Eklesiastee̱ 6 - Xo̱jo̱n eén Néná

Jmí ni chjíjiín kjo̱a̱mindyioo̱n

¹ Ngo ni xi ndajín tsꞌeén ngayeje xotaa̱, je kamábe an kui nga̱sondiee̱ nga.

² Tjín xota̱ xi Néná achichí kjo̱a̱cho̱n, ko̱jo ni, ko̱jo kjo̱a̱yandikón tsjaá. Tjiín ngayeje ni xi chjieén, ko̱jo ni xi mejeén nga kꞌuieé, ta̱nga Néná tsjandièjiín tsi̱ꞌe̱ nga tsjatsꞌèn sa̱ꞌínkjién ngayeje kui nii̱. Kó ta̱sá kje̱ꞌe xota̱ xi nde yajín ꞌyá kuií bo̱a̱ xi tsjatsꞌèn tsꞌénkjién. Kui nii̱ ti̱ ta̱kjo̱a̱ndaní bo̱a̱ nga, kó ni xi achichí tsꞌénꞌónná boá.

³ Tjínrá xota̱ xi ka̱ma kꞌuieé úchán ndí, kó ka̱mara̱ kjín nó kꞌuijñá nga̱sondie, ta̱nga ndatsi kjín nó kꞌuijñá, tsi katsjájiín kjo̱a̱tsja ini̱ma̱a̱ kjo̱a̱a̱ ni xi kisꞌiee̱, kó tsi nde kamájín akjanijín, bi̱ xian an, nga ta̱sara̱ nda ngase ngo ndí xí katsenxtió, ta̱bo̱a̱jiín kui xota̱ xi̱ꞌba̱.

⁴ Ngatꞌa̱ kui ndí xí katsenxtioó ta̱kjo̱a̱ndaní bo̱a̱ nga jeꞌe, kó nínga jñó jàn boá nínga fochó, nínga si̱ꞌma jaꞌeén,

⁵ kó kji̱e̱ bejín, ti̱nde jmíni̱xtjin sku̱i̱e̱ ndiꞌií tsꞌueé, ta̱nga tjín ngasee̱ kjo̱a̱xió kuí, ta̱bo̱a̱jiín kui xota̱ xi̱ꞌba̱.

⁶ Ka̱maraa̱ jó mi̱ nó kꞌuijñá nga̱sondiee̱ kui xotaa̱, kó tsi ndajín tsꞌén katsꞌénkjién ngayeje ni nda xi kisꞌiee̱, nga fetꞌani kjo̱a̱, a mí tsí ngajoó nga ta̱ ngo tsí ngi̱ndie fochó.

⁷ Ngayeje xá xí tsꞌén xota̱ nga̱sondiee̱, ta̱ tsi̱ꞌe̱ nga skji̱ni̱e̱ ko̱jo nga kꞌuí tsí, kó ngaskande bo̱a̱ tsꞌén jmíni̱xtjin tsiee̱.

⁸ Ngatꞌa̱, mí ni xi tjín ngasee̱ xota̱ xi kjínkoón, ko̱jo xota̱ xi kitikjo̱a̱a̱. Kó mí ni xi tjín ngasee̱ xota̱ xi ni̱ma̱a̱, kui xi kamaá nga jaꞌatio kui nga̱sondiee̱.

⁹ Chjí ngasenii̱ ni xi ndyi̱be ndyikón, ta̱bo̱a̱jiín ni xi ta̱ niꞌánkjínñáa̱ takón. Kó kui nii̱, ti̱ ta̱kjo̱a̱ndaní bo̱a̱ nga, kó ta̱ tsꞌénboa tsíná.

¹⁰ Kui xi je tikón ngotꞌee̱, jé tsienii̱ nga katseꞌeé ngo jaꞌén, kó jè ya nga kuí boá xi xota̱ nga̱sondiee̱. Kuíni nga ka̱májín nga skjánjo̱ ngo xi tjín ngasee̱ ngaꞌniú ta̱bo̱a̱jiín kuí.

¹¹ Kó ti̱ kjiꞌanga tsie ngase ndokjo̱a̱, ta̱kjo̱a̱ndaní bo̱a̱ nga, kósꞌe̱, mí ni bo̱a̱ xi tsꞌén xota̱ nga̱sondiee̱.

¹² Nga ja̱koxi̱, jmíjín xi be mí ni xi nda ngase ka̱maa̱ xota̱ nga̱sondiee̱ kjo̱a̱a̱ ngayeje ni̱xtjin xi je tjixki̱ nga kꞌuijñá kui nga̱sondiee̱ xi ta̱kjo̱a̱ndanií. Ngatꞌa̱ foaꞌa ni̱xtjii̱n xikó maá tsi ngo tji̱nkꞌi̱én. Kósꞌe̱, ꞌyá xi ka̱tso̱yaa̱ ni xi ka̱ma kui nga̱sondiee̱ ngije kꞌien kui.