Éksondo̱ 12 - Xo̱jo̱n eén Néná

Kjo̱a̱botíxoma xi katseꞌeé xota̱ Israee̱l kjo̱a̱a̱ kótsꞌèn sa̱ꞌín sꞌué Paskuaa̱

¹ Kjiꞌanga to̱kó síndora nangi Ejipto̱ Moisee̱ ko̱jo Aaroo̱n, Néná bi̱ katsoó:

² «Kui saá, kuí boá xi sá tjoón kui noó ka̱majnú jún, kó kuí boá xi ꞌniú ndikón ngase.

^3-5 Bo̱a̱ tꞌínjnúu̱ ngayeje xota̱ Israee̱l nga xki̱ ni̱xtjin tiee̱ kui saá, nga ngo nga ngo xtín xota̱ nga nga tꞌijñánda ngo ndií cho̱tsa̱nga̱ tsi̱ꞌe̱ nga skji̱ni̱e̱. Chjiéngá cho̱ xi xi̱ꞌin ngatama kui cho̱o̱, xi sꞌe̱ tsí ngo noó, ko̱jo xi onjiín. Ta̱nga nda má nga kosoón nga kjo̱chóꞌá ngayeje xi skji̱ni̱e̱ kui cho̱o̱, ngatꞌa̱ nga ngo nga ngo kui xotaa̱ chjiéngá skji̱ni̱e̱ xikó kjiꞌi kjinie síkijí. Tsi ngo xtín xotaa̱ xi kjínjín má, kó tsi kju̱i̱e̱jiín kui cho̱o̱, chjiéngá nga kjiniejo̱ xota̱ tꞌa ndiꞌaa̱.

⁶ »Ngije nga ngo nga ngo xtín xotaa̱ xi je íjñanda kui cho̱o̱, chjiéngá ngaskande nga ni̱xtjin tienijoón kui saá nga ka̱ma sa̱ꞌínkꞌién, ngije kjimangixoón kui ni̱xtjii̱n.

⁷ Kó nga je síndo xtín nga skji̱ni̱e̱ kui cho̱o̱, nga kjíbé chií jiín kui cho̱o̱, kó nga tsꞌénkajájón yá xí tikón nkꞌaa̱ nga̱ntjo̱a̱a̱ ndiꞌaa̱.

⁸ Kó kui ni̱xtji̱e̱e̱n chjiéngá yojo xi ꞌbítsjó skji̱ni̱e̱, ko̱jo pan xi jmí nisanjiín ko̱jo xka̱ xi sa.

⁹ Ta̱nga ka̱májín yojo xi xkjuién ko̱jo tsi yojo xi kachjándá skji̱ni̱e̱, chjiéngá kꞌuítsjó ngi̱jin ndiꞌií, kó ti̱ skji̱ni̱e̱ to̱ko̱, ko̱jo se, ko̱jo tsiꞌee̱ kui cho̱o̱ nga.

¹⁰ »Kó chjiéngá tsá skji̱ni̱e̱ nga ndyi̱yajá ńjñoo̱ ko̱jo nga kjiyaa̱ tji̱xíndié, kó ngatjayatsja yánísieé, xikó tsi je tsaá nga je ndyi̱fí.

¹¹ Ka̱májín kjo̱a̱ꞌátjó chií kui cho̱o̱ tsi̱ꞌe̱ nga nga kamángindyiojón skji̱ni̱e̱, ngatꞌa̱ kjiꞌá boá sꞌué paskuaa̱, kui xi niꞌán nga nganda tsa̱ꞌa̱n, cho̱ xi kꞌo̱ngii̱ chjiéngá ngatꞌítí.

¹² »Kui ni̱xtji̱e̱e̱n an kjo̱a̱ꞌa an ngi̱jii̱n ngayeje nangi Ejiptoo̱, kó sa̱ꞌinkꞌién an ngayeje ndí xíꞌín xi tjoón nga ngo nga ngo xtín xota̱ Ejiptoo̱, ko̱jo cho̱ tjié xi tjiín nga. Án boá xi Nee̱ xota̱ Israee̱l, kó án boá xi tsjachjíi̱ ne xi tjín nangi Ejipto̱.

¹³ Ta̱nga jún xi xota̱ Israee̱l, chjiénjín nga ko̱nda̱konjnú, kui jín xí ko̱nangijónjnú yaá nga̱ntjo̱a̱a̱ ndiꞌajnú, kuí boá xi chi̱bo̱a̱ ka̱mana. Kó nga skuie an kui jiín nga kjo̱a̱ꞌa an, jmí ni sa̱ꞌínjo̱jín an ndí xíꞌín xi tjónjnú, ta̱sá ta̱ kjo̱a̱ꞌa ndojó tsi an.

