Eklesiastee̱ 3 - Xo̱jo̱n eén Néná

Ngayeje nii̱ xi ni̱xtjin tjiín

¹ Ngayeje nii̱ xi ni̱xtjin tjiín, kó chi̱bo̱a̱ tjiín nga ma ni xi ma nga̱sondiee̱.

² Ni̱xtjin nga ka̱ma stse̱n, ko̱jo ni̱xtjin nga ka̱ma ko̱yà, ni̱xtjin nga ka̱ma kꞌuítji̱e̱, ko̱jo ni̱xtjin nga ka̱ma chja̱ꞌátikó ni xi ikꞌítji̱e̱.

³ Ni̱xtjin nga ka̱ma si̱ꞌanꞌon, ko̱jo ni̱xtjin nga ka̱ma si̱ꞌandayà, ni̱xtjin nga ka̱ma si̱ꞌankixóndó, ko̱jo ni̱xtjin nga ka̱ma chjanínkꞌá.

⁴ Ni̱xtjin nga ka̱ma xchaꞌá, ko̱jo ni̱xtjin nga ka̱ma ko̱jno̱, ni̱xtjin nga ka̱ma ku̱i̱tjá xa̱ꞌya̱, ko̱jo ni̱xtjin nga ka̱ma xcha̱.

⁵ Ni̱xtjin nga ka̱ma ko̱ti̱tsojó ndi̱jo̱, ko̱jo ni̱xtjin nga ka̱ma chja̱ꞌátikó, ni̱xtjin nga ka̱ma ko̱jna̱níkjá xingi̱, ko̱jo ni̱xtjin nga ka̱ma si̱ꞌankixotꞌá.

⁶ Ni̱xtjin nga ka̱ma ku̱i̱ndyi̱sé, ko̱jo ni̱xtjin nga ka̱ma si̱ꞌanchajà, ni̱xtjin nga ka̱ma chja̱ꞌátjó, ko̱jo ni̱xtjin nga ka̱ma ku̱i̱chíjmi.

⁷ Ni̱xtjin nga ka̱ma chjándiyà, ko̱jo ni̱xtjin nga ka̱ma chja̱yá, ni̱xtjin nga ka̱ma xió ku̱i̱ndyión, ko̱jo ni̱xtjin nga ka̱ma ko̱ndókjo̱a̱.

⁸ Ni̱xtjin nga ka̱ma si̱ꞌantjó, ko̱jo ni̱xtjin nga ka̱ma si̱ꞌanchꞌo, ni̱xtjin nga ka̱ma kꞌuiéná kjo̱a̱xchán, ko̱jo ni̱xtjin nga ka̱ma kꞌuiéná kjo̱a̱xió.

Ni xi ta̱ katsjáná Néná

⁹ Mí ta̱ ni nda xi ꞌboxieé xaá xota̱ xi ꞌniú tsꞌénxaá.

¹⁰ Jè kamábe an xá ꞌniú xi Néná ꞌbínieé xota̱ nga̱sondiee̱, tsi̱ꞌe̱ nga sa̱ꞌínkjatjosón.

¹¹ Ni̱xtjin nga katsꞌénda Néná ngayeje nii̱ achichí tsjákón katsꞌén, kó íjin ngi̱jii̱n ini̱ma̱a̱ xotaa̱ tsi̱ꞌe̱ nga ka̱makjiín kjo̱a̱a̱ kjo̱a̱mindyion ngatsjéni̱xtjii̱n, ta̱nga xotaa̱ niꞌin makjiín ni xi je katsꞌén Néná ndeskande koó nga ítjatsꞌennii̱, ngaskande nga kju̱e̱tꞌanii̱.

¹² Jè be an nga jmíjín ingo ni xi nda ngase tsi̱ꞌe̱ xota̱ nga̱sondiee̱, xikoó nga tsja kꞌuieé ko̱jo nga ndatsꞌèn kꞌuijñá,

¹³ ko̱jo nga kjo̱a̱ndaa̱ Néná boá nga ngayeje xotaa̱ skji̱ni̱e̱ ko̱jo kꞌuí, ko̱jo nga ndatsꞌèn sa̱ꞌín ngayeje xá xí tsꞌén.

