1 Xo̱jo̱o̱n Peé 5 - Xo̱jo̱n eén Néná

Bi̱ tsꞌén íni̱jmì Peé xikótsꞌèn xchoón xota̱ na̱ngo̱xi̱i̱ Néná

¹ Xota̱ xi xchá án ngi̱jii̱n xota̱ na̱ngo̱xi̱i̱, kó chistiko̱ án kjo̱a̱a̱ kjo̱a̱ni̱ma̱ xi jaꞌajin Kristoo̱, kó nga be an nga ti̱ sa̱kóchiína kjo̱a̱je xi sꞌe̱ sꞌi̱jñatsijee̱n, kuíni nga ꞌniú míꞌáa̱ xota̱ xi xchaá na̱ngo̱xi̱i̱ xi síndojinjnú nga bi̱ xiaan:

² Chónjnú xota̱ na̱ngo̱xi̱ xi Néná katsꞌénkꞌindájnú xikoó ngo nda̱ xi koo̱n cho̱tsa̱nga̱a̱, chónjnú, kó jmí tsi kjo̱a̱ꞌniú nga bo̱a̱ si̱ꞌánjnú, ta̱sá ngayeje takónjnú, xikótsꞌèn mejeén Néná, jmí tsi kjo̱a̱a̱ kjo̱a̱xkéto̱n, ta̱sá kjo̱a̱a̱ nga tsja májnú nga niꞌánjnú kui xaá.

³ Ngata̱ tajájín niꞌánjo̱jnú xikoó tsi jún xi ndi̱a̱a̱ kui xota̱ xi ndyi̱chonjnú ka̱majnú, ta̱sá takójnúu̱ ngo chi̱bo̱a̱ xi nda xikótsꞌèn kꞌuíndo xota̱ xi tsi̱ꞌe̱ Néná.

⁴ Kó bo̱a̱ tsꞌén kjiꞌanga kji̱ndi̱bá nda̱ xi ꞌniú nkꞌa xaá xi koo̱n cho̱tsa̱nga̱a̱, jún sa̱kójnú chjií kjo̱a̱je xi jmíni̱xtjin fotsoo̱n.

⁵ Kó ti̱ tsꞌén míꞌájnúꞌun jún xi xo̱ngòjnú nga cha̱ndikónjnú xota̱ xi xchaá, kó ngayejejnú ja̱kꞌi̱e̱ ja̱ngaján ni̱ma̱kjo̱a̱ ngatamajnú, ngatꞌa̱ bi̱ tsó xo̱jo̱n eén Néná: Néná kondra̱ maá xota̱ xi je ꞌboxié yojoo̱, ta̱nga xota̱ xi ni̱ma̱kjo̱a̱a̱, tsjaá kjo̱a̱nda.

⁶ Kuíni nga ni̱ma̱kjo̱a̱ ti̱ꞌánjnú yojojnú ngindie ngaꞌniú jee̱ Néná, tsi̱ꞌe̱ nga kui skjinínkꞌájnú kjiꞌá má nga kjo̱chó chi̱bo̱a̱.

⁷ Ngayeje ni xi nda̱jnú, Néná tꞌíjñájnúu̱, ngatꞌa̱ kuí xí tsꞌénkoón jún.

⁸ Nda ti̱ꞌankjójnú ni xi si̱ꞌánjnú, kó ti̱ndyiondajnú, ngatꞌa̱ kondra̱jnú kui xi xindajín ndiabloo̱, tsoꞌbá xikó maá ngo xandi̱je̱ xi tamá, nga tsꞌénmongase ꞌyání xi sa̱ꞌínkꞌién nga skji̱ni̱e̱.

⁹ Kondra̱ ti̱ndyiónjnúu̱ kui xindajiín nga ꞌniú si̱ꞌansꞌijinjnú Néná, ngatꞌa̱ jè yàjnú nga ngayeje nga̱sondiee̱, ntsꞌié ko̱jo ndichjá ti̱ bo̱a̱ ti̱ tsꞌén ndyi̱foaꞌatio kjo̱a̱ni̱ma̱ kjo̱a̱a̱ ti̱ kuii̱ ni xi ndyi̱bitjatiójnú jún nga.

¹⁰ Kó ngije ikitjatiójnú chií kjo̱a̱ni̱ma̱ chiboa ni̱xtjin, kui Néná xí tsi̱ꞌe̱ ngayeje kjo̱a̱ndaa̱, kui xi Jesukristoo̱ katsꞌénkjién nga tsíchji̱a̱ná, tsi̱ꞌe̱ nga sa̱kóná kjo̱a̱je xi fejiín, kui nga tsꞌén xi chjiéngá ka̱majnú, nga tsjangaꞌniújnú, ꞌniú ngatꞌijñájnú, ko̱jo nga tsjandièjín nga jó nga ján kꞌuijñaá ini̱ma̱jnú.

¹¹ Néná xí Na̱ꞌmii̱, kui tsi̱ꞌe̱ ngatama kjo̱a̱jee̱ ngatsjéni̱xtjin. Bo̱a̱ kjiꞌi.

Peé bi̱ tsꞌén katsꞌénkjietꞌa xo̱jo̱o̱n

¹² Silbanoo̱ kui nda̱ xi ngo nda̱ ntsꞌié xi ta̱nisién ꞌniátakón an, asíko̱jona nga katsꞌendajnúꞌun kui xo̱jo̱o̱n. Chiboa má ni xi itꞌajnúꞌun nga tsꞌénbotixomájnúꞌun, kó tsꞌénxiya kixi̱ kixi̱jnúꞌun, nga ni xi tjítꞌa kꞌi̱e̱e̱ kuí boá xi kjo̱a̱ndaa̱ Néná. ꞌNiú tindyionjinjnú kui nii̱.

¹³ Tinde xò bo̱a̱ tsó xotaa̱ na̱ngo̱xi̱ xi tikón Babilonia̱ kui xi Néná jaꞌájin xikoó jún. Ko̱jo tinde xò bo̱a̱ tsó Markoo̱ kui xi ndína xiaan.

¹⁴ Ti̱ꞌantindéjnú ja̱kꞌi̱e̱ ja̱ngaján xingi̱jnú. Ngatꞌiéjnú kjo̱a̱xió ngayejejnú xi ndokjo̱a̱nijnú Kristoo̱.