2 Xo̱jo̱o̱n Peé 2 - Xo̱jo̱n eén Néná

Bi̱ tsꞌén íni̱jmì Peé kjo̱a̱a̱ ni xi tsꞌén já mostro̱ ndiso xi síndojin ngi̱jii̱n xota̱ na̱ngo̱xi̱i̱

¹ Ngi̱jii̱n xota̱ jundíoo̱ kisꞌie já chji̱ni̱e̱ꞌén ndiso xi tsꞌenṉcha̱, kó ti̱ bo̱a̱ ti̱ tsꞌén kꞌuié mostro̱ xi kꞌo̱ṉcha̱ ngi̱jii̱n jún. Kui jaá, kuí boá xi ꞌma ꞌma ko̱kóyájnú kje̱ꞌe ni xi sa̱ꞌínkjatsónjnú. Sa̱ꞌínkiejín yojoo̱ kjo̱a̱a̱ kui Ndi̱a̱ná xi tsꞌaxiéꞌá. Kuí nii̱ xi sa̱ꞌín nga kui xotaa̱ tsá si̱ꞌankjie.

² Achichí ka̱ma xota̱ xi ko̱e̱je̱tji̱ngii̱ ni xi ndajín xi tsjá kjo̱a̱soboá xi katsꞌén kui jaá, kó kuí nii̱ xi sa̱ꞌín nga chꞌo tsꞌén ko̱ndókjo̱a̱ kjo̱a̱a̱ ndi̱yà xí ja̱koxi̱i̱.

³ Kó ta̱ngatꞌanii̱ kjo̱a̱xkétoo̱n nga ko̱kóyá ni ndiso tsi̱ꞌe̱ nga kꞌo̱xiéjnú to̱n. Ta̱nga Néná jè bo̱a̱ katsó nga tsá sa̱ꞌínkjié, kó kuí kjo̱a̱niꞌánkjieé jè tsá ndibá.

⁴ Ngasꞌe̱ Néná katsꞌénjetakónjiín ndítsjie xi katsꞌénjeé, kó ta̱sá ki̱a̱ tsꞌajmijin ndo̱bo̱a̱ṉkꞌi̱e̱e̱n nga índo nínga tikón ndo̱bo̱a̱yà xí jñoó, ngaskande ni̱xtjin nga Néná ka̱tso̱yà tsi nda ko̱jo tsi ndajínkjiꞌi ni xi katsꞌén xotaa̱.

⁵ Kó Néná ti̱ katsꞌénjetakónjiín xota̱ xi kisꞌińdo ni̱xtjii̱n Noee̱, ta̱sá katsangiyaa̱ stsé ꞌniú, kó ngayejee̱ nga jesón. Néná tsꞌaxiéꞌá Noee̱, nda̱ xi akóyaá xotaa̱ nga kixi̱ tsꞌén kꞌuíndo, kó jatjoꞌa Noee̱ ko̱jo ngi yito xota̱.

⁶ Néná ti̱ katsꞌénjeé nga katsꞌénkjié na̱xi̱ńdáꞌniú Sondoma̱ ko̱jo Ngomorra̱, kó ítí ngaskande nga ndiso kamá, tsi̱ꞌe̱ nga kui nii̱ xi chi̱bo̱a̱ kamaá xota̱ xi bendikónjín Néná.

⁷ Ta̱nga tsꞌaxiéꞌá Loo̱t, nda̱ xi kixi̱i̱, kui xi on kamaá nga kamábe nga kui xota̱ xi ndajiín katsꞌén ta̱jmì niní.

⁸ Ngatꞌa̱ kui nda̱ kixi̱i̱ ki̱a̱ kisꞌijña kui na̱xi̱ńdaá, kó achichí on kamaá ini̱ma̱ kixi̱i̱ nga kamábe ko̱jo nga tsintꞌié ni xi ndajín xi katsꞌén kui xotaa̱.

⁹ Ngayeje kui nii̱ xi bokó nga Ndi̱a̱ná márií ꞌboxiéjin ngi̱jii̱n kjo̱a̱chjatꞌayákón xi ꞌbeé xota̱ xi bendikón Néná, kó ti̱ tjínrií ngaꞌniú nga ko̱tíjeé xota̱ xi kixi̱jín, nga kjo̱chó ni̱xtjin nga Néná ka̱tso̱yà tsi nda ko̱jo tsi ndajínkjiꞌi ni xi katsꞌén xotaa̱.

¹⁰ Ngase má ni xi ka̱maa̱ xota̱ xi ni xi mejeén yojoo̱ ndyi̱tsꞌèn, ko̱jo xi ni xi ndándí xi mejeén ini̱ma̱a̱ ndyi̱tsꞌèn, ko̱jo xi ndyi̱tsꞌènchꞌó xi tjiín xá ndiꞌakꞌajmi jàn. Ndasénjiín, kó ta̱ ni xi mejénrií xi ndyi̱tsꞌèn, kó tsakjónjín má nga chꞌo ndyi̱tsoó ngaꞌniú xí ꞌniú nkꞌaá.

¹¹ Kó ndatsi ndítsjiee̱ tjín ngasee̱ ngaꞌniú ko̱jo xá, májín kon nga chꞌo ka̱tso̱o̱ kui já mostro̱ ndisoo̱ nga ko̱tíjétáꞌín ngindyi̱ko̱n Ndi̱a̱ná.

