, kó chi̱ni̱ án. Án boá xi tsꞌenjée̱ ndií, ko̱jo ndíndee̱, ko̱jo ndínde xi ma joó tsi̱ꞌe̱ xota̱ xi tsꞌenchꞌóna,

⁶ ta̱nga achichí nda tsꞌenjo̱ an ngayeje xota̱ tji̱e̱e̱ xota̱ xi tsꞌéntjóna, ko̱jo xi ndyi̱tsꞌènkjátjosón kjo̱a̱botíxomana.

⁷ »Ka̱májín ta̱xkiya si̱ꞌankjiénjnú jaꞌénna, chjiéngá xcha̱ndikónjnú, xi ta̱xkiya sa̱ꞌínkjién, sa̱ꞌinjéñáa̱.

⁸ »Ngatjaꞌátsjienjnú nga ni̱xtjin xotoo̱, ni̱xtjin ndikón boá, tsi̱ꞌe̱ nga an si̱ꞌandikónna.

⁹ Nga jun ni̱xtjin xi tjoón xomanaa̱, ka̱ma si̱ꞌánjnú ngayeje xá xí mejénjnú si̱ꞌánjnú,

¹⁰ ta̱nga ni̱xtjin xotoo̱, ni̱xtjin xi niꞌánkjaꞌyá boá, ni̱xtjin nga an si̱ꞌandikónna. Kui ni̱xtjii̱n ngojín xi chjiéngá sa̱ꞌín ngo xá: ti̱nde jún, ti̱nde ndí xí xi̱ꞌinjnú, ti̱nde ndí xí ínchjínjnú, ti̱nde moso̱jnú, ti̱nde chji̱ni̱e̱ꞌbojnú, ti̱nde cho̱ xi tjínjnú, ti̱nde xota̱ xi xín nangi xi tsꞌénxájo̱jnú nga.

¹¹ Ngatꞌa̱ jun ni̱xtjin katsꞌéndani an ndiꞌakꞌajmii̱, ko̱jo tꞌanangii̱, ko̱jo ndáchíkoón, ko̱jo ngayeje ni xi tjiín. Ta̱nga ni̱xtjin xi ma yitoo̱ katsꞌenkjaꞌyá án. Kuíni nga katsꞌenchikonñé an kui ni̱xtjii̱n, kó án xi bo̱a̱ kixian an nga ngo ni̱xtjin ndikón ka̱ma.

¹² »Ndaꞌyáꞌénjnúu̱ ko̱jo chónjnúu̱ na̱ꞌmijnú ko̱jo na̱anjnú. Kó bo̱a̱ tsꞌén nga kjín nó ka̱majnú nga ku̱i̱ndyionjnú kui na̱xi̱ńdá xi an tsjajnúꞌun.

¹³ »Ngata̱ xota̱jín niꞌánkꞌiénjnú.

¹⁴ »Ngata̱ niꞌántꞌajínjnúu̱ kjo̱a̱ chjo̱ónjnú ko̱jo tsi xi̱ꞌinjnú.

¹⁵ »Ngata̱ jmí chejé niꞌánjínjnú.

¹⁶ »Ngata̱ chꞌójín tsꞌén ndokjo̱a̱taꞌínjnú ngo xota̱, ti̱nde ngata̱ ꞌbíndisotaꞌínjínjnú.

¹⁷ »Ngata̱ niꞌánmejénjínjnú ni xi tjiín kje̱ꞌe xota̱, tsi chjo̱ón, tsi mosoo̱ xi xi̱ꞌin, tsi mosoo̱ xi chjo̱on, tsi cho̱yojo xi tsꞌénxaá, tsi bórróo̱, ko̱jo tsi ta̱jmì niní xi tjiín».

Xota̱ Israee̱l bi̱ tsꞌén katsakjónní Néná

¹⁸ Kó xota̱ Israee̱l ngije tsintꞌieé nga janie cho̱ꞌo̱o̱n ko̱jo nga kandaꞌyá tjioo̱, kó nga kamábe nga jaꞌatꞌe, ko̱jo nga katjo ṉdi̱ kui na̱xi̱i̱, achichí katsakjónní kó ta̱ kjin kixindyia.

