1 Xo̱jo̱o̱n Juaa̱ 2 - Xo̱jo̱n eén Néná

¹ Jún ndí ndí tsa̱ꞌa̱n, kui nii̱ tjítsꞌenꞌindójnúꞌun tsi̱ꞌe̱ nga si̱ꞌanjéjínjnú, ta̱nga tsi tjín xí je katsꞌénjé, tikónná ngo nda̱ xi kꞌo̱xiéꞌáná ngindyi̱ko̱n Na̱ꞌmii̱, kó Jesukristoo̱, nda̱ xi kixi̱i̱ boá.

² Jesukristoo̱ boá xi katsjá yojoo̱ xikoó ngo kjo̱a̱tjó, nga jaꞌatio kjo̱a̱ni̱ma̱ ta̱ngatꞌanii̱ nga íchjítjé jéná ñá xi je kisꞌijinná Néná. Kó jmí tsi ta̱ jéná tsí, ko̱jo jeé ngayeje xota̱ xi tjín nga̱sondiee̱ boá nga.

³ Tsi ndyi̱niꞌánkjatjosón kjo̱a̱botíxomaa̱ Néná, kuí nii̱ xi bokó nga je yà Néná.

⁴ Kui xota̱ xi: “Jè be an kui” tsó, kó tsi tsꞌénkjátjosónjín kjo̱a̱botíxomaa̱, ndiso kuí xotaa̱, kó jmíjiín ni xi ja̱koxi̱i̱.

⁵ Ta̱nga kui xota̱ xi tsꞌénkjátjosón eén Néná, kuí boá xi ja̱koxi̱ nga tsꞌéntjó Néná xikótsꞌèn chjiéngá sa̱ꞌíntjó, kó kuí nii̱ xi bokó nga je tindyionjìi̱n Néná.

⁶ Kui xota̱ xi tsó nga je tikónjii̱n Néná, chjiéngá bo̱a̱ tsꞌén ko̱e̱je̱tji̱ngi xikó katsꞌén Jesukristoo̱.

Juaa̱ bi̱ tsꞌén atíxomaa̱ xota̱ na̱ngo̱xi̱i̱

⁷ Jún ndí ntsꞌie, jmí tsi ngo kjo̱a̱botíxoma tja̱tsi̱e̱ xi tjítsꞌenꞌindójnúꞌun. Ni xi tjítsꞌenꞌindójnúꞌun kuí boá kjo̱a̱botíxoma xchá xi kisꞌiejnú ndeskande koó nga ítjatsꞌennii̱ nii̱. Kui kjo̱a̱botíxoma xchaá, kuí boá kui én xi tikón xi je kandaꞌyájnú ndeskande koó ngasꞌe̱.

⁸ Ta̱nga tikónrií ngo ni xi tja̱tsi̱e̱ kui kjo̱a̱botíxoma xi tjítsꞌenꞌindójnúꞌun, ngatꞌa̱ xikó katsꞌén Kristoo̱ ko̱jo xikótsꞌèn tindyiónjnú jún tjiyá nga ja̱koxi̱ boá kui kjo̱a̱botíxomaa̱. Kjo̱a̱jñoó ni xi ndajín niꞌaán, je tjichájá, kó je tjítsꞌéntsíjen ndiꞌí xí ja̱koxi̱i̱.

⁹ Xota̱ xi bo̱a̱ ka̱tso̱ nga nínga tikón ndiꞌí xí tsꞌentsíjee̱n tikón, ta̱nga tsi chꞌoo̱ xota̱ xi ngasee̱, ta̱kó nínga jñoó boá nínga tikón.

¹⁰ Kui xota̱ xi tjoó xota̱ xi ngasee̱, nínga tikón ndiꞌí xí tsꞌentsíjee̱n boá nínga tikón kuí, kó bo̱a̱ tsꞌén nga nde ngojín ni xi ꞌboṉcha̱jo tsi̱ꞌe̱ nga sa̱ꞌínjé.

