2 Xo̱jo̱o̱n Peé 1 - Xo̱jo̱n eén Néná

Bi̱ tsꞌén katsꞌéntinde Peé xota̱ na̱ngo̱xi̱i̱

¹ Án xí ꞌmína Ximo̱ Pé, nda̱ moso̱ ko̱jo nda̱ apostroo̱ Jesukristoo̱, tsꞌentindejnúꞌun jún xota̱ xi je kasakojnú ngo kjo̱a̱sꞌijin xi bo̱a̱ tsꞌén chjínií xikoó xi tsa̱ji̱n, ta̱ngatꞌanii̱ kjo̱a̱kixi̱i̱ Jesukristoo̱, kui xi Néná xí tsꞌaxiéꞌáná.

² Ngatama tsie kjo̱a̱nda ko̱jo kjo̱a̱xió xi kꞌuiéjnú nga xcha̱jnú Néná ko̱jo Ndi̱a̱ná Kjisoo̱.

Bi̱ tsꞌén íni̱jmì Peé kjo̱a̱a̱ xikótsꞌèn chjiéngá kꞌuíndo xota̱ xi tsi̱ꞌe̱ Néná

³ Néná katsꞌénkjién ngaꞌniuú nga katsjáná ngayeje ni xi chjiénná, kó ta̱kó tsꞌéntsjáná tsi̱ꞌe̱ nga ku̱i̱ndyión xikótsꞌèn mejeén kui, kó katsjáná ngayeje kui nii̱ kjiꞌanga kamáyà Jesukristoo̱. Ngatꞌa̱ nga tsíchji̱a̱ná, bo̱a̱ katsꞌén, tsi̱ꞌe̱ nga ki̱a̱ ko̱ndókjo̱a̱ ñá nínga botixómá kui.

⁴ Kó ti̱ katsjáná kjo̱a̱nda xi chjínií ko̱jo xi tsjakon xi katsóyàtjón nga tsja̱aná. Ta̱ngatꞌanii̱ kui nii̱ nga jún ka̱ma ku̱i̱ndyionjnú xi kótsꞌèn tikón Néná, nga je ikiyojnúu̱ ni xi ndajín xi chji̱a̱ni kui nga̱sondiee̱, kui ni xi mejeén ini̱ma̱a̱ kui xotaa̱.

⁵ Kuíni nga chjiéngá si̱ꞌánjnú ngo kjo̱a̱ꞌniú tsi̱ꞌe̱ nga kjo̱a̱sꞌijinjnú tjasónjnúu̱ nga nda si̱ꞌánjnú. Kó kui kjo̱a̱ndaniꞌaán, tjasónjnúu̱ kjo̱a̱kjíntakón.

⁶ Kó kui kjo̱a̱kjíntakoón, tjasónjnúu̱ nga kamáꞌniújnú yojojnú. Kó kui kjo̱a̱a̱ nga maꞌniújnú yojojnú, tjasónjnúu̱ kjo̱a̱chiyákjo̱a̱. Kó kui kjo̱a̱chiyákjo̱a̱a̱, tjasónjnúu̱ nga si̱ꞌandikónjnú Néná.

⁷ Kó kui kjo̱a̱yandikoón Néná, tjasónjnúu̱ nga tjó si̱ꞌánjnú xingi̱jnú xikoó tsi ntsꞌiejnú, kó kui kjo̱a̱a̱ nga niꞌántjó xingi̱jnú xikoó tsi ntsꞌié, tjasónjnúu̱ ngase kjo̱a̱tjó.

⁸ Ngatꞌa̱ tsi bo̱a̱ ndyi̱niꞌánjnú, kó tsi ꞌniú tikónjinjnú kui nii̱, nda si̱ꞌánjnú ni xi si̱ꞌánjnú, kó kjo̱a̱a̱ nga je yàjnú Ndi̱a̱ná Jesukristoo̱ tsiꞌéjín ka̱majnú.

⁹ Ta̱nga xota̱ xi tsꞌénjín kui nii̱, xikónií ngo xota̱ xi ti̱ka̱ ko̱jo xi kjinjín be, ngatꞌa̱ jè kichíyaá nga kiniꞌántsjie jé xi katsꞌén ngasꞌe̱.

¹⁰ Kuíni ntsꞌie, nga Néná je tsíchji̱a̱jnú ko̱jo nga je jaꞌájinjnú, chónjnú nga kui nii̱ ꞌniú kꞌuíjinjnú, ngatꞌa̱ tsi bo̱a̱ si̱ꞌánjnú jmíni̱xtjin kꞌo̱kajnú ngindie jàn.