¹² Ta̱nga kui jaá, chꞌo tsꞌénchji̱a̱ kjo̱a̱a̱ ni xi makjínjiín, xikónií cho̱ xi tsꞌénkjójín kui xi ta̱ tjimá tsí tsi̱ꞌe̱ nga ko̱ndo̱bo̱a̱ ko̱jo si̱ꞌankꞌien. Kuíni nga ko̱yà kui jaá ta̱ngatꞌanii̱ ni xi ndajín xi ndyi̱tsꞌèn.

¹³ Sa̱kó nginií chjií ni xi kixi̱jín xi ndyi̱tsꞌèn. Sꞌijinrií nga tsjakjiꞌi ni xi ndyi̱tsꞌèn nga ndyi̱tsja̱á kjo̱a̱tsja ini̱ma̱a̱ kjo̱a̱a̱ ni xi ndyi̱tsꞌèn nga ni̱xtjii̱n. Ni xi ta̱nisién ndajín boá kui nii̱ ko̱jo ni xi tsꞌéndándíná. Kó ngaskande tsja maa̱ kjo̱a̱a̱ ni xi ndajín xi ndyi̱tsꞌèn kjiꞌanga nda ndyi̱kjinie ṉño̱ nga síndojinjnú.

¹⁴ Nde májín nda be ngo na̱, nga ja̱ kamá tsꞌénkjó nga sa̱ꞌíntsjajo̱, jmíni̱xtjin fenda nga ndyi̱tsꞌèn jé, ꞌboṉcha̱jo xota̱ xi kji̱e̱ ꞌniújín ndyi̱a̱, achichí kjo̱a̱xkéto̱n tjíjin ini̱ma̱a̱, xota̱ xi ꞌniú ndajín boá ngindyi̱ko̱n Néná.

¹⁵ Jè íjñámasien ndi̱yà xí kixi̱i̱, kó jè kichajá nga bo̱a̱ ndyi̱tsꞌèn xikoó nda̱ xi ꞌmí Balaa̱n, ndií Beoo̱r, kui xi to̱n kamámejeén, kó katsꞌén ni xi kixi̱jiín.

¹⁶ Kó kiniꞌánxchánjo̱ ta̱ngatꞌanii̱ jeé. Ngo bórró, cho̱ chꞌià xi májiín chji̱a̱, tsíchji̱a̱jo Balaa̱n xikótsꞌèn chji̱a̱ ngo xota̱, kó íchjaá tsi̱ꞌe̱ nga ngiti̱ katsꞌénjín kui kjo̱a̱tsobeé.

¹⁷ Kui já xí ndyi̱ꞌboṉcha̱a̱ xikónií ndáńchꞌi̱ xi je kixíyà, ko̱jo xikónií ṉdi̱ xi ta̱xkiya fíjo̱ tjo̱o̱. Néná je íjñandaa̱ ngo ngi̱ndie nínga ꞌniú jñó tsi̱ꞌe̱ nga ki̱a̱ kꞌuíndo.

¹⁸ Ngatꞌa̱ achichí nkꞌa chji̱a̱ ta̱nga én xi jmí ni chjíjiín boá xi chji̱a̱. ꞌBoṉcha̱jo xotaa̱ tsi̱ꞌe̱ nga sa̱ꞌín ni xi ndajíntsꞌeén ko̱jo ni xi ndajín xi mejeén yojoo̱, kó ꞌboṉcha̱jo xota̱ xi sꞌe̱ tsí ndyi̱tsꞌèn ngo kjo̱a̱ꞌniú nga ndyi̱mongaa̱ ni xi ndajín xi niꞌaán.

¹⁹ Bo̱a̱ ndyi̱tsoó xotaa̱ nga sꞌi̱ndondé, kó kuí síndo, xikoó moso̱ xi kastiñaá ni xi fotsoo̱n. Ngatꞌa̱ ngayeje ni xi tsꞌénná xi tsꞌénchájáná, kuí nii̱ xi ꞌbíndoꞌniúná.

²⁰ Tsi je ya ñá nga Jesukristoo̱ xi Ndi̱a̱ná, ko̱jo nga kui xi tsꞌaxiéꞌáná, kó tsi kuíni nga je ikiyòo̱ ni xi ndándií kui nga̱sondiee̱, kó tsi ti̱ bo̱a̱ ti̱ si̱ꞌan nginí ñá xikó kiniꞌán ngasꞌe̱, kó tsi kui nii̱ xi ti̱ sa̱ꞌín nginíná nga sa̱ꞌínchajaná, bo̱a̱ tsꞌén nga chꞌo ngase tsꞌén ku̱i̱ndyión ta̱bo̱a̱jiín ngasꞌe̱.

²¹ Ngatꞌa̱ ta̱sara̱ ndatsi kamábejín kui jaá ndi̱yà xí kixi̱i̱, ta̱bo̱a̱jiín tsi ngije kamábe, xín sa̱ꞌínkjaꞌàa̱ yojoo̱ kui kjo̱a̱botíxoma tsjie xi je katseꞌeé.

²² Ta̱nga kui jaá jè bo̱a̱ kamaá xikó tsó kui én xchá xí ja̱koxi̱i̱: “Ńñaá kjinie nginí ni xi fosoó, kó chi̱nga̱ xi je tsjiee̱ fí tsꞌén ndáse nginí yojoo̱ ngi̱jin ndásee̱.”