2 Timoo̱ 3 - Xo̱jo̱n eén Néná

Bi̱ tsꞌén íni̱jmì Pabloo̱ xi kókón ka̱ma xotaa̱ ngindiee̱ nga kjo̱e̱ꞌe nginí Kristoo̱

¹ Ti̱ chjiéngá xchi̱e̱ ji kui nii̱ nga: Nga ni̱xtjin xi fetꞌaa̱, kji̱ndi̱bá ni̱xtjin xi ta̱nisién niꞌin ka̱ma.

² Ngatꞌa̱ xotaa̱ ka̱maꞌonkon, kó to̱o̱n xi ꞌniú sa̱ꞌíntjó ngase, ko̱jo je ka̱maa̱ yojoo̱, ko̱jo ta̱kuítsí xi sa̱ꞌíntjó yojoo̱, ko̱jo chꞌo ka̱tso̱o̱ Néná, ko̱jo ku̱i̱ntꞌiéꞌénjiín xi xchaá, ko̱jo xota̱ xi tsꞌénkiejín yojoo̱ nga bosíko̱jo ka̱ma, kó sku̱i̱e̱ndikónjín Néná.

³ Jmí kjo̱a̱tjó, ko̱jo jmí kjo̱a̱ni̱ma̱takón kꞌuiéjiín, ko̱jo ku̱i̱ꞌíndisotaꞌin xota̱ xi ngasee̱, ko̱jo ka̱májiín ku̱i̱ꞌíꞌniuú yojoo̱ nga ni xi ndajín sa̱ꞌín, ko̱jo tamá ka̱ma, ko̱jo kondra̱ ka̱maa̱ ngayeje ni xi ndaa̱.

⁴ Ko̱tíñá xkjín, ko̱jo ta̱xkiya sa̱ꞌín ngo ni, ko̱jo achichí je kꞌo̱xié yojoo̱, ko̱jo tjó ngase ka̱maa̱ kjo̱a̱tsjaa̱ yojoo̱ ta̱bo̱a̱jiín nga Néná ko̱ngase.

⁵ Ja̱ sa̱ꞌín xi bendikón Néná sa̱ꞌín, ta̱nga kjo̱a̱a̱ xikótsꞌèn síndo, ko̱kó nga jmíjiín kui ngaꞌniú xí Néná tsjaá xota̱ xi bendikón. Ngata̱ ki̱a̱jín niꞌínkamaje̱ ji kui xota̱ xi̱ꞌba̱.

⁶ Ngatꞌa̱ kuí boá kui xotaa̱ xi ꞌbosꞌien xki̱ ndiꞌa, kó ꞌbindísojo̱ ínchjín xi inda tjimá xi májiín ꞌbíꞌniuú yojoo̱ nga ndyi̱tsꞌèn jé, kui xi ndyi̱tsꞌènkjátjosón ta̱jmì niní xi mejeén ini̱ma̱a̱.

⁷ Kui ínchjiín ngatsjéni̱xtjin mejeén nga ka̱maa̱ ngo ni xi tja̱tsi̱e̱, kó jmíni̱xtjin ka̱maa̱ ka̱makjiín ni xi ja̱koxi̱i̱.

⁸ Kó xikó katsꞌén já tjiꞌe Janee̱ ko̱jo Jambree̱ nga kondra̱ kijií Moisee̱, ti̱ bo̱a̱ ti̱ tsꞌén kui xotaa̱ kondra̱ síndoo̱ ni xi ja̱koxi̱i̱. Xota̱ xi je jatson kjo̱a̱kjíntakoón boá, kó ya nga ngiti̱ sꞌijinjiín Néná.

⁹ Ta̱nga kjo̱tjosónjín ni xi ndyi̱tsꞌènkjó, ngatꞌa̱ ngayeje xotaa̱ makjiín nga xota̱ chi̱ni boá, xikó kamaá Janee̱ ko̱jo Jambree̱.

Pabloo̱ bi̱ tsꞌén atíxoma ngasee̱ Timoo̱

¹⁰ Ta̱nga ji Timo̱, jè nda ye ji ni xi akoyá an, ko̱jo xikó tsꞌen an, ko̱jo mí ni xi mejénna sa̱ꞌin an, ko̱jo kjo̱a̱sꞌijinna, ko̱jo kjo̱a̱chiyákjo̱a̱na, ko̱jo kjo̱a̱tjóna, ko̱jo xikótsꞌèn tjítsꞌenchíkjo̱a̱ an ni xi tsꞌénfoaꞌatio an,

¹¹ ti̱ jè ye ji nga ikiyotji̱ngina, ko̱jo kui kjo̱a̱ni̱ma̱ xi jaꞌatio an, ko̱jo kótsꞌèn katsꞌenchíkjo̱a̱ an ki̱a̱ na̱xi̱ńdáꞌniú Antiokiya̱, ko̱jo na̱xi̱ńdáꞌniú Ikonio̱, ko̱jo na̱xi̱ńdáꞌniú Listra̱, achichí kjo̱a̱miyotji̱ngi xi jaꞌajin an ki̱a̱a̱, ta̱nga Ndi̱a̱ná tsꞌaxiéjinna ngayeje kui nii̱.

¹² Kó ja̱koxi̱ boá nga ngayeje xota̱ xi mejeén sku̱i̱e̱ndikón Néná, kó sꞌijii̱n Kristo̱ Kjisoo̱, tsie kjo̱a̱miyotji̱ngi kjo̱a̱ꞌatio.

¹³ Ta̱nga kui xota̱ xi ndajiín, ko̱jo xi ndyi̱ꞌbindísoó, ꞌniú ngase ndajín ka̱maa̱, nga kꞌo̱ṉcha̱ ko̱jo nga xꞌi̱ṉcha̱jo.

¹⁴ Ta̱nga ji ta̱kó ꞌniú tꞌentji̱ngìi̱ ngayeje kui ni xi je akakoyaá, kui ni xi je kasasiee̱n, kó ye ji ꞌyání bo̱a̱ xi akóyaá,

¹⁵ kó nga ndeskande koó nga nda̱chí ji nga ye ji xo̱jo̱n én tsjiee̱ Néná, kui xi tsi si̱ꞌinye ji, tsja̱á kjo̱a̱kjínkón, tsi̱ꞌe̱ nga kjo̱tjoꞌàa̱ yojòo̱ nga sꞌijii̱n Kristo̱ Kjisoo̱.

¹⁶ Ngayeje ni xi kjitꞌa xo̱jo̱n eén Néná, A̱si̱énni̱xtjii̱n Néná boá xi íjñajii̱n én xi ítꞌa xota̱ xi katsꞌénꞌindó ngayeje kui xo̱jo̱o̱n, kó nda kuí eén tsi̱ꞌe̱ nga ko̱ko̱yá, ko̱jo tsi̱ꞌe̱ nga ꞌniú ko̱ndókjo̱a̱jo xotaa̱, ko̱jo tsi̱ꞌe̱ nga si̱ꞌanchji̱ni̱e̱ xotaa̱, ko̱jo tsi̱ꞌe̱ nga ko̱ko̱yaá xotaa̱ kótsꞌèn nga kixi̱ kꞌuíndo,

¹⁷ kó kuí xo̱jo̱o̱n xi sa̱ꞌín nga xota̱ xi ndyi̱tsꞌèn xaá Néná, kꞌuíndonda nga ka̱maa̱ nga sa̱ꞌín ngayeje ni xi ndaa̱.