1 Xo̱jo̱o̱n Juaa̱ 3 - Xo̱jo̱n eén Néná

Bi̱ tsꞌén íni̱jmì Juaa̱ nga Néná, ndií katsꞌénná

¹ Tsitsíjenjnúu̱ kókjiꞌi tsie kjo̱a̱tjó xi tsꞌéntsjáná Néná xí Na̱ꞌmii̱, nga xotaa̱, ndií Néná tsóná ñá, kó ndií Néná boá ñá. Kuíni nga xotaa̱ kui nga̱sondiee̱ bejínná ñá, ngatꞌa̱ kui bejín Néná.

² Jún ndí ntsꞌie xi tjóna, ngotꞌe̱ ꞌne̱, jè ndií Néná ñá, kó ndatsi kji̱e̱ yàjín ñá mí ni xi ka̱ma ñá jaskan, jè ya ñá nga kjiꞌanga kjo̱e̱ꞌe Jesukristoo̱ xikó maá kui, nga bo̱a̱ kon ka̱ma ñá, ngatꞌa̱ xcha̱ cha̱n cha̱n ñá xikó má kjiꞌi kui.

³ Kó ngayeje xota̱ xi ndyi̱koyaa̱ kui, ndyi̱tsꞌèntsjie yojoo̱ ngindyi̱ko̱n Néná, xikótsꞌèn tsjie Jesukristoo̱.

⁴ Ta̱ꞌyaní xi tjítsꞌénjé, tsꞌénmonganié kjo̱a̱kitii̱ Néná, ngatꞌa̱ nga niꞌánjeé, miyonié kjo̱a̱kitii̱ Néná.

⁵ Kó jún jè yàjnú nga Jesukristoo̱ jeꞌe kui nga̱sondiee̱ tsi̱ꞌe̱ nga jaꞌáxín jéná, kó kuí, jmí jé kisꞌiejiín.

⁶ Kuíni nga ngayeje xota̱ xi je tikónjii̱n Jesukristoo̱, jè ngiti̱ tsꞌénjéjín, ta̱nga ngayeje xota̱ xi ndyi̱tsꞌènjeé, kji̱e̱ bejín ko̱jo kji̱e̱ makjínjiín ꞌyání xi Jesukristoo̱.

⁷ Jún bo̱a̱ ndí ndí tsa̱ꞌa̱n, ngata̱ ngojín xi ꞌboṉcha̱jojnú, ngatꞌa̱ xota̱ xi ndyi̱tsꞌèn ni xi kixi̱i̱, kixi̱ tjimá, xikótsꞌèn kixi̱ Jesukristoo̱.

⁸ Ta̱nga kui xota̱ xi ndyi̱tsꞌènjeé, xota̱ xi tsi̱ꞌe̱ xindajín ndiabloo̱ boá, ngatꞌa̱ xindajiín ndeskande koó nga ítjatsꞌennii̱ nii̱ nga tjítsꞌénjé. Kuíni nga jatjokjaní ndií Néná, tsi̱ꞌe̱ nga sa̱ꞌínkjié ni xi ndajín xi tsꞌén xindajiín.

⁹ Ngayeje xota̱ xi Néná je katsjaá nga ndií kui ka̱ma, ngájiín nga tsꞌénjé, ngatꞌa̱ Néná jè íjñajii̱n ngo xojmá, kó kui, ngiti̱ májín tsꞌénjé, ngatꞌa̱ jè ndií Néná má.

¹⁰ Bi̱ tsꞌén nga ya ꞌyání bo̱a̱ xi ndií Néná, kó ꞌyání bo̱a̱ xi ndií xindajín ndiabloo̱. Ta̱ꞌya xota̱ní xi tsꞌénkjátjosónjín kjo̱a̱kixi̱i̱ Néná ko̱jo xi tjójiín xota̱ xi ngasee̱, jmí tsi Néná chji̱a̱ni.

Bi̱ tsꞌén akóyá Juaa̱ nga chjiéngá tjó si̱ꞌán xingi̱

¹¹ Kuí bí én xí je kandaꞌyájnú ndeskande koó ngasꞌe̱. Nga tjó si̱ꞌán ja̱kꞌi̱e̱ ja̱ngaján xingi̱.

