Matthew 23 - Mofa New Testament

¹ Te deɓa'a Yèsu a ngaƋa ta ndohi rèdèdè'a a golahi nenga'a:

² Malamhai a ndohi pharisie ta gshè va a njè Moise.

³ Skwi tèlèba man ta gaƌa kinè, vagau, vadzodzora! Aman kin gu ara man a tenga ɓai! Tenga'a ta gèƋè'a a ma genè, aman ta gia'a azɓai.

⁴ Ta gi aman ndohi tazhüɓ skwi mwuƋitpa a gèƋ ta, aman ta woya a ta takaha ta ɓai, ko kèshkata.

⁵ Aman skwi tèlèba ta gi a sam di ndohi genè. Ta ngreda Ƌèlèwèr mbia'a, man ta tsi ri a vna, a bècècèr maslaka mbia'a.

⁶ Ta woya sam n'nzi mbela'a a ma te ngolala. A ta woy a ta nzi a ma te gi njèngè ma Zhiklè.

⁷ Ta woya ndohi ta ga ta mbalai a luma. Ta woya ndohi ta baba ta Rabbi.

⁸ Aman kinè, kin gu arsa ɓai, da baba kinè Rabbi ɓai! Ndo njèngè ma kinè staƋgenè, kin tèlèba kramamhai.

⁹ Ko wawa kin baba na bab kinè ɓai, aman Bab kinè staƋgenè, nenga'a man a zhè te zhiklè te géƋè'a.

¹⁰ Lèmèlèmè aman ndohi tababa kinè ndo mbia'a, kin co ɓai! Aman ndo mbia'a kinè staƋgenè, Kristi.

¹¹ Ndo man a fena ngiƋè te ndev kinè, da gu a ndo ntakaha kinè.

¹² Ko wawa man a woya a ngrè gèƋ na a ri na, ta da manda na gèƋ a hai. Ko wawa man a manda gèƋ na a hai a ri na, ta da slambaƋda na gèƋ.

¹³ Woba kinè, malamhai a ndohi pharisie! Kinè ndohi n'ngwèdè ndo, aman kin pizlèa kokwar Bi Zhiklè a sam ndohai.

¹⁴ Kinè, kin dè a pa azɓai, a kin gedassa ta civeƌ a ndohi man ta woy ndè a pa.

¹⁵ Woba kinè, malamhai a ndohi pharisie! Kinè ndohi n'ngwèdè ndo! Kin shèