2 Xo̱jo̱o̱n Peé 3 - Xo̱jo̱n eén Néná

Bi̱ tsꞌén íni̱jmì Peé kjo̱a̱a̱ ni̱xtjin nga kji̱ndi̱bá nginí Ndi̱a̱ná

¹ Jún ndí ntsꞌie xi tjóna, kuí bí xi ma joó xo̱jo̱n xi katsꞌendajnúꞌun, kó nga jó kui xo̱jo̱o̱n nga tsꞌenkjaꞌátsjienjnúꞌun ni xi je akoyájnúꞌun tsi̱ꞌe̱ nga kixi̱ tsꞌén kꞌuijñá kjo̱a̱kjíntakónjnú ngindyi̱ko̱n Néná.

² Ngatjaꞌátsjienjnú ni xi katsó já chji̱ni̱e̱ꞌén tsjiee̱ Néná ngasꞌe̱, ko̱jo kjo̱a̱botíxoma xi akóyájnú já apostroo̱ kjo̱a̱a̱ Ndi̱a̱ná Jesukristoo̱ kui xi tsꞌaxiéꞌáná.

³ Tjón kui nii̱ xi ꞌniú tjajintakónjnú, nga ni̱xtjin xi kju̱i̱e̱tꞌaa̱, kꞌuié xota̱ xi kꞌuíndo xikótsꞌèn mejeén ini̱ma̱a̱ nga kꞌuíndo, kó ko̱jno̱kie ni xi je akakoyájnú,

⁴ kó bi̱ ka̱tso̱ nga ko̱síyá: “Ánní nga jatjosónjín ni xi je kiꞌmí, nga kji̱ndi̱bá nginí Kristoo̱. Ngatꞌa̱ ndeskande nga jesón xota̱ tji̱e̱ xcháná, ngaskande ngotꞌe̱, ta̱kó bo̱a̱ tsꞌén síndo nii̱, xikoó nga ítjatsꞌennii̱ nga kamánda kui nga̱sondiee̱.”

⁵ Kui xotaa̱ ngayeje kon nga mejénjiín sku̱i̱e̱ nga ndeskande koó ngasꞌe̱ nga ta̱ngatꞌanii̱ eén Néná nga kamánda ndiꞌakꞌajmii̱ ko̱jo tꞌanangii̱, kui tꞌanangi xi kisꞌijñaa̱, xi ngi̱jin ndáfoaa̱ kjindibánii̱.

⁶ Ngatꞌa̱ ndáfoaa̱ kui stsé ꞌniú xí tsaꞌaá kiniꞌánkjiéni xota̱ xi kisꞌińdo kui ni̱xtjin jàn.

⁷ Ta̱nga kui ndiꞌakꞌajmi ko̱jo tꞌanangi xi síndo ngotꞌe̱, ta̱ngatꞌanii̱ kui eén Néná nga, nga je síndondani tsi̱ꞌe̱ nga ndiꞌí sa̱ꞌínkjié nga kjo̱chó ni̱xtjin nga Néná ka̱tso̱yà tsi nda ko̱jo tsi ndajínkjiꞌi ni xi katsꞌén xotaa̱, kó kjiꞌá boá nga kju̱i̱e̱ xota̱ xi bendikónjín Néná nga.

⁸ Jún ndí ntsꞌie xi tjóna, mejénna nga xcha̱jnú nga Ndi̱a̱ná, nga ngo ni̱xtjii̱n xikónií tsi ngo mi̱ nó máa kui, kó nga ngo mi̱ noó xikónií tsi ngo ni̱xtjin máa kui.

⁹ Ndi̱a̱ná tsꞌénkꞌandíyàjiín nga sa̱ꞌínkjatjosón ni xi katsóyàtjón nga sa̱ꞌín, xikótsꞌèn bee̱ko̱n kjín xota̱ nga tsꞌénkꞌandíyà. Ta̱sá koyakjo̱a̱jnú ngatꞌa̱ mejénjiín nga tjín xi xcha̱ja, ta̱sá mejeén nga ngayeje xotaa̱ sa̱ꞌínkꞌoyà yojoo̱.

