Éksondo̱ 16 - Xo̱jo̱n eén Néná

Bi̱ tsꞌén Néná katsjaá nichinie xota̱ Israee̱l

¹ Ngo sá masien jaskan ngije jatjo nangi Ejipto̱ xota̱ Israee̱l, jatjoni nangi Elii̱n, kó jachó nangi kixí xi ꞌmí Sii̱n, kui ngi̱ndie xi tikón xtji̱e̱e̱n nangi Elii̱n ko̱jo na̱xi̱ Sinaii̱.

² Kó ki̱a̱ nangi kixií ngayeje xota̱ Israee̱l katsꞌénxchánjo̱ Moisee̱ ko̱jo Aaroo̱n.

³ Kó bi̱ katsoó: «Jún kꞌi̱e̱ kjindibájo̱jnú ji̱n kui ngi̱ndie kixií tsi̱ꞌe̱ nga kꞌi̱e̱ ko̱yà bojójne̱. Ta̱sara̱ ndatsi Néná ki̱a̱ katsꞌénkꞌiénjne̱ nangi Ejipto̱. Ngatꞌa̱ kui ngi̱ndie jàn kisꞌiejne̱ ti̱jìꞌásó yiꞌi xi tjikítsie má yojo xi kachján, kó kichiniejne̱ ngaskande nga nda kitsiejne̱».

^4-5 Kósꞌe̱ Néná bi̱ katsoó Moisee̱: «A ye kó sa̱ꞌin an, nkꞌa jàn kji̱ndi̱bájénni ni xi skji̱ni̱e̱ xotaa̱ ndyiojón ndyiojón, ta̱nga xotaa̱ ta̱ bo̱a̱ tsí kjiꞌi kjo̱a̱ꞌátikó kui nichiniee̱ xikó kjiꞌi kju̱i̱e̱e̱ nga ngo ni̱xtjin. Ni̱xtjii̱n xi ma juu̱n jó bo̱a̱ kjiꞌi xikó kjiꞌi kjinie nga ngo ni̱xtjii̱n kjo̱a̱ꞌátikó. Skotꞌayákón mára an tsi tsꞌénkjátjosónna ko̱jo tsi jmí».

^6-8 Kósꞌe̱ Moisee̱ ko̱jo Aaroo̱n, bi̱ katsoó xota̱ Israee̱l: «Ánní nga ndyi̱niꞌánxchánjnú, xi jmí ni yàjínjne̱ kjo̱a̱a̱ kui ni xi kjimaa̱. Kjiꞌanga ji̱n xi ndyi̱niꞌánxchánjo̱jnú jún, nga ja̱koxi̱ Néná boá xi ndyi̱niꞌánxchánjo̱jnú, ngatꞌa̱ kuí boá xi tsáyàjne̱ ni xi niꞌánjne̱. ¡Kó Néná jè tsintꞌié ni xi ndyi̱ꞌmìjnú! »Néná boá xi tsꞌaxiéjnú nangi Ejipto̱, kó jmí tsi ji̱n. Kuíni nga kui kamángixoón xcha̱jnú nga kꞌi̱e̱ tikón Néná ngi̱jii̱n jún, ngatꞌa̱ tsja̱ajnú yojo xi xi̱ni̱e̱jnú. Kó ndyiojón ta̱jñó xcha̱jnú, ngatꞌa̱ tsja̱ajnú ngayeje pan xi ka̱ma xi̱ni̱e̱jnú».

⁹ Jaskan ngije kamá kui nii̱, Moisee̱ bo̱a̱ katsoó Aaroo̱n tsi̱ꞌe̱ nga ku̱i̱ꞌítikó ngayeje xota̱ na̱xi̱ńdá Israee̱l, tsi̱ꞌe̱ nga ko̱e̱je̱ ngindyi̱ko̱n Néná, ngatꞌa̱ Néná je tsintꞌieé nga ndyi̱tsꞌènxchán.

¹⁰ Tji̱e̱nga Aaroo̱n to̱kó tsꞌénchji̱a̱jo ngase xota̱ Israee̱l, ta̱niján má kamáyà ngo ṉdi̱ xtji̱e̱e̱n nangi kixií. ¡Néná boá xi kisꞌijñajin ngamasiee̱n kui ṉdi̱i̱ xi achichí ꞌna̱a̱!

¹¹ Kó Néná bi̱ katsoó Moisee̱:

¹² «Jè tsintꞌié an nga ndyi̱tsꞌènxchán xota̱ Israee̱l, ta̱nga bo̱a̱ tꞌíi̱n nga ngotꞌe̱ má sku̱i̱e̱ ꞌyání xi Nee̱. Nga ka̱mangixoón tsjàa̱ nga skji̱ni̱e̱ yojo, kó nga ta̱jño̱ó tsjàa̱ nga skji̱ni̱e̱ pan».