^14-20 »Kó ngotꞌe̱ xꞌi̱a̱nijnú, nga ngatsjéni̱xtjin ngayejejnú chjiéngá si̱ꞌánjnú kui sꞌueé nganda tsa̱ꞌa̱n, tsi̱ꞌe̱ nga si̱ꞌankjaꞌátsjienjnú ni̱xtjin nga tsꞌaxiéjnúꞌun nangi Ejipto̱. Yito ni̱xtjin kꞌo̱ndíyaá kui sꞌueé, kjiꞌa ku̱i̱ꞌítsꞌi̱yani nga ka̱mangixoón ni̱xtjin tienijoón saá, kó nga kju̱i̱e̱ kjiꞌá boá nga kamángixoón ni̱xtjin xi kan ngoo̱. Kui xomanaa̱ chjiéngá jó ndi̱yà nga ndikóntsꞌèn ka̱matikójnú, ngo ndi̱yà nga ni̱xtjin xi tjoón, sꞌe̱ ingo ndi̱yà nga ni̱xtjin xi ma yitoo̱. Ta̱ nínga tindyiónjnú, nga yito kui ni̱xtjii̱n pan xi jmí nisanjiín boá xi xi̱ni̱e̱jnú. Ndeskande ni̱xtjin xi tjoón kui sꞌueé, ngaskande ni̱xtjin xi fetꞌanii̱ nga nde chií nda̱ꞌyo̱ pan xi tjiín nisan kꞌuiéjínjnú ndiꞌajnú. Kui xi skji̱ni̱e̱ pan xi tjiín nisan nga yito kui ni̱xtjii̱n, tsi xota̱ xi xín nangi, ko̱jo tsi xota̱ Israee̱l, chjiéngá ku̱i̱yòtjíngií ngi̱jii̱n jún. Kó nga yito kui ni̱xtjii̱n nde ngojín xá si̱ꞌánjnú, ta̱ ngototo ni xi xi̱ni̱e̱jnú xi ka̱ma si̱ꞌandajnú. Kjo̱a̱kiti xi kꞌuijñá ngatsjéni̱xtjin boá kui nii̱».

Kjiꞌanga xota̱ Israee̱l iskjinie nichinie tsi̱ꞌe̱ sꞌué paskuaa̱

²¹ Kó Moisee̱ ítikó ngayeje xota̱ ngito̱ko̱o̱ xota̱ Israee̱l, kó bi̱ katsoó: «Nga ngo nga ngojnú tangínchja̱ꞌájinjnú ngo ndií cho̱tsa̱nga̱ xki̱ ngo xtín xota̱ ndiꞌa, kó ti̱ꞌankꞌiènjnú tsi̱ꞌe̱ sꞌué paskuaa̱.

²² Jiín kui cho̱o̱ ngo ndástsié tindyiájnú, sꞌe̱ chjábéjnú ngo chꞌo̱ xka̱ isopo̱, kó nangínjinjnú ngi̱jii̱n kui jiín, kó ti̱ꞌankꞌijnú nkꞌaa̱ nga̱ntjo̱a̱a̱ ndiꞌajnú ko̱jo nga ngo nga ngo yá nga̱ndee̱ nga̱ntjo̱a̱a̱, ngije kiniꞌánjnú kui nii̱, ngata̱ ngojín xi fotjoxie ngaskande nga kamángindyiojón.

²³ Kó bo̱a̱ tsꞌén, kjiꞌanga Néná kjo̱a̱ꞌa ngi̱jii̱n nangi Ejipto̱ nga sa̱ꞌínkꞌién ndí xíꞌín xi tjoón xota̱ Ejiptoo̱, nga sku̱i̱e̱ kui jiín nga yajájón yá nga̱ndee̱ nga̱ntjo̱a̱a̱, kjo̱a̱ꞌa ndojó. Kó Néná tsja̱ndièjín nga ngo jún xi ko̱yàjnú.

²⁴ »Ndeskande ngotꞌe̱ ku̱i̱ꞌítsꞌi̱yani nga jún xi xota̱ Israee̱l, kꞌuiéjnú ngo kjo̱a̱ꞌniú nga si̱ꞌankjatjosónjnú ngatsjéni̱xtjin kui kjo̱a̱kiti xi Néná jè katsjájnú.

²⁵ Kó kjiꞌanga ku̱i̱ndyionjnú ngi̱ndie xi katsójnú Néná nga tsja̱ajnú, ti̱ꞌánjnú kui nii̱ xki̱ nó xki̱ nó.