¹¹ Ta̱nga xi chꞌoo̱ xota̱ xi ngasee̱, ngi̱jin nínga jñoó boá nínga tikón, kó nínga jñoó boá nínga tsoꞌbá, kó nde bejín nínga tsꞌénfí, ngatꞌa̱ kui kjo̱a̱jñoó jè katsꞌénti̱ka̱.

¹² Jún ndí ndí tsa̱ꞌa̱n, tjítsꞌenꞌindójnúꞌun kui xo̱jo̱o̱n jún, ngatꞌa̱ ta̱ngatꞌanii̱ ni xi katsꞌén Jesukristoo̱ nga je kiniꞌánjetakoón jéjnú.

¹³ Jún xi xi xchájnú, tjítsꞌenꞌindójnúꞌun kui xo̱jo̱o̱n jún, ngatꞌa̱ jè kamáyàjnú kui xi ja̱bo̱a̱ je tikón ndeskande koó nga ítjatsꞌennii̱ nii̱. Jún xi xo̱ngòjnú, tjítsꞌenꞌindójnúꞌun kui xo̱jo̱o̱n jún, ngatꞌa̱ jè kiniꞌánjnúu̱ nga kiniꞌánchajajnú xindajiín. Tjítsꞌenꞌindójnúꞌun kui xo̱jo̱o̱n jún xi ndí ndína jún, ngatꞌa̱ jè kamáyàjnú Na̱ꞌmii̱.

¹⁴ Tjítsꞌenꞌindójnúꞌun jún xi xi xchájnú, ngatꞌa̱ jè kamáyàjnú kui xi ta̱kó tikón ndeskande koó nga ítjatsꞌennii̱ nii̱. Tjítsꞌenꞌindójnúꞌun kui xo̱jo̱o̱n jún xi xo̱ngòjnú, ngatꞌa̱ tjínjnú ngaꞌniú, kó eén Néná jè tikónjinjnú, ngatꞌa̱ jè kiniꞌánjnúu̱ nga kiniꞌánchajajnú xindajiín.

¹⁵ Ngata̱ niꞌántjójínjnú ni xi ndajín xi tjiín kui nga̱sondiee̱, ko̱jo ni xi niꞌán xi ndajiín nga. Tsi tjín xí tsꞌén kuí nii̱, tikónjinjiín kjo̱a̱tjoó Néná xí Na̱ꞌmii̱.

¹⁶ Ngatꞌa̱ ngojín ni xi tjín kuí nga̱sondiee̱ xi Na̱ꞌmii̱ ndibánií, xikoó ni xi ndajín xi mejeén yojoná, ko̱jo ni xi ya xi mejénná si̱ꞌantsa̱ñá, ko̱jo kjo̱a̱nkꞌatakón xi tsjáná nga tsꞌatio ni xi machjiénná ꞌbéná. Ngayeje kui nii̱ nga̱sondiee̱ ndibánií.

¹⁷ Jè kjifè kui nga̱sondiee̱ ko̱jo ngayeje ni xi mejeén ini̱ma̱a̱ xotaa̱. Ta̱nga kui xota̱ xi ndyi̱tsꞌèn ni xi mejeén Néná, kuí xí ngatsjéni̱xtjin kꞌuíndo.

Bi̱ tsꞌén akóyá Juaa̱ nga xchóo̱n yojoná kjo̱a̱a̱ kondraa̱ Kristoo̱

¹⁸ Jún ndí ndí tsa̱ꞌa̱n, kuí bí xi̱ꞌbi̱ ni̱xtjin xi je kjifetꞌaa̱, kó jún jè kandaꞌyájnú nga ndibá kondraa̱ Kristoo̱, kó ngotꞌe̱ ꞌne̱, achichí jè kjín má kondraa̱ Kristoo̱ xi je jatjokjaà, kuíni nga jè ya ñá nga kuí ni̱xtjii̱n xi je kjifetꞌaa̱.

