Éksondo̱ 14 - Xo̱jo̱n eén Néná

Bi̱ tsꞌén jaꞌatio Ndáchíkón Inií xota̱ Israee̱l

¹ Jaskan Néná tsíchji̱a̱jo Moisee̱, nga bi̱ katsoó:

² «Bi̱ tꞌíi̱n xota̱ Israee̱l nga ngatjíꞌoyá nginí, kó ki̱a̱ ngatsꞌénkjaꞌyá ki̱a̱ Pi-Airoo̱t, kui ngi̱ndie xi tikón ngamasiee̱n ndáchíkoón ko̱jo nangi Mijndoo̱l, kje̱n má nangi Baa̱l-Sefoo̱n.

³ Kó bo̱a̱ tsꞌén nda̱ ree̱ nangi Ejipto̱ sa̱ꞌínkjó nga ngije jún kjóchójnú nangi kixií xcha̱jínjnú ni xi si̱ꞌánjnú, kó ta̱sá kji̱ndi̱báꞌoyá nginíjnú.

⁴ Kó án boá xi sa̱ꞌin tajá án ini̱ma̱a̱ nda̱ ree̱, tsi̱ꞌe̱ nga ko̱e̱je̱tji̱ngijnú, kó nga bo̱a̱ sa̱ꞌín, sa̱ꞌinkjié an xota̱ juu̱n, kó kokòo̱ ngaꞌniúna. Bo̱a̱ tsꞌén nga xota̱ Ejiptoo̱ sku̱i̱e̱ nga án xi Néná án». Kó xota̱ Israee̱l katsꞌén ni xi katsoó Néná nga sa̱ꞌín.

⁵ Kó nga kiꞌmíyaà nda̱ ree̱ nangi Ejipto̱ nga je ndyi̱monga xota̱ Israee̱l, kui nda̱ ree̱ ko̱jo já mosoo̱ asíkjo eén nga ja̱bo̱a̱ je katsjákjo̱a̱ nga je kjo̱tjo kui xotaa̱, kó bi̱ katsoó xkjín: «¡Mí kjo̱a̱tsobé xi kiniꞌán! Kótsꞌèn katseꞌéndiè ñá nga kiniꞌánkjí xota̱ Israee̱l. Kó ngotꞌe̱ ꞌne̱, ꞌyá xí sa̱ꞌínxá ngajoná.»

^6-10 Kó Néná katsꞌéntajá ini̱ma̱a̱ nda̱ ree̱, kó kui ko̱jo jájuún kijítji̱ngii̱ xota̱ Israee̱l. Tji̱e̱n má katsjákjo̱a̱ nga ikꞌíjñandaa̱ ngo karreta̱ tsi̱ꞌe̱ kjo̱a̱xchán, kó kijíjo̱ jájún ngito̱ko̱o̱ nga kijítji̱ngii̱ xota̱ Israee̱l. Jun úchán kamá karreta̱ xi ꞌniú ndakón ngase xi jaꞌájin, ko̱jo ngayeje karreta̱ xi kisꞌie nangi Ejipto̱. Kó xota̱ Israee̱l ngije jatjoni nangi Ejipto̱ kisie só xi nda nga niꞌán ngo kjo̱a̱xchán. Ngi̱chí sájín xota̱ Ejiptoo̱ jachótji̱ngii̱ xota̱ Israee̱l ki̱a̱ ngi̱ndie nínga katsoó Néná nga sa̱ꞌínkjaꞌyá. Kó kjiꞌanga xota̱ Israee̱l ta̱ kjin kamábeni nga ndyi̱fochótjíngií nda̱ ree̱ ko̱jo jájún xi ngasee̱, achichí katsakjónní kó askjandáyà má nga tsíꞌaá Néná nga ko̱síko̱jo.