^13-14 Kó bo̱a̱ kamá. Ti̱ kuii̱ kamángixoón, achichí ni̱sie tosafoá jachó ngi̱ndie nínga síndo kui xotaa̱, xi ngaskande kisꞌikitsié má nga̱són tꞌanangii̱. Kó nga ta̱jño̱ó ni̱xtjin xi mangindyiojoón kui ngi̱ndiee̱ kisꞌie ngo xoño. Kó ngije kichjajá kui xoñoo̱, nga̱són tꞌanangii̱ kisꞌijña ngo ni tiboa ńtsó xí ja̱ kon xi̱i̱ pan má kon.

¹⁵ Kó nga kamábe kui nii̱ xota̱ Israee̱l, ja̱kꞌi̱e̱ ja̱ngaján asíyaá xkjín, nga bi̱ katsoó mí nii̱ bo̱a̱ xi̱ꞌba̱. Kó Moisee̱ bi̱ katsoó: «Kuí bí pan xi Néná tsꞌéntsjájnú tsi̱ꞌe̱ nga xi̱ni̱e̱jnú.

¹⁶ Kó Néná tsꞌéntsáyàná nga ta̱ jó tsí kilo̱ ka̱ma kjo̱a̱ꞌátikó nga ngo xota̱. Kó nga bo̱a̱ kjiꞌi ka̱manijnú nga ngo nga ngojnú. Jmíjín xí tsꞌatio bo̱a̱ kjiꞌi ka̱ma kjo̱a̱ꞌátikó».

¹⁷ Kó xota̱ Israee̱l katsꞌén ni xi atíxomaa̱ Néná nga sa̱ꞌín. Tjín xí tsie, tjín xí chiboa jaꞌátikó,

¹⁸ ta̱nga nga tsꞌachi̱bo̱a̱, ti̱nde tsꞌangijiín xi tsie jaꞌátikoó, kó ti̱nde kichajájiín xi chiboa jaꞌátikoó.

¹⁹ Kósꞌe̱ Moisee̱ bi̱ katsoó kui xotaa̱: «Ngata̱ ngojín xi foaꞌátjó chií kui nii̱ tsi̱ꞌe̱ nga nga kamángindyiojón skji̱ni̱e̱».

²⁰ Ta̱nga tjín xota̱ Israee̱l xi katsꞌénsénjiín ni xi katsó Moisee̱, kó jaꞌátjó chiboa kui paa̱n tsi̱ꞌe̱ nga nga ka̱mangindyiojón skji̱ni̱e̱ katsaki. ¡Ta̱nga kamá chi̱ndo kui paa̱n kó achichí chꞌoje̱n kamá! Kuíni nga Moisee̱ achichí katsꞌénxchánjo̱ kui xotaa̱.

²¹ Jaskan ngije kamá kui nii̱, kui xotaa̱ ta̱ xikó kjíꞌí tsí xi chjieén xi jaꞌátikó, kó xki̱ ta̱jñó xki̱ ta̱jñó jaꞌátikó, ngatꞌa̱ ngije kamáꞌniú ndoboaá kamáńdá kuí paa̱n.

Néná bi̱ tsꞌén atíxomaa̱ xota̱ Israee̱l tsi̱ꞌe̱ nga sa̱ꞌínkjaꞌyá ni̱xtjin xi ma yitoo̱

²² Ni̱xtjin xi ma juu̱n xomanaa̱, xota̱ Israee̱l kijíkjaꞌaꞌyá nginí kui paa̱n, ta̱nga nijón kilo̱ jaꞌáꞌyá nga ngo nga ngo xotaa̱, jó bo̱a̱ kjiꞌi jaꞌátikó xikó kjiꞌi foaꞌátikó nga ni̱xtjin nda, kó nga bo̱a̱ kjiꞌi jaꞌátikó, já ngito̱ko̱o̱ xota̱ Israee̱l nda̱ kamaá, kó kijítsáyaá Moisee̱ kui nii̱,

²³ kó Moisee̱ bi̱ katsoó: «Néná boá xi atíxoma nga ndyiojón, ni̱xtjin nga niꞌánkjaꞌyá boá, ni̱xtjin tsi̱ꞌe̱ nga si̱ꞌandikón Néná. Chjiénjín nga si̱ꞌanxájnú ndyiojón. Kuíni nga ngotꞌe̱ Néná jó bo̱a̱ kjiꞌi nichinie katsjájnú. Tsi tjín ni xi si̱ꞌanchjánjnú ko̱jo tsi si̱ꞌanxojnú ndyiojón, ngotꞌe̱ bo̱a̱ ti̱ꞌánjnú kui nii̱, kó ngayeje ni xi kꞌo̱ngijnú chja̱ꞌátjójnú tsi̱ꞌe̱ ndyiojón».

