Eklesiastee̱ 7 - Xo̱jo̱n eén Néná

Mí ni xi chjí ngasenii̱

¹ Chjí ngasenii̱ kjo̱a̱yandikoón, ta̱bo̱a̱jiín ndásíje̱n xi nda ngasee̱. Chjí ngasenii̱ ni̱xtjin nga mayá, ta̱bo̱a̱jiín ni̱xtjin nga tsen.

² Chjí ngasenii̱ nga ngo ndiꞌa nínga tjín xí kꞌien mongín, ta̱bo̱a̱jiín tsi ngo sꞌué mongín, ngatꞌa̱ kjo̱a̱bo̱yaa̱ boá nínga fetꞌani ni̱xtjii̱n xotaa̱, kó xota̱ xi síndo ngasee̱ chjiéngá kjo̱a̱ꞌátsjiee̱n kui nii̱.

³ Chjí ngasenii̱ kjo̱a̱ndasee̱n, ta̱bo̱a̱jiín kjo̱a̱chaꞌaá, ngatꞌa̱ ndatsi ndasen tikón ngo kje̱n, kuí boá xi tsꞌendáyà ini̱ma̱a̱.

⁴ Ngi̱jin ini̱ma̱a̱ xota̱ xi kjínkoón ꞌbíjin kjo̱a̱a̱ kjo̱a̱bo̱yaa̱, ta̱nga xota̱ xi kitikjo̱a̱a̱, ta̱soboá kjo̱a̱a̱ kjo̱a̱tsjaa̱ boá xi ꞌbíjin ini̱ma̱a̱ kui.

⁵ Chjí ngasenii̱ nga ngo xota̱ xi kjínkón sa̱ꞌínxchánjo̱o̱, ta̱bo̱a̱jiín nga ngo xota̱ xi kitikjo̱a̱ tsja ka̱tso̱o̱.

⁶ Xikótsꞌèn mojnó ngo xota̱ xi kitikjo̱a̱, bo̱a̱ má tsꞌén ndaꞌyaá xikótsꞌèn fonie nga tí yándáꞌyaá ki̱a̱ ngindiee̱ ngo ti̱jì. Kó kui nii̱ ti̱ ta̱kjo̱a̱ndaní bo̱a̱ nga.

⁷ Xota̱ xi kjínkoón xikónií tsi ngo xota̱ xi chi̱ni ka̱ma kjiꞌanga tjín xí tsja̱á ngo to̱n, tsi̱ꞌe̱ nga tjín xí kjo̱a̱ndaa̱ ko̱e̱je̱ni, ngatꞌa̱ kui to̱o̱n, kuí boá xi sa̱ꞌínkjatsón ini̱ma̱a̱.

⁸ Chjí ngasenii̱ nga ndatsꞌèn si̱ꞌankjietꞌani ngo ni, ta̱bo̱a̱jiín nga ndatsꞌèn ku̱i̱ꞌítsꞌi̱yanii̱. Chjí ngasenii̱ ngo xota̱ xi koyakjo̱a̱, ta̱bo̱a̱jiín ngo xota̱ xi nkꞌakon.

⁹ Ngata̱ tsájín niꞌínxtíi̱ yojòo̱, ngatꞌa̱ kjo̱a̱xtindaa̱, kuí boá xi bokó nga xota̱ xi kitikjo̱a̱ boá ji.

¹⁰ Ngata̱ bi̱jín sé ji: míkjo̱a̱a̱ nga nda ngase kamá ni̱xtjin xi je jaꞌaa̱, ta̱bo̱a̱jiín kui ni̱xtjin xi̱ꞌbi̱. Ngatꞌa̱ xota̱ xi kjínkoón, bo̱a̱jín tsó ni xi bosíyá.

¹¹ Achichí nda kjo̱a̱kjíntakoón xikó maá ngo ni xi ikꞌíjñáná, kó nda sa̱ꞌiín xota̱ xi síndo kui nga̱sondiee̱.

¹² Ngatꞌa̱ kjo̱a̱kjíntakoón ko̱jo to̱o̱n skoónri xikoó ngo ni xi ꞌbíchjaá ni xi ndajín, ta̱nga kjo̱a̱kjínkoón foaꞌatjónrií kui nii̱, kó kuí boá xi ka̱ma tsja̱á nga kjín nó ka̱maa̱ xota̱ nga̱sondiee̱.

¹³ Tsitsíjìi̱n ni xi je katsꞌénda Néná, ngatꞌa̱, ꞌyá xí ka̱maa̱ sa̱ꞌínna̱xo̱ ni xi kui katsꞌénti̱ki̱e̱n.

¹⁴ Kjiꞌanga kji̱ndi̱bá ni̱xtjin xi ndaa̱, tsjangatamaa̱, kó kjiꞌanga kji̱ndi̱bá ni̱xtjin xi ndajiín, ti̱ꞌinkjé jí nga Néná boá xi katsꞌén ngayeje nii̱, kó bo̱a̱ tsꞌén nga xota̱ nga̱sondiee̱ jmíni̱xtjin sku̱i̱e̱ ni xi jaskan ka̱ma.

