Eklesiastee̱ 2 - Xo̱jo̱n eén Néná

¹ Kósꞌe̱ bi̱ tsꞌén katsꞌenkjó án: Ngotꞌe̱ ꞌne̱ nga skotꞌa an kjo̱a̱tsjaa̱, ko̱jo ni nda xi tjiín kjo̱a̱mindyioo̱n. ¡Ta̱nga ngaskande kui nii̱ xi ta̱kjo̱a̱ndaní bo̱a̱ nga!

² Kó nga fetꞌani kamábe an nga kjo̱a̱mojnoó, kjo̱a̱tsobé boá, ko̱jo nga ni xi tsjáná kjo̱a̱tsjaa̱, jmí ni chjíjiín.

³ Kósꞌe̱ kamámejénna nga katsjáa̱ kjo̱a̱tsja yojona nga achichí bino̱ katsꞌe an, kó jmíni̱xtjin nga kichajá tokó án. Kamámejénna katsꞌen an kui ni xi chi̱nii̱, tsi̱ꞌe̱ nga skuie an mí ni xi nda xi sakoó xotaa̱, kjo̱a̱a̱ ngayeje xá xí tsꞌén ni̱xtjin nga síndo kui nga̱sondiee̱.

⁴ Achichí yiꞌi ni xi katsꞌenda an: Katsꞌenda an ndiꞌa, kó itji̱e̱ an tostsi̱je̱è xí án tsa̱ꞌa̱n,

⁵ katsꞌenda an ngi̱ndie nínga ꞌbítji̱e̱ ni tjié xi tsa̱ꞌa̱n, kó ki̱a̱ itji̱e̱ an ngayeje to̱ko̱ya yá xí tsjá to xi ma chinie.

⁶ Ti̱ katsꞌenda an ngi̱ndiò ndáfoa, tsi̱ꞌe̱ nga kui xi ko̱si̱ndanií nínga kjimaxchá kuí yaá.

⁷ Tsꞌatsie an moso̱ xi chjo̱on ko̱jo xi xi̱ꞌin, kó ti̱ kisꞌiena moso̱ xi kꞌi̱e̱ katsen ndiꞌana, ko̱jo achichí kamá cho̱yojona, ko̱jo cho̱tsa̱nga̱na, kjín ngase kamá ta̱bo̱a̱jiín xi kisꞌiee̱ ngayeje re xi kisꞌie ki̱a̱ na̱xi̱ńdáꞌniú Jerusale̱n ngindiee̱ nga stse̱n án.

⁸ Achichí kamá to̱ntiboa ko̱jo to̱nsinié xi kisꞌiena, ko̱jo ni tsjakon xi nda ngase xi kisꞌiee̱ já ree̱, ko̱jo xi kisꞌiee̱ nangi xi ngasee̱. Kisꞌiena xota̱ xi kisiena xi chjo̱on ko̱jo xi xi̱ꞌin, kó katsꞌentsjàa̱ yojona xikótsꞌèn tsꞌéntsjaà yojoo̱ xota̱ nga̱sondiee̱, kó ti̱ kisꞌiena ngayeje to̱ko̱ya ni xi niꞌánkjaniejo̱ni só.

⁹ Achichí kamáyàndikónna, kó achichí tsie ni xi kisꞌiena, tsie ngase, ta̱bo̱a̱jiín xota̱ xi kisꞌie na̱xi̱ńdáꞌniú Jerusale̱n ngindiee̱ nga stse̱n án, kó ndatsi kui nii̱ kisꞌiena, jmíni̱xtjin ijñámasien an kjo̱a̱kjínkónna.

¹⁰ Ngayeje ni xi kamámejénna nga skuie an, kamábe an, ngayeje kjo̱a̱tsja xi kamámején ini̱ma̱na, katsꞌenkjatjosón an, ngatꞌa̱ ini̱ma̱na tsja kamaá kjo̱a̱a̱ ngayeje xá xí katsꞌen an, kó ngayeje kui nii̱ xi katsꞌen an kjo̱a̱a̱ kui xaá.

¹¹ Sꞌe̱ askotsijèe̱n ngayeje xá xí je katsꞌen an, ko̱jo xikó kjiꞌi kisꞌingina nga katsꞌen an, kó kꞌi̱e̱ bí nga kamákjínna nga ngayeje kui nii̱ ta̱kjo̱a̱ndaní bo̱a̱, kó ta̱ tsꞌénboa tsíná, kó nga jmí ni chjíjiín kꞌi̱e̱ kui nga̱sondiee̱.

Nde ngo nii̱ kui nga̱sondiee̱ mongínjo̱jín ñá nga mayá

¹² Jaskan katsꞌenkjó án kjo̱a̱a̱ kjo̱a̱kjínkoón, ko̱jo kjo̱a̱a̱ kjo̱a̱tsobeé, ko̱jo kjo̱a̱a̱ kjo̱a̱kitikjo̱a̱a̱, ngatꞌa̱, mí ni xi ka̱ma sa̱ꞌín ngase kui re xi jaskan kꞌuijñá xaá. Ta̱jmìjínni, ta̱kuítsí ni xi je kiniꞌaán.

¹³ Jè kamábe an nga kjo̱a̱kjínkoón foaꞌatjoón kjo̱a̱kitikjo̱a̱a̱, xikótsꞌèn ndiꞌií foaꞌatjoón nga jñoó.

