1 Timoo̱ 6 - Xo̱jo̱n eén Néná

¹ Xota̱ xi moso̱ xi kastiñaá chjiéngá ko̱ójinkon nga ꞌniú sku̱i̱e̱ndikón ndi̱a̱a̱, tsi̱ꞌe̱ nga chꞌójín tsꞌén ko̱ndókjo̱a̱ kjo̱a̱a̱ Néná, ti̱nde chꞌójín tsꞌén ko̱ndókjo̱a̱ kjo̱a̱a̱ ni xi tjibókoyaá.

² Kó xi tjiín ngo ndi̱a̱ xi sꞌijii̱n Néná, jmí tsi kjo̱a̱a̱ nga ndse̱je̱n sꞌijii̱n Néná ngo joó sꞌe̱ sku̱i̱e̱ndikónjín, ta̱sá chjiéngá nda ngase sa̱ꞌínseén, ngatꞌa̱ tjoó ndi̱a̱a̱ ko̱jo ngatꞌa̱ sꞌijii̱n Néná kui ndi̱a̱a̱. Kuí nii̱ xi takoyèe̱, ko̱jo tatíxomée̱ xota̱ na̱ngo̱xi̱i̱.

Bi̱ tsꞌén íni̱jmì Pabloo̱ kjo̱a̱a̱ kjo̱a̱tjoó to̱o̱n

³ Tsi tjín káꞌá xota̱ xi ko̱kóyá kje̱ꞌe ni, kó tsi sasiénjiín én nda xi tsi̱ꞌe̱ Ndi̱a̱ná Jesukristoo̱, ko̱jo tsi bokoyájiín xotaa̱ nga xcha̱ndikón Néná,

⁴ kui xi bo̱a̱ tsꞌe̱én, ngo xota̱ xi je ꞌboxié yojoo̱, kó jmí ni bejín, ndajín tsꞌénkjó, kó je kamángaá nga chji̱a̱tijo̱ xotaa̱ kjo̱a̱a̱ ta̱jmì énní, kó ki̱a̱ ndibánií kjo̱a̱ꞌontakoón, ko̱jo kjo̱a̱bixkaán, ko̱jo kjo̱a̱chꞌotsoó, ko̱jo kjo̱a̱a̱ nga ngiti̱ maꞌniátakónjín xkjín,

⁵ ko̱jo kjo̱a̱bixkaán xota̱ xi ndajín tsꞌén tikón kjo̱a̱kjíntakoón, ko̱jo xi bejín ni xi ja̱koxi̱i̱, kó tsꞌénkjó nga tsi sku̱i̱e̱ndikón Néná, ka̱macho̱n. Xín ti̱ꞌinkjeꞌée̱ yojòo̱ kui xotaa̱.

⁶ Ta̱nga kjénní nga tsꞌéncho̱nná kui kjo̱a̱yandikoón Néná tsi tsja tjínná kjo̱a̱a̱ ni xi tjínná,

⁷ ngatꞌa̱ nga jéꞌe̱ ñá kui nga̱sondiee̱, jmí ni kichꞌiájín ñá, kó jmí ni xꞌi̱a̱jín ñá nga kongín.

⁸ Kuíni nga tsi tikónná nichinie ko̱jo ńjño xi xcha̱já, tsjangatꞌiéná kjo̱a̱a̱ kui nii̱.

⁹ Ngatꞌa̱ kui xota̱ xi mejeén nga ka̱ma cho̱o̱n, tsꞌenseén ni xi ꞌboṉcha̱jo, ngatꞌa̱ ta̱ chiboa ma mejénrií ni xi jmí ni chjíjiín ko̱jo ni xi ndajíntsꞌeén, kó kui nii̱ xi tsꞌenkjié ko̱jo xi tsꞌénchájá kui xotaa̱.

¹⁰ Ngatꞌa̱ kjiꞌanga ꞌniú niꞌántjó to̱o̱n, ki̱a̱ ndibánií ngayeje to̱ko̱ya ni xi ndajín, kó tjín xota̱ xi ta̱ngatꞌanii̱ nga mejeén ka̱ma cho̱n, nga xín katsꞌénkjaꞌa kjo̱a̱sꞌijii̱n, kó ti̱kuíní xi ndyi̱tsꞌènꞌoón yojoo̱.

Pabloo̱ bi̱ tsꞌén atíxomaa̱ Timoo̱ kjo̱a̱a̱ ni xi sa̱ꞌín

¹¹ Ta̱nga ji xi xotaa̱ Néná jí, ti̱yíi̱ kui nii̱, kó ki̱a̱ tꞌentji̱ngi ji kjo̱a̱kixi̱i̱, ko̱jo kjo̱a̱yandikoón, ko̱jo kjo̱a̱sꞌijii̱n, ko̱jo kjo̱a̱tjoó, ko̱jo kjo̱a̱chiyákoón, ko̱jo kjo̱a̱ndaxota̱a̱.