²⁶ Kó kjiꞌanga ko̱síyájnú ndíjnú, mí nii̱ bo̱a̱ xi ndyi̱niꞌánjnú,

²⁷ bi̱ tꞌínjnúu̱: “Kui nichiniee̱, kuí boá xi sꞌué paskuaa̱ xi niꞌán nganda tsi̱ꞌe̱ Néná. Kó niꞌánkjaꞌátsjien kjiꞌanga jaꞌajin nangi Ejipto̱ nga katsꞌénkꞌién ndí xíꞌín xi tjoón kui xotaa̱, ta̱nga jaꞌa ndojó ndiꞌaa̱ xota̱ Israee̱l, kó katsꞌénkꞌiénjínjne̱ ji̱n”». Ngije kamaá Moisee̱ nga tsíchji̱a̱jo ngayeje xota̱ Israee̱l, kui xotaa̱ asiéntikoó, kó katsꞌéndikón Néná,

²⁸ kósꞌe̱ katsꞌén ni xi Néná katsoó Moisee̱ ko̱jo Aaroo̱n nga sa̱ꞌín.

Kjo̱a̱botíjé xí ma tiee̱: Nga jesón ndí xíꞌín xi tjoón xota̱ Ejiptoo̱

²⁹ Kó nga kamá masien ni̱xtji̱e̱n, Néná katsꞌénkꞌién ngayeje ndí xíꞌín xi tjoón xota̱ Ejiptoo̱. Kó jesón ngayejee̱, ki̱a̱ ítsꞌi̱yanii̱ ndeskande ndí xíꞌín xi tjoón nda̱ ree̱, kui xi jaskan ko̱tíxomaa̱, ngaskande ndí xíꞌín xi tjoón xota̱ xi síndo ndo̱bo̱a̱ya̱à. Ti̱ jesón ngayeje ndí tjoón ngayeje cho̱ tji̱e̱é xota̱ Ejiptoo̱ nga.

³⁰ Kó kui ni̱xtji̱e̱e̱n jastjíe̱n nda̱ ree̱, ko̱jo mosoo̱, ko̱jo ngayeje xota̱ Ejiptoo̱, kó achichí on askjandáyà nga askjandá, ngatꞌa̱ ngayeje ndiꞌa nga kꞌien ndí xíꞌín xí tjoón xotaa̱.

³¹ Kó ti̱ kui ni̱xtji̱e̱n, nda̱ ree̱ tsíchji̱a̱a̱ Moisee̱ ko̱jo Aaroo̱n, kó bi̱ katsoó: «¡Tja̱tjójnú ngi̱jii̱n nangina! ¡Tangínjnú ngayeje jún ko̱jo xota̱ Israee̱l, kó ti̱ꞌandikónjnú Nejnú, xikótsꞌèn je kichjiáꞌájnúꞌun!

³² ¡Tangínjo̱jnú cho̱tsa̱nga̱jnú ko̱jo cho̱yojojnú, xikótsꞌèn je kichjiáꞌájnúꞌun, kó tja̱tjójnú kui ngi̱ndiee̱ ꞌne̱! ¡Kó chji̱a̱ꞌajnúu̱ Nejnú tsi̱ꞌe̱ nga ngiti̱ ko̱tíjéjínna!»

³³ Kó xota̱ Ejiptoo̱ tsá katsꞌeén xota̱ Israee̱l tsi̱ꞌe̱ nga tsá kjo̱tjo kui ngi̱ndiee̱, ngatꞌa̱ katsꞌénkjó nga ngayejee̱ nga kju̱i̱e̱són.

³⁴ Kó xota̱ Israee̱l iskjíbé nda̱ꞌyo̱ xi jmí nisanjiín, kó ńjñotjibé íxtié ko̱jo ni indyiá, sꞌe̱ ísón tjia.

³⁵ Kó xota̱ Israee̱l tsíꞌaá xota̱ Ejiptoo̱ ngayeje ni to̱ntiboa ko̱jo ni to̱nsinié ko̱jo ńjño xi tjiín, xikó má katsó Moisee̱ nga atíxomaa̱.

³⁶ Kó Néná katsꞌén nga xota̱ Ejiptoo̱ nda katsꞌénjo̱ xota̱ Israee̱l, kó ngayeje ni xi kichjiáꞌaá xota̱ Ejiptoo̱, katsjá. Bo̱a̱ tsꞌén nga xota̱ Israee̱l jaꞌáxiín xota̱ Ejiptoo̱ ngayeje ni xi kisꞌiee̱.

Bi̱ tsꞌén jatjoni xota̱ Israee̱l nangi Ejipto̱

³⁷ Xota̱ Israee̱l jatjoni nangi Ramsee̱, kó kijíyise ngaskande nangi Sukoo̱t. Mara̱ jun úchán mi̱ ma nga ta̱soboá jáxíꞌín, kó kje̱ꞌení ínchjiín ko̱jo jákjíndií.

³⁸ Nga jatjo, kijíjo̱ kjín cho̱tsa̱nga̱ ko̱jo cho̱yojo, kó ti̱ achichí má xota̱ xi xín nangi xi nijan kijíjo̱ kui xotaa̱ nga.

³⁹ Achichí tsá jatjoni nangi Ejipto̱ nga nde jmí ngi̱ndie kisꞌiejiín nga katsꞌénda nichinie, kuíni nga iskjíbé kui nda̱ꞌyo̱ xi jmí nisanjiín xi tsꞌaxiéni nangi Ejipto̱, kó kuí boá xi katsꞌéndani pan.

^40-41 Xota̱ na̱xi̱ńdaá Néná kjiꞌá má jatjoni nangi Ejipto̱, kjiꞌanga tsꞌasꞌien nijón úchán ko̱jo kantié nó nga kisꞌińdo kui ngi̱ndiee̱.

⁴² Nga ngo kui ni̱xtji̱e̱e̱n nga Néná askoo̱n kui xotaa̱ tsi̱ꞌe̱ nga jmí ni ka̱májiín ko̱jo nga nda tsꞌaxiéni nangi Ejipto̱, kuíni nga ta̱ngatꞌanii̱ kui ni xi katsꞌén Néná ngandaa̱ xota̱ Israee̱l, nga ngojín kui xotaa̱ xi foyojofé kjiꞌanga tsꞌén sꞌué paskuaa̱.

Ngase kjo̱a̱botíxoma kjo̱a̱a̱ sꞌué paskuaa̱

^43-49 Kó Néná bi̱ katsoó Moisee̱ ko̱jo Aaroo̱n: «Kjiꞌanga si̱ꞌánjnú sꞌué paskuaa̱, kuí bí kjo̱a̱botíxoma xi kongintjingíjnú: »Ngojín xota̱ xi xín nangi xi tsꞌénxájoo̱ ji, xi ka̱ma skji̱ni̱e̱ ndií cho̱tsa̱nga̱ xi si̱ꞌankꞌien nga ka̱ma kui sꞌueé. »Ta̱kuítsí xi ka̱ma skji̱ni̱e̱ kui moso̱ xi stiñá xi to̱o̱n xota̱ Israee̱l kitsꞌítsieni, ta̱nga ngototo tsi je kiniꞌaán sirkunsisioo̱n. »Kó ti̱ ka̱ma skji̱ni̱e̱ kui ndií cho̱tsa̱nga̱a̱ kui xota̱ xi xín nangi, xi ki̱a̱ síndojo̱jnú, ta̱nga ngototo tsi ngayeje jáxíꞌín xi chji̱a̱ni ndiꞌaa̱ xi je katsꞌeén sirkunsisioo̱n yojoo̱ nga. Bo̱a̱ tsí tsꞌén nga ko̱jo kui xi xota̱ na̱xi̱ńdá Israee̱l ka̱ma nga, kó ka̱ma sa̱ꞌín sꞌué paskuaa̱ nga. »Ngojín xota̱ xi jmíjiín sirkunsisioo̱n xi ka̱ma skji̱ni̱e̱ nichiniee̱ kui sꞌueé. »Ndií cho̱tsa̱nga̱a̱ chjiéngá ngi̱ya ndiꞌa xi̱ni̱e̱. Ndi̱tsen jàn nde chií yojoo̱ kui cho̱o̱ ka̱májín kjo̱tjo. Ti̱nde ka̱májín chjátꞌó ńdaa̱ ndií cho̱tsa̱nga̱a̱. »Kuí bí kui kjo̱a̱kitii̱ xi chjiéngá sa̱ꞌínkjatjosón xota̱ Israee̱l ko̱jo xota̱ xi xín nangi chji̱a̱ni xi síndo kui na̱xi̱ńdaá».

⁵⁰ Kó ngayeje xota̱ Israee̱l, bo̱a̱ katsꞌén xikó má katsoó Néná nga tsíchji̱a̱jo Moisee̱ ko̱jo Aaroo̱n,

⁵¹ kó kuí má ni̱xtjii̱n nga Néná tsꞌaxié xota̱ Israee̱l ki̱a̱ nangi Ejiptoo̱.