¹¹ Kó xota̱ Israee̱l katsꞌénxchán nga bi̱ katsoó Moisee̱: —Ánní nga kaꞌnaxiéjne̱ nangi Ejipto̱. Ánní nga kꞌi̱e̱ jéꞌe̱jejne̱ nangi kixií nga kꞌi̱e̱ kju̱i̱e̱sónjne̱. A jmí ngi̱ndiejín nangi Ejipto̱ nga ki̱a̱jín akjanijínjne̱.

¹² A mí tsí bo̱a̱ kiꞌmíjne̱ ji kui ni̱xtjin jàn nga ngata̱ niꞌínxtíjínjne̱, kó nga ta̱sá ko̱e̱ꞌéndièjne̱ nga si̱ꞌanxájne̱ nganda tsi̱ꞌe̱ xota̱ Ejiptoo̱. ¡Ngatꞌa̱ ta̱sá nda ngase tsi ki̱a̱ kamára̱ ji̱n moso̱, ta̱bo̱a̱jiín nga kꞌi̱e̱ ko̱yàjne̱ nangi kixií!

^13-14 Kó Moisee̱ bi̱ katsoó xota̱ na̱xi̱ńdaá: —¡Xió tindyiónjnú, kó ngata̱ ndakonjínmájnú! Ngata̱ nda̱jín májnú, ngatꞌa̱ sꞌe̱ xcha̱jnú nga Néná boá xi kꞌo̱xiéꞌájnú. Kui xota̱ Ejipto̱ xi ndyi̱yajnú ngotꞌe̱, nginijánjín xcha̱jnú, ngatꞌa̱ Néná boá xi skja̱n ngajojnú.

¹⁵ Ta̱nga Néná, bi̱ katsoó Moisee̱: —Kó ji, ánní nga an tichjiéꞌéní nga kosiko̱joo. ¡Ta̱sá bo̱a̱ tꞌíi̱n xota̱ Israee̱l nga, ngatjíra nínga ndyi̱fí!

¹⁶ Chjábé jí yánísiée̱ kó chjanínkꞌé ji, kó tjin ji ndse̱ nga̱soón ndáchíkoón tsi̱ꞌe̱ nga jó tjín ko̱kjanga, kó xota̱ Israee̱l ka̱ma ko̱e̱je̱yise ngamasiee̱n ndáchíkoón nga tsja̱jon ngi̱ndie xi kixí.

^17-18 Ngatꞌa̱ án boá xi sa̱ꞌin tajá án ini̱ma̱a̱ an xota̱ Ejiptoo̱ tsi̱ꞌe̱ nga ko̱e̱je̱tji̱ngijnú, kósꞌe̱ kjiꞌá boá nga sa̱ꞌinkjié an. Kó ngije katsꞌée̱n nda̱ ree̱ ko̱jo ngayeje juu̱n ko̱jo karretaa̱, xota̱ Ejiptoo̱ sku̱i̱e̱ nga án boá xi Nee̱ xota̱ Israee̱l. ¡Kokomáráa̱ ngaꞌniú tsie xi tjínna!

¹⁹ Kósꞌe̱ xota̱ Israee̱l kijí xtji̱e̱e̱n nínga tikón ndáchíkoón. Tji̱e̱nga kui ndítsjiee̱ Néná xi kijítjoón kui xotaa̱, xtji̱e̱e̱n nga̱xto̱n kisꞌijña, kó ngamasiee̱n xota̱ Israee̱l ko̱jo xota̱ Ejiptoo̱ kisꞌijña kui, kó kui ṉdi̱ xi ja̱kjiꞌi yásé má kjiꞌii̱, ti̱ ki̱a̱ kisꞌijña nga̱xto̱n xota̱ Israee̱l nga,

²⁰ kó kui ṉdi̱i̱ akóraa̱ ndi̱yà xota̱ Israee̱l, ta̱nga katsꞌénjñoó jájuún nangi Ejiptoo̱. Kui ni̱xtji̱e̱e̱n xota̱ Ejiptoo̱ jachótji̱ngijiín xota̱ Israee̱l.

