1 Xota̱ Korinto̱ 8 - Xo̱jo̱n eén Néná

Bi̱ tsꞌén akóyá Pabloo̱ kjo̱a̱a̱ nichinie xi niꞌánkꞌasꞌiee̱n a̱sie̱én ngo ne xi tsꞌénda xotaa̱

¹ Kuichjiájomájnúꞌun kjo̱a̱a̱ nichinie xi niꞌánkꞌasꞌiee̱n a̱sie̱én ngo ne xi tsꞌénda xotaa̱. Jè ya ñá nga makjínná ni xi̱ꞌba̱, ta̱nga ni xi be xotaa̱, kuí xí nkꞌakon ꞌboxié, tji̱e̱nga kjo̱a̱tjoó, kuí xí tsja̱angaꞌniuú xotaa̱.

² Kó tsi tjín xí tsꞌénkjó nga be ngo ni, kuí boá xi kji̱e̱ bejín xikótsꞌèn chjiéngá sku̱i̱e̱.

³ Ta̱nga tsi tjín xota̱ xi ndyi̱tsꞌèntjó Néná, Néná jè be ꞌyá xota̱ xi̱ꞌba̱.

⁴ Kjo̱a̱a̱ nichinie xi niꞌánkꞌasꞌiee̱n a̱sie̱én ngo ne xi tsꞌénda xotaa̱, jè ya nga kui nee̱, jmí ni chjíjiín kui nga̱sondiee̱, kó ti̱ jè ya nga ta̱ ngo tsí má Néná.

⁵ Nga ja̱koxi̱ tjín nkꞌa jàn, ko̱jo tꞌanangii̱ xi ne tsoó xotaa̱, kó ngaskande kjín ne, ko̱jo kjín ndi̱a̱ tjín kjimaa̱ xotaa̱.

⁶ Ta̱nga ñá jè ya nga ta̱ ngo tsí má Néná xí tikón, xi Na̱ꞌmii̱, xi katsꞌénda ngayeje ni xi tjiín, kó kuí tsi̱ꞌe̱ ñá, kó ta̱ ngo tsí má Ndi̱a̱ná, kui xi Jesukristoo̱, kó ta̱ngatꞌanii̱ kui nga Néná katsꞌénda ngayeje nii̱, kó ta̱ngatꞌanii̱ Jesukristoo̱ nga tindyión ñá.

⁷ Ta̱nga jmí tsi ngayeje xota̱ xi be kui nii̱, ngatꞌa̱ tjín káꞌá xota̱ xi je kamángaá ngaskande ngotꞌe̱ nga tsꞌéntsjaà a̱sie̱én ngo ne xi tsꞌénda xotaa̱, kó bo̱a̱ tsꞌén makjiín nga ta̱kó ndyi̱kjinie nichinie xi xikoó tsi ja̱koxi̱ nga kui nee̱ xi tsi̱ꞌe̱, kuíni nga tsꞌénkjó nga ndándí síndo ngindyi̱ko̱n Néná, ngatꞌa̱ kji̱e̱ ꞌniújín tikón kjo̱a̱kjíntakoón.

⁸ Nga ja̱koxi̱ jmí tsi ta̱ngatꞌanii̱ nichiniee̱ nga ꞌniú ngase tiña ku̱i̱ndyiontꞌáa̱ Néná, ngatꞌa̱ jmí tsi nda ngase ka̱ma ñá kjo̱a̱a̱ nichiniee̱, ti̱nde jmí tsi chiboa ngase ka̱ma ñá kjo̱a̱a̱ nga xi̱ni̱e̱ jàn nichinie.

⁹ Xota̱ ndé ñá nga xi̱ni̱e̱ ta̱jmì niní. Ta̱nga chónjnú tsi ta̱ngatꞌanii̱ ni xi xi̱ni̱e̱jnú, nga sa̱ꞌínjé ngo xota̱ xi kji̱e̱ ꞌniújín sꞌijii̱n Néná.

¹⁰ Ngatꞌa̱ tsi tjín xí kji̱e̱ ꞌniújín tikón kjo̱a̱kjíntakoón, kó tsi sku̱i̱e̱e̱ ji nga je ye ji kui nii̱, kó nga ki̱a̱ tindyintꞌe nga tichini nichinie nínga niꞌándikón kuí a̱sie̱én ne xi tsꞌénda xotaa̱, a mí tsi ko̱jo kui nda tsꞌén sku̱i̱e̱ nga ka̱ma skji̱ni̱e̱ kui nichinie xi kiniꞌánkꞌasꞌiee̱n kui a̱sie̱én ne xi tsꞌénda xotaa̱ nga.

¹¹ Kó ta̱ngatꞌanii̱ kui ni xi ye ji, nga xcha̱ja ngo nda̱ ntsꞌié xí ꞌniújín tikón ngi̱yaa̱ ni xi tsi̱ꞌe̱ Néná, kui nda̱ ntsꞌié xí Kristoo̱ kꞌientjéni.

¹² Kjiꞌanga ndyi̱niꞌánkjatsónjínjnú kjo̱a̱kjíntakoón ntsꞌié xi kji̱e̱ ꞌniújín sꞌijii̱n Néná, ndajínkjiꞌi ni xi ndyi̱niꞌánjnúu̱ ntsꞌié, kó ti̱ ndajínkjiꞌi ni xi ndyi̱niꞌánjnúu̱ Kristoo̱ nga.

¹³ Kó kuíni nga, tsi ta̱ngatꞌanii̱ ngo nichinie xi skjíni̱e̱ an nga ngo ntsꞌié án kꞌo̱kajin ngo jé, ta̱sá nginijánjín skjíni̱e̱ an yojo, tsi̱ꞌe̱ nga kꞌo̱kajinjín ngo jé ntsꞌié án.