2 Timoo̱ 4 - Xo̱jo̱n eén Néná

¹ Ngindyi̱ko̱n Néná, ko̱jo ngindyi̱ko̱n Ndi̱a̱ná Jesukristoo̱, kui xi ka̱tso̱yà tsi nda ko̱jo tsi ndajín katsꞌén xota̱ xi síndoo̱, ko̱jo xi je jesoón, ni̱xtjin nga ko̱kó yojoo̱, kjiꞌanga ko̱tíxoma, ꞌniú míꞌaá ji,

² nga tꞌíni̱jmìi̱ xotaa̱ kui eén, bo̱a̱ ti̱ꞌin ji nga ka̱ma, ko̱jo nga ka̱májín, ti̱ꞌinꞌindakon ji tsi̱ꞌe̱ nga sku̱i̱e̱ tsi ndajínkjiꞌi ni xi katsꞌén, ti̱ꞌinchji̱ni̱ ji ko̱jo te̱ꞌéngaꞌníi̱, kó takoyèe̱ nga bi̱ tsiee̱ ka̱ma takín.

³ Ngatꞌa̱ kji̱ndi̱bá ni̱xtjin nga xotaa̱ ngiti̱ sa̱ꞌínsénjiín nga ku̱i̱ntꞌiè kuí kjo̱a̱bokoyá xi ndaa̱, ta̱sá ni xi mejeén ini̱ma̱a̱ xi sa̱ꞌín, kó ko̱ngase ngo sen mostro̱ xi ko̱kóyaá ni xi tsjaa̱ nga ku̱i̱ntꞌie̱é kuí.

⁴ Kui xotaa̱ ngiti̱ ku̱i̱ntꞌièjiín én xí ja̱koxi̱i̱, kó ta̱sá ngayeje to̱ko̱ya én xchá xí sa̱ꞌínseén.

⁵ Ta̱nga ji, ta̱jmì niní xi si̱ꞌin ji, nda tsꞌén tꞌíjñí ji kjo̱a̱kjíntakóo̱n, ko̱jo ti̱ꞌinchíkjo̱e̱ ji kjo̱a̱ni̱ma̱ xi ku̱i̱tja̱tí, ko̱jo tꞌíni̱jmì ji éntjatsi̱e̱e̱ Néná, kó nda ti̱ꞌinkjatjosén ji xáa̱.

⁶ Ngatꞌa̱ an, jè ma ka̱ma an xikoó ngo chji̱e̱ xi niꞌánkꞌasꞌiee̱n Néná, kó jè ma kjachó chi̱bo̱a̱a̱ nga kꞌuijñá an kui nga̱sondiee̱.

⁷ Je askjantjé an nga ichjáa̱ xota̱ xi kondra̱ kijínii̱ eén Néná. Jè jachó an nínga fetꞌaa̱ ndi̱yàná. Ngatsjéni̱xtjin nga kisꞌijinna Néná.

⁸ Ngotꞌe̱ ꞌne̱, jè sa̱kóna ngo ni xi niꞌán, xi sakoó xota̱ xi kixi̱ síndo ngindyi̱ko̱n Néná, kui xi tsja̱ana nga kjo̱chó ni̱xtjin kui Ndi̱a̱ná xí kixi̱ tsꞌén skotsíjee̱n mí ni xi katsꞌén xotaa̱, kó jmí tsi ta̱ án tsí xi tsja̱ana kui chjí xí niꞌaán, ti̱ tsja̱arií ngayeje xota̱ xi achichí kjo̱a̱tjó tjiín nga ndyi̱koyaa̱ nga tsjatsꞌèn kjo̱e̱ꞌe nginí Ndi̱a̱ná.

Pabloo̱ bi̱ tsꞌén atíxomaa̱ Timoo̱ ni xi mejeén nga sa̱ꞌín

⁹ Ti̱ꞌin ji ngo kjo̱a̱ꞌniú tsi̱ꞌe̱ nga tsá kji̱ndi̱béchinní,

¹⁰ ngatꞌa̱ Ndemaa̱, tjó ngase kamaá nii̱ kui nga̱sondiee̱, kó jè íjñámasienna nga kijí na̱xi̱ńdáꞌniú Tesalónika̱. Kresentee̱ je kijí nangi Ngalasia̱, kó Titoo̱ nangi Ndalmasia̱ kijí.