¹² Ti̱xkéntjé ji kjo̱a̱sꞌijinná, chjábé tsján tsján ji kui xi katsjáná kjo̱a̱mindyion ngatsjéni̱xtjii̱n, ngatꞌa̱ kuí xá tsíchji̱a̱nii̱ Néná, kuíni nga kiꞌmíyé ji nga sꞌijii̱n Jesukristoo̱ ngindyi̱ko̱n kjín xota̱ xi kamá chistiko̱.

¹³ Be Néná kui xi katsjaá kjo̱a̱mindyion ngayeje ni xi tjiín, kó ti̱ be Jesukristo̱ xi katsóyà ꞌyání kui, kjiꞌanga akatíjeé ngindyi̱ko̱n Ponsio Pilatoo̱, nga an tsꞌénbotixomaa̱ ji kui nii̱,

¹⁴ tsi̱ꞌe̱ nga si̱ꞌinkjatjosén yeje ji kui kjo̱a̱botíxoma xi tsꞌéntsjaa. Tsjietsꞌén ti̱ꞌinkjatjosén ji kui nii̱, kó nga jmíjín xi ngo ni ko̱óngítaꞌii̱n, ngaskande nga ko̱kó nginí yojoo̱ Ndi̱a̱ná Jesukristoo̱.

¹⁵ Kui Jesukristoo̱ xi kjo̱e̱ꞌe kuí má ni̱xtjin xi mejeén Néná nga kjo̱e̱ꞌe. Ta̱ ngo tsí má kui Néná xi tsja tjiín, kui xi botixómáná ngayeje ñá, kuí xí nda̱ Ree̱ ngayeje re, ko̱jo Ndi̱a̱a̱ ngayeje ndi̱a̱.

¹⁶ Ta̱ kuí tsi xi ꞌméjín, kó ki̱a̱ tikónjin ngo ndiꞌí ꞌna̱ nínga ngojín xota̱ xi ma fochó tiña, kui xi kji̱e̱ ngo xota̱ xi be, ti̱nde májín be, kui tsi̱ꞌe̱ ngatama ngayeje kjo̱a̱yandikón ko̱jo ngaꞌniú, ta̱ kjiꞌání. Bo̱a̱ kjiꞌi.

¹⁷ Xota̱ cho̱o̱n kui nga̱sondiee̱ tatíxomée̱ nga jejín ꞌboxié yojoo̱, ti̱nde nga kjo̱a̱cho̱o̱njín xi ka̱maꞌniátakón, ngatꞌa̱ kjo̱a̱cho̱o̱n jmí tsi ngatsjéni̱xtjii̱n nga sꞌi̱jña, ta̱sá kui Néná xi tikoón xi ngatamaꞌniátakón, ngatꞌa̱ kuí boá xi tsjáná ngayeje ni xi machjiénná, tsi̱ꞌe̱ nga tsjatsꞌèn si̱ꞌankjién kuí nii̱.

¹⁸ Tatíxomée̱ xota̱ cho̱o̱n nga ni xi nda sa̱ꞌín, ngatꞌa̱ kuí nii̱ xi kjo̱a̱cho̱o̱n ka̱ma, kó nga ndikonkónjín ka̱ma nga tsja̱á ko̱jo nga sa̱ꞌínkabisoón xotaa̱ ni xi tjiín.

¹⁹ Bo̱a̱ tsꞌén nga kꞌuieé ngo kjo̱a̱cho̱n xi ko̱síko̱jo ni̱xtjin xi sꞌe̱ ndibaá, kó kꞌuieé ngo kjo̱a̱mindyion xi ja̱koxi̱i̱.

Pabloo̱ bi̱ tsꞌén atíxomaa̱ Timoo̱ nga fetꞌa

²⁰ Ji Timo̱, nda tsꞌén ti̱ꞌinkjatjosén ji xá xi kiniꞌánkꞌasꞌiee̱n, ngata̱ niꞌínsénjíi̱n én xi jmí ni chjíjiín, ko̱jo éndísó xi chji̱a̱ xotaa̱ kui xi kjo̱a̱kjínkón ndyi̱tsoó,

²¹ ngatꞌa̱ tjín káꞌá xotaa̱ xi kamáꞌniátakón kui kjo̱a̱kjínkón xi ndisoo̱, kó kuíni nga xín íjñá kjo̱a̱sꞌijin xi tsi̱ꞌe̱ Néná. Néná ngatsjájnú kjo̱a̱ndaa̱. Bo̱a̱ kjiꞌi.