1 Xo̱jo̱o̱n Peé 3 - Xo̱jo̱n eén Néná

Bi̱ tsꞌén íni̱jmì Peé xikótsꞌèn chjiéngá kꞌuíndojo̱ xkjín xota̱ xi je ixaán

¹ Bo̱a̱ ti̱ tsꞌén ndatsa jún nga ínchjín xi je ikixánjnú, cha̱ndikónjnú xi̱ꞌinjnú, tsi̱ꞌe̱ nga kui xi̱ꞌin xi sꞌijinjiín Néná, sa̱ꞌínsꞌijin kó nde jmí én ka̱machjiénjiín, ngatꞌa̱ nda ndyi̱niꞌánjnú jún,

² kó sku̱i̱e̱ nga nda ndyi̱mongínjo̱jnú yojojnú, ko̱jo nga ndyi̱yandikonjnú Néná.

³ Nga kuijín ni xi tsjatsꞌèn tsꞌénbóndani yojojnú xtji̱e̱e̱n ndi̱tsen xi chjiéngá ku̱i̱ndyi̱séjnú, xikoó nga ndikóntsꞌèn kosijee̱n tsja̱jnú, xikoó nga xꞌi̱a̱jnú ni to̱nsinié, ko̱jo tsi ńjño xi ꞌniú chjí xcha̱jàjnú.

⁴ Ta̱sá ngi̱jii̱n ini̱ma̱jnú ngatꞌijñaá ngo kjo̱a̱fonda xi kjo̱tsònjín nga kꞌuiéjnú ngo a̱siénni̱xtjin xi nda ko̱jo xi xió. Kuí kjo̱a̱tsjakjiꞌii̱ xi ꞌniú chjínií ngindyi̱ko̱n Néná.

⁵ Ngatꞌa̱ bi̱ tsꞌén yínda yojoo̱ kui ínchjín tsjie xi askoyaá Néná ni̱xtjin xcháján, nga kamábendikón xi̱ꞌii̱n,

⁶ xikoó na̱ Saraa̱ nga tsintꞌiéꞌeén Abraa̱n, kó “ndi̱a̱na” katsoó. Jún boá xi ndí ínchjiín na̱ Saraa̱, tsi ndakjiꞌi ni xi ndyi̱niꞌánjnú ko̱jo tsi ko̱nda̱kónjínjnú ni xi ka̱mataꞌinjnú.

⁷ Kó jún xi xi̱ꞌinjnú, ti̱ bo̱a̱ ti̱ tsꞌén ngatꞌiéjnú kjo̱a̱kjíntakón nga nda tsꞌén ku̱i̱ndyionjo̱jnú chjo̱ónjnú, cha̱ndikónjnú, ngatꞌa̱ ínchjiín jmí tsi bo̱a̱ tsꞌén ꞌniú xikoó jún, ngatꞌa̱ ngo chjo̱on ngo xi̱ꞌin xi je síndojo̱ xkjín, nijan sa̱kórií kjo̱a̱ndaa̱ kjo̱a̱mindyion xi tsjá Néná, tsi̱ꞌe̱ nga jmí ni sa̱ꞌínniꞌínjiín nga ku̱i̱chji̱a̱a̱ Néná.

Bi̱ tsꞌén íni̱jmì Peé kjo̱a̱a̱ xikótsꞌèn chjiéngá ku̱i̱ndyión

⁸ Kó nga fetꞌa, ngayejejnú tsjatsꞌèn tindyionjinjnúu̱ xingi̱jnú, tasíko̱jojnú xingi̱jnú, tjó ti̱ꞌánjnú xingi̱jnú xikoó tsi ngo ntsꞌiejnú, ndaxota̱ ko̱jo ni̱ma̱kjo̱a̱ ngatamajnú.

⁹ Tsi ngo xota̱ xi ndajínkjiꞌi ni xi katsꞌénjo̱jnú, ngata̱ niꞌánngojojínjnú, kó ti̱ tsi tjín xi chꞌo ka̱tso̱jnú, ngata̱ chꞌójín ꞌmíjnúu̱ ndatsa jún nga, ta̱sá chji̱a̱ꞌajnúu̱ Néná nga sa̱ꞌínchikonñé, ngatꞌa̱ jè yàjnú nga Néná tsíchji̱a̱nijnú tsi̱ꞌe̱ nga sa̱kójnú kjo̱a̱niꞌánchikonñeé kui.

¹⁰ Ngatꞌa̱ bi̱ tsó xo̱jo̱n eén Néná: Xi mejeén tjó sa̱ꞌín kjo̱a̱mindyioo̱n, kó mejeén sku̱i̱e̱ ni̱xtjin xi nda, nga koo̱n na̱je̱n, nga chꞌójín tsꞌén ku̱i̱chji̱a̱, kó nga koo̱n tsꞌoa nga jmí éndísó ku̱i̱chji̱a̱jín.

¹¹ Ngatangaa̱ ni xi ndajiín, kó ni xi ndaa̱ xi nga tsꞌén, ngatangase kjo̱a̱xioó, kó kui nii̱ xi ngatjítji̱ngi.

