Philippiens 4 - Mofa New Testament

¹ Gar haha, kramamhi ga, man i woy kinè, man i zhèr kinè, man i wuffè a géƋ kinè, man i jégèr va a géƋ kinè! Vazlatsa tara'a te Bai Yèsu, a kin gidè azɓai, dalahimam ga!

² I bidè Evodie a i bidè Syntyche, man ta hérè te ndav lèmèlèmè te Bai Yèsu.

³ A vava ka ba, ndo ntakahayè nlèɓèslèa, sèi ka takaha ta ngwozi haha. Ta takahayè a ngi gèjau a géƋ ma mbela'a, a nda Clément, a ndohi ntakahayè ngiƋè, man nzlembaƋ ta a zhè te Ƌèlèwèr nshèffè.

⁴ Vawuffa te Bai Yèsu pèc pècèk, a i gaƋa kinè za'a: Vawuffa!

⁵ Vangreda ta maya nshèffè kinè man amba a ndohi tèlèba! Bai Yèsu a shkè ndul ndul.

⁶ Kin hur gèƋ zlau ɓai! Aman te skwi tèlèba, vatsu rai mbuhmbuha'a, a nshid gèƋ a sam Bi Zhiklè.

⁷ A gumi Bi Zhiklè man a fena maya te gèƋ nga tèlèba, da ɓür ndav kinè, a nhér gèƋ kinè te Yèsu Kristi!

⁸ A va'a, dalahimam ga, skwi man nzura'a, man a maya nlèɓèslèa, man a vava, man nkezla'a, man amba, man mbela'a, a maya te gèƋ, a nshid gèƋ, vahur nenga'a!

⁹ Skwi tèlèba man kin sundo, kin ngotso, kin tsena'a a kin rka'a a sam ga, vagu arsa! Te deɓa'a Zhiklè gumai a di a zhè a nda kinè.

¹⁰ I wuffè holhola'a te Bai Yèsu, te man kin ngots wuƋi za'a, a kin waray dai. Kin waray di nshèièkura'a ma, aman te deɓa'a kin ngatsa ria ɓai.

¹¹ l gèƋ ma haha azɓai, te man i woy skwai. I slebau, aman skwi man i ngotso, dè'ayè.

¹² I sla ba a i nzi ara ndo ntawassa, i slaha a i nzi ara ndo mwala'a; skwi tèlèba i slebau. I slaha tèlèba, ko man dè'ay ma, ko man mi a keƌyè, ko i ngotso, a njèkèƌia'a a zhè, ko i tèkwèn skwai.

¹³ I slaha skwi tèlèba a nda nenga'a, man a vay wuƌai.

¹⁴ Aman kin gu amba, aman kin takahayè te matakwan ga.

¹⁵ Kinè ndohi Philippes, kin suna, aman te nhinkaƋ ma mbela'a, man i do a kokwar Macédoine, mpi ndohi Zhiklè ngiƌè ta geday skwi man ta ngotso a skwi man ta gu a vna ɓai, sèi kinè staƌgenè.

¹⁶ Aman i te kokwar Thessalonique dai, kin zlündo skwi a sam ga, a gi sak cèw.

¹⁷ I zhèr skwi te ri kinè ka ɓai, aman i woya aman skwi mbela'a a shkè auda te nshèffe kinè.

¹⁸ Aman antanta i ngreda kinè, ara man i ngots skwi tèlèba, kumɓa, a njèkèƌia'a a zhè. I tèkwèn skwi asaɓai, a gèƌ skwi kinè man amba, man i ngots te ri Epaphrodite: ara skwi man kin va na Zhiklè man a wuffe a gèƌè'a, ambaba, man a cè'a.

¹⁹ A skwi man kin tèkwènè'a, Zhiklè ga a di a va kinè, ara n'njèl nenga'a mbia'a te Yèsu Kristi.

²⁰ Aman a Zhiklè, Bab nga, nslébèrdè pèc pècèk, a mèdèp ba. Amen.

²¹ Vaga ta mbalai a ndohi Zhiklè nkezla'a tèlèba te Yèsu Kristi! Kramamhi man ta zhè a sam ga ta ga kine mbalai.

²² Ndohi Zhiklè nkezla'a tèlèba, holhola'a golahi César ta ga kinè mbalai.

²³ Pombai Bi Yèsu Kristi da zhè a nda mèzhèɓ kinè!