¹⁵ Ngayeje kui ni bi̱ xi je kamábe an kui ni̱xtjin xi ta̱kjo̱a̱ndaní xi je kisꞌijña an: xota̱ xi kixi̱ xi ta̱ngatꞌanii̱ kjo̱a̱kixi̱i̱ nga jesón, ko̱jo xota̱ xi ndajín xi achichí tsie maá, ndatsi ndajín ndyi̱tsꞌèn.

¹⁶ Ngata̱ tsꞌatiojín kixi̱ niꞌín ji yojòo̱, ti̱nde nga tsꞌatiojín kjínkón má ji, ngatꞌa̱ míkjo̱a̱a̱ nga si̱ꞌincheje ji yojòo̱.

¹⁷ Ngata̱ tsꞌatiojín niꞌín ji ni xi ndajín, ti̱nde ngata̱ tsꞌatiojín chi̱ni niꞌín yojòo̱. Míkjo̱a̱a̱ nga ngindie ni̱xtjin ko̱yè kon ji.

¹⁸ Ndakjíꞌí nga chjábé ji kui nii̱, kó ti̱ ꞌniú tjaꞌní jí ni xi ingoo̱ nga, ngatꞌa̱ kui xota̱ xi bendikón Néná, ngayeje nii̱ xi nda fotjoo̱.

¹⁹ Tsie ngase ngaꞌniú tsjaá kjo̱a̱kjínkoón xota̱ xi kjínkoón, ta̱bo̱a̱jiín tie xota̱ xi tjiín ngaꞌniú xi ndyi̱botixómaá ngo na̱xi̱ńdáꞌniú.

²⁰ Ta̱nga nga ja̱koxi̱, jmíjín kui nga̱sondiee̱ ngo xota̱ xi kixi̱, xi sa̱ꞌín ni xi ndaa̱, ko̱jo xi jmíni̱xtjin sa̱ꞌínjé.

²¹ Ngata̱ ki̱a̱jín niꞌínsée̱n ngayeje ni xi ndokjo̱a̱a̱, tsi̱ꞌe̱ ko̱nda̱ꞌyéjín ji kjiꞌanga ku̱i̱chji̱a̱taꞌii̱n mosòo̱,

²² ngatꞌa̱ jè yé ji nga achichí kjín ndi̱yà kandokjo̱e̱taꞌin ji kje̱ꞌe xota̱.

Míkjo̱a̱a̱ nga síndo nii̱

²³ Kjo̱a̱kjínkoón katsꞌenkjién án nga askotꞌayákón ngayeje kui nii̱, kósꞌe̱ bi̱ kixian an: xota̱ xi kjínkón ka̱ma an, ta̱nga tsanga boaꞌána kjo̱a̱kjínkoón.

²⁴ Ngayeje ni xi tjiín achichí kjin tikónna, kó achichí niꞌín kjiꞌi nga skuie an. Kó, ꞌyá xí ka̱makjiín kui nii̱.

²⁵ Kósꞌe̱ tsangasendi̱yà án ngayeje ni xi yaꞌanii̱ kjo̱a̱a̱ kjo̱a̱kjíntakoón, tsi̱ꞌe̱ nga sa̱kóna ngo kjo̱a̱, kjo̱a̱a̱ nga ngo nga ngo nii̱. Kó kamákjína nga ta̱ kjo̱a̱chi̱ni boá nga ndajín má, ko̱jo nga ta̱ kjo̱a̱tsobé boá nga kitikjo̱a̱ má.

²⁶ Kó kasakona ngo ni xi tsꞌénꞌon ngasena ta̱bo̱a̱jiín kjo̱a̱bo̱yaa̱, kó kuí boá kui na̱ xi ndajiín, kui xi chja̱ya̱ ꞌbijñaá ini̱ma̱ná, kó nga foníkjáná ngiti̱ tsjuienjínná. Tsi ko̱nda̱ꞌyáꞌée̱n Néná jmí ni sa̱ꞌínjínná kui naa̱, ta̱nga nda̱ xi tsꞌénjeé kꞌo̱kayà chja̱ya̱a̱.

²⁷ Ngije tsangasendi̱yà cha̱n cha̱a̱n ngayeje nii̱, an, Nda̱ xi Tsáyà Eén, kuí nii̱ xi xian an:

²⁸ ¡Nde kji̱e̱ sakójínna ni xi tsꞌénmongase an! Ngi̱jii̱n ngo mi̱ jáxíꞌín kasakona ngo nda̱ xi ndaxota̱, ta̱nga ngi̱jii̱n ngayeje ínchjiín, nde ngo na̱ xi ndaxota̱ kasakojínna.

²⁹ Ta̱kuitoto kui nii̱ xi kasakona: nga Néná kixi̱tsꞌèn katsꞌénda xota̱ nga̱sondiee̱, ta̱nga xota̱ nga̱sondiee̱ boá xi tsꞌenníꞌiín kjo̱a̱mindyioo̱n.