Éksondo̱ 2 - Xo̱jo̱n eén Néná

Bi̱ tsꞌén katsen Moisee̱

¹ Ngo nda̱ ko̱jo ngo na̱ xi chji̱a̱ni xota̱ tji̱e̱e̱ Lebii̱ ixánjo̱ xkjín.

² Kó kui naa̱ tsaꞌa ndí, kó jaskan katsen kui ndií. Nga kamábe kui xota̱chjo̱on nga achichí tsjá kisꞌie ndií, ján sá kamaá nga íjñaꞌma.

³ Kó nga ngiti̱ kamájiín íjñaꞌma ngase kui ndií, iskjíbé ngo ni̱se̱nyá xi indyiaá tjingóxkjà ko̱jo brea̱ nga̱xto̱n, kósꞌe̱ ki̱a̱ íyá kui ndií, sꞌe̱ ngi̱jii̱n nínga tjín yána̱xo̱o̱ ki̱a̱ tꞌa ndejèꞌ Niloo̱, ki̱a̱ katsꞌénkjíjin kui ni̱se̱nya̱á.

⁴ Ta̱nga ngo ndichja kui ndií ta̱ kjin askotsijenni míra̱ ni xi ka̱maa̱.

⁵ Ngi̱chí sájín tsa̱kji̱ín nda̱ ree̱ nangi Ejipto̱ kijíngóyá ndejeèꞌ, kó tji̱e̱nga tjimá ki̱a̱ tꞌa ndejeèꞌ kui ko̱jo ínchjín chji̱ni̱e̱ꞌboo̱, kamábe kui ni̱se̱nya̱á ki̱a̱ ngi̱jin nínga tjín yána̱xo̱o̱, kó katsangiya ngo chji̱ni̱e̱ꞌboo̱ tsi̱ꞌe̱ nga ko̱e̱je̱kjaꞌá.

⁶ Nga iskjíxꞌaá kui ni̱se̱nya̱á kamábe nga tsꞌénkjandá kui ndií, kó ni̱ma̱ kamaá, kósꞌe̱ bi̱ katsó: «¡Ndií xota̱ Israee̱l boá kui ndií!»

⁷ Kósꞌe̱ kjiꞌá boá nga ndichja kui ndií, bi̱ katsoó tsa̱kji̱ín nda̱ ree̱: —Tsi mejeén kjuínkjáꞌa an ngo xota̱chjo̱on Israee̱l xi ka̱ma sa̱ꞌínkí ko̱jo ka̱ma sa̱ꞌínxchá kuí ndií.

⁸ Kó tsa̱kji̱ín nda̱ ree̱ bi̱ katsoó: —Ja̱ tꞌen ji, kó tꞌenchje̱ꞌé. Kó ndichja kui ndií kijíkjaꞌá na̱aa̱n.

⁹ Nga jachó kui xota̱chjo̱on, tsa̱kji̱ín nda̱ ree̱, bi̱ katsoó: —Tꞌenje̱ chií ji kui ndií ndiꞌàa̱, ti̱ꞌinki ji, kó ti̱ꞌinxchéní, kó an kꞌuichjií. Kó kui xota̱chjo̱on kijíjo̱ kui ndií, kó askoo̱n.

¹⁰ Ngije kamáxchá kuí ndií, kijíjoo̱ tsa̱kji̱ín nda̱ ree̱, kó kui tsa̱kji̱ín katsꞌéntsi̱ꞌe̱ kui ndií, kó «Moise̱» ítꞌajaꞌén, «Án boá xi tsꞌaxié an ngi̱jin ndáfoaa̱» tsó kui jaꞌeén.

Bi̱ tsꞌén tsangani Moisee̱ nangi Ejipto̱

¹¹ Ngije jaꞌa kjín nó, ngije xchá Moisee̱, ngo ndi̱yà kijí nínga ndyi̱tsꞌènxá xota̱ nangii̱, nínga achichí ꞌniú xá moso̱ xi katsꞌén, kó ta̱niján má kamábe nga ngo nda̱ Ejipto̱ tsꞌénbeꞌeé ngo nda̱ Israee̱l,

¹² kó Moisee̱ askotsijen nga ngo foaꞌatjiyajoo̱n, kó nga ta̱ꞌyajín xi kamábe, katsꞌénkꞌién nda̱ Ejiptoo̱, kó ki̱a̱ íjñaꞌma yojoo̱ kui nda̱a̱ ki̱a̱ ngi̱jin tsomií.

¹³ Nga kamángindyiojón ti̱ jatjo nginí Moisee̱, kó kamábe nga jó já Israee̱l ndyi̱kjàn, kó bi̱ katsoó kui nda̱ xi tsꞌénbeꞌeé nda̱ xi ingoo̱: —Ánní nga tiꞌbékòo̱n nda̱ xi ngo nangi manijnú xingi̱jnú.