¹⁰ Ta̱nga nga kjo̱e̱ꞌe Ndi̱a̱ná xikónií tsi ngo chejé xí foeꞌe nga jñoó nga kjo̱e̱ꞌe, kó kui ni̱xtjii̱n ndiꞌakꞌajmii̱ achichí ꞌniú kjo̱ni̱e̱ nga kju̱i̱e̱, kó ngayeje nii̱ ndiꞌí si̱ꞌankjieni, kó tꞌanangii̱ ko̱jo ngayeje ni xi tjiín, ku̱i̱ti̱.

¹¹ Kó nga ngayeje kui nii̱ bo̱a̱ tsꞌén kju̱i̱e̱, a chjiénjín nga tsjie tsꞌén ku̱i̱ndyionjnú ko̱jo nga xcha̱ndikónjnú Néná,

¹² kó nga si̱ꞌanmejénjnú nga kjo̱chó ni̱xtjin nga sa̱ꞌín Néná ni xi katsó nga sa̱ꞌín. Kui ni̱xtjii̱n ndiꞌakꞌajmii̱ kju̱i̱e̱, kó ngayeje ni xi tjiín ka̱mańdá nga ku̱i̱ti̱.

¹³ Ta̱nga ñá ndyi̱chiyáa̱ ndiꞌakꞌajmi tja̱tsi̱e̱e̱ ko̱jo tꞌanangi tja̱tsi̱e̱e̱, xikótsꞌèn katsóyàtjónná Néná, ki̱a̱ nínga kixi̱ ku̱i̱ndyión.

¹⁴ Kuíni nga jún ndí ntsꞌie xi tjóna, tji̱e̱nga ndyi̱chiyájnúu̱ nga kjo̱e̱ꞌe Ndi̱a̱ná, ti̱ꞌánjnú ngo kjo̱a̱ꞌniú tsi̱ꞌe̱ nga kꞌuiéjnú kjo̱a̱xió ngindyi̱ko̱n Néná, ko̱jo nga jmí kjo̱a̱ndándí kꞌuiéjínjnú ko̱jo nga jmíjín xi ka̱maa̱ chꞌo tsꞌén ku̱i̱chji̱a̱taꞌinjnú.

¹⁵ Kó ngatamakjínjnú nga kui kjo̱a̱chiyákjo̱a̱ xi tjiín Ndi̱a̱ná, tsi̱ꞌe̱ nga kjo̱tjoꞌa ñá boá, xikótsꞌèn nda̱ ntsꞌie xi tjóná xi ꞌmí Pabloo̱, ítꞌajnú xo̱jo̱n, xikó kjiꞌi kjo̱a̱kjínkón xi katsjaá Néná.

¹⁶ Nga ngo nga ngo xo̱jo̱n xi katsangiya Pabloo̱ katsóyàjnú kjo̱a̱a̱ kui nii̱, ndatsi tjín nii̱ xi niꞌin makjínná. Kuíni nga xota̱ xi ndajín makjiín ko̱jo xi ꞌniújín síndojin kjo̱a̱sꞌijii̱n kje̱ꞌe tsꞌén ꞌbijñaá ni xi je tjítꞌa kui xo̱jo̱n. Bo̱a̱ ti̱ tsꞌeén ni xi ngase xi kjitꞌa xo̱jo̱n eén Néná nga, kó bo̱a̱ tsꞌén nga ti̱ kuii̱ ndyi̱tsꞌènkjí yojoo̱ nínga xcha̱ja.

Peé bi̱ tsꞌén katsꞌénkjietꞌa xo̱jo̱o̱n

¹⁷ Kuíni nga jún ndí ntsꞌie xi tjóna, nga je yàjnú jún kui nii̱, chónjnú yojojnú tsi̱ꞌe̱ nga ta̱kó ꞌniú kꞌuijñá kjo̱a̱a̱ nga sꞌijinjnú Néná, kó nga kꞌo̱ṉcha̱jojínjnú xota̱ xi ꞌniú ndajiín nga skjiénjnú.

¹⁸ Ta̱sá ꞌniú tangíntji̱ngíjnú kjo̱a̱ndaa̱, ko̱jo nga nda xcha̱ ngasejnú Ndi̱a̱ná Jesukristoo̱, kui xi tsꞌaxiéꞌáná. ¡Kuí boá xi ngotꞌe̱, ko̱jo ta̱ kjiꞌání nga nga sꞌiee̱ kjo̱a̱je! Bo̱a̱ kjiꞌi.