¹⁴ Xota̱ xi kjínkoón be boá nínga fí, ta̱nga xota̱ xi kitikjo̱a̱a̱ jñó boá nínga fotsoꞌbá, ta̱nga ti̱ kamákjínna nga ni xi ka̱maa̱ ngo, ti̱ bo̱a̱ ti̱ ka̱maa̱ xi ingoo̱ nga.

¹⁵ Kósꞌe̱ bi̱ tsꞌén katsꞌenkjó án: xikó ka̱maa̱ xota̱ xi kitikjo̱a̱a̱, ti̱ bo̱a̱ ti̱ ka̱mana an nga. Kósꞌe̱ mítsjà katsꞌenxá án ngaskande nga xota̱ xi kjínkón kamá an. Kósꞌe̱ bi̱ tsꞌén katsꞌenkjó án, nga ko̱jo kui nii̱ xi ta̱kjo̱a̱ndaní bo̱a̱ nga.

¹⁶ Ngatꞌa̱ jmíjín xi sa̱ꞌínkjaꞌátsjien xota̱ xi kjínkoón ko̱jo xota̱ xi kitikjo̱a̱a̱, ngatꞌa̱ ni̱xtjin xi jaskan ndibaá ngayeje nii̱ xi si̱ꞌanchíyá, kó ko̱yà xota̱ xí kjínkoón, kó ti̱ ko̱yà xota̱ xí kitikjo̱a̱a̱ nga.

¹⁷ Kuíni nga katsꞌenchꞌó an kjo̱a̱mindyioo̱n, ngatꞌa̱ xá xí niꞌán kui nga̱sondiee̱ je tsꞌajonna, ngatꞌa̱ ngayeje kui nii̱ ta̱kjo̱a̱ndaní bo̱a̱, kó ta̱ tsꞌénboa tsíná.

¹⁸ Kó ti̱ bo̱a̱ ti̱ tsꞌén kamáchꞌona ngayeje xá xí katsꞌen an kui nga̱sondiee̱, ngatꞌa̱ ngayeje kui xaá, kui xi kꞌuijñá ngajona, kuí tsi̱ꞌe̱ ka̱ma.

¹⁹ Kó ꞌyá xí bená tsí kjínkón ko̱jo tsi kitikjo̱a̱ ka̱ma kui xi ko̱tíxomaa̱ ngayeje xána, kui xá xí achichí kjo̱a̱ni̱ma̱ ko̱jo kjo̱a̱kjínkón kisꞌingina nga katsꞌen an kui nga̱sondiee̱. Ti̱ ta̱kjo̱a̱ndaní bo̱a̱ kui nii̱ nga.

²⁰ Ingo ndi̱yà ti̱ achichí ni xi kamá nginií ini̱ma̱na, kjo̱a̱a̱ kui xá xí achichí kjo̱a̱ni̱ma̱ kisꞌingina, xi katsꞌen an kui nga̱sondiee̱, nga katsꞌenkjién án kjo̱a̱kjínkónna.

²¹ Kjiꞌanga ngo xota̱ xi sa̱ꞌínkjién kjo̱a̱kjínkoón, ko̱jo kjo̱a̱kjíntakoón, ko̱jo kjo̱a̱kixi̱i̱, kósꞌe̱ sa̱ꞌinkꞌasꞌiee̱n ni xi kisꞌiee̱, ngo xota̱ xi jmí ni kisꞌingíjiín, ngayeje kui nii̱ xi ti̱ ta̱kjo̱a̱ndaní bo̱a̱ nga, kó ta̱nisién ndajínkjiꞌi.

²² Ngatꞌa̱, mí ni xi tsꞌén xota̱ nga̱sondiee̱ kjo̱a̱a̱ ngayeje xaá ko̱jo ngaꞌniú xí katsꞌén nga achichí nda̱ kamaá nga katsꞌénxá kuí nga̱sondiee̱.

²³ Ngatꞌa̱ ngayeje ni̱xtjin nga kjo̱a̱ni̱ma̱ tsꞌénfoaꞌatio, nga katsꞌén xá xí tsjajín kamaá nga katsꞌén, kó ndatsi nga jñoó nde jmí kjo̱a̱xió kisꞌiejiín ini̱ma̱a̱. ¡Kó kui nii̱, ti̱ ta̱kjo̱a̱ndaní bo̱a̱ nga!

²⁴ Jmíjín ingo ni xi nda ngase, nga xota̱ nga̱sondiee̱ skji̱ni̱e̱ ko̱jo kꞌuí, ko̱jo nga tsja ka̱maa̱ nga kꞌuijñá nga̱sondie kjo̱a̱a̱ xaá. Kó jè kamábe an nga kui nii̱, ngi̱ya tsja Néná ndibání.

²⁵ Ngatꞌa̱, ꞌyání xí nda ngase skji̱ni̱e̱ nichinie, ko̱jo xi nda ngase skoón yojoo̱, xikoó án.

²⁶ Ngatꞌa̱ Néná, kui xota̱ xi nda ꞌbókaa̱, tsjaá kjo̱a̱kjínkón, ko̱jo kjo̱a̱kjíntakón, ko̱jo kjo̱a̱tsja, ta̱nga xota̱ xi tsꞌénjeé, Néná tsjaá xá, tsi̱ꞌe̱ nga kui kjo̱a̱ꞌáꞌyá, ko̱jo kjo̱a̱ꞌátikó ni xi jaskan Néná sa̱ꞌínkꞌasꞌiee̱n kui xota̱ xi nda ꞌbókaa̱ kui. Kó ngayeje kui nii̱, ti̱ ta̱kjo̱a̱ndaní bo̱a̱, kó ta̱ tsꞌénboa tsíná.