Eklesiastee̱ 9 - Xo̱jo̱n eén Néná

Ta̱ ngo ndiè tsí kongín

¹ Kó ngayeje kui nii̱ xi katsꞌenkjó ndá ndá an, kó kamábe an nga ngi̱ya tsja Néná boá nínga síndo xota̱ xi kixi̱i̱, ko̱jo xota̱ xi kjínkoón, ko̱jo ngayeje ni xi tsꞌén. Kó ti̱ kamábe an nga xota̱ nga̱sondiee̱ bejín mí nii̱ bo̱a̱ xi kjo̱a̱tjoó ko̱jo mí nii̱ bo̱a̱ xi kjo̱a̱niꞌánchꞌoó, ndatsi ngindyi̱ko̱n boá nínga síndo kui nii̱.

² Ti̱ bo̱a̱ ti̱ kjiꞌini ni xi maa̱ ngayeje xotaa̱ nga fetꞌani. Ti̱ kuínií tsi kixi̱ ko̱jo tsi kixi̱jín, tsi ndaxota̱ ko̱jo tsi ndajínxota̱, tsi tsjie ko̱jo tsi tsjiejín, tsi xi tsꞌenkꞌásꞌién kjo̱a̱tjó ko̱jo tsi tsꞌenkꞌásꞌiénjín, tsi xi tsꞌén ni xi ndaa̱ ko̱jo tsi xi tsꞌénjeé, tsi xi tsáyàtjoón ko̱jo tsi tsáyàtjónjiín Néná ni xi sa̱ꞌín.

³ Kuí bí kui ni xi ndajiín xi ma kui nga̱sondiee̱, nga ngayeje xotaa̱ ti̱kuíní ni xi maa̱, ko̱jo nga xota̱ nga̱sondiee̱ ngi̱jin ini̱ma̱a̱ tjikítsie maá ni xi ndajín, ko̱jo kjo̱a̱chi̱ni, ngayeje ni̱xtjin nga síndo kui nga̱sondiee̱, kósꞌe̱ nga fetꞌani ꞌme ꞌne̱ ngijee̱.

⁴ Ta̱nga tjínrií kjo̱a̱chiyá ngayeje xota̱ xi to̱kó síndo ngasee̱, ngatꞌa̱ chjí ngasenii̱ ngo ńñá xí tikón ngase, ta̱bo̱a̱jiín ngo xandi̱je̱ xi je kꞌien.

⁵ Ngatꞌa̱ xota̱ xi to̱kó síndo ngasee̱, jè be nga kjo̱chó ni̱xtjin nga ko̱yà, ta̱nga xota̱ xi je jesoón, jè ngiti̱ jmí ni bejín kuí, ti̱nde ngiti̱ jmí to̱n tsꞌénjín ngase, ngatꞌa̱ kjo̱a̱foaꞌátsjiee̱n jè kisꞌijñachíyá.

⁶ Nijan jesónjo̱ kjo̱a̱tjoó, ko̱jo kjo̱a̱niꞌánchꞌoó, ko̱jo kjo̱a̱ꞌontakoón, kó jmíni̱xtjin ka̱ma sa̱ꞌín ngase ni xi niꞌán kui nga̱sondiee̱.

⁷ ¡Ye tsobo̱a̱, ti̱ꞌinꞌnítakín ji! Chi̱ni kó tsjatsꞌèn ti̱ndyin ji, tꞌi̱ ji binòo̱, kó tsjangatꞌieé ini̱ma̱a̱, ngatꞌa̱ xá xí je kiniꞌín ji, achichí tsjá maá Néná.

⁸ Ngatsjéni̱xtjin nga tiboa ngatama ńjño xi xchi̱e̱je ji, kó tindyiée̱ ndásíje̱n taki.

⁹ Tsjatsꞌèn ti̱ndyinje̱ ji chjo̱on xí tjoó, ngayeje ni̱xtjin nga ku̱i̱ndyin ji kui nga̱sondiee̱, ngayeje kui ni̱xtjin xi ta̱kjo̱a̱ndanií, ngatꞌa̱ kuí boá kui nii̱ xi tsoboaá, ko̱jo xá xí kꞌuiníi̱ yojòo̱ kui nga̱sondiee̱.