¹⁴ Jè kamákjínna nga ngayeje ni xi katsꞌén Néná ngatsjéni̱xtjin nga sꞌi̱jña, jmíjín ni xi sꞌi̱soón, ti̱nde jmíjín ni xi chja̱ꞌáxiín, kó kui nii̱ xi tsꞌén Néná, tsi̱ꞌe̱ nga xota̱ nga̱sondiee̱ sku̱i̱e̱ndikón.

¹⁵ Ni xi tjín ngotꞌe̱, jè kisꞌie ngasꞌe̱, kó ni xi jaskan kꞌuié, ti̱ jè tjín ngotꞌe̱, kó Néná boá xi tsꞌéndàyà nginí ni xi je kamá ngasꞌe̱.

Ngayeje nii̱ xi chojo má nginí

¹⁶ Kó ti̱ kamábe ngase an ni kui nga̱sondiee̱, ni xi ndajín xi ma ki̱a̱ nínga botíjeé xotaa̱, ko̱jo ni xi ꞌniú ndajín xi ma ki̱a̱ nínga kixi̱tsꞌèn mandajin kjo̱a̱xtii̱ xotaa̱.

¹⁷ Kósꞌe̱ bi̱ tsꞌén katsꞌenkjó án: Xota̱ xi kixi̱i̱ ko̱jo xota̱ xi ꞌniú ndajiín, Néná boá xi ko̱kó tsi nda ko̱jo tsi ndajín katsꞌén, ngatꞌa̱ ki̱a̱ boá nínga tikón ngo ni̱xtjin kjo̱a̱a̱ ngayeje ni xi mejénná si̱ꞌán, ko̱jo ngayeje ni xi niꞌán.

¹⁸ Ti̱ bi̱ tsꞌén katsꞌenkjó ngiñá an: Bo̱a̱ kjíꞌí ngayeje nii̱, ngatꞌa̱ Néná mejeén skótꞌayákón xota̱ nga̱sondiee̱, tsi̱ꞌe̱ nga sku̱i̱e̱ nga ti̱ bo̱a̱ ti̱ kon xikoó cho̱ tamaá.

¹⁹ Ngatꞌa̱ ni xi maa̱ xota̱ nga̱sondiee̱ ko̱jo cho̱ tamaá, ti̱kuíní ni: Ngajoó nga fesón, ngajoó nga tjo̱ kjiendá, ti̱nde tsiejín ngase ni tjiín xota̱ nga̱sondiee̱, ti̱nde tsiejín ngase ni tjiín cho̱ tamaá. Ngayeje kui nii̱ xi ta̱kjo̱a̱ndaní bo̱a̱ nga.

²⁰ Ngayejee̱ nga ta̱ ngo tsí ndiè fochó, ngayejee̱ nga chojo kamándani, kó ngayejee̱ nga chojo ka̱má nginí.

²¹ Nga ja̱koxi̱, ꞌyá xí be tsi a̱si̱énni̱xtjii̱n xota̱ nga̱sondiee̱ fínijíngí, ko̱jo tsi a̱si̱énni̱xtjii̱n cho̱o̱ fíjaya ngindiee̱ tꞌanangii̱.

²² Kuíni nga jè kamábe an, nga jmíjín ingo ni xi nda ngase nga tsja ka̱maa̱ xota̱ nga̱sondiee̱ kjo̱a̱a̱ xaá, ngatꞌa̱ kuí bí kui nii̱ xi tsoboaá nga sa̱ꞌín, ngatꞌa̱, ꞌyá xí kjo̱e̱ꞌéjo̱ nginí kui nga̱sondiee̱ tsi̱ꞌe̱ nga sku̱i̱e̱ ni xi kamá jaskan ngije kꞌien.