1 Xota̱ Korinto̱ 2 - Xo̱jo̱n eén Néná

Bi̱ tsꞌén katsóyà Pabloo̱ xikótsꞌèn íni̱jmì eén tja̱tsi̱e̱e̱ Kristoo̱

¹ Kó án já ntsꞌie, kjiꞌanga kijíkónjnúꞌun nga ini̱jmijnúꞌun én xí Néná íjña ꞌma ngasꞌe̱, ta̱nga ngotꞌe̱ je tikón tsijen, jmí én nkꞌa jmí én yiꞌi katsꞌenkjienjín an.

² Kó kamámejénjínna nga kje̱ꞌe ni tsíchji̱a̱ an ngi̱jinjnú, ta̱ ngototo kjo̱a̱a̱ Jesukristoo̱, kui xi akjatꞌa kroo̱.

³ Kó nga jachó má an achichí índa kamá an, kó jatsiéndíkón má an,

⁴ kó nga tsíchji̱a̱jojnúꞌun, ko̱jo nga ini̱jmijnúꞌun eén Néná, jmí én xí tsꞌénkjién xota̱ chji̱ni̱e̱ kjínkón katsꞌenkjienjín an nga tsíchji̱a̱jojnúꞌun, ta̱sá ngaꞌniuú ko̱jo A̱si̱énni̱xtjii̱n Néná akó nga ja̱koxi̱ ni xi tsíchji̱a̱jojnúꞌun,

⁵ tsi̱ꞌe̱ nga sꞌi̱jinjnú kui Néná xí tjiín ngaꞌniuú, kó jmí tsí kjo̱a̱kjínkoón xotaa̱ xi sꞌi̱jinjnú.

Bi̱ tsꞌén akóyá Pabloo̱ ni xi akó A̱si̱énni̱xtjii̱n Néná

⁶ Ta̱nga eén kjo̱a̱kjínkón boá xi ndokjo̱a̱jojne̱ kui xota̱ xi je ꞌniú makjiín eén Néná, ta̱nga kuijín kjo̱a̱kjínkoón kui nga̱sondiee̱, ti̱nde kuijín chji̱a̱ni xi botixómaá kui nga̱sondie xi je kjifee̱.

⁷ Én xí ndyi̱ndokjo̱a̱jne̱ kjo̱a̱kjínkoón Néná xi jmíjín xi bee boá, kjo̱a̱kjínkón xi tjiꞌmaá, tsi̱ꞌe̱ nga ko̱jo ñá, ka̱ma kꞌuiéná kjo̱a̱je xi íjñanda Néná ndeskande ngindiee̱ nga katsꞌénda nga̱sondiee̱.

⁸ Kui kjo̱a̱kjíntakoón nde ngojín xota̱ xi botixómaá nga̱sondiee̱ xi kamákjiín, ngatꞌa̱ tsi kamákjiín kui nii̱, yítꞌajínra̱ kro kui Ndi̱a̱ xi tjiín kjo̱a̱jee̱ tsobo̱a̱.

⁹ Ta̱nga bi̱ tsꞌén kjitꞌa xo̱jo̱n eén Néná: Ni xi nde ngojín xota̱ xi je kamábe, ti̱nde ngojín xota̱ xi je tsintꞌié, ti̱nde ngojín xota̱ xi je íjñajin ngi̱jin ini̱ma̱a̱, kuí ni xi je tikónndaa̱ Néná tsi̱ꞌe̱ xota̱ xi ndyi̱tsꞌèntjó Néná.

¹⁰ Ta̱nga A̱si̱énni̱xtjii̱n Néná jè akóná kui nii̱, ngatꞌa̱ A̱si̱énni̱xtjii̱n ngayeje nii̱ xi kotꞌa, ngaskande ni xi ꞌniú tjiꞌmaá Néná.

¹¹ Ngatꞌa̱, ngojín xota̱ xi be ni xi tsꞌénkjó kje̱ꞌe xota̱. Nga ngo nga ngo xotaa̱ ta̱kuítsí xi be ni xi tsꞌénkjó. Ti̱ bo̱a̱ ti̱ tsꞌén ta̱ꞌyajín xi be ni xi tjíjinkon Néná, ta̱kuítsí A̱si̱énni̱xtjii̱n Néná xí be.

¹² Ta̱nga a̱siénni̱xtjin xi katseꞌéná ñá, Néná xí katsjáná, jmí tsi nga̱sondiee̱, tsi̱ꞌe̱ nga xcha̱ ngayeje kjo̱a̱nda xi tsjáná Néná.

¹³ Én xí akóyáná A̱si̱énni̱xtjii̱n Néná xí niꞌánkjién kjiꞌanga ndokjo̱a̱ kuí nii̱, kó jmí tsi én xí ndibánií kjo̱a̱kjínkoón xotaa̱. Kó bo̱a̱ tsꞌén ꞌmíyáa̱ xota̱ xi tikónjii̱n A̱si̱énni̱xtjii̱n Néná ni xi tsi̱ꞌe̱ A̱si̱énni̱xtjii̱n.

¹⁴ Ta̱nga kjíbéjín kui nii̱ xota̱ xi tsꞌénkjó ni xi tjíjinkon xota̱ nga̱sondiee̱, ngatꞌa̱ ta̱ ton maá, kó makjínjiín, ngatꞌa̱ ti̱kuíní A̱si̱énni̱xtjii̱n xi bokóná ni xi tsi̱ꞌe̱ Néná.

¹⁵ Xi tjíjii̱n A̱si̱énni̱xtjii̱n Néná makjiín ngayeje nii̱, ta̱nga xota̱ xi tsꞌénkjó xikoó xota̱ nga̱sondiee̱, makjínjiín kókón xota̱ xi tjíjii̱n A̱si̱énni̱xtjii̱n Néná.

¹⁶ Ngatꞌa̱ bi̱ tsꞌén je tjítꞌa xo̱jo̱n eén Néná “ꞌYání xi be ni xi tjíjinkon Ndi̱a̱ná. ꞌYá xí ko̱tíxomaa̱ kjo̱a̱a̱ ni xi sa̱ꞌín.” Ta̱nga ñá tikónjinná kjo̱a̱kjíntakoón Kristoo̱.