Eklesiastee̱ 5 - Xo̱jo̱n eén Néná

Ti̱ꞌinkjatjosén ji ni xi kiꞌmíyetjén

¹ Kjiꞌanga kꞌuín jí na̱ngo̱xi̱i̱ Néná, chíi̱n nga ta̱xkiya si̱ꞌínjín ji ngo ni, ta̱sá tjón tꞌendàꞌyé ji, ngindiee̱ nga ki̱a̱ kꞌuínje̱ ji xota̱ xi kitikjo̱a̱ xi tsꞌenkꞌásꞌién kjo̱a̱tjoó, kui xi nde bejín nga ndajín ndyi̱tsꞌe̱én.

² Nga ta̱xkiya ndokjo̱e̱jín ji, ko̱jo nga ta̱xkiya niꞌínkjéjín ji ngo én xí ko̱ndókjo̱e̱ ji ngindyi̱ko̱n Néná, ngatꞌa̱ Néná nkꞌajmii̱ boá nínga tikón, kó jí, kꞌi̱e̱ tindyin ji kꞌi̱e̱ tꞌanangii̱, kuíni nga chiboa tsí én xí ti̱ꞌinkjìn jí.

³ Ngatjaꞌátsjiee̱n nga xota̱ xi ꞌniú nda̱ maa̱ ngo ni, chi̱ni chꞌo tsó boeꞌeé, kó xota̱ xi achichí chji̱a̱a̱, ni chi̱ni boá xi chji̱a̱.

⁴ Tsi ngo ni ko̱ndókjo̱e̱ ji xi si̱ꞌinkjatjosée̱n Néná, tsá ti̱ꞌinkjatjosén ji, ngatꞌa̱ Néná chꞌórií xota̱ xi kitikjo̱a̱a̱. Ti̱ꞌinkjatjosén ji ni xi kiꞌmíyetjén ji nga si̱ꞌin.

⁵ Ndakjiꞌi ngase nga kꞌuíyetjénjín ji ngo ni xi si̱ꞌin ji, ta̱bo̱a̱jiín tsi kꞌuíyetjén ji, sꞌe̱ jaskan si̱ꞌínkjatjosénjín ji.

⁶ Ngata̱ boeꞌéndièjín ji nga ndso̱ꞌbe ko̱ngijeé, ti̱nde nga bo̱a̱jín sé ji ngindyi̱ko̱n ndítsjiee̱ nga ta̱xkiya kandokjo̱e̱ ji. Jmí kjo̱a̱jín nga Néná sa̱ꞌínxchán kjo̱a̱a̱ ni xi kase ji, kósꞌe̱ sa̱ꞌínkjatsón ngayeje xá xí jè kiniꞌín ji.

⁷ Kui nga̱sondiee̱ tjikítsie maá ni xi niꞌánkjiín takón, ko̱jo én, ko̱jo ni xi ta̱kjo̱a̱ndaní bo̱a̱, ta̱nga ji chjiéngá ko̱ké ji nga yendikín jí Néná.

Jmí ni chjíjiín kjo̱a̱cho̱o̱n

⁸ Ngata̱ fíndikónjiín nga xchi̱e̱ ji na̱xi̱ńdá nínga tjíꞌbiniéꞌniuú xá xota̱ ni̱ma̱a̱, ko̱jo nínga tjíbosíkjoyá kjo̱a̱kitii̱ tsi̱ꞌe̱ nga jmí tsi kixi̱ tjíniꞌánseén. Kuí nii̱ xi ma kjiꞌanga ngo nda̱ xi nkꞌa xaá, ingo xi nkꞌa ngase xaá boꞌmá ni xi tsꞌén, kósꞌe̱ ingo xi ꞌniú nkꞌa ngase xaá boꞌmá ni xi tsꞌén ngajoó.

⁹ Kó ingo ni ngase, ni xi tsjá tꞌanangii̱ ngayeje xota̱ na̱xi̱ńdaá xi nda maá, kó ngaskande ti̱ kuii̱ nda̱ ree̱ koyakjo̱a̱a̱ tꞌanangii̱ nga.

