Éksondo̱ 19 - Xo̱jo̱n eén Néná

Kjo̱a̱a̱ xaá Bi̱ tsꞌén jachó xota̱ Israee̱l nangi kixií na̱xi̱ Sinaii̱

^1-2 Xota̱ Israee̱l jatjoni nangi Refindii̱n sꞌe̱ kijí xtji̱e̱e̱n nangi kixií na̱xi̱ Sinaii̱, kó ki̱a̱ kisꞌińdotꞌa se na̱xi̱i̱. Nga jachó kui ngi̱ndiee̱, jè ján sá jaꞌa nga jatjoni nangi Ejipto̱.

³ Ngo ndi̱yà Moisee̱ kijínijíngí na̱xi̱i̱ tsi̱ꞌe̱ nga ki̱a̱ sa̱ko̱ó Néná. Kó nga jachó ki̱a̱ nínga ꞌniú nkꞌaá na̱xi̱i̱, Néná tsíchji̱a̱a̱ Moisee̱ kó bi̱ katsoó: «Bi̱ má tꞌíi̱n xota̱ Israee̱l:

⁴ Jún boá xi kamáyàjnú ni xi katsꞌenjo̱ an nga katsꞌenjée̱ xota̱ Ejiptoo̱, kó ti̱ jè kamáyàjnú kótsꞌèn nga nda jéꞌe̱jojnúꞌun ngaskande kui ngi̱ndie nínga tikòn an. Kó bo̱a̱ má tsꞌén askonjnúꞌun xikótsꞌèn koón ndií ngo ja̱ nga ꞌbíjñasón nga̱a̱.

⁵ »Tsi jún xi ko̱nda̱ꞌyáꞌénjnú kjo̱a̱ꞌbíndana ko̱jo tsi si̱ꞌankjatjasónjnú ni xi tsoboájnú jún nga si̱ꞌánjnú, jún boá xi ka̱majnú na̱xi̱ńdá xi tjó ngase sa̱ꞌin an, ngi̱jii̱n ngayeje na̱xi̱ńdá xí ngase xi tjín nga̱sondiee̱. Án boá xi tsa̱ꞌa̱n ngayeje tꞌanangii̱.

⁶ Jún boá xi ka̱majnú chináꞌmina ngindyi̱ko̱n ngayeje xota̱ nga̱sondiee̱, kó ku̱i̱ndyiontꞌaxínjnúu̱ ngayeje nii̱ tsi̱ꞌe̱ nga ta̱ xá tsa̱ꞌa̱n tsí xi si̱ꞌánjnú».

⁷ Kó Moisee̱ ítikó ngito̱ko̱o̱ xota̱ na̱xi̱ńdaá, kó katsóyaà ngayeje ni xi katsoó Néná nga sa̱ꞌín.

^8-9 Kó ngayeje xota̱ na̱xi̱ńdaá ta̱ ngo nda̱ kamá nga bi̱ katsoó Moisee̱: «Bo̱a̱ si̱ꞌanjne̱ ngayeje ni xi atíxoma Néná nga si̱ꞌanjne̱». Kó Moisee̱ katsóyaà Néná ni xi katsó xota̱ na̱xi̱ńdaá. Kósꞌe̱ Néná bi̱ katsoó Moisee̱: «Ngi̱jii̱n ngo ṉdi̱ jmá kuichjiájoñaa ji, tsi̱ꞌe̱ nga xota̱ na̱xi̱ńdaá ku̱i̱ntꞌiè ngayeje ni xi kuichjiájoo, kósꞌe̱ ngatsjéni̱xtjin nga sꞌi̱jii̱n ji ngijee̱.

^10-11 »Mejénna nga kꞌuíchíi̱n xota̱ na̱xi̱ńdaá, kó tꞌíndendé jí tsi̱ꞌe̱ nga sa̱ꞌíndikónna ngotꞌe̱ ko̱jo ndyiojón. Tatíxomée̱ nga ko̱nié ńjñoo̱, tsi̱ꞌe̱ nga sa̱ꞌíntsjie yojoo̱, kó ngatꞌíndonda tsi̱ꞌe̱ nga sa̱ꞌíntsjána ngii̱, ngatꞌa̱ kuí ni̱xtjii̱n nga kokòo̱ yojona ki̱a̱ na̱xi̱ Sinaii̱.

^12-13 »Tꞌínde ji chi̱bo̱a̱ nga ngo foaꞌatjiyajoo̱n na̱xi̱i̱, kó bo̱a̱ tꞌíi̱n xota̱ Israee̱l nga ka̱májín ko̱e̱je̱nijíngí kui na̱xi̱i̱, ngaskande nde ngo se ka̱májín tsja̱jon nga ngo foaꞌatjiyajoo̱n. Ta̱ꞌyaní xi ko̱e̱je̱nijíngí kui na̱xi̱i̱, yáyojó ko̱jo tsi ndi̱jo̱ si̱ꞌankꞌienni, tsi cho̱ ko̱jo tsi xota̱. Ta̱ kjiꞌá tsí nga ka̱ma ko̱e̱je̱nijíngí kjiꞌanga kjo̱ni̱e̱ tjioo̱».