¹² Jmí tsi bo̱a̱ si̱ꞌán xikoó Kaii̱n nga xindajín tsíchji̱a̱ni, kó katsꞌénkꞌién ntsꞌi̱e̱. Kó míkjo̱a̱a̱ nga katsꞌénkꞌién. Ngatꞌa̱ ndajínkjiꞌi ngayeje ni xi katsꞌén kuí, kó kixi̱ kamá ngayeje ni xi katsꞌén Abe̱ ntsꞌi̱e̱.

¹³ Ndí já ntsꞌie, ngata̱ fíndikónjínjnú tsi xotaa̱ kui nga̱sondiee̱ sa̱ꞌínchꞌójnú.

¹⁴ Ñá jè ya nga jè ngiti̱ ki̱a̱jín tindyionjìn kjo̱a̱bo̱yaa̱, ngatꞌa̱ jè ngi̱jii̱n kjo̱a̱mindyion xi tsi̱ꞌe̱ Néná je tindyión, ngatꞌa̱ tjóná xota̱ xi ngasee̱. Xi tjójiín xota̱ xi ngasee̱, ta̱kó ki̱a̱ tikónjinra kjo̱a̱bo̱yaa̱.

¹⁵ Ngayeje xota̱ xi chꞌoo̱ xota̱ xi ngasee̱, xota̱ xi tsꞌenkꞌién ini̱ma̱ boá xi̱ꞌba̱, kó jún jè yàjnú nga nde ngojín xota̱ xi tsꞌenkꞌién ini̱ma̱ xi kꞌuieé kjo̱a̱mindyion ngatsjéni̱xtjii̱n Néná.

¹⁶ Kuí nii̱ xi ya ñá kjo̱a̱tjoó, nga Jesukristoo̱ katsjá kjo̱a̱mindyioo̱n ta̱ngatꞌanii̱ ñá, bo̱a̱ ti̱ tsꞌén ñá, chjiéngá ko̱e̱ꞌé kjo̱a̱mindyionná ta̱ngatꞌanii̱ xota̱ xi ngasee̱.

¹⁷ Ta̱ꞌya xota̱ní xi tsꞌatio nga tjiín ni xi machjieén, kó tsi be nga ngo xota̱ tsꞌénfoaꞌatio ngo kjo̱a̱ni̱ma̱ nga chjieén ngo ni, kó tsi ka̱mani̱ma̱jiín nga tsja̱á, a tikónjinrií kjo̱a̱tjoó Néná kuí xotaa̱.

¹⁸ Jún ndí ndí tsa̱ꞌa̱n, nga jmí tsi ta̱ én tsí xi ko̱ndókjo̱a̱jnú nga xcha̱ nga tjínjnú kjo̱a̱tjó. Chjiéngá ko̱kójnú kjo̱a̱tjójnú kjo̱a̱a̱ ni nda xi ndyi̱niꞌánjnú.

¹⁹ Bi̱ tsꞌén nga ya ñá nga ja̱koxi̱i̱ ndokjo̱a̱ ñá, kó nga ꞌniú kꞌuijñá ini̱ma̱ná ngindyi̱ko̱n Néná.

²⁰ Ndatsi ini̱ma̱ná tsꞌénbongítaꞌinná nga tjínná jé, ta̱nga Néná je ngase ta̱bo̱a̱jiín ini̱ma̱na, kó kuí be ngayeje ni xi kjimáná.

²¹ Jún ndí ntsꞌie xi tjóna, tsi ini̱ma̱ná tsꞌénbongítaꞌinjínná nga tjínná jé, ka̱ma ku̱i̱ndyión ngindyi̱ko̱n Néná ngatꞌa̱ ꞌniátakón ñá kuí.

²² Kó ngayeje ni xi chji̱a̱ꞌáa̱ Néná tsja̱aná, ngatꞌa̱ ndyi̱niꞌánkjatjosón kjo̱a̱botíxomaa̱, kó ndyi̱niꞌán ni xi tsja maa kui.

²³ Nga si̱ꞌansꞌijin Jesukristoo̱, kui xi ndií Néná, ko̱jo nga si̱ꞌantjó ja̱kꞌi̱e̱ ja̱ngaján xingi̱ xikótsꞌèn íjñá Néná nga si̱ꞌán, kuí bí kui nii̱ xi kjo̱a̱botíxomaa̱ Néná.

²⁴ Xi tjítsꞌénkjátjosón kjo̱a̱botíxomaa̱ Néná, jè tikónjii̱n Néná, kó Néná tikónjii̱n kui, kó kui nii̱ xi ya ñá nga Néná je tikónjinná ñá, ngatꞌaa̱ kui A̱siénni̱xtjin xi je katsjáná.