1 Timoo̱ 5 - Xo̱jo̱n eén Néná

Pabloo̱ bi̱ tsꞌén íni̱jmi̱ì Timoo̱ xikótsꞌèn sa̱ꞌínxájo̱ xota̱ na̱ngo̱xi̱i̱

¹ Ngata̱ niꞌínxchínje̱jín ji ngo xota̱ xi xchá, ta̱sá tatíxomée̱ xikoó tsi na̱ꞌmíi̱ ma, kó já xo̱ngo̱ò tatíxomée̱ xikoó tsi ntsꞌie ma.

² Ínchjín xi xchaá tatíxomée̱ xikoó tsi na̱áa̱n ma, kó ínchjín xo̱ngo̱ò tatíxomée̱ xikoó tsi ndichje ma. Tsjietsꞌén tꞌíjñí ini̱màa̱ nga ko̱ti̱xomée̱ ínchjiín.

³ Tasíke̱je ji ínchjín kꞌán xi je kꞌien xi̱ꞌii̱n xi ja̱koxi̱ nga jmí nijiín.

⁴ Ta̱nga tsi ngo xota̱chjo̱on kꞌaán xi je kꞌien xi̱ꞌii̱n xi tjiín ndí ko̱jo tsi ndínde, kuí ndií xi chjiéngá tjón ka̱maa̱ nga sa̱ꞌínkjatjosón ni xi chjiéngá sa̱ꞌínjo̱ xota̱ xkjín, ngatꞌa̱ jè sꞌijii̱n Néná, kó nga tsjaá xi xchaá kui kjo̱a̱tjó xi katseꞌeé ngasꞌe̱, ngatꞌa̱ kuí nii̱ xi nda ko̱jo xi tsja maa̱ Néná.

⁵ Kui xota̱chjo̱on kꞌán xi ja̱koxi̱ nga je kꞌien xi̱ꞌii̱n xi jmíjín xi tjiín, ko̱jo xi je kisꞌijña soboaá, Néná koyaa̱ nga ko̱síko̱jo, kó ngatsjéni̱xtjin chji̱a̱a̱ Néná nga ni̱xtjin ko̱jo ni̱xtji̱e̱n nga míꞌaá ni xi chjieén.

⁶ Ta̱nga kui xota̱chjo̱on kꞌán xi je kꞌien xi̱ꞌii̱n xi tsꞌenkꞌásꞌieén yojoo̱ kjo̱a̱tsjaa̱ nga̱sondiee̱, jè kꞌien tikón xi̱ꞌba̱.

⁷ Bi̱ tsꞌén tatíxomée̱ xota̱ na̱ngo̱xi̱i̱, ni xi tꞌíxiaán, tsi̱ꞌe̱ nga jmíjín xi ka̱maa̱ chꞌo tsꞌén ku̱i̱chji̱a̱taꞌin.

⁸ Ngatꞌa̱ kui xota̱ xi ndasénjiín xkjín, ngase má xota̱ xi síndojo̱ ngi̱ya ndiꞌaa̱, jè íjñátꞌaxín kjo̱a̱sꞌijii̱n, kó kuí, ndajín ngase ta̱bo̱a̱jiín xota̱ xi sꞌijinjiín Néná.

⁹ Xo̱jo̱n xki̱ xi kjitꞌa jaꞌeén ínchjín kꞌán xi je kꞌien xi̱ꞌii̱n, ta̱kuítsí ínchjín xi je tsꞌatio ichítié ko̱jo tie noó xi kjótꞌa jaꞌeén kui xo̱jo̱o̱n, ko̱jo xi ta̱ ngo tsí xi̱ꞌin kisꞌiee̱.

¹⁰ Chjiéngá xcha̱ kjo̱a̱a̱ ni nda xi katsꞌén, ko̱jo tsi je nda katsꞌénxchá ndií, ko̱jo tsi je nda katsꞌénseén xota̱ xi jachó ndiꞌaa̱, ko̱jo tsi je aniéjón sé xota̱ tsjiee̱ Néná, ko̱jo tsi je asíko̱jo xota̱ xi ndyi̱foaꞌatio kjo̱a̱ni̱ma̱, ko̱jo tsi je katsꞌén ngayeje ni xi ndaa̱.

¹¹ Ta̱nga ngata̱ ꞌbítꞌejín ji kui xo̱jo̱n xki̱i̱ ínchjín kꞌán xi je kꞌien xi̱ꞌii̱n xi kjindí ngase, ngatꞌa̱ kjiꞌanga ta̱ngatꞌanii̱ kjo̱a̱tsjaa̱ yojoo̱ ka̱mamejeén ku̱i̱xan kó sa̱ꞌínkjii̱n yojoo̱ Kristoo̱,

¹² kó ko̱ngijeé yojoo̱ ta̱ngatꞌanii̱ nga katsꞌénkjatjosónjín kjo̱a̱sꞌijin xi tjón katsꞌénkꞌasꞌiee̱n yojoo̱.

¹³ Kui ínchjín kꞌán xi je kꞌien xi̱ꞌii̱n kjimangaa̱ nga xki̱ ndiꞌa tjimá, kó kamátsiꞌé, ko̱jo ta̱ tjimájo̱ én, nga ndyi̱kongajin ngayeje ni, nga ndyi̱chji̱a̱ ni xi chjiénjín nga ku̱i̱chji̱a̱.

¹⁴ Kuíni nga mejénna nga ku̱i̱xan ínchjín kꞌán xi je kꞌien xi̱ꞌii̱n xi kjindií, kó ngatꞌieé ndí, nga koo̱n ndiꞌaa̱, kó nga tsjandièjiín nga xota̱ xi kondraa̱ ku̱i̱chji̱a̱taꞌin.

¹⁵ Ngatꞌa̱ tjín káꞌá ínchjín kꞌán xi je kꞌien xi̱ꞌii̱n xi je xín kijí, kó je ki̱a̱ tjimátji̱ngii̱ xindajín Satanaa̱.

¹⁶ Tsi tjín xota̱ xi sꞌijii̱n Néná xi tjiín ínchjín kꞌán ndiꞌaa̱, ngatasikójo, tsi̱ꞌe̱ nga kuijín xota̱ na̱ngo̱xi̱i̱ sa̱ꞌín eé, ki̱a̱ ka̱maa̱ nga xota̱ na̱ngo̱xi̱i̱ ka̱maa̱ ko̱síko̱jo kje̱ꞌe ínchjín kꞌán xi je kꞌien xi̱ꞌii̱n xi ja̱koxi̱ nga jmíjín xi tjiín.

¹⁷ Xota̱ xi xchá xi síndotjoón na̱ngo̱xi̱i̱ xi nda tsꞌén ndyi̱fíjo̱ xaá, chjiéngá ꞌniú ngase ngatamayandikón, ngase má kui xi ndyi̱ꞌbini̱jmì, ko̱jo xi ndyi̱bokoyá eén Néná.

¹⁸ Ngatꞌa̱ bi̱ tsó xo̱jo̱n eén Néná: “Ngata̱ foꞌméjín tsꞌoa cho̱yojo xi̱ꞌii̱n xi bitjiá to ndso̱ko̱a̱n ṉño̱paa̱n”, kó ti̱ bi̱ tsó nga: “Nda̱ xi tsꞌénxaá tjínrií kjo̱a̱nda nga ka̱machjií.”

¹⁹ Ngata̱ niꞌínjíi̱n xki̱ tsi tjín xí ko̱óngítaꞌin ngo xota̱ xi xchá, ngototo tsi jó ko̱jo tsi ján má chistiko̱ xi tjiín xi tsꞌénbongítaꞌii̱n.

²⁰ Ta̱nga kui xota̱ xi ta̱kó ndyi̱tsꞌènjeé, ti̱ꞌinchji̱ni̱ ji ngindyi̱ko̱n ngayeje xota̱ na̱ngo̱xi̱i̱, tsi̱ꞌe̱ nga xota̱ xi ngasee̱ ka̱mandikoón.

²¹ Ngindyi̱ko̱n Néná ko̱jo ngindyi̱ko̱n Ndi̱a̱ná Jesukristoo̱ ko̱jo ndítsjie xi jaꞌájin, ꞌniú tsꞌénmíꞌaá tsi̱ꞌe̱ nga si̱ꞌinkjatjosén ji ni xi tꞌíxiaán, nga ta̱ són si̱ꞌinje̱ ji xotaa̱, kó nga jmíjín xi chje̱ꞌéjin ji.

²² Ngata̱ ta̱xkiya boeꞌéxéjíi̱n ngo nda̱ nga kꞌuíjñisée̱n ndse̱, ngatꞌa̱ tsi ta̱, ta̱ chiboa ko̱e̱ꞌéxée̱ ko̱jo ji nijan si̱ꞌinjéje̱. Tsjietsꞌén tindyin kjo̱a̱a̱ ngayeje ni xi ndajiín.

²³ Ngiti̱ ta̱soboá ndáfoajín xi ꞌyí, ta̱sá chií bino̱ tꞌi̱ ji nganda tsi̱ꞌe̱ nga̱ntsꞌoe, ko̱jo kjo̱a̱a̱ chiꞌin xi ngotjón ngotjón tsoboánii̱.

²⁴ Tjín xota̱ xi ya cha̱n cha̱n jeé ngindiee̱ nga sa̱tíjeé, ta̱nga kje̱ꞌe xota̱ xi jaskan ya tsi̱ꞌe̱.

²⁵ Ti̱ bo̱a̱ ti̱ tsꞌén ni xi nda niꞌaán ya cha̱n cha̱n, kó ni xi kje̱ꞌeé ka̱májín ngatsjéni̱xtjin nga kꞌuíndoꞌmá.