Éksondo̱ 17 - Xo̱jo̱n eén Néná

Néná bi̱ tsꞌén tsꞌaxiéni ndáfoa ngo ndi̱jo̱

¹ Xota̱ na̱xi̱ńdá Israee̱l jatjoni ngi̱ndie kixí xi ꞌmí Sii̱n, kó nínga katsoó Néná nga sa̱ꞌínkjaꞌyá, ki̱a̱ katsꞌénkjaꞌyá. Nga jachó ngo ngi̱ndie xi ꞌmí Refindii̱n ki̱a̱ katsꞌénkjaꞌyá, ta̱nga jmí ndáfoa xi ꞌyó kasakojiín ki̱a̱a̱,

² kó xota̱ na̱xi̱ńdaá katsꞌénxchánjo̱ Moisee̱ nga bi̱ katsoó: —¡Xíndájne̱! ¡Te̱ꞌéjne̱ ndáfoa xi sꞌi̱o̱ji̱n! Kó Moisee̱ bi̱ katsoó: —Kó, Ánní nga an ndyi̱niꞌánxchánjo̱jnúꞌun. Ánní nga niꞌánsꞌijinjínjnú ngaꞌniuú Néná.

³ Achichí ꞌniú kamáxíndaá kui xota̱ na̱xi̱ńdaá, nga ngaskande ítsꞌi̱yanii̱ nga katsꞌénxchánjo̱ Moisee̱ nga bi̱ katsoó: —A kuí xá kaꞌnaxiénijne̱ nangi Ejipto̱ tsi̱ꞌe̱ nga ko̱yà xíndájne̱ ji̱n ko̱jo ndíjne̱ ko̱jo cho̱yojojne̱.

⁴ Kósꞌe̱ Moisee̱ tsíchji̱a̱a̱ Néná nga ko̱síko̱jo nga bi̱ katsoó: —Mí xí sa̱ꞌinjo̱ an kui xota̱ na̱xi̱ńdaá. ¡Je ta̱ chiboa chajaa̱ nga ndi̱jo̱ kꞌo̱yana nga sa̱ꞌínkꞌiénna!

^5-6 Kó Néná bi̱ katsoó Moisee̱: —Mejénna nga kꞌuínje̱ ji xota̱ Israee̱l ngaskande nínga tikón na̱xi̱ Oree̱b. Ki̱a̱ skoyaa ji nga̱soón ndi̱jo̱o̱. Ji tꞌentjén ji, kó tꞌenje̱ ji chiboa ngito̱ko̱o̱ xota̱ na̱xi̱ńdaá. Chꞌi̱e̱ ji yánísié xi akjaní ji ndáfoaa̱ ndejèꞌ Niloo̱ nga jín kamá. Ngije kjóchí ji ki̱a̱a̱, tjaní ji yánísiée̱ kui ndi̱jo̱o̱, kó ki̱a̱ kjo̱tjoni ndáfoa, kó ngayeje xotaa̱ ka̱ma kꞌuí. Kó Moisee̱ katsꞌén ngayeje kui nii̱ ngindyi̱ko̱n ngayeje ngito̱ko̱o̱ xota̱ na̱xi̱ńdaá.

⁷ Kó kui ngi̱ndiee̱ Meribaa̱ ítꞌajaꞌén, «nga niꞌánxchánjo̱» tsó kui nii̱, ngatꞌa̱ xota̱ na̱xi̱ńdaá ki̱a̱ boá nínga katsꞌénxchánjo̱ Néná. Kó ti̱ Masaa̱ ítꞌajaꞌén nga, «ni xi sꞌijinjínná» tsó kui nii̱, ngatꞌa̱ jó ján íjñaá ini̱ma̱a̱ kjo̱a̱a̱ ngaꞌniú xí tjiín Néná nga skoón kui xotaa̱.

Xota̱ Israee̱l bi̱ tsꞌén askjanjo̱ xota̱ Amalee̱k

⁸ Kósꞌe̱ ki̱a̱ nangi Refindii̱n xota̱ Amalee̱k kijíkjánjo̱ xota̱ Israee̱l.

⁹ Kó ki̱a̱ Moisee̱ bi̱ katsoó Josuee̱: «Chje̱ꞌéjin ji chiboa jáxíꞌín, kó tangínki̱xkánjo̱jnú xota̱ Amalee̱k. Ndyiojón kotíjña̱ an nga̱són nínga ꞌniú nkꞌaá na̱xi̱i̱, kó koꞌniú án yánísié xi katsjána Néná kui xi katsꞌenjéñáa̱ xota̱ Ejiptoo̱».

¹⁰ Kó Josuee̱ bo̱a̱ katsꞌén xikó katsoó Moisee̱, kó kijíkjánjo̱ xota̱ Amalee̱k. Kó Moisee̱ ko̱jo Aaroo̱n ko̱jo Uu̱r kijínijíngí nínga ꞌniú nkꞌaá na̱xi̱i̱.

¹¹ Kó kjiꞌanga Moisee̱ iskjininkꞌa tsja, xota̱ Israee̱l katsꞌén kui kjo̱a̱xcha̱án, ta̱nga kjiꞌanga Moisee̱ tsꞌenje̱ngi tsja, xota̱ Amalee̱k katsꞌén kui kjo̱a̱xcha̱án.

¹² Kó ti̱chaa̱n jenda tsja Moisee̱ nga iskjininkꞌa, kósꞌe̱ Aaroo̱n ko̱jo Uu̱r iskjíbé ngo ndi̱jo̱ xi katsꞌénkꞌíjñasón Moisee̱, kósꞌe̱ nga ngo nga ngo kui jaá kisꞌińdotꞌaa̱, ngo nga skoón sꞌe̱ ngo nga fojnií xi iskjininkꞌajo̱ tsja, kó kisꞌiee̱ ngaꞌniú tsja Moisee̱ ngaskande nga kamángixoón.

¹³ Kó bo̱a̱ tsꞌén nga Josuee̱ katsꞌeén nga askjanjo̱ xota̱ Amalee̱k.

¹⁴ Kó ngi̱chí sájín Néná bi̱ katsoó Moisee̱: «Ti̱ꞌinꞌindé ji ngayeje ni xi kamá kui kjo̱a̱xcha̱án, tsi̱ꞌe̱ nga jmíjín xi xchi̱yaa̱, kó bo̱a̱ tꞌíi̱n Josuee̱ nga án boá xi sa̱ꞌin an nga ngiti̱ jmíjín xi kjo̱a̱ꞌátsjiee̱n xota̱ Amalee̱k».

¹⁵ Kó Moisee̱ ngo ṉchandikón katsꞌénda ki̱a̱a̱, kó, «Néná boá xi bandera̱na», ítꞌajaꞌén,

¹⁶ kó bi̱ katsó: «¡Ngi̱ya ndsa̱ án tikón banderaa̱ Néná! ¡Néná boá xi ítsꞌi̱yanii̱ nga skjánjo̱ xota̱ Amalee̱k ko̱jo ngayeje xota̱ tji̱e̱e̱!»