¹⁹ Kui já boá, kꞌi̱e̱ jatjojinná, ta̱nga nga ja̱koxi̱ xota̱nájín bo̱a̱, ngatꞌa̱ tsi xota̱ná kamá, nijan síndojo̱na tsobo̱a̱, ta̱nga bo̱a̱ kamá tsi̱ꞌe̱ nga xcha̱ cha̱n cha̱n nga tjín xota̱ xi jmí tsi xota̱ xi tsa̱ñá boá.

²⁰ Ta̱nga jún jè tikónjnú A̱si̱énni̱xtjii̱n Néná xi katsjájnú Kristoo̱, kó jè yàjnú ni xi ja̱koxi̱i̱.

²¹ Tjítsꞌenꞌindójnúꞌun kui xo̱jo̱o̱n, jmí tsi kjo̱a̱a̱ nga yàjínjnú ni xi ja̱koxi̱i̱, kjo̱a̱a̱ nga yàjnú kuíni nga tjítsꞌenꞌindójnúꞌun, kó jún jè yàjnú nga nde ngojín kjo̱a̱ndisoo̱ xi ni xi ja̱koxi̱i̱ ndibánií.

²² ꞌYání xi ndiso. Kuí boá xi tsó nga Kjisoo̱jín xò xí Kristoo̱. Kó kuí boá xi̱ꞌba̱ xi kondraa̱ Kristoo̱, ngatꞌa̱ tsꞌenjóꞌojín Néná xí Na̱ꞌmii̱ ko̱jo ndií.

²³ Kó ta̱ ꞌyání xi tsꞌenjóꞌojín ndií, tikónjinjiín Na̱ꞌmii̱. Ta̱nga ta̱ ꞌyání xi ka̱tso̱yà nga Kjisoo̱ xi ndií Néná, ti̱ tikónjii̱n Na̱ꞌmii̱ nga.

²⁴ Kuíni nga tꞌíjñajinjnú ngi̱jin ini̱ma̱jnú kui ni xi je kandaꞌyájnú jún ndeskande koó ngasꞌe̱. Kó tsi kꞌuijñájinjnú kui ni xi je kandaꞌyájnú ndeskande koó ngasꞌe̱, ti̱ bo̱a̱ ti̱ tsꞌén jún ku̱i̱ndyionjinjnúu̱ kui ndií ko̱jo Na̱ꞌmii̱.

²⁵ Kjo̱a̱mindyion ngatsjéni̱xtjii̱n boá xi katsóyàtjónná Jesukristoo̱ nga tsja̱aná.

²⁶ Kuí nii̱ xi tjítsꞌenꞌindójnúꞌun kjo̱a̱a̱ kui xota̱ xi mejeén kꞌo̱ṉcha̱jojnú.

²⁷ Ta̱nga kui A̱si̱énni̱xtjii̱n Néná xi katsjájnú Jesukristoo̱ jè tikónjinjnú, kó nde chjiénjín nga tjín xí ko̱kóyájnú, ngatꞌa̱ kui A̱si̱énni̱xtjii̱n, kuí boá xi bokoyá kjo̱a̱a̱ ngayeje nii̱, kó ja̱koxi̱ boá ni xi bokoyá, jmí tsi kjo̱a̱ndiso. Xikó tsꞌén je akóyájnú kui A̱si̱énni̱xtjii̱n Néná, bo̱a̱ tsꞌén tindyionjinjnúu̱ Jesukristoo̱ ngatsjéni̱xtjin.

²⁸ Kó ngotꞌe̱ ꞌne̱ ndí ndí tsa̱ꞌa̱n, tindyionjinjnúu̱ Jesukristoo̱, tsi̱ꞌe̱ nga kjiꞌanga ko̱kó yojoo̱, tji̱e̱nda̱jín ka̱máná nga kongínchóo̱n ngindyi̱ko̱n, kó kjinjín si̱ꞌáa̱n yojoná nga soboá ka̱máná nga kjo̱e̱ꞌe kuí.

²⁹ Tsi je yàjnú nga kixi̱ Jesukristoo̱, ja̱ ti̱ chjiéngá xcha̱jnú nga ngayeje xota̱ xi ndyi̱tsꞌèn ni xi kixi̱i̱, kuí boá xi je ndií Néná.