¹⁰ Xota̱ xi tjoó to̱o̱n, tsꞌéntsiejiín to̱o̱n, kó xi tjoó kjo̱a̱cho̱o̱n, jmíni̱xtjin nga tsie kjo̱a̱cho̱n sakoó. Kó kui nii̱ ti̱ ta̱kjo̱a̱ndaní bo̱a̱ nga,

¹¹ ngatꞌa̱ kjiꞌanga tsie ngase ni ꞌbéná, ti̱ makjín ngase xota̱ xi mejeén sa̱ꞌínkjié nga. Ta̱kuitoto ni xi tsja maa̱ xota̱ cho̱o̱n, nga ndyi̱ko̱n má xi beni nga tsie to̱n tjiín,

¹² kó ngaskande ngiti̱ foféjín ngatꞌa̱ achichí to̱n je tjiín. Ta̱nga xota̱ xi tsꞌénxaá, ka̱márií tsi tsie ko̱jo tsi chiboa nichinie skji̱ni̱e̱, ta̱nga ata̱ tsjatsꞌèn fofé.

¹³ Jè kamábe an nga kui nga̱sondiee̱ nga ndajínkjiꞌi nga tsie to̱n chja̱ꞌátjó, ngatꞌa̱ kuí boá kui nii̱ xi ndajín tsꞌeén xota̱ xi bo̱a̱ tsꞌeén.

¹⁴ Kó nga ngayeje kui to̱o̱n xi ka̱ma kju̱i̱e̱ tsi ndajín tsꞌén si̱ꞌanxájo̱, kósꞌe̱ kui xi cho̱n mára kamaá, nde ngiti̱ jmí ni kꞌuiéjiín xi ku̱i̱ꞌíjñaá ndií ngijee̱,

¹⁵ kó nga fetꞌani xikótsꞌèn jmí ni yaꞌajín ngatꞌa̱ kjiꞌixtí nga katsen, bo̱a̱ tsꞌén ko̱e̱je̱ nginí ¡kó nde ngo ni xi achichí kjo̱a̱ni̱ma̱ kisꞌingii̱ nga katsꞌénxá ko̱e̱je̱jojín!

¹⁶ Achichí nga ndajínkjiꞌi kui nii̱: Nga xikótsꞌèn jeꞌe kui nga̱sondiee̱, ti̱ bo̱a̱ ti̱ tsꞌén ko̱e̱je̱ nginí. Kósꞌe̱ mí chjínií nga bo̱a̱ nda katsꞌénxá kjo̱a̱nda.

¹⁷ Kó ngayeje ni̱xtjin nga kꞌuijñá, kꞌuijñá xikoó tsi nínga jñó tikón, kó ndasen ka̱maa̱, kꞌuieé xi so xi ndakjan, kꞌuieé chiꞌin, ko̱jo kjo̱a̱xti.

¹⁸ Ta̱nga, jè kamábe an ngo ni xi nda: Nga xi̱ni̱e̱ ko̱jo nga sꞌi̱o̱, ko̱jo nga tsja ka̱máná kjo̱a̱a̱ xá xí niꞌán kꞌi̱e̱ kui nga̱sondie xi katsjáná Néná. Ngatꞌa̱ kuí boá kui nii̱ xi íjñáná Néná.

¹⁹ Ti̱ bo̱a̱ ti̱ tsꞌén, ngayeje xota̱ xi Néná katsjaá kjo̱a̱cho̱n, ko̱jo nga tsie ni tjiín, ti̱ katsjaá nga ki̱a̱ skji̱ni̱e̱ ko̱jo nga ki̱a̱ kꞌuiní, nga skjíbé ni xi tsoboaá, kó tsjangatamaa̱ kjo̱a̱a̱ xaá, ngatꞌa̱ kui nii̱, ni xi ta̱ katsjáná Néná boá.

²⁰ Kó nga Néná ꞌbikítsie maá kjo̱a̱tsja ini̱ma̱ná, chjiénjín nga nda̱ ka̱máná kjo̱a̱a̱ ni̱xtjin xi tikónná nga ku̱i̱ndyión kuí nga̱sondiee̱.