3 Xo̱jo̱o̱n Juaa̱ 1 - Xo̱jo̱n eén Néná

Bi̱ tsꞌén katsꞌéntinde Juaa̱ xota̱ na̱ngo̱xi̱i̱

¹ Án boá ngo nda̱ xi xota̱ xi xchaá na̱ngo̱xi̱i̱, tsꞌentinde an ndí ntsꞌié án Ngayoo̱, kui nda̱ xi ja̱koxi̱ nga tjóna.

² Ji ndí ntsꞌie xi tjóna, míꞌáa̱ Néná tsi̱ꞌe̱ nga nda ko̱e̱je̱e̱ kjo̱a̱a̱ ngayeje nii̱, kó nga nda ku̱i̱ndyin ji, xikótsꞌèn nda tjisꞌíjñá ini̱màa̱ ngindyi̱ko̱n Néná.

Achichí nda katsꞌén Ngayoo̱

³ Ngatꞌa̱ achichí tsja kamána nga kjindibákónna já ntsꞌiee̱, kó katsóyàna nga ta̱kó kjimaꞌniátakón ji Néná, ko̱jo kótsꞌèn nga ni xi ja̱koxi̱i̱ tińtjejin.

⁴ Nga ntꞌié an nga kui xota̱ xi xikoó ndína, nga ngi̱jii̱n ni xi ja̱koxi̱i̱ tjimájin, jmíjínna ingo kjo̱a̱tsja xi je ngase ta̱bo̱a̱jiín kui ni xi̱ꞌba̱.

⁵ Ji ndí ntsꞌie xi tjóna, ta̱nisién ꞌniátakón kjima ji kjiꞌanga tiniꞌínsée̱n ntsꞌié xí ngasee̱, ngase má nga tibosíke̱je ji kui xi xín nangi chji̱a̱nii̱.

⁶ Kuí boá xi katsóyà ngindyi̱ko̱n xota̱ na̱ngo̱xi̱i̱ kjo̱a̱a̱ kjo̱a̱tjó xi tjiín jí, kó ndakjíꞌí ni xi si̱ꞌin ji nga ko̱si̱ke̱je nga sa̱ꞌín ngase xaá Néná, tsi̱ꞌe̱ nga ta̱kó ko̱e̱je̱ra nínga ndyi̱fí.

⁷ Ngatꞌa̱ kui xotaa̱ ndyi̱fí ja̱kꞌi̱e̱ ja̱ngaján ngi̱ndie ta̱ngatꞌanii̱ nga ndyi̱ꞌbini̱jmì eén Jesukristoo̱, kó jmí nii̱ xota̱ xi sꞌijinjiín Néná katsꞌénjo̱ꞌojín.

⁸ Kuíni nga ñá chjiéngá ko̱e̱ꞌéndièe̱ ndiꞌaná kui ntsꞌié xí xikoó xi̱ꞌba̱. Kó bo̱a̱ tsꞌén nga ko̱si̱ko̱jó nga ku̱i̱ꞌíni̱jmì én xí ja̱koxi̱i̱ Néná.

Ndiótrefee̱ ko̱jo Ndemetrioo̱

⁹ An, jè katsꞌenꞌindóo̱ ngo xo̱jo̱n xota̱ na̱ngo̱xi̱i̱, ta̱nga Ndiótrefee̱ kamámejénjiín sku̱i̱e̱ndikón xájne̱, ngatꞌa̱ ngatsjéni̱xtjin mejeén nga kui xi ngito̱ko̱o̱ na̱ngo̱xi̱i̱ ka̱ma.

¹⁰ Kuíni nga, tsi an xi kjuín án, sa̱ꞌinkjaꞌátsjiée̱n ni xi ndajín xi tsꞌén nga chꞌo tsóná, ko̱jo nga ndajín chji̱a̱ kondra̱ tsa̱ñá. Kó jmí tsi ta̱kuítsí nii̱ xi tsꞌén, ngaskande tsjandièjín nga ntsꞌié xí xín nangi fochokoón, kó ꞌbíchjaá xota̱ na̱ngo̱xi̱ xi mejeén nga kjo̱chókoón kui já ntsꞌiee̱, kó mongatji̱ngii̱ na̱ngo̱xi̱i̱.

¹¹ Ji ndí ntsꞌie xi tjóna, ngata̱ ki̱a̱jín chjeꞌéngíi̱ xota̱ xi ni xi ndajín ndyi̱tsꞌèn, ta̱sá ki̱a̱ chje̱ꞌéngíi̱ xota̱ xi ndyi̱tsꞌèn ni xi ndaa̱. Xota̱ xi ni xi nda tsꞌén, xota̱ xi tsi̱ꞌe̱ Néná boá, ta̱nga xota̱ xi ndajín ndyi̱tsꞌe̱én, kji̱e̱ bejín Néná.

¹² Ngayeje xotaa̱ chji̱a̱ kjo̱a̱a̱ nga ndaxota̱ Ndemetrioo̱, kó ja̱koxi̱ boá ni xi chji̱a̱. Ngaskande ji̱n nda ndokjo̱a̱jne̱ kjo̱a̱a̱ kui, kó jún jè yàjnú nga ja̱koxi̱ boá ni xi niꞌánjne̱, ko̱jo ni xi ndokjo̱a̱jne̱.

Bi̱ tsꞌén katsꞌénkixotꞌa Juaa̱ xota̱ na̱ngo̱xi̱i̱

¹³ Achichí ni xi tikónna xi kuichjiájoo ji katsaki, ta̱nga mejénjínna nga xo̱jo̱n ko̱jo tinta̱ sa̱ꞌinkjièn án.

¹⁴ Ngatꞌa̱ ta̱sá skoyáa̱ nga tsá skuieé jí, tsi̱ꞌe̱ nga ka̱ma tíkje̱n tíkje̱n xchi̱boáni̱jmì.

¹⁵ Ngatꞌieé kjo̱a̱xió. Xota̱ xi amingoo̱ tsó tinde. Ngo kjo̱a̱nda kuíꞌaá, tinde bo̱a̱ tꞌín ji nga ngo nga ngo amingo̱na xi síndo ki̱a̱a̱.