2 Xota̱ Korinto̱ 1 - Xo̱jo̱n eén Néná

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Korinto̱

¹ Án boá xi ꞌmína Pabloo̱, an xí kamá an ngo nda̱ apostroo̱ Jesukristoo̱, ngatꞌa̱ bo̱a̱ tsꞌén kamámejeén Néná. An ko̱jo nda̱ ntsꞌié xi ꞌmí Timoo̱ niꞌántindejne̱ xota̱ na̱ngo̱xi̱i̱ Néná xí síndo na̱xi̱ńdáꞌniú Korinto̱, ko̱jo ngayeje xota̱ tsjiee̱ Néná xí síndo ngayeje nangi Akaya̱.

² Néná xí Na̱ꞌminá, ko̱jo Ndi̱a̱ná Jesukristoo̱, ngatsjájnú kjo̱a̱ndaa̱ ko̱jo kjo̱a̱xioó.

Bi̱ tsꞌén akó Pabloo̱ nga Néná boá xi katsjángaꞌniuú nga jaꞌatio kjo̱a̱ni̱ma̱

³ Nganiꞌántsjaá Néná, kui xi Nee̱ ko̱jo Na̱ꞌmii̱ Ndi̱a̱ná Jesukristoo̱, kui xi Na̱ꞌminá ko̱jo xi Néná xí ma ni̱ma̱a̱ ñá, ko̱jo xi tsjangaꞌniúná ngatsjéni̱xtjin.

⁴ Kuí xí tsjangaꞌniúná tsi̱ꞌe̱ nga xchíkjo̱a̱ná ngayeje kjo̱a̱ni̱ma̱, tsi̱ꞌe̱ nga ka̱máná ko̱e̱ꞌéngaꞌniúu̱ ngayeje xota̱ xi ndyi̱foaꞌatio kjo̱a̱ni̱ma̱, xikótsꞌèn Néná tsꞌéntsjángaꞌniúná, bo̱a̱ tsꞌén ko̱e̱ꞌéngaꞌniúu̱ xota̱ xi ngasee̱.

⁵ Ngatꞌa̱ xikótsꞌèn tsie kjo̱a̱ni̱ma̱ ndyi̱bitjajin ngatꞌaa̱ Kristoo̱, ti̱ bo̱a̱ ti̱ tsꞌén Kristoo̱ tsꞌéntsjángaꞌniúná.

⁶ Tsi̱ꞌe̱ nga kꞌuiéjnú ngaꞌniú ko̱jo nga kjo̱tjoꞌajnú, kuíni nga kjo̱a̱ni̱ma̱ ndyi̱bitjatiójne̱ ji̱n. Kó tsi sa̱kó ngaꞌniújne̱ ji̱n, tsi̱ꞌe̱ nga kꞌuiéjnú ngaꞌniú, ko̱jo nga kjo̱tjoꞌajnú, tsi̱ꞌe̱ nga xchíkjo̱a̱jnú, ko̱jo sa̱kó ngaꞌniújnú kjiꞌanga kꞌuiéjnú ti̱ kuii̱ kjo̱a̱ni̱ma̱ xikoó xi ndyi̱bitjajinjne̱ ji̱n.

⁷ ꞌNiátakónjne̱ jún ngatꞌa̱ yàjne̱ nga tsi nijan ku̱i̱tja̱tió kuí kjo̱a̱ni̱ma̱a̱, ti̱ bo̱a̱ ti̱ tsꞌén nijan sa̱kó ngaꞌniúná nga.

⁸ Jún ntsꞌie, mejénjínjne̱ nga kꞌuiꞌmájne̱ kjo̱a̱ni̱ma̱ xi ikitjatiójne̱ nangi Asia̱, achichí tsie ni xi kamátaꞌinjne̱ ki̱a̱, kó ta̱ꞌya kichikjo̱a̱jne̱, ngaskande jè ngiti̱ kiniꞌánkjójínjne̱ tsi ti̱ ku̱i̱ndyión ngasejne̱ nga̱sondie.

⁹ Ngatꞌa̱ ji̱n jè ta̱nisién ko̱yàjne̱ kamájne̱, tsi̱ꞌe̱ nga ti̱ ji̱njín xi kamáꞌniátakónjne̱ yojojne̱, ta̱sá Néná xí ka̱maꞌniátakónjne̱, kui Néná xí tsꞌénkjaꞌáꞌyaá xota̱ xi je jesoón.

¹⁰ Néná xín katsꞌénkjaꞌajne̱ kjo̱a̱bo̱yaa̱, kó bee̱takónjne̱ nga xín sa̱ꞌínkjaꞌajne̱, kó nga ta̱kó bo̱a̱ sa̱ꞌín.

¹¹ Ndókjo̱a̱tjéjnú ji̱n, ngatꞌa̱ tsi kjín ka̱ma xi ku̱i̱chji̱a̱tjéjne̱, ti̱ kjín ka̱ma xota̱ xi tsja̱á ndokꞌóchjì Néná kjo̱a̱a̱ kui kjo̱a̱niꞌánchikonñé xi tsja̱ajne̱ ji̱n.