¹⁴ Kó Moisee̱ kijíkꞌijñánda kui xota̱ na̱xi̱ńdaá tsi̱ꞌe̱ nga sa̱ꞌíntsjaá Néná, kó kuí xotaa̱ anié ńjñoo̱.

¹⁵ Jaskan Moisee̱, bi̱ katsoó: «Jún chjiéngá ku̱i̱ndyiondajnú ngatꞌa̱ ngii̱ si̱ꞌantsjajnúu̱ Néná. Kuíni nga chjiéngá ku̱i̱ndyionxónjnú nga ján kui ni̱xtjii̱n, jmíjín xi ínchjín sa̱ꞌínjo̱».

¹⁶ Kó nga kisisie̱èn ni̱xtjin xi ma jaán, nkꞌa jàn kandaꞌyá cho̱ꞌo̱n ko̱jo jaꞌatꞌe, kó ngo ṉdi̱ kisꞌijñajin kui na̱xi̱i̱, kó achichí ꞌniú kandaꞌyá ngo tjio. ¡Ngayeje xota̱ Israee̱l xi kisꞌińdo ndiꞌańjñoo̱ ngaskande jatsié má nga katsakjónní!

¹⁷ Kósꞌe̱ Moisee̱ tsꞌaxié xotaa̱ Israee̱l nínga síndo, kó ki̱a̱ kijíjo̱ tꞌa se na̱xi̱ Sinaii̱, tsi̱ꞌe̱ nga ki̱a̱ sa̱ko̱ó Néná.

¹⁸ Ngayeje kui na̱xi̱ Sinaii̱ jatjoo̱ ṉdi̱, ngatꞌa̱ xikó maá ndiꞌí kamá Néná nga jatjajen, ¡kó ṉdi̱i̱ kijínijíngí xikoó ṉdi̱i̱ ngo orjno̱! Kó ngayeje na̱xi̱i̱ achichí ꞌniú kandaꞌyaá nga janie,

¹⁹ kó nda̱a̱ kui tjioo̱ saꞌniú sáꞌniú kandaꞌyá ngase. Kó tji̱e̱nga Moisee̱ tsíchji̱a̱jo Néná, nda̱a̱ Néná kandaꞌyá xikó maá ngo cho̱ꞌo̱n.

²⁰ Kó jatjajenni Néná nkꞌa jàn, kó ki̱a̱ nínga ꞌniú nkꞌaá na̱xi̱i̱ kisꞌijña, kó tsíchji̱a̱a̱ Moisee̱ tsi̱ꞌe̱ nga ko̱e̱je̱nijíngí. Nga jachó Moisee̱,

²¹ Néná bi̱ katsoó: —Ti̱tjaje̱n ji, kó tꞌíyée̱ xota̱ Israee̱l nga chjiénjín nga kꞌi̱e̱ kji̱ndi̱bánijingí nga an kjo̱e̱ꞌekátsijenna. Tsi bo̱a̱ sa̱ꞌín, kjín ka̱ma xi ko̱yà ki.

²² Kó ngaskande chináꞌmi xi kji̱ndi̱bákón tiñana, chjiéngá ku̱i̱ꞌíjñanda mára yojoo̱, ngatꞌa̱ tsájmi̱ ko̱yà ndatsa kui nga.

²³ Kó Moisee̱ bi̱ katsoó Néná: —Xota̱ Israee̱l ka̱májín kón nga ko̱e̱je̱nijíngí na̱xi̱i̱, ngatꞌa̱ ji je bo̱a̱ kasée̱ nga ko̱e̱je̱jín. Ngaskande je bo̱a̱ kasejne̱ nga chi̱bo̱a̱ kꞌuíndojne̱, ngatꞌa̱ ngi̱ndie ndikóo̱n boá kui na̱xi̱i̱.

²⁴ Kó Néná bi̱ katsoó: —Ti̱tjaje̱n ji kui na̱xi̱i̱, kó ndibénijíngí nginí ji, kó ndibéje̱ ji Aaroo̱n nga. Ta̱nga ta̱ꞌyajín xi ka̱ma kji̱ndi̱bá ngase kꞌi̱e̱e̱, nde chináꞌmii̱ ka̱májín kji̱ndi̱bá, tsi bo̱a̱ sa̱ꞌín, ko̱yà ki.

²⁵ Kó Moisee̱ jatjajenni na̱xi̱i̱, kó katsóyaà xota̱ Israee̱l ngayeje kui nii̱.