¹¹ Ngatꞌa̱ bo̱a̱ tsꞌén nga tsjatsꞌèn ko̱e̱ꞌéndièjnú nga ku̱i̱tjásꞌi̱e̱njnú ngi̱ndie nínga botixómá ngatsjéni̱xtjin Ndi̱a̱ná kui xi tsꞌaxiéꞌáná, kui xi Jesukristoo̱.

Bi̱ tsꞌén íni̱jmì Peé míkjo̱a̱a̱ nga ta̱kó tsꞌénbokoyaá xota̱ na̱ngo̱xi̱i̱

¹² Kuíni nga ngatsjéni̱xtjin sa̱ꞌinkjaꞌátsjienjnúꞌun ni xi tjítsꞌenꞌindójnúꞌun, ndatsi je yàjnú, kó ndatsi ꞌniú tindyiàjnú ngi̱yaa̱ ja̱koxi̱ xi je akakoyájnú.

¹³ Kuí nii̱ xi kixi̱ kjimana, tji̱e̱nga tikòn an ngi̱jii̱n kui yojoo̱, nga tjínna ngo kjo̱a̱ꞌniú nga kotixomájnúꞌun.

¹⁴ Jè be an nga ngi chiboa ni̱xtjin tikónna nga kꞌuijñámasien an kui yojoo̱, xikó katsóna Ndi̱a̱ná Jesukristoo̱.

¹⁵ Kó ti̱ sa̱ꞌin an ngo kjo̱a̱ꞌniú tsi̱ꞌe̱ nga ngije kꞌien an, ngatsjéni̱xtjin kjo̱a̱ꞌátsjienjnú kui ni xi̱ꞌbi̱.

¹⁶ Kjiꞌanga kiꞌmíyàjne̱ nga kji̱ndi̱bá nginí Ndi̱a̱ná Jesukristoo̱ nga kjo̱e̱ꞌéjo̱ ngaꞌniuú, jmí tsi én xchá maña̱ xi ta̱ kiniꞌánda xí tsangíntjingijne̱, ta̱sá kiꞌmíyàjne̱ ngatꞌa̱ ji̱n má xi kamáyàjne̱ ngaꞌniuú Ndi̱a̱ná.

¹⁷ Ngatꞌa̱ kjiꞌanga Jesukristoo̱ iskjíbé kjo̱a̱yandikón ko̱jo kjo̱a̱je xi katsjaá Néná xí Na̱ꞌmii̱, kanangiyaa̱ ngo nda̱ xi kandaꞌyá, xi tjiín kjo̱a̱je xi bi̱ katsó: “Kuí xi̱ꞌbi̱ xi ndí tjóna, ꞌniú tsjátjínna kjo̱a̱a̱ kui.”

¹⁸ Kó ji̱n má xi kandaꞌyájne̱ kui nda̱ xi kjindibáni ndiꞌakꞌajmi jàn, kjiꞌanga tindyionjo̱jne̱ Jesukristoo̱ ki̱a̱ tji̱ngi̱ nínga kamá kui kjo̱a̱ndikoón.

¹⁹ Kó bo̱a̱ tsꞌén nga jatjo kixi̱ én xí tsíchji̱a̱ já chji̱ni̱e̱ꞌe̱én Néná. Nda ndyi̱niꞌánjnú tsi ndyi̱bosiénnijonjnúu̱ kui eén, ngatꞌa̱ kuí boá xi kjima xikoó ngo ndiꞌí xí tsꞌentsíjen nga jñoó, ngaskande nga sisi̱én nga kamángindyiojón, kó ńño tsiee̱ kjo̱tjo tsi̱ꞌe̱ nga sa̱ꞌíntsijee̱n ini̱ma̱jnú.

²⁰ Tjón ngatamakjínjnú kui nii̱, nga ngojín én xí Néná tsáyà xi kjitꞌa kui xo̱jo̱n eén Néná xi ka̱ma si̱ꞌankjién xikótsꞌèn mejénná ñá.

²¹ Ngatꞌa̱ én xí katsóyà Néná jmí tsi xota̱ nga̱sondiee̱ xi kjindibánii̱, ta̱sá já chji̱ni̱e̱ꞌe̱én Néná xi tsíchji̱a̱ eén Néná, ngatꞌa̱ A̱si̱énni̱xtjii̱n Néná boá xi katsꞌénkíchji̱a̱ én xí Néná kjindibánii̱.