²¹ Kó Moisee̱ yején tsja xtji̱e̱e̱n ndáchíkoón, kó Néná katsꞌénkjaꞌa ngo tjo̱ xi ꞌniú nga ngo kui ni̱xtji̱e̱e̱n. Kó kui tjo̱o̱ jó tjín akjángá ndáchíkoón, kó ngamasiee̱n ngo ndi̱yà xí kixí kitsjien.

²² Kó ndáfoaa̱ ndáchíkoón ki̱a̱ nínga tsakjangaa̱ jó nga̱nde kisꞌiee̱ xi xikoó tsi jó xó, ngo nga skoón ko̱jo nga fojnií. Kó kuí boá xi ndi̱yà nínga jaꞌayise xota̱ Israee̱l.

²³ Kó xota̱ Ejiptoo̱ kijítji̱ngii̱ xota̱ Israee̱l ki̱a̱ kui ndi̱yà nínga tsakjanga ndáchíkoón, kijítji̱ngi ngayeje jájuún nda̱ ree̱ xi síndosoón ndi̱je̱ ko̱jo xi tjimáyà karretaa̱ xi tsꞌénkjién nga fí kjo̱a̱xchán.

²⁴ Ta̱nga nga ndibáꞌásie̱én Néná askotsijennii̱ xota̱ Ejiptoo̱ ki̱a̱ nínga tikón ṉdi̱ ko̱jo ndiꞌí xí ja̱ kon yásé má koón, kó katsꞌéntsobéjii̱n kui xotaa̱ kó achichí katsakjónní.

²⁵ Kó Néná ti̱ katsꞌénkjatsón ni ńtsoó karretaa̱ jájún Ejiptoo̱, kó ta̱ꞌya kamá kijí ngase kui nii̱. Kósꞌe̱ xota̱ Ejiptoo̱ bi̱ katsoó xkjín nga askjandáyaá: «¡Ta̱sá ku̱i̱yóo̱ xota̱ Israee̱l, ngatꞌa̱ Nee̱ kui xotaa̱ boá xi tsꞌénkjánjo̱ná ñá!»

²⁶ Ta̱nga Néná bi̱ katsoó Moisee̱: «Tjin ji ndse̱ nga̱soón ndáchíkoón tsi̱ꞌe̱ nga ndáfoa ndáchíkoón ngatjandibánieé xota̱ Ejiptoo̱, ko̱jo karretaa̱».

²⁷ Kó Moisee̱ bo̱a̱ katsꞌén, kó ngije tjisísi̱e̱én, ndáchíkoón kisꞌijñanda nginí ngi̱ndiee̱. Kó xota̱ Ejiptoo̱ kamámejeén tsanga ta̱nga kamájiín, ngatꞌa̱ Néná íꞌmáni ndáfoaa̱ ndáchíkoón,

²⁸ ngayeje jájuún nangi Ejiptoo̱ ko̱jo karretaa̱ kjo̱a̱xchán xí tjimájo̱. ¡Kó nde ngojín nda̱ jun xi tsꞌangii̱ yojoo̱!

²⁹ Ta̱nga xota̱ Israee̱l jaꞌa ngamasiee̱n ndáchíkoón, nga katsjájón tꞌanangi kixí, ngatꞌa̱ ndáfoaa̱ ndáchíkoón kisꞌijña xikoó tsi ngo xó, ngo nga skoón ko̱jo nga fojnií.

³⁰ Bo̱a̱ kamá kui ni̱xtjin jàn nga Néná tsꞌaxiéꞌá xota̱ Israee̱l. Ngayeje xota̱ Israee̱l kamábe xota̱ Ejipto̱ xi jesoón nga ki̱a̱ kisꞌiyojo tꞌa ndáchíkoón.

³¹ Kó xota̱ Israee̱l nga kamábe nga Néná katsꞌénkjié xota̱ Ejiptoo̱ nga katsꞌénkjién ngaꞌniuú, katsjaákon nga ku̱i̱ntꞌiéꞌeén ko̱jo nga ka̱maꞌniátakón Néná ko̱jo Moisee̱.