1 Xo̱jo̱o̱n Peé 1 - Xo̱jo̱n eén Néná

Bi̱ tsꞌén katsꞌéntinde Peé xota̱ na̱ngo̱xi̱i̱

¹ Án boá xi Peé, nda̱ apostroo̱ Jesukristoo̱, tsꞌentindejnúꞌun ngayeje jún xota̱ xi Néná je jaꞌájinjnú xi xín nangi ndokjo̱a̱nijnú xi tindyiónjnú ngi̱ndie xi ꞌmí Ponto̱, ko̱jo Ngalasia̱, ko̱jo Kapandosia̱, ko̱jo Asia̱, ko̱jo Bitinia̱.

² Xikó tsꞌén índa Néná xí na̱ꞌminá nga kamámejeén jaꞌájinjnú jún, tsi̱ꞌe̱ nga xota̱ na̱xi̱ńdá xí tsi̱ꞌe̱ ka̱majnú. Kó nga ngatꞌaa̱ A̱si̱énni̱xtjii̱n, ko̱jo ngatꞌaa̱ nga kꞌien Jesukristoo̱ nga katsꞌéntsjiejónjnú ngayeje jéjnú, tsi̱ꞌe̱ nga ko̱nda̱ꞌyáꞌénjnú. Ngatama tsie kjo̱a̱nda ko̱jo kjo̱a̱xió xi tsja̱ajnú Néná.

Bi̱ tsꞌén íni̱jmì Peé kjo̱a̱a̱ nga sa̱kóná ñá ni̱xtjin xi fetꞌaa̱

³ Nganiꞌántsjaá Néná, kui xi Na̱ꞌmii̱ Ndi̱a̱ná Jesukristoo̱, kui xi ta̱ngatꞌanii̱ kjo̱a̱ni̱ma̱takón jee̱ nga katsꞌéntsen nginíná nga ndyi̱chiyáa̱ nga ko̱jo ñá kꞌuiéná ngo kjo̱a̱mindyion, ta̱ngatꞌanii̱ nga jaꞌáꞌyaá Jesukristoo̱ ngi̱jii̱n xota̱ xi je jesoón.

⁴ Néná boá xi sa̱ꞌín nga sa̱kóná kui ni xi je tikónndaa̱ ki̱a̱ ndiꞌakꞌajmii̱ nga tsja̱aná, kui ni xi ngiti̱ ka̱májiín kjo̱tsòn, ti̱nde jmíjiín ni xi ndándí, ti̱nde ka̱májiín xi̱ꞌniú.

⁵ Ngaꞌniuú tjítsꞌénkjién nga tsꞌénkoón jún, ta̱ngatꞌanii̱ nga sꞌijinjnú, tsi̱ꞌe̱ nga Néná kꞌo̱xiéꞌá kjin kjin xota̱ xi tsi̱ꞌe̱ xikótsꞌèn je tikónndaa̱ ni̱xtjin xi kjifetꞌaa̱.

⁶ Ta̱ngatꞌanii̱ kui nii̱ nga jún tsjangatꞌiéjnú ndatsi ngi chiboa tsí ni̱xtjin nga ku̱i̱tja̱tiójnú kjín to̱ko̱ya kjo̱a̱chjatꞌayákón,

⁷ tsi̱ꞌe̱ nga chjátꞌayákón kjo̱a̱sꞌijinjnú, ngatꞌa̱ kuí xí chjí ngasenii̱ ta̱bo̱a̱jiín to̱nsinieé, kui xi maa̱ fotsoo̱n kó ndiꞌí chitꞌani. Kó bo̱a̱ tsꞌén kui kjo̱a̱sꞌijii̱n xcha̱ nga kꞌuieé kjo̱a̱niꞌántsjà, ko̱jo kjo̱a̱je, ko̱jo kjo̱a̱yandikón kjiꞌanga ko̱kó yojoo̱ Jesukristoo̱.

⁸ Jesukristoo̱ xí ndyi̱niꞌántjójnú ndatsi kamáyàjínjnú kó kisꞌie kje̱n, kó tjisꞌíjinjnú ndatsi ngotꞌe̱ yàjínjnú kje̱n, achichí kjo̱a̱tsja xi ꞌniú jè tjínjnú, kó ngaskande nde yàjín kótsꞌèn kꞌuiyá kuí nii̱,

⁹ tjínjnú kui nii̱, ngatꞌa̱ jè ndyi̱fochótꞌajnúu̱ kjo̱a̱ꞌnaxiéꞌájnú, kó kui nii̱ ki̱a̱ ndibánií kjo̱a̱sꞌijinjnú.

¹⁰ Já chji̱ni̱e̱ꞌe̱én Néná xí kisꞌie ngasꞌe̱ kamámejeén sku̱i̱e̱, ko̱jo tsangase ndi̱yà sen see̱n kjo̱a̱a̱ kui kjo̱a̱ꞌnaxiéꞌaá, kjiꞌanga katsóyàtjón nga Néná tsja̱ajnú kui kjo̱a̱ndaa̱.

¹¹ Kamámejeén kamábe ꞌyá xota̱ ko̱jo mí ni̱xtjin xi íjñá tsijen A̱si̱énni̱xtjii̱n Kristoo̱ xi tikónjii̱n kui já chji̱ni̱e̱ꞌe̱én, kui A̱si̱énni̱xtjii̱n xi katsóyà nga tsie kjo̱a̱ni̱ma̱ kjo̱a̱ꞌatio Kristoo̱, ko̱jo kui kjo̱a̱je xi jaskan kji̱ndi̱baá.

