Eklesiastee̱ 8 - Xo̱jo̱n eén Néná

¹ Jmíjín xí kjo̱chótji̱ngi xota̱ xi kjínkoón, ti̱nde jmíjín xi kjo̱chótji̱ngi xota̱ xi tsꞌénkjiín kon kjo̱a̱a̱ ngo kjo̱a̱. Kjo̱a̱kjínkoón boá xi tsja tsꞌénkꞌié kje̱n xotaa̱, ko̱jo kuí boá xi bosíkjo kje̱n tamájin.

Nga ndaꞌyáꞌeén nda̱ ree̱

² An bi̱ tꞌíxiaán nga chjiéngá ko̱nda̱ꞌyéꞌíi̱n kjo̱a̱botíxomaa̱ nda̱ ree̱, ngatꞌa̱ bo̱a̱ tsꞌén je kiꞌmíyetjée̱n Néná.

³ Ngata̱ tsájín bitaxi̱e̱ ji ngindyi̱ko̱n nda̱ ree̱, ti̱nde nga ki̱a̱jín chingajin ji ni xi ndyi̱tsꞌèn xota̱ xi ndajiín. Ngatꞌa̱ nda̱ ree̱ ka̱márií sa̱ꞌín ta̱ ni xi mejénrií kui.

⁴ Kuí boá xi botixómá, kó chjírií eén. Kó ꞌyá xí ku̱i̱ꞌaa̱ xki̱ kjo̱a̱a̱ ni xi tsꞌén.

⁵ Xota̱ xi sa̱ꞌínkjatjosón kjo̱a̱botíxomaa̱, jmí ni xi ndajín ka̱májiín. Xota̱ xi kjínkoón jè be kjiꞌání ko̱jo kótsꞌèn nga sa̱ꞌínkjatjosón ngo kjo̱a̱.

⁶ Nga ja̱koxi̱, ngayeje nii̱ xi ni̱xtjin tjiín, kó ngo chi̱bo̱a̱ tjiín nga ma ni xi ma, kó xota̱ nga̱sondiee̱ achichí kjo̱a̱xti tsangijin yojoo̱,

⁷ ngatꞌa̱ nde bejín mí ni xi ka̱ma jaskan, kó ngije ka̱ma kui nii̱, ꞌyá xí ka̱tso̱yaa̱ mí nii̱ bo̱a̱.

⁸ Jmíjín ngo xota̱ nga̱sondie xi ka̱maa̱ ko̱tíxomaa̱ a̱si̱énni̱xtjii̱n, ko̱jo tsi ku̱i̱ꞌíjñaꞌniú, ti̱nde jmíjín xi ka̱maa̱ ko̱tíxomaa̱ ni̱xtjin nga kji̱ndi̱bá kjo̱a̱bo̱yaa̱ nga. Jmíjín xi kjo̱tjongii̱ yojoo̱ kjo̱a̱a̱ kui kjo̱a̱xcha̱án. Ti̱nde ni xi ꞌniú ndajiín ka̱májiín kꞌo̱xiéꞌá xota̱ xi xi tsꞌén ni xi ꞌniú ndajiín.

Achichí niꞌín kjiꞌi nga ka̱makjínná kjo̱a̱a̱ kjo̱a̱mindyioo̱n

⁹ Ngayeje kui nii̱ xi je kamábe an kjiꞌanga tsangasendi̱yàa̱ ngayeje ni xi niꞌán kui nga̱sondiee̱, ko̱jo xikó kjiꞌi ngaꞌniú xí tjiín xota̱ nga̱sondiee̱ nga ni xi ndajín tsꞌénjo̱ xkjín.

¹⁰ Ti̱ je kamábe an nga achichí ndikóntsꞌèn fonijín xota̱ xi ꞌniú ndajiín, tji̱e̱nga kui xota̱ xi ngotjón ngotjón kijí ki̱a̱ ndiꞌandikoón, kiniꞌánchíyá ti̱ ki̱a̱a̱ na̱xi̱ńdáꞌniú nínga achichí kixi̱ kamá. Kó kui nii̱ ti̱ ta̱kjo̱a̱ndaní bo̱a̱ nga.

¹¹ Kó kjiꞌanga tsájín niꞌánjeé xota̱ xi ndajín katsꞌeén, xota̱ xi ngasee̱ tsꞌénkjó nga ka̱ma sa̱ꞌín ni xi ndajiín kui nga.

¹² Ndatsi xota̱jeé úchán ndi̱yà sa̱ꞌín ni xi ndajín, kó ndatsi tsie ka̱maa̱ nga kꞌuíndo nga̱sondie, ta̱nga jè be an nga nda ko̱e̱je̱e̱ xota̱ xi bendikón ko̱jo xi tsꞌéndíkón Néná,

¹³ kó ti̱ jè be an nga xota̱ xi ꞌniú ndajiín, ndajín ko̱e̱je̱e̱, ko̱jo tsiejín ka̱maa̱ nga kꞌuíndo nga̱sondie, xikónií tsi ngo tji̱nkꞌi̱én ka̱ma, ngatꞌa̱ bendikónjín ko̱jo xi tsꞌéndíkónjín Néná.

¹⁴ Tjín ingo ni xi ta̱kjo̱a̱ndaní bo̱a̱ xi niꞌán kui nga̱sondiee̱ xikoó nga: Xota̱ xi kixi̱i̱, bo̱a̱ niꞌánjo̱ xikoó xota̱ xi ꞌniú ndajiín, kó ti̱ tjín xota̱ xi ꞌniú ndajiín, xi bo̱a̱ niꞌánjo̱ xikoó xota̱ xi kixi̱i̱. ¡Kó kui nii̱ ti̱ ta̱kjo̱a̱ndaní bo̱a̱ xian an nga!

¹⁵ Kuíni nga an ta̱sá tsjá kamána kjo̱a̱a̱ kjo̱a̱tsjaa̱, ngatꞌa̱ ni xi nda ngase xi ka̱ma sa̱ꞌín xota̱ nga̱sondiee̱, kuí boá nga skji̱ni̱e̱, nga kꞌuí, ko̱jo nga tsja tsꞌén kꞌuijñá, ngatꞌa̱ ta̱kuítsí kui nii̱ xi tsijeén kjo̱a̱a̱ xá xí katsꞌén ni̱xtjin xi katsjaá Néná nga kisꞌijña kui nga̱sondiee̱.

¹⁶ Kó án ki, ti̱ ta̱sá kamámejéna nga tsangasendi̱yàa̱ nga skuie ngase an kjo̱a̱a̱ kjo̱a̱kjínkoón, tsi̱ꞌe̱ nga ka̱makjínna ngayeje ni xi niꞌán kui nga̱sondiee̱, ngatꞌa̱ tjín xota̱ xi nde nga ni̱xtjin ko̱jo nga ni̱xtji̱e̱n foféjín,

¹⁷ bo̱a̱ tsꞌén nga je kamábe an ngayeje ni xi je katsꞌénda Néná, kó ti̱ je kamábe an nga xota̱ nga̱sondiee̱ jmíni̱xtjin nga ka̱makjiín ni xi ma kui nga̱sondiee̱. Ndatsi ꞌniú ka̱mamejeén nga ka̱makjiín, ka̱makjínjiín, kó ndatsi xota̱ xi kjínkoón xi bo̱a̱ ka̱tso̱ nga mejeén nga ka̱makjiín, jmí tsi kjo̱a̱a̱ kui nii̱, sꞌe̱ ka̱makjiín ngijee̱.