1 Xota̱ Korinto̱ 1 - Xo̱jo̱n eén Néná

Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Korinto̱

¹ Án boá xi ꞌmína Pabloo̱, nda̱ xi Néná tsíchji̱a̱a̱ nga katsjáxaá, ngatꞌa̱ bo̱a̱ tsꞌén kamámejeén Néná, nga apostroo̱ Jesukristoo̱ kamá. An ko̱jo nda̱ ntsꞌié xi ꞌmí Sóstenee̱ niꞌántindejne̱,

² xota̱ na̱ngo̱xi̱i̱ Néná xi síndo na̱xi̱ńdáꞌniú Korinto̱ kui xi kamátsjie ngindyi̱ko̱n Néná ngatꞌaa̱ Kristo̱ Kjisoo̱. Jún xi Néná tsíchji̱a̱jnú nga xota̱ tsjiee̱ ka̱majnú, ko̱jo kui xota̱ xi ta̱jñà ngi̱ndiení je sꞌijii̱n Ndi̱a̱ná Jesukristoo̱, Ndi̱a̱a̱ kui xotaa̱, ko̱jo Ndi̱a̱ tsa̱ñá.

³ Néná xí Na̱ꞌminá, ko̱jo Ndi̱a̱ná Jesukristoo̱, ngatsjájnú kjo̱a̱ndaa̱ ko̱jo kjo̱a̱xioó.

Bi̱ tsꞌén katsjaá Pabloo̱ ndokꞌóchjì Néná kjo̱a̱a̱ kjo̱a̱ndaa̱ A̱si̱énni̱xtjii̱n

⁴ Ngatsjéni̱xtjin tsjàa̱ ndokꞌóchjì Néná kjo̱a̱a̱ jún, kjo̱a̱a̱ kjo̱a̱nda xi Néná katsjájnú, ngatꞌa̱ Kristo̱ Kjisoo̱ xí katsꞌén nga kasakojnú kui nii̱,

⁵ ngatꞌa̱ ta̱ngatꞌanii̱ Jesukristoo̱ nga Néná katsjájnú ngo kjo̱a̱cho̱n, kjo̱a̱a̱ xikótsꞌèn ndokjo̱a̱jnú, ko̱jo ngayeje ni xi makjínjnú,

⁶ kó bo̱a̱ tsꞌén akako nga ja̱koxi̱ boá kui én xí ini̱jmijnúꞌun kjo̱a̱a̱ Kristoo̱.

⁷ Kuíni nga nde ngojín kjo̱a̱ndaa̱ Néná xi xcha̱jàjnú, tji̱e̱nga ndyi̱chiyájnúu̱ ni̱xtjin nga ko̱kó yojoo̱ Ndi̱a̱ná Jesukristoo̱,

⁸ kui xi tsja̱ngaꞌniújnú ngaskande nga kju̱i̱e̱tꞌa nga̱sondiee̱, tsi̱ꞌe̱ nga jmíjín xi ka̱maa̱ chꞌo tsꞌén ku̱i̱chji̱a̱taꞌinjnú ni̱xtjin nga kjo̱e̱ꞌe nginí Ndi̱a̱ná Jesukristoo̱.

⁹ Néná tsꞌénkjátjosón ni xi tsáyàtjónná nga sa̱ꞌín, kó kuí xí tsíchji̱a̱jnú tsi̱ꞌe̱ nga si̱ꞌanngojo̱jnú yojojnú ndií Néná, kui xi Ndi̱a̱ná Jesukristoo̱.

Bi̱ tsꞌén íni̱jmì Pabloo̱ kjo̱a̱a̱ kjo̱a̱xti xi tjiín xota̱ na̱ngo̱xi̱i̱

¹⁰ Já ntsꞌie, ta̱ngatꞌanii̱ xá xí katsjána Ndi̱a̱ná Jesukristoo̱, ꞌniú míꞌájnúꞌun nga ndse̱je̱n ka̱majnú nga ngo ni ko̱ndókjo̱a̱jnú, kó nga ko̱kjangajínjnú yojojnú, nga ta̱sá nga ngo xtín ka̱majnú, kó nga ti̱ kuii̱ ni xi si̱ꞌankjójnú, ko̱jo nga ti̱ kuii̱ ni xi kjójintakónjnú.

