1 Timoo̱ 2 - Xo̱jo̱n eén Néná

Bi̱ tsꞌén akóyá Pabloo̱ ni xi si̱ꞌan ngi̱ya na̱ngo̱xi̱i̱

¹ Tjón má kui nii̱ míꞌáa̱ xota̱ na̱ngo̱xi̱i̱: Ndókjo̱a̱jnúu̱ Néná nganda tsi̱ꞌe̱ ngayeje xotaa̱, te̱ꞌéjnúu̱ ndokꞌóchjì kjo̱a̱a̱ ngayeje xotaa̱, kó chji̱a̱ꞌajnúu̱ tsi̱ꞌe̱ nga tsja̱ajnú kjo̱a̱ndaa̱, ko̱jo nga ko̱síko̱jójnú Néná.

² Chji̱a̱ꞌatjejnú nganda tsi̱ꞌe̱ já ree̱, ko̱jo ngayeje xota̱xá, tsi̱ꞌe̱ nga tsjatsꞌèn ko̱jo xió ku̱i̱ndyión, kó bo̱a̱ tsꞌén ka̱ma xcha̱ndikón Néná, kó ka̱ma xcha̱ndikónná ñá nga.

³ Ngatꞌa̱ kuí nii̱ xi nda, ko̱jo xi tsja máa kui Néná xí tsꞌaxiéꞌáná.

⁴ Néná mejeén nga kjo̱tjoꞌa ngayeje xotaa̱, ko̱jo nga sku̱i̱e̱ ni xi ja̱koxi̱i̱.

⁵ Ngatꞌa̱ ta̱ ngo tsí má Néná, kó ta̱ ngo tsí má xi chji̱a̱tjená ñá ngindyi̱ko̱n Néná, kó kuí boá xi Kristo̱ Kjisoo̱, kui xi xota̱ nga̱sondie boá nga.

⁶ Kui xi ti̱ kuii̱ katsꞌénkꞌasꞌien yojoo̱ nga kiniꞌánkꞌién, tsi̱ꞌe̱ nga íchjítjéná ngayeje ñá, kó kuí ngatꞌaa̱ nga Néná, nga jachó ni̱xtjin akó nga mejeén kꞌo̱xiéꞌá ngayeje xotaa̱.

⁷ Kó kuíni nga Néná, an katsꞌénna ngo xi ꞌbini̱jmì éntjatsi̱e̱e̱. An xi apostro̱ an, ja̱koxi̱ boá ni xi tꞌíxián an, jmí tsi tsꞌénꞌbindiso an, kó án boá xi mostroo̱ xota̱ xi jundío̱jín, tsi̱ꞌe̱ nga kokoyáa̱ kjo̱a̱sꞌijin xi ja̱koxi̱i̱.

⁸ Mejénna nga já xíꞌiín, nga ta̱jñàní nga ku̱i̱chji̱a̱a̱ Néná nga skjinínkꞌá tsja nga tsjietsꞌén kꞌuijñá ini̱ma̱a̱, kó nga sa̱ꞌínxchánjín, ti̱nde nga ku̱i̱chji̱a̱tijín nga bo̱a̱ sa̱ꞌín.

⁹ Mejénna nga ínchjiín jmí tsi ndikóntsꞌèn ko̱ónda yojoo̱, tsi̱ꞌe̱ nga ku̱i̱ꞌíndikón xota̱ xi ngasee̱, ngatamabendikón yojoo̱ kó ni̱ma̱takón ngatama, jmí tsi ndikóntsꞌèn sa̱ꞌínnije̱n tsja̱to̱ko̱, ko̱jo tsi ꞌniú sa̱ꞌínkjién ni to̱nsinié, ko̱jo tsi ni to ixkìꞌ xi chjí, ko̱jo tsi xtjí xi chjí.

¹⁰ Ni xi nda niꞌaán xí chjiéngá ngatándani yojoo̱, xikótsꞌèn tsoboaá nga tsꞌén ínchjín xi mejeén sa̱ꞌíndikón Néná.

¹¹ Ínchjiín si̱e̱n si̱e̱n tsꞌén ngatintꞌieè ni xi ko̱ko̱yaá, kó ngatintꞌièꞌeén kui eén.

¹² Ngatꞌa̱ an tsjandièjín an nga ínchjiín xi ko̱kóyá ngi̱jii̱n xota̱ na̱ngo̱xi̱i̱, ti̱nde nga kuijín xi ko̱tíxomaa̱ já xíꞌiín, ta̱sá xió ngatꞌíndo.

¹³ Ngatꞌa̱ Néná jmí tsi na̱ Ebaa̱ xi tjón katsꞌénda, Andaa̱n boá xi tjón katsꞌénda.

¹⁴ Kó jmí tsi Andaa̱n xi kichꞌíṉchajo, naa̱ boá xi kichꞌíṉchajo, kó bo̱a̱ tsꞌén nga kisꞌiee̱ jé.

¹⁵ Ta̱nga ínchjiín, kjo̱tjoꞌarií yojoo̱ nga kꞌuieé ndí, tsi ꞌniú ku̱i̱ndyiajin kjo̱a̱sꞌijii̱n, tsi kꞌuieé kjo̱a̱tjoó, ko̱jo tsi tsjietsꞌén kꞌuíndo ngindyi̱ko̱n Néná nga nda tsꞌén kꞌuíndo.