1 Xo̱jo̱o̱n Juaa̱ 4 - Xo̱jo̱n eén Néná

Bi̱ tsꞌén íni̱jmì Juaa̱ kjo̱a̱a̱ ꞌyání xi A̱si̱énni̱xtjii̱n Néná

¹ Jún ndí ntsꞌie xi tjóna, ngata̱ niꞌánsꞌijinjínjnúu̱ ngayeje xota̱ xi bo̱a̱ ka̱tso̱ nga Néná katsꞌénkíchji̱a̱, ta̱sá chjátꞌayákónjnú kui A̱si̱énni̱xtjii̱n tsi tsi̱ꞌe̱ Néná, ngatꞌa̱ achichí má já chji̱ni̱e̱ꞌén ndiso xi je jatjokjà kuí nga̱sondiee̱.

² Bi̱ tsꞌén nga ka̱ma xcha̱jnú jún, ꞌyání xi tikoón A̱si̱énni̱xtjii̱n Néná. Ngayeje xota̱ xi tsáyà nga Jesukristoo̱ jeꞌe kui nga̱sondiee̱ nga jín nga yojo, kuí boá xi tikónjii̱n A̱si̱énni̱xtjii̱n Néná.

³ Kó kui xota̱ xi tsꞌenjóꞌojín nga Jesukristoo̱ jeꞌe nga jín nga yojo, jmí tsi A̱si̱énni̱xtjii̱n Néná tikónjii̱n, kuí boá xi̱ꞌba̱ xi tikónjii̱n a̱si̱énni̱xtjii̱n kondraa̱ Kristoo̱, kui kondra̱ xi jún je kandaꞌyájnú nga kji̱ndi̱bá, kó ngotꞌe̱ ꞌne̱ jè tikón kui nga̱sondiee̱.

⁴ Jún ndí ndí tsa̱ꞌa̱n, Néná ndokjo̱a̱nijnú, kó jè kiniꞌánjnúu̱ nga kiniꞌánchajajnú kui já chji̱ni̱e̱ꞌén ndisoo̱, ngatꞌa̱ kui xi tikónjinjnú, tjín ngasee̱ ngaꞌniú ta̱bo̱a̱jiín kui xi tikónjii̱n xota̱ nga̱sondiee̱.

⁵ Kui xotaa̱, ni xi ndajiín kui nga̱sondiee̱ chji̱a̱ni, kuíni nga nii̱ kui nga̱sondiee̱ xi chji̱a̱, kó xota̱ xi chji̱a̱ni ni xi ndajiín kui nga̱sondiee̱ xí ntꞌieé.

⁶ Ta̱nga ji̱n Néná ndokjo̱a̱nijne̱, kó kui xota̱ xi je be Néná kuí boá xi ntꞌiéjne̱, ta̱nga kui xota̱ xi Nénájín chji̱a̱ni ntꞌiéjínjne̱. Bo̱a̱ tsꞌén nga ka̱ma xcha̱ ñá ꞌyání xi tikoón a̱siénni̱xtjin xi ja̱koxi̱i̱, kó ꞌyání xi tikoón a̱siénni̱xtjin xi ꞌboṉcha̱a̱.

Bi̱ tsꞌén íni̱jmì Juaa̱ kjo̱a̱a̱ mí ni xi yaꞌanii̱ kjo̱a̱tjoó

⁷ Jún ndí ntsꞌie xi tjóna, ja̱kꞌi̱e̱ ja̱ngaján si̱ꞌantjó xingi̱, ngatꞌa̱ kjo̱a̱tjoó tsi̱ꞌe̱ Néná boá. Ngayeje xota̱ xi tjiín kjo̱a̱tjoó, kuí boá xi Néná je katsjaá nga ndií kui ka̱ma, kó kuí boá xi be Néná.

⁸ Xota̱ xi jmíjiín kjo̱a̱tjoó, bejín Néná, ngatꞌa̱ kjo̱a̱tjó boá Néná.

⁹ Kuí nii̱ xi akó nga Néná tjoó ñá, nga katsangiya ndí ngototoo̱ kui nga̱sondiee̱, tsi̱ꞌe̱ nga ngatꞌaa̱ kui ndií nga kꞌuiéná kjo̱a̱mindyion.