Bi̱ tsꞌén íni̱jmì Pabloo̱ ánní nga ta̱ xo̱jo̱n tsí xi katsangiyaa̱ xota̱ na̱ngo̱xi̱ xi chji̱a̱ni Korinto̱

¹² Tsjá májne̱ nga nda tikón kjo̱a̱kjíntakónjne̱, kó yàjne̱ nga tsjie, ko̱jo nga kixi̱ kisꞌiṉtso̱majne̱ ngi̱jinjnú, ko̱jo ngi̱jii̱n ngayeje xotaa̱, kjiꞌanga bo̱a̱ kiniꞌánjne̱, kjo̱a̱ndaa̱ Néná boá xi tsangíntjingijne̱, jmí tsi xikótsꞌèn tjíjinkon xotaa̱ kui nga̱sondiee̱.

¹³ Ni xi ka̱makjínjnú boá xi kiniꞌánꞌindójne̱ xo̱jo̱n xi ndyi̱niꞌányajnú, kó skoya an nga ka̱makjín cha̱n cha̱njnú ngayejee̱ nii̱.

¹⁴ Xikó tsꞌén je kamákjín chiíjnú nga ni̱xtjin nga kjo̱e̱ꞌe nginí Ndi̱a̱ná Jesukristoo̱, jún tsja ka̱majnú kjo̱a̱a̱ ji̱n, xikótsꞌèn ji̱n tsja ka̱majne̱ kjo̱a̱a̱ jún.

¹⁵ ꞌNiú kamáꞌniátakónjnúꞌun kuíni nga katsꞌenkjó án nga tjón jún kjuínkátsijenjnúꞌun, tsi̱ꞌe̱ nga kꞌuiéjnú kjo̱a̱nda nga jó ndi̱yà kjuínkátsijenjnúꞌun.

¹⁶ Kó tsꞌenkjó án nga tjón kjuínkátsijenjnúꞌun nga kjuín án na̱xi̱ńdáꞌniú Masendonia̱, sꞌe̱ jaskan nga kji̱ndi̱bá ngiñá an, ti̱ kjo̱a̱ꞌatio ngiñá an ki̱a̱a̱, ki̱a̱ ka̱ma nga jún ka̱ma ko̱si̱ko̱jójnúꞌun nga kjuín án xtji̱e̱e̱n nangi Jundea̱.

¹⁷ Kó ngije bo̱a̱ tsꞌén katsꞌenkjó án, a ndajín katsꞌenkjó án nga katsꞌen an kui nii̱ tsobo̱a̱. Axa̱ a beriítakónjnú nga nda tsꞌénꞌbínda an ni xi sa̱ꞌin an, xikoó ngo xota̱ xi ti̱ kjiꞌa “jo̱o̱n” ko̱jo “jmí” tsó nga chji̱a̱.

¹⁸ Ta̱nga Néná xí chistiko̱ nga ji̱n jmí tsi “jo̱o̱n” sꞌe̱ ti̱ kjiꞌa “jmí” ꞌmíjne̱.

¹⁹ Ngatꞌa̱ Jesukristoo̱ kuí xí ndií Néná, kó kjo̱a̱a̱ kuí boá xi ikꞌíni̱jmìjne̱ Silbanoo̱, ko̱jo Timoo̱, ko̱jo an ngi̱jinjnú, jmí tsi “jo̱o̱n” ko̱jo “jmí” ti̱ kjiꞌa katsó, kuí boá xi ngatsjéni̱xtjin “jo̱o̱n” tsó Néná.

²⁰ Ngatꞌa̱ ngayeje ni xi katsóyàtjón Néná nga sa̱ꞌín kuí, fotjosón ngatꞌaa̱ Kristoo̱, kó kuíni nga “bo̱a̱ kjiꞌi” ꞌmí ñá nga boeꞌée̱ kjo̱a̱je Néná.

²¹ Néná boá xi tsjáná ngaꞌniú jún ko̱jo ji̱n, tsi̱ꞌe̱ nga ꞌniú ku̱i̱ndyiá kjo̱a̱a̱ nga je kisꞌijinná Kristoo̱, kó kuí boá kui Néná xí jaꞌájinná.

²² Kuí Néná xi je katsꞌénkaꞌaná chi̱bo̱a̱ nga íjñajin ngi̱jin ini̱ma̱ná A̱si̱énni̱xtjii̱n, xikoó ngo ni xi tikónngí tsi̱ꞌe̱ nga xcha̱ nga sa̱ꞌínkjatjosón ni xi jaskan tsja̱aná.

²³ Ngindyi̱ko̱n Néná nga ngataya an tsi bo̱a̱jín kjiꞌi ni xi tsꞌénxiyàjnúꞌun, kji̱e̱ fíjín an na̱xi̱ńdáꞌniú Korinto̱, ngatꞌa̱ mejénjínna nga ndasen ka̱majnú.

²⁴ Jmí tsi ji̱n xi si̱ꞌanjne̱ kjo̱a̱ꞌniú kjo̱a̱a̱ xikótsꞌèn sꞌijinjnú, ta̱sá mejénjne̱ nga ji̱n ko̱siko̱jojne̱ jún tsi̱ꞌe̱ nga kꞌuiéjnú kjo̱a̱tsja, ngatꞌa̱ jè ꞌniú tindyiàjnú nga sꞌijinjnú Néná.