2 Timoo̱ 1 - Xo̱jo̱n eén Néná

Pabloo̱ bi̱ tsꞌén katsꞌéntinde Timoo̱

¹ Án boá xi ꞌmína Pabloo̱, nda̱ apostroo̱ Kristo̱ Kjisoo̱ ngatꞌa̱ Néná xí bo̱a̱ tsꞌén kamámejeén, xikótsꞌèn Néná katsóyàtjón nga tsja̱á kjo̱a̱mindyion xota̱ xi sꞌijii̱n Kristo̱ Kjisoo̱.

² Tjítsꞌentindee ji Timo̱, ji xi ndí tjóna. Néná xí Na̱ꞌmii̱ ko̱jo Jesukristoo̱, kui xi Ndi̱a̱ná nga tsjaa kjo̱a̱ndaa̱, ko̱jo kjo̱a̱ni̱ma̱takoón, ko̱jo kjo̱a̱xioó.

Pabloo̱ bi̱ tsꞌén katsjángaꞌniuú Timoo̱

³ Tsjàa̱ ndokꞌóchjì Néná nga nda tjítsꞌénjoo̱, kó nga foaꞌátsjienna ji ngatsjéni̱xtjin chjiáa̱ Néná nga ni̱xtjin ko̱jo nga ni̱xtji̱e̱n. Tsjie tikón kjo̱a̱kjíntakónna nga tsꞌén an xaá Néná, xikó katsꞌén xota̱ xi xchána.

⁴ Nga foaꞌátsjienna nga kachjatjén ndándyíkin, mejénna nga skuié ngiñaá tsi̱ꞌe̱ nga kꞌuiéna kjo̱a̱tsja.

⁵ Foaꞌátsjienna nga ngayeje ini̱ma̱a̱ nga sꞌijii̱n Néná. Tjón má na̱xcháa̱ xi ꞌmí na̱ Loindaa̱ kisꞌijii̱n, ko̱jo na̱áa̱n xi ꞌmí na̱ Eunisee̱ nga. Kó ngotꞌe̱ ꞌne̱ be an nga ti̱ bo̱a̱ ti̱ tsꞌén sꞌijii̱n ji nga.

⁶ Kó kuíni nga tsꞌénbotixomaa̱ tsi̱ꞌe̱ nga si̱ꞌinkjìn jí kui kjo̱a̱nda xi katsjaá Néná kjiꞌanga íjñasoón ndsa̱ an.

⁷ Ngatꞌa̱ Néná jmí tsi ngo a̱siénni̱xtjin xi tsiendikón xi katsjáná, a̱siénni̱xtjin xi tjiín ngaꞌniú boá, xi tjiín kjo̱a̱tjó, ko̱jo xi tsi̱ꞌe̱ nga ka̱máná nga nda kongínjo̱ yojoná.

⁸ Kó kuíni nga ngata̱, soboájín maá nga kꞌuiníjmì jí kjo̱a̱a̱ Ndi̱a̱ná, ti̱nde ngata̱ soboájín maá nga kꞌuiníjmì jí kjo̱a̱a̱ an, nga ndo̱bo̱a̱yà tjiꞌyá an ta̱ngatꞌanii̱ Jesukristoo̱. Kó jí nga ku̱i̱tjéjin ji kjo̱a̱ni̱ma̱ ta̱ngatꞌaa̱ éntjatsi̱e̱e̱, Néná tsja̱á ngaꞌniú tsi̱ꞌe̱ nga xchíkjo̱a̱a̱ xikoó an.

⁹ Kui Néná xí tsꞌaxiéꞌáná, ko̱jo xi tsíchji̱a̱ná tsi̱ꞌe̱ nga ngo na̱xi̱ńdá tsjie ka̱ma, jmí tsi kjo̱a̱a̱ ni xi kiniꞌán, ta̱sá kjo̱a̱a̱ ni xi je tjíndaa̱, ko̱jo kjo̱a̱a̱ kjo̱a̱nda xi katseꞌéná ñá nga kui Kristo̱ Kjisoo̱ xi ko̱ndókjo̱a̱ ñá ndeskande ni̱xtjin nga katsꞌénda nga̱sondiee̱.

¹⁰ Kó ngotꞌe̱ ꞌne̱, Néná akó kjo̱a̱ndaa̱ nga jeꞌe Kristo̱ Kjisoo̱, kui xi tsꞌaxiéꞌáná, kó kuí boá xi katsꞌénkjié ngaꞌniuú kjo̱a̱bo̱yaa̱, kó akó nga ka̱ma kꞌuiéná ngo kjo̱a̱mindyion nínga ngiti̱ ko̱yàján ñá, ta̱ngatꞌanii̱ ni xi tsó éntjatsi̱e̱e̱.

¹¹ Néná katsjáxána tsi̱ꞌe̱ nga ka̱ma an ngo xi ku̱i̱ꞌíni̱jmì éntjatsi̱e̱e̱, ngo apostro̱ ko̱jo ngo mostro̱.

¹² Kuíni nga tsie kjo̱a̱ni̱ma̱ xi tsꞌénfoaꞌatio an kjo̱a̱a̱ ngayeje kui nii̱, ta̱nga soboájín mana, ngatꞌa̱ jè be an ꞌyání xi je kisꞌijinna, kó be án nga ja̱koxi̱ nga kui tjiín ngaꞌniú, nga ta̱kó sꞌi̱ni̱jmì kui én xi katseꞌéna ngaskande ni̱xtjin nga Néná skotsíjee̱n mí ni xi katsꞌén nga ngo nga ngo xotaa̱.

¹³ ꞌNiú ti̱ꞌinsꞌijin ji Kristo̱ Kjisoo̱ kó ngatꞌieé kjo̱a̱tjoó, tsi̱ꞌe̱ nga bo̱a̱ tsꞌén ko̱ko̱yé ji kjo̱a̱bokoyá xi ndaa̱ xikótsꞌèn akóyaá án.

¹⁴ Ngatasikójoo A̱si̱énni̱xtjii̱n Néná xi tikónjinná tsi̱ꞌe̱ nga xchíi̱n kui kjo̱a̱bokoyá nda xi katseꞌeé nga ko̱ko̱yé ji.

¹⁵ Ja̱ jè yé ji nga ngayeje xota̱ xi chji̱a̱ni nangi Asia̱, kó ngaskande Fijeloo̱ ko̱jo Ermójenee̱ índomasienna.

¹⁶ Ndi̱a̱ná nga tsjaá kjo̱a̱ni̱ma̱takoón xota̱ xkjín Onesíforoo̱, ngatꞌa̱ kui nda̱a̱ achichí kjín ndi̱yà katsjangaꞌniúna, kó soboájín kamaá nga ndo̱bo̱a̱yà kisꞌijña an.

¹⁷ Kjiꞌanga kisꞌijña na̱xi̱ńdáꞌniú Roma̱ ꞌniú tsangasena nga jachó, ngaskande nga kasakoo̱ an.

¹⁸ Ndi̱a̱ná nga tsjaá kjo̱a̱ni̱ma̱takoón ni̱xtjin nga skotsíjee̱n mí ni xi katsꞌén nga ngo nga ngo xotaa̱. Kó ji jè yé cha̱n cha̱n ji kókjiꞌi asíko̱joná Onesíforoo̱ ki̱a̱ na̱xi̱ńdáꞌniú Éfeso̱.