¹⁹ Sꞌe̱ jaskan kui xotaa̱ kijíkoón Moisee̱, nga bi̱ katsoó: —Ta̱sá ndatsi ji xi ko̱ndókjo̱e̱jejne̱. Tꞌíyéjne̱ ni xi chjiéngá si̱ꞌanjne̱, kó ko̱nda̱ꞌyáꞌénjne̱ ji. Ngatꞌa̱ tsi Néná xí ku̱i̱chji̱a̱jojne̱, ko̱yayéjéjne̱ tsobo̱a̱.

²⁰ Ta̱nga Moisee̱, bi̱ katsoó: —¡Ngata̱ ndakonjínmájnú! Néná mejeén skótꞌayákónjnú. Tsi jún ko̱nda̱ꞌyáꞌénjnúu̱, ngayeje nii̱ xi nda ka̱majnú.

²¹ Ndatsi bi̱ kiꞌmií xota̱ Israee̱l, ti̱ kuí xí ta̱ kjín kisꞌińdonii̱ na̱xi̱i̱. Ta̱kuítsí Moisee̱ xi kijíkóntiñaa̱ kui ṉdi̱ nínga tikón Néná.

Bi̱ tsꞌén katsóyà Néná xikótsꞌèn si̱ꞌanda ṉchandikoón

²² Kó Néná atíxomaa̱ Moisee̱ nga tsja̱á kui eén xota̱ Israee̱l: «Jún je kamáyàjnú kótsꞌèn tsíchji̱a̱jojnúꞌun ndeskande ndiꞌakꞌajmii̱.

²³ »Ngata̱ niꞌándajínjnú ne xi to̱ntiboa ko̱jo ne xi to̱nsinié, tsi̱ꞌe̱ nga kui nii̱ xi si̱ꞌandikónjnú ngindiee̱ nga an xi si̱ꞌandikónjnúꞌun.

²⁴ »Kjiꞌanga si̱ꞌandajnú ngo ṉchandikón tsi̱ꞌe̱ nga an si̱ꞌandikónjnúꞌun, ńdie ti̱ꞌandajo̱jnú, kó ki̱a̱ ti̱ꞌankꞌiènjnú cho̱tsa̱nga̱ ko̱jo cho̱yojo xi̱ꞌin xi si̱ꞌankꞌasꞌienjnúꞌun. Ki̱a̱ tꞌíjñájnú nga̱soón kui ṉchaa̱n kui kjo̱a̱tjó xi si̱ꞌankꞌasꞌienjnú kjo̱a̱a̱ jeé xota̱ na̱xi̱ńdaá, ko̱jo kui kjo̱a̱tjó xi bokó nga mejénjnú nga kꞌuiéná kjo̱a̱xió jún ko̱jo an, ko̱jo jún ko̱jo xota̱ xi ngasee̱. An kji̱ndi̱bá an ngo ngi̱ndie xi kjoaꞌajin an tsi̱ꞌe̱ nga kjo̱a̱ꞌátsjienjnú an, kó án boá xi sa̱ꞌin an nga nda ka̱ma ngayeje ni xi si̱ꞌánjnú.

²⁵ »Kjiꞌanga ngo ṉchandikón xí ndi̱jo̱ si̱ꞌandajnúꞌun, ngata̱ ni xi ki̱cha̱jín bokjannijnú kui ndi̱jo̱o̱, ta̱sá bo̱a̱ tsꞌén ti̱ꞌankjiénjnú xikó kjiꞌi nga kasakojnú. Tsi ni xi ki̱cha̱ si̱ꞌankjién nga ko̱kjan kui ndi̱jo̱o̱, jè ngiti̱ ka̱májín kui ndi̱jo̱o̱ xi si̱ꞌandani ṉchanna.

²⁶ Ngata̱ jmí ki̱jo̱n niꞌándajínjnúu̱ ṉchanna, tsi̱ꞌe̱ nga jmíjín xi sku̱i̱e̱ yojo kjiꞌixtií nga tjín xí ko̱e̱je̱nijíngíni kui ki̱jo̱o̱n».