¹¹ Jún ntsꞌie, kui nii̱ tꞌíxián an, ngatꞌa̱ xota̱ xi xkjín Kloee̱ katsóyàna nga ti̱ juún xò xi ndyi̱ndokjo̱a̱tijo̱jnú xingi̱jnú.

¹² Kjo̱a̱a̱ ni xi tsꞌénchji̱a̱ an, nga tjín xò ngi̱jinjnú xi bi̱ tsó: “Pabloo̱ xí chjiá an”, kje̱ꞌe xi bi̱ tsó: “Apoloo̱ xí chjiá an”, kje̱ꞌe xi bi̱ tsó: “Sefaa̱ xí chjiá an”, kó kje̱ꞌe xi bi̱ tsó: “Kristoo̱ xí chjiá an.”

¹³ Ta̱nga, a tsakjanga yojoo̱ Kristoo̱. A Pabloo̱ xí akjatꞌa kro nganda tsa̱jún. Axa̱ nga kastindájnú, a jè xota̱ xi tsi̱ꞌe̱ Pabloo̱ kamájnú.

¹⁴ Tsjàa̱ ndokꞌóchjì Néná nga nde ngojín jún xi an atindá án, ta̱kuítsí Krispoo̱, ko̱jo Ngayoo̱,

¹⁵ tsi̱ꞌe̱ nga ngojín xi bo̱a̱ ka̱tso̱ nga xota̱ tsa̱ꞌa̱n je kamá nga kastindá.

¹⁶ Kjénní nga ti̱ án xí atindá án xota̱ ngo ndiꞌaa̱ Estéfanaa̱, ta̱nga foaꞌátsjienjínna tsi atindá ngase an kje̱ꞌe xota̱.

¹⁷ Ngatꞌa̱ jmí tsi katsangiyana Kristoo̱ tsi̱ꞌe̱ nga an xi kotindá án xota̱, katsangiyana tsi̱ꞌe̱ nga an xi kꞌuini̱jmì án éntjatsi̱e̱e̱ Néná, kó jmí tsi én kjínkón kuichjiá an, tsi̱ꞌe̱ nga xcha̱jàjín ngaꞌniú xí tjiín nga kꞌien Kristoo̱ tꞌa kroo̱.

Pabloo̱ bi̱ tsꞌén íni̱jmì nga Kristoo̱ xí ngaꞌniuú ko̱jo kjo̱a̱kjínkoón Néná

¹⁸ Ngatꞌa̱ én xí tsáyà nga kꞌien Kristoo̱ tꞌa kroo̱ kjo̱a̱tsobé maá xota̱ xi tjimá kichajaá, ta̱nga xota̱ xi je jatjoꞌa xikoó ñá, ngaꞌniuú Néná máná kuí eén.

¹⁹ Ngatꞌa̱ jè kjitꞌa xo̱jo̱n eén Néná, nínga bi̱ tsoó: Sa̱ꞌinkjatsón án kjo̱a̱kjínkoón xota̱ xi kjínkoón, kó sa̱ꞌínkjié an ngaꞌniuú ni xi makjiín xota̱ xi inda to̱ko̱o̱.

²⁰ Mí chjínií nda̱ kjínkoón kui nga̱sondiee̱. Mí chjínií nda̱ chji̱ni̱e̱kjo̱a̱kitii̱ kui nga̱sondiee̱. Mí chjínií nda̱ xi maa̱ fotí kjo̱a̱a̱ ngayeje nii̱ kui nga̱sondiee̱. Ngatꞌa̱ Néná boá xi katsꞌéntsobéjii̱n kjo̱a̱kjínkoón xotaa̱ kui nga̱sondiee̱.

²¹ Ngatꞌa̱ ngi̱jin kjo̱a̱kjínkoón Néná índa, nga jmí tsi kjo̱a̱kjínkoón xota̱ nga̱sondiee̱ xi sku̱i̱e̱ni Néná, ta̱sá Néná tsja kamaá nga tsꞌaxiéꞌá xota̱ xi sꞌijii̱n kui ni xi kjo̱a̱tsobé kjimaa̱ xotaa̱ kui nga̱sondiee̱.

²² Ngatꞌa̱ xota̱ jundíoo̱ kjo̱a̱ndikón míꞌá tsi̱ꞌe̱ nga sku̱i̱e̱ ngaꞌniuú Néná, kó xota̱ ngriengoo̱ kjo̱a̱kjínkón mongase,

²³ ta̱nga ji̱n, eén Kristo̱ xi akjatꞌa kroo̱ xí ndyi̱ꞌbíni̱jmìjne̱, kui én xí kjo̱a̱kichajá maá xota̱ jundíoo̱, kó xota̱ xi tjín nga̱sondiee̱ kjo̱a̱tsobé maá,

²⁴ ta̱nga kui xota̱ xi Néná je tsíchji̱a̱a̱ tsi xota̱ jundío̱, ko̱jo tsi xota̱ ngriengo̱, kuí boá xi makjiín nga Kristoo̱ xí ngaꞌniuú Néná, ko̱jo xi kjo̱a̱kjínkoón Néná.

²⁵ Ngatꞌa̱ ni xi tsꞌén Néná xi xikoó tsi ta̱ ton maá xotaa̱, jè ngase ta̱bo̱a̱jiín kjo̱a̱kjíntakoón xotaa̱, kó ni xi inda kjimaa̱ xotaa̱, ꞌniú ngase ta̱bo̱a̱jiín ngaꞌniuú xotaa̱.

²⁶ Jún ntsꞌie, tsitsíjenjnúu̱ nga Néná jaꞌájinjnú ndatsi chiboa tsí májnú xi kjínkónjnú, xikótsꞌèn tsꞌénkjó xota̱ nga̱sondiee̱, kó chiboa tsí májnú xi xota̱ xi xá tjiín, ko̱jo tsi xi xota̱ xi yandikón.

²⁷ Ta̱nga Néná jaꞌájin ni xi ta̱ ton maá xotaa̱ kui nga̱sondiee̱, tsi̱ꞌe̱ nga tsja̱á kjo̱a̱soboá xota̱ xi kjínkoón, kó Néná jaꞌájin xota̱ xi indaa̱ kui nga̱sondiee̱, tsi̱ꞌe̱ nga tsja̱á kjo̱a̱soboá xota̱ xi ꞌniú yandikoón.

²⁸ Néná jaꞌájin ni xi ta̱ kon ta̱ maa̱ nga̱sondiee̱, ko̱jo ni xi jmí ni chjíjiín, ko̱jo ni xi kji̱e̱ jmíjín, tsi̱ꞌe̱ nga sa̱ꞌínchaja ni xi kuii̱,

²⁹ tsi̱ꞌe̱ nga nde ngojín xi nkꞌakon ka̱maa̱ yojoo̱ ngindyi̱ko̱n Néná.

³⁰ Néná xí katsꞌéngojo̱jnú Kristo̱ Kjisoo̱, kó ñá xi je kiniꞌángojo̱ yojoná makjínná ni xi tsi̱ꞌe̱, kó Néná xí katsꞌénná nga xota̱ kjínkón boá ñá, nga kixi̱ tindyión ngindyi̱ko̱n kui, nga xota̱ tsjie, ko̱jo nga xota̱ xi je kamáchjítjé jéná ñá,

³¹ tsi̱ꞌe̱ nga bo̱a̱ si̱ꞌán xikótsꞌèn kjitꞌa xo̱jo̱n eén Néná: “Tsi tjín xí mejeén nga je kꞌo̱xié yojoo̱, bo̱a̱ nga tsꞌén, ta̱nga kjo̱a̱a̱ ni xi katsꞌén Ndi̱a̱ná”.