¹⁴ Kó bi̱ katsó kui nda̱a̱: —ꞌYá xi katsjaá xá nga ji xi ngito̱ko̱jne̱, axa̱ ꞌyá xí nendiꞌamasien katsꞌeén nga ji ko̱ti̱xomejne̱. A bo̱a̱ tsꞌén mejeén si̱ꞌinkꞌínní xikótsꞌèn kiniꞌínkꞌín ji nda̱ Ejiptoo̱ nga. Nga tsintꞌié kuí nii̱ Moisee̱ achichí katsakjónní, kó bi̱ tsꞌén katsꞌénkjó: «Nga ja̱koxi̱ jè kamáyà nga an xi katsꞌénkꞌién an nda̱ Ejiptoo̱».

¹⁵ Ja̱ bo̱a̱ jè be kui nii̱ nda̱ ree̱, kó kuíni nga katsangiyakjaꞌá Moisee̱ tsi̱ꞌe̱ nga sa̱ꞌínkꞌién, ta̱nga Moisee̱ tsanga, kó ki̱a̱ kijíkꞌíjñá ngo nangi xi ꞌmí Mandiaa̱n. Nga jachó kui ngi̱ndiee̱ ki̱a̱ katsꞌénkjaꞌyá tꞌa ngo ndáńchꞌi̱.

¹⁶ Ngi̱chí sájín jachó ki̱a̱ kui ndáńchꞌií yito ínchjín kjindí xí kijíkꞌaxié ndáfoa, tsi̱ꞌe̱ nga ku̱i̱ndyiákitsie ngi̱ndie nínga ꞌbi ndáfoa cho̱tsa̱nga̱a̱. Ngayeje kui ínchjiín, ínchjiín Jetroo̱ boá, kui nda̱ xi chináꞌmii̱ nangi Mandiaa̱n.

¹⁷ Ti̱ jachó ki̱a̱a̱ já xí koón cho̱tsa̱nga̱, kó katsꞌénxchánjo̱ kui ínchjiín tsi̱ꞌe̱ nga xín ko̱e̱je̱, kósꞌe̱ Moisee̱ jastjíe̱n, kó tsꞌaxiéꞌá kui ínchjiín, kó kui katsjaá ndáfoa cho̱tsa̱nga̱a̱.

¹⁸ Kó nga jachó ndiꞌaa̱ kui ínchjiín, na̱ꞌmii̱ bi̱ tsꞌén asíyaá: —Ánní nga tá xotí jèꞌe̱konjnú.

¹⁹ Kó bi̱ katsó kui ínchjiín: —Kjo̱a̱a̱ nga ngo xota̱ Ejipto̱ tsꞌaxiéꞌájne̱ nga ísejo̱jne̱ xota̱ xi koo̱n cho̱tsa̱nga̱a̱, kó jmí tsi ta̱kuítsí ni, ¡ngaskande tsꞌaxié ndáfoa ndáńchꞌií, sꞌe̱ katsjaá ndáfoa cho̱tsa̱nga̱jne̱ nga!

²⁰ —Kó ñá tikón kui nda̱a̱ —katsó na̱ꞌmii̱. Kó ánní nga jàn jàn ikꞌíjñásoboákonjnú. ¡Ndókjo̱a̱jnúu̱ tsi̱ꞌe̱ nga kji̱ndi̱bákjiniejo̱ná nichinie!

²¹ Kjiꞌanga ndyi̱kjinie nichinie, Jetroo̱ tsíchji̱a̱jo Moisee̱ kó bo̱a̱ katsoó nga ki̱a̱ ngatꞌíjñá nínga tikón ndiꞌaa̱, kó jo̱ꞌo katsó Moisee̱. Jaskan ngije jaꞌa ni̱xtjin Jetroo̱ katsꞌénkixanjo̱ Moisee̱ tsa̱kji̱ín, kui xi ꞌmí na̱ Séforaa̱.

²² Kó kui naa̱ ngo ndí kisꞌiee̱, kó Moisee̱, Ngersoo̱n ítꞌajaꞌén, ngatꞌa̱ bi̱ katsó: «Xota̱ xi xín nangi án kꞌi̱e̱e̱».

Néná bi̱ tsꞌén nda̱ kamaá xota̱ Israee̱l

²³ Ngije jaꞌa kjín nó, kꞌien nda̱ re xi chji̱a̱ni nangi Ejipto̱, kó xota̱ Israee̱l achichí ni̱ma̱ katsó kjo̱a̱a̱ nga moso̱ kamá ki̱a̱a̱, ngatꞌa̱ tsie kjo̱a̱ni̱ma̱ jaꞌa.

^24-25 Ta̱nga Néná kamábe kjo̱a̱ni̱ma̱ xi ndyi̱foaꞌatio, kó tsintꞌieé nga ndyi̱kjandayà nga on kjimaa̱ ni xi kjimataꞌin kui xotaa̱, kó kjiꞌá boá nga jaꞌátsjiee̱n Néná ni xi índajo̱ xota̱ xi xchaá xota̱ Israee̱l, kui xi Abraa̱n, Isaa̱ ko̱jo Jakoo̱b.