¹¹ Ta̱ kuí tsí Rkaa̱ xi kꞌi̱e̱ tikónjo̱na. Ti̱ndyi̱sé ji Markoo̱, kó nijan ndibéje̱, ngatꞌa̱ kuí boá xi ka̱maa̱ ko̱síko̱jona xá xi tjítsꞌen an.

¹² Kó Tikikoo̱ na̱xi̱ńdáꞌniú Éfeso̱ katsangiya an.

¹³ Kjiꞌanga kji̱ndi̱bé ji, chꞌi̱e̱ní kuí ńjñona xi boajá an nga ma cho̱nchꞌaàn, kui xi ijñá an na̱xi̱ńdáꞌniú Troa̱ ki̱a̱ ndiꞌaa̱ Karpoo̱, kó ndibéje̱ní xo̱jo̱nna, kuí má xi ꞌniú chjiénna kui xi tji̱xin kamándajo̱ni.

¹⁴ Achichí kjo̱a̱xti katsjána Rijaá, nda̱ chji̱ni̱e̱ki̱cha̱a̱. Ndi̱a̱ná ku̱i̱ꞌíchjií kjo̱a̱a̱ ni xi katsꞌén.

¹⁵ Chíi̱n yojòo̱ kjo̱a̱a̱ kui, ngatꞌa̱ kondra̱ tikónnii̱ kui eén Néná xi ndyi̱bokoyá ñá.

¹⁶ Kjiꞌanga tjón tsꞌaxiéꞌá an yojona ngindyi̱ko̱n jáxaá, nde ta̱ꞌyajín xi asíko̱jona, ngayeje xotaa̱ índomasienna, mejénna nga Néná ko̱a̱ꞌa̱xki̱jiín kui nii̱.

¹⁷ Ta̱nga Ndi̱a̱ná kisꞌijñajo̱na, kó katsjána ngaꞌniú, tsi̱ꞌe̱ nga kamána nga íni̱jmì án eén Néná, kó tsintꞌié ngayeje xota̱ xi jundío̱jiín. Bo̱a̱ tsꞌén nga Néná tsꞌaxiéꞌána nga kiniꞌánkꞌiénjínna.

¹⁸ Kó Ndi̱a̱ná kꞌo̱xiéꞌána kjo̱a̱a̱ ngayeje ni xi ndajiín, kó kꞌo̱xiéꞌána tsi̱ꞌe̱ nga kui ko̱tíxomana ki̱a̱ ndiꞌakꞌajmii̱. Kui tsi̱ꞌe̱ ngatama kjo̱a̱jee̱ ngatsjéni̱xtjin. Bo̱a̱ kjiꞌi.

Pabloo̱ bi̱ tsꞌén katsꞌénkjietꞌa xo̱jo̱o̱n

¹⁹ Tinde bo̱a̱ tꞌín ji na̱ Priskaa̱, ko̱jo Akilaa̱, ko̱jo xota̱ xkjín Onesíforoo̱.

²⁰ Erastoo̱ ki̱a̱ kisꞌijña na̱xi̱ńdáꞌniú Korinto̱, kó Trófimoo̱ na̱xi̱ńdáꞌniú Mileto̱ kastie chiꞌin, kó ki̱a̱ ijñá an.

²¹ Ti̱ꞌin ji ngo kjo̱a̱ꞌniú nga kji̱ndi̱bé ji ngindiee̱ cho̱nchꞌaàn. Tinde xò bo̱a̱ tsó Eubuloo̱, ko̱jo Pundentee̱, ko̱jo Linoo̱, ko̱jo na̱ Klaundiaa̱, ko̱jo ngayeje ntsꞌié xí síndo kꞌi̱e̱e̱.

²² Ndi̱a̱ná Jesukristoo̱ ngasꞌijñajin ini̱màa̱. Néná ngatsjájnú kjo̱a̱ndaa̱ ngayejejnú. Bo̱a̱ kjiꞌi.