¹⁰ Kuí bí kui nii̱ xi kjo̱a̱tjoó: Nga jmí tsi ñá xí kiniꞌántjó Néná, ta̱sá kjo̱a̱a̱ nga Néná boá xi katsꞌéntjóná ñá, kó katsangiyaná ndií xikoó ngo kjo̱a̱tjó xi niꞌánkꞌasꞌien tsi̱ꞌe̱ nga kiniꞌánjetakoón jéná.

¹¹ Jún ndí ntsꞌie xi tjóna, tsi bo̱a̱ tsꞌén katsꞌéntjóná Néná, ti̱ chjiéngá ti̱ bo̱a̱ ti̱ tsꞌén ja̱kꞌi̱e̱ ja̱ngaján si̱ꞌantjó xingi̱.

¹² Kji̱e̱ ngo xi je kamábe kókjiꞌi Néná, ta̱nga tsi ja̱kꞌi̱e̱ ja̱ngaján tjóná xingi̱, kjiꞌá boá nga Néná tikónjinná, kó kjo̱a̱tjoó kjimando̱jo kjin kjin ngi̱jinná.

¹³ Ngatꞌa̱ Néná katsjáná A̱si̱énni̱xtjii̱n, kuíni nga ya ñá nga Néná tindyionjìi̱n, kó nga kui tikónjinná ñá.

¹⁴ Kó ji̱n jè kamáyà ji̱n, kó chistiko̱ ji̱n nga Néná xí Na̱ꞌmii̱ xí katsangiya ndií, tsi̱ꞌe̱ nga kꞌo̱xiéꞌá xota̱ xi tjín kuí nga̱sondiee̱.

¹⁵ Ngayeje xota̱ xi ka̱tso̱yà nga Kjisoo̱ xi ndií Néná, Néná tikónjii̱n xi bo̱a̱ ka̱tso̱o̱, kó kui tikónjii̱n Néná.

¹⁶ Kó ñá jè ya ko̱jo sꞌijinná nga Néná tjoó ñá. Kjo̱a̱tjó boá Néná, kó kui xota̱ xi síndo ngi̱jii̱n kjo̱a̱tjoó Néná, Néná tikónjii̱n kui, kó kuí tikónjii̱n Néná.

¹⁷ Kuí nii̱ xi ya nga kjimando̱jo kjin kjin kjo̱a̱tjoó ngi̱jii̱n ñá, nga ka̱maꞌniátakón ni̱xtjin nga kꞌuiyá tsi nda ko̱jo tsi ndajín kiniꞌán, ngatꞌa̱ bo̱a̱ kón ñá xikoó Jesukristoo̱ kꞌi̱e̱ kui nga̱sondie xi tindyión.

¹⁸ Kjo̱a̱tjoó jmíjiín kjo̱a̱tsiendikón, ngatꞌa̱ kjo̱a̱tjó xi je kamá xi chjiéngá ka̱maa̱ ꞌboxié kjo̱a̱tsiendikoón. Ngatꞌa̱ xi tsꞌénkoyaa̱ kjo̱a̱botíjeé, tsꞌéntsakjón, kó kui xota̱ xi tsꞌéntsakjoón, kji̱e̱ ma ndo̱jò kjin kjinjín kjo̱a̱tjó xi tikónjii̱n.

¹⁹ Ñá ndyi̱niꞌántjó Néná, ngatꞌa̱ kuí xí tjón katsꞌéntjóná ñá.

²⁰ Tsi tjín xí: “Tjóna Néná” ka̱tso̱, kó tsi chꞌoo̱ xota̱ xi ngasee̱, xota̱ ndiso boá. Ngatꞌa̱ tsi tjójínná xota̱ xi ngasee̱ xi ya kókjiꞌi kje̱n, ja̱ kótsꞌèn ka̱ma tjóná Néná nga yàjín ñá kje̱n kui.

²¹ Xota̱ xi tjoó Néná, chjiéngá ti̱ nga tsꞌéntjó xota̱ xi ngasee̱ nga. Kuí bí kjo̱a̱botíxoma xi je tikónná xi katsjáná Néná.