¹⁰ Kó ngayeje ni xi ka̱ma si̱ꞌin ji, ndatsꞌèn ti̱ꞌin ji, ngatꞌa̱ ki̱a̱ nga̱tsjo̱ó, ki̱a̱ nínga kjóchí ji, ngiti̱ jmí xájín ki̱a̱a̱, ti̱nde ngiti̱ jmíjín ni xi ma niꞌán ngase, ti̱nde ngiti̱ jmíjín kjo̱a̱kjíntakón, ko̱jo kjo̱a̱kjínkón.

Chjí ngasenii̱ kjo̱a̱mañaa̱ ta̱bo̱a̱jiín ngaꞌniuú

¹¹ Ti̱ askotsijen ngiñá an, kó kamábe an nga kui nga̱sondiee̱ jmí tsi xota̱ xi ꞌniú monga ngasee̱ xi tsꞌén nga mongandse̱je̱n, ti̱nde jmí tsi xota̱ xi ꞌniú ngasee̱ xi tsꞌén ngo kjo̱a̱xcha̱án, ti̱ kamábe an nga xota̱ xi kjínkoón nde nichinie jmíjiín, ko̱jo nga jmí tsi xota̱ xi kjínkoón xi cho̱n ma, ko̱jo nga jmí tsi xota̱ xi tjiín kjo̱a̱kjíntakoón xi nda niꞌánjo̱. Ngayejee̱ nga tjiín ni̱xtjin xi nda ko̱jo ni̱xtjin xi ndajín,

¹² ngatꞌa̱ xota̱ nga̱sondiee̱ bejín ni̱xtjin nga kjo̱chó chi̱bo̱a̱a̱, bo̱a̱ má maá xikoó tji̱o̱o̱ nga fíyá ki̱a̱ nda̱ꞌya̱a̱, ko̱jo tsi xikoó ni̱siee̱ nga fíyá chja̱ya̱a̱, bo̱a̱ maá xota̱ nga̱sondiee̱, ta̱niján má ndibá nga ndajín maá.

¹³ Ti̱ kamábe an kꞌi̱e̱ kui nga̱sondiee̱ ngo kjo̱a̱kjínkón xi achichí je mána:

¹⁴ ngo ndí na̱xi̱ńdáꞌniú xi chichí xi kjínjín xota̱ kisꞌiee̱, kó ngo re xi achichí yandikón jachókjánjo̱, kó kui ree̱ íchjáꞌyá kui ndí na̱xi̱ńdáꞌniuú, kó índo nga ngo foaꞌatjiyajoo̱n kjín jájún tsi̱ꞌe̱ nga sa̱ꞌiín,

¹⁵ kó kui ngi̱ndiee̱ kisꞌijña ngo nda̱ xi ni̱ma̱ xi jmí to̱njiín, xi kjínkón kamá, xi kamaá katsꞌénkjién kjo̱a̱kjínkoón nga tsꞌaxiéꞌá kui ndí na̱xi̱ńdáꞌniuú katsaki, ta̱nga kjo̱a̱a̱ nga achichí ni̱ma̱, ¡nde ngojín xi jaꞌátsjiee̱n kui nda̱a̱!

¹⁶ Kósꞌe̱ bi̱ kixian an: nda ngase kjo̱a̱kjínkoón ta̱bo̱a̱jiín ngaꞌniuú, ndatsi nde jmíjín xi tsaꞌaxki̱ kjo̱a̱kjínkoón nda̱ xi ni̱ma̱a̱, ti̱nde ndatsi nde jmíjín xi ko̱siénnijoo̱n ni xi ka̱tso̱.

¹⁷ Chjí ngasenii̱ nga ko̱nda̱ꞌyaá én ndaa̱ nda̱ xi kjínkoón, ta̱bo̱a̱jiín nga kjandayà nda̱ ree̱ xota̱ xi kitikjo̱a̱a̱.

¹⁸ Nda ngase kjo̱a̱kjínkoón ta̱bo̱a̱jiín ni xi niꞌánkjién kjo̱a̱xcha̱án, ta̱nga ta̱ngatꞌanii̱ tsi ngo chií xi sa̱ꞌínjé, achichí ni xi nda si̱ꞌankjatsón.