¹² Néná akoó kui já chji̱ni̱e̱ꞌe̱én ta̱nga jmí tsi kjo̱a̱a̱ nganda ti̱ kuii̱ tsi̱ꞌe̱, nganda tsa̱jún boá nga akakoo̱. Kuí bí kui én xi katseꞌéjnú ngotꞌe̱ jún xi je ikꞌíni̱jmìjnú kui éntjatsi̱e̱e̱, ta̱ngatꞌanii̱ ngaꞌniuú A̱si̱énni̱xtjii̱n Néná xi kanangiyani ndiꞌakꞌajmi jàn, kui ni xi ngaskande ndítsjiee̱ kamámejeén kamábe.

Bi̱ tsꞌén íni̱jmì Peé nga tsjie tsꞌén ku̱i̱ndyión ngatꞌa̱ jè Ndi̱a̱ná ndokjo̱a̱ ñá

¹³ Kuíni nga ti̱ndyiondajnú nga kꞌuiéjnú kjo̱a̱kjínkón, kó nda ti̱ꞌankjójnú ni xi si̱ꞌánjnú, kó chiyá ndo̱jò ndójo̱jnúu̱ kjo̱a̱nda xi kjo̱e̱ꞌéjo̱jnú kjiꞌanga ko̱kó yojoo̱ Jesukristoo̱.

¹⁴ Ngatamajnú xikoó ndí xí ntꞌiéꞌeén na̱ꞌmii̱, jmí tsi bo̱a̱ tsꞌén ku̱i̱ndyionjnú, xikoó ngasꞌe̱ kjiꞌanga kji̱e̱ yàjínjnú Néná, nga ta̱xkiya kiniꞌánkjatjosónjnúu̱ ni xi kamámejénjnú kiniꞌánjnú.

¹⁵ Ta̱sá tsjietsꞌén ti̱ndyiónjnú, xikótsꞌèn tsjie kui xi tsíchji̱a̱jnú.

¹⁶ Ngatꞌa̱ je kjitꞌa xo̱jo̱n eén Néná nínga bi̱ tsoó: “Tsjie ngatamajnú jún, ngatꞌa̱ tsjie án.”

¹⁷ Kó nga “Na̱ꞌmi” ndyi̱ꞌmìjnúu̱ kui Néná xi ta̱ són tsꞌénjo̱ xotaa̱ nga tsáyà tsi nda ko̱jo tsi ndajín ni xi katsꞌén, chjiéngá xcha̱ndikónjnú ngatsjéni̱xtjin nga ku̱i̱ṉtsomajnú kui nga̱sondiee̱.

¹⁸ Ngatꞌa̱ jè yàjnú nga Néná íchjítjéjnú tsi̱ꞌe̱ nga ka̱mandéjnú kjo̱a̱a̱ kui kjo̱a̱mindyion ta̱xkiya xi kisꞌiejnú xi íjñájnú xota̱ xi xchájnú, kó nga kaꞌnaxiéꞌájnú jún, jmí tsi ni xi fotson xi kamáchjíní, xikoó tsi to̱nsinié, ko̱jo tsi to̱ntiboa.

¹⁹ Ta̱sá jiín Kristoo̱ xi kiniꞌánchjién kuí xí ꞌniú chjí ngasenii̱. Kristoo̱, kuí boá xi xikoó ngo cho̱tsa̱nga̱ xi nda ko̱jo xi onjiín.

²⁰ Néná índa ndeskande koó ngindiee̱ nga kamánda nga̱sondiee̱ nga bo̱a̱ kjiꞌi ni xi ka̱maa̱, ta̱nga kui ni̱xtjin xi kjifetꞌaa̱ tjibóko ta̱ngatꞌanii̱ nganda tsa̱jún.

²¹ Kó ta̱ngatꞌanii̱ Kristoo̱ nga jún sꞌijinjnú Néná, kui Néná xi katsꞌénkjaꞌáꞌyaá Kristoo̱ ngi̱jii̱n xota̱ xi je jesoón kó katsjaá kjo̱a̱je, tsi̱ꞌe̱ nga sꞌi̱jinjnú ko̱jo ka̱maꞌniátakónjnú Néná.

²² Ngotꞌe̱ ꞌne̱ nga je kiniꞌántsjiejnú yojojnú ta̱ngatꞌanii̱ nga kandaꞌyáꞌénjnúu̱ én xí ja̱koxi̱i̱, kó nga je tjó ja̱koxi̱jnú xingi̱jnú, xikoó tsi ngo ntsꞌiejnú. Ngayeje ini̱ma̱jnú ꞌniú ti̱ꞌantjójnú ja̱kꞌi̱e̱ ja̱ngaján xingi̱jnú.

²³ Ngatꞌa̱ jún jè katsen nginíjnú, kó ngotꞌe̱ jmí tsi xota̱ xi fesón xi katsennijnú, eén Néná xí katsꞌéntsen nginíjnú, kui én xí fejiín, ngatꞌa̱ tikón ta̱ kjiꞌánií.

²⁴ Ngatꞌa̱ bi̱ tsó xo̱jo̱n eén Néná: Ngayeje xota̱ xi tjín nga̱sondiee̱ xikónií ngo kꞌijñá, kó ngayeje kjo̱a̱jee̱ xotaa̱ xikónií ngo naxoó kui kꞌijñaá. Xí kꞌijñaá, kó ꞌbókangí naxoó.

²⁵ Ta̱nga eén Ndi̱a̱ná, tikón ta̱ kjiꞌánií. Kó kui eén, kuí boá kui éntjatsi̱e̱e̱ Néná xi je ikꞌíni̱jmìjnú.