²⁴ Kó xota̱ Israee̱l tsintꞌiéꞌeén Moisee̱, kó jaꞌátjó nga kamángindyiojón nichinie xi tsꞌangii̱. Nga kamángindyiojón askotsijee̱n kui paa̱n, kó jmí chi̱ndo kisꞌiejiín ti̱nde chꞌójín je̱n kamá.

²⁵ Kósꞌe̱ Moisee̱ bi̱ katsoó: «Ngotꞌe̱, ni̱xtjin nga niꞌánkjaꞌyá boá. Ngo ni̱xtjin tsi̱ꞌe̱ Néná, kó jmí nichinie sa̱kójínjnú nga̱són tꞌanangii̱. Kó kuíni nga ngotꞌe̱ chi̱ni̱e̱jnú nichinie xi kachjaꞌátjójnú ngojña̱.

²⁶ Ngotꞌe̱ ku̱i̱ꞌítsꞌi̱yanii̱ nga jun ni̱xtjin sa̱kójnú nichinie ki̱a̱ nga̱són tꞌanangii̱, ta̱nga xi ma yito ni̱xtjii̱n, jmí ni sa̱kójínjnú, ngatꞌa̱ ni̱xtjin nga niꞌánkjaꞌyá boá».

²⁷ Ndatsi je bo̱a̱ katsó Moisee̱, ti̱ kuí xí tjín xota̱ Israee̱l xi kijíngase kui nichiniee̱ xi ma yito ni̱xtjii̱n, ta̱nga jmí ni kasakojiín.

²⁸ Kósꞌe̱ Néná, bi̱ katsoó Moisee̱: «Ngaskande kjiꞌání nga ko̱nda̱ꞌyáꞌénjnúꞌun.

²⁹ Ni̱xtjin xi ma juu̱n jó bo̱a̱ kjiꞌi nichinie tsꞌéntsjájnúꞌun, tsi̱ꞌe̱ nga si̱ꞌankjaꞌyájnú ni̱xtjin xi ma yitoo̱. Kui ni̱xtjii̱n ngojín xi chjiéngá kjo̱taxie ndiꞌaa̱».

³⁰ Kósꞌe̱ xota̱ na̱xi̱ńdaá katsꞌénkjaꞌyá ni̱xtjin xi ma yitoo̱.

³¹ Kui pan xi jaꞌátikó tiboa kamá xikoó to ndi̱ꞌee̱, kó ixi kamá xikoó pan xi nanginjon ntsjieén. Xota̱ Israee̱l «mana̱» katsoó kui nii̱.

Néná bi̱ tsꞌén atíxoma nga chja̱ꞌátjó chií kui manaa̱

³² Jaskan Moisee̱, bi̱ katsoó xota̱ na̱xi̱ńdaá: «Néná atíxománá nga chjién nga chja̱ꞌátjó jó kilo̱ kui manaa̱, tsi̱ꞌe̱ nga xota̱ tji̱e̱ná sku̱i̱e̱ kui pan xi katsjáná Néná ki̱a̱ nangi kixií, ngije tsꞌaxiéná nangi Ejipto̱».

^33-34 Kósꞌe̱ Moisee̱ bi̱ katsoó Aaroo̱n: «Chjábé jí ngo ti̱jì, kó ki̱a̱ tindyie ji nga jó kilo̱ kui manaa̱, kó ki̱a̱ tꞌíjñí ji kje̱n nínga tikón koxa̱a̱ kjo̱a̱ꞌbíndaa̱. Ki̱a̱ chja̱ꞌátjó kuí manaa̱, tsi̱ꞌe̱ nga xota̱ tji̱e̱ná sku̱i̱e̱ nichinie xi katsjáná Néná». Kó Aaroo̱n bo̱a̱ katsꞌén.

^35-36 Kó kuí nii̱ xi iskjinie xota̱ Israee̱l yichán nó, ngaskande nga jachó tsindioó nangi Kanaa̱n, nínga ja̱bo̱a̱ je síndo kje̱ꞌe xota̱. Nga kichꞌíchi̱bo̱a̱ manaa̱, xota̱ Israee̱l katsꞌénkjién ngo chi̱bo̱a̱ xi ꞌmí «ngomee̱r» kó jó kilo̱ kjiya kui chi̱bo̱a̱a̱.