1 Xo̱jo̱o̱n Juaa̱ 1 - Xo̱jo̱n eén Néná

Bi̱ tsꞌén íni̱jmì Juaa̱ kjo̱a̱a̱ ꞌyání xi Eén kjo̱a̱mindyioo̱n

¹ Ndyi̱ꞌbíni̱jmìjne̱ jún kjo̱a̱a̱ kui xi tikón ndeskande koó nga ítsꞌi̱yanii̱ nii̱, kui xi je kandaꞌyájne̱ nga tsíchji̱a̱jojne̱, ko̱jo kui xi ndyikón má ji̱n xi je kamábe, kui xi je kamáyà cha̱n cha̱n ji̱n, ko̱jo kui xi ndsa̱ má ji̱n xi je katsꞌénjo̱. Kuí boá xi Én xí tikoón, kui xi tsjaá kjo̱a̱mindyion xotaa̱.

² Kui kjo̱a̱mindyion xi je akakoo̱ xotaa̱, kó ji̱n má xi kamáyà ji̱n, kó chistiko̱ ji̱n, kó ndyi̱ꞌbíni̱jmìjne̱ kjo̱a̱a̱ kui kjo̱a̱mindyion ngatsjéni̱xtjii̱n, kui xi tikónjii̱n Na̱ꞌmii̱, kó jè akakoná.

³ Kui xi je kamáyà ji̱n, ko̱jo kui xi je kandaꞌyá ji̱n xí ndyi̱ꞌbíni̱jmìjne̱ jún, tsi̱ꞌe̱ nga jún, ko̱jo ji̱n ngo ka̱ma ñá. Kó bo̱a̱ tsꞌén nga ja̱koxi̱ nga ñá je kiniꞌángojo̱ yojoná Na̱ꞌmii̱ ko̱jo Jesukristoo̱, kui xi ndií ma kui.

⁴ Kó kui nii̱ xi ndyi̱ꞌbítꞌajne̱ xo̱jo̱n tsi̱ꞌe̱ nga ka̱mando̱jo kjo̱a̱tsjaná.

Bi̱ tsꞌén íni̱jmì Juaa̱ kjo̱a̱a̱ nga ni xi niꞌán boá xi bokó tsí sꞌijinná Néná

⁵ Kuí bí kui én xi je kandaꞌyájne̱ nga akóyájne̱ Jesukristoo̱, kó kuí xí ndyi̱ꞌbíni̱jmìjne̱ nga Néná boá kui ndiꞌí xí tsꞌentsíjenná, kó nga kui, jmíjiín nínga jñó.

⁶ Tsi ndyi̱ꞌmì nga je kiniꞌángo yojoná ñá ko̱jo Néná, kó tsi ta̱kó nínga jñoó tindyión nga ndyi̱niꞌánjé, ndyi̱ꞌbindisó ñá, kó jmí tsi ni xi ja̱koxi̱i̱ xi ndyi̱niꞌán.

⁷ Ta̱nga tsi nínga tikón ndiꞌí xí tsꞌentsíjee̱n timá, xikótsꞌèn Néná tikón nínga tikón ndiꞌí xí tsꞌentsíjee̱n, kjiꞌá boá nga ja̱kꞌi̱e̱ ja̱ngaján ndyi̱niꞌángo yojoná, kó jiín Jesukristoo̱ boá xi tsꞌéntsjiejón ngayeje jéná.

⁸ Tsi jmí jéjínná tsí kꞌuín, ti̱ ñání xi ndyi̱chꞌíṉcha̱jo yojoná, kó jmíjínná ja̱koxi̱i̱.

⁹ Ta̱nga tsi ndyi̱niꞌánkié yojoná nga tjínná jé, ka̱ma ka̱maꞌniátakón ñá nga kixi̱ boá Néná, tsi̱ꞌe̱ nga sa̱ꞌínjetakón jéná ko̱jo nga sa̱ꞌíntsjiejónná ngayeje ni xi ndajín xi tikónjinná.

¹⁰ Kó tsi ndyi̱ꞌmì nga kji̱e̱ niꞌánjé jàn, xikónií tsi ndyi̱ꞌnaxié ndiso Néná, kó ja̱ kji̱e̱ tikónjinjínná kuí én xí tikoón tsobo̱a̱.