Romans 2 - Mofa New Testament

¹ Gar haha ka ndo, ko wawa man ka bèzlè mali a gèƋ ndohi ngiƋè, ka slaha ka tsoko gèƋ ngaya auda a sam kita azɓai. Aman te skwi man ka bazla na mali a gèƋ ndo ngiƋè, ka phomde va ngaya a ri ngaya, te man ka ba, ka gia lèmèlèmè ara man ka ga na ma a gèƌ.

² Aman nga suna, kita Zhiklè nzura'a a vava a géƌ tenga'a man ta gi mali arsa.

³ Ka ndo, man ka bèzlè mali a gèƌ ndo ngiƌè, a ka gi lèmèlèmè ara nenga'a: ka hur ka da mbèl ngaya a sam kita Zhiklè ƌè?

⁴ Pombi nenga'a mbia'a, nzhèr skwi nenga'a dai, a ndav nenga'a man a slèmbèƌè tsam tsam azɓai, ka kwola ka ɓi ƌè? Ka sun ɓi ƌè, pombi Zhiklè a zhèr ka, aman ka da ngwèdè ndav.

⁵ Aman ka sassaya ndav ngaya, a ka ngwèdè ndav ngaya azɓai, ka hèy ndzoan a géƌ ngaya, ha pats ndzoan, aman kita nzura'a man a Zhiklè a da gudko va a dai,

⁶ aman a da va na ndo staƌ staƌ ara skwi nenga'a man a gau:

⁷ Nshèffè a mèdèp a sam ndohi man ta nza tara'a te mizlinè man amba, a ta zhèr nslébèrdè, a n'njèlè, a skwi man a géƌèshè azɓai.

⁸ Aman ndohi man ta sala na va a gèƌ, man ta fa na gèƌ a ma nzura'a azɓai, aman ta jèjèr ma man az zura ɓai, a phomde ta, a ga ta ndzoan.

⁹ Matakwan a zlau a sam ndohi tèlèba, man ta gi skwi man ambaɓai: nshèlèkura'a a sam ndohi Juif, te deɓa'a a sam ndohi man Juif ka ɓi ba.

¹⁰ Nslèbèrdè a n'njèlè a gumai a sam ndohi man ta gi skwi man amba: nshèlèkura'a a sam ndohi Juif, te deɓa'a a sam ndohi man Juif ka ɓi ba.

¹¹ Aman Zhiklè a pèr ndo mpèrè azɓai.

¹² Ndohi man ma kita Zhiklè az a sam ta ɓai, a ta gu malai, ta gedas ta genè, a ta ngècè kita, ko ma kita Zhikfè az a sam ta ɓai. A ndohi man ma kita Zhiklè a zhè a sam ta, a ta gu malai, ta ngècè kita a ma kita Zhiklè.

¹³ Ndohi ta ndi a ndohi nzura'a a sam di Zhiklè, a géƋ man ta cinè ma kita Zhiklè ka ɓai, aman a géƋ man ta fi gèƋè'a.

¹⁴ Aman ndohi herkeda, man ta ngatsa ma kita Zhiklè ɓai, a ta dzodzor ma kita Zhiklè, ara man ndav tenga'a a ngra ta, ko ta ngatsa ma kita Zhiklè ɓai, ndav tenga'a kala ma kita tenga'a;

¹⁵ ta ngreda mizlinè ma kita auda, man mwindèa te ndav ta. Ndav tenga'a, a nhér gèƌ tenga'a, a ngreda ta arsa; a sam ngiƌè a pin ta, a sam ngiƌè a jèke ta,

¹⁶ a pats man Zhiklè a gi kita te Yèsu Kristi, a géƌ skwi n'ngheda'a te ndav ndohai, ara ma mbela'a man i njè'a.

¹⁷ Aman ka, ka ndo Juif, a ka gshè va a ma kita Zhiklè, a ka jégèr va a géƋ Bi Zhiklè.

¹⁸ Ka sun skwi man a woya'a, te man ta slebda ka ma kita Zhiklè, a ka slaha ka ƌèl skwi tèlèba, a ka wèr skwi man amba a skwi man ambaɓai.

¹⁹ Ka fi va, a ka gaƌa, i ndo ncè ta ma ndohi mandazlai, skwi nhél sam ndohi nte ruva,

²⁰ ka ndo nslebda ta ndohi man ta sun skwi di ɓai, ka ndo njènga ta ndohi man ta sun maya di ɓai, a géƌ man te ma kita ka rka skwi man a shindè maya a ma nzura'a.

²¹ Anai ka slebda ta a ndohi ngiƌè, a ka slebi ar ka azɓi ƌè? Ka njè ta ndohi ngiƌè: kin gu metsar ɓai! — a ka gia ar ka ƌè?

²² Ka gaƌa: kin gu mphömè ɓai, a ka gi mphömè ar ka ƌè? Vrai a ndara ka, a ka gi vri a metsar genè ƌè?

²³ Ka jégèr va a géƌ ma kita Zhiklè, ka tawaƌaha ma kita, a ka derƌe Bi Zhiklè.

²⁴ Ara man ƌèlèwèr Zhiklè a gaƌa: Ndohi ngiƌè te va ndohi herkeda ta derƌe nzlembaƌ Zhiklè a géƌ kinè.

²⁵ N'ngél ngwon amba, aman ka jèjèr ma kita Zhiklè. Aman ka jèjèr ma kita Zhiklè azɓai, ka ndo man ngwon n'ngela, ka lèmèlèmè ara ndo man ngwon n'ngel ɓi ma.

²⁶ Ndo man ngwon n'ngel ɓai, a jèjèr ma kita Zhiklè, a sam di Zhiklè lèmèlèmè ara ndo man ngwon n'ngela ka ɓi Ƌè?

²⁷ A nenga'a man daga nyakaƋ na ngwon n'ngel ɓai, aman a jèjèr ma kita Zhiklè tèlèba, a ndi a ndo mbèzlè kita a géƋ ngaya, ka man ka ngots ma kita a ma n'ngél ngwon, a ka gi malai ara ma kita Zhiklè a gaƋa.

²⁸ Nenga'a ndo Juif man ta rka a deɓa'a genè ka ɓai. Nenga'a n'ngél ngwon man ndohi ta ngu genè ka ɓai.

²⁹ Aman nenga'a ndo Juif nzura'a, man ndo Juif te ndav. Nenga'a n'ngél ngwon nzura'a, man ndav ntila, man ndo a ngoƋ ka ɓai, aman Mèzhèɓ Zhiklè a ngau. Ndo arsa a ngècè n'njèlè a sam ndohi ka ɓai, aman a sam Zhiklè.