¹² Ngatꞌa̱ Ndi̱a̱ná koón xota̱ xi kixi̱i̱, kó nda bosiénníjoón nga chji̱a̱ kui xotaa̱, ta̱nga kje̱n Ndi̱a̱ná kondra̱ tikónnii̱ xota̱ xi ndajín ndyi̱tsꞌe̱én.

Bi̱ tsꞌén íni̱jmì Peé kjo̱a̱a̱ xikótsꞌèn kjójintakón kjiꞌanga kjo̱a̱ni̱ma̱ ku̱i̱tja̱tió

¹³ ꞌYá xí ndajínkjiꞌi ni xi sa̱ꞌínjo̱jnú, tsi ngongá ni xi ndaa̱ xi ndyi̱niꞌánjnú jún.

¹⁴ Ta̱nga ndatsi kjo̱a̱ni̱ma̱ ku̱i̱tja̱tiójnú ta̱ngatꞌanii̱ kjo̱a̱kixi̱i̱, achichíra̱ tsjajnú nga bo̱a̱ ka̱majnú. Kuíni nga ngata̱ ꞌyàjín xi mindyiandíkónjnú, ti̱nde ngata̱ nda̱jín májnú jún.

¹⁵ Ta̱sá cha̱ndikónjnú Kristoo̱ ngi̱jii̱n ini̱ma̱jnú nga kui xi Ndi̱a̱jnú má, kó ngatsjéni̱xtjin ti̱ndyiondajnú nga ka̱majnú kꞌuiyájnúu̱ nga tjín xi ko̱síyájnú ngo ni kjo̱a̱a̱ kui kjo̱a̱chiyá xi tjínjnú jún.

¹⁶ Ta̱nga ngatꞌiéjnú kjo̱a̱ni̱ma̱kjo̱a̱, ko̱jo kjo̱a̱yandikón nga bo̱a̱ si̱ꞌánjnú. Ti̱ꞌánjnú kui nii̱ nga nda tsꞌén kꞌuijñá kjo̱a̱kjíntakónjnú ngindyi̱ko̱n Néná, ki̱a̱ ka̱maa̱ nga kui xota̱ xi ndyi̱chji̱a̱taꞌinjnú, kui xi ndyi̱tsó nga ndajínjnú xota̱, soboá ka̱maa̱ nga sku̱i̱e̱ nga nda ndyi̱niꞌánjnú ngatꞌa̱ sꞌijinjnú Kristoo̱.

¹⁷ Ta̱sá ndatsi kjo̱a̱ni̱ma̱ ku̱i̱tja̱tiójnú nga ni xi ndaa̱ xi si̱ꞌánjnú, tsi Néná xí bo̱a̱ tsꞌén mejeén, ta̱bo̱a̱jiín tsi kjo̱a̱ni̱ma̱ ku̱i̱tja̱tiójnú nga ni xi ndajiín xi si̱ꞌánjnú.

¹⁸ Ngatꞌa̱ Kristoo̱ ti̱ bo̱a̱ ti̱ tsꞌén jaꞌatio kjo̱a̱ni̱ma̱, kó ta̱ ngo tsí ndi̱yà kꞌien nga katsꞌénkjié jeé xotaa̱. Nda̱ xi kixi̱i̱, xota̱ xi kixi̱jiín kꞌientjéni, tsi̱ꞌe̱ nga kjo̱joná ngindyi̱ko̱n Néná. Nga ja̱koxi̱ kiniꞌánkꞌién nga xota̱, ta̱nga kiniꞌánkjaꞌáꞌyaá nga a̱siénni̱xtjin.

¹⁹ Kó nga a̱siénni̱xtjin kijí nga kijíkꞌini̱jmi̱ì a̱siénni̱xtjin xi síndoyáꞌniuú,

²⁰ kui xi tsintꞌiéꞌénjín ni̱xtjin nga kisꞌijña Noee̱, kjiꞌanga Néná askoyá sakon sakoo̱n nga sa̱ꞌínkꞌoyà yojoo̱ xotaa̱, tji̱e̱nga kjimanda tjotso jee̱. Jin ma xota̱ xi jatjoꞌaa̱ yojoo̱ nga jesón ngándájín ngi̱jin ndáfoaa̱.

²¹ Kuí ndáfoaa̱ xi akó tjón tjón xikótsꞌèn tsꞌaxiéꞌájnú ndáfoaa̱, ngatꞌa̱ kjiꞌanga satíndá ngi̱jin ndáfoaa̱, fotjoꞌa ñá ta̱ngatꞌanií nga jaꞌáꞌyaá Jesukristoo̱. Kjo̱a̱botíndaá jmí tsi kui xi tsꞌéntsjie yojoná, ta̱sá tsi̱ꞌe̱ nga ndyi̱mindyisé nga nda kꞌuijñá kjo̱a̱kjíntakónná ngindyi̱ko̱n Néná.

²² Jesukristoo̱ kijínijíngí ndiꞌakꞌajmi jàn, kó ki̱a̱ tikón nga fojnií Néná, kó kuí boá xi tsꞌénbotixómaá ndítsjiee̱, ko̱jo a̱siénni̱xtjin xi tjiín xá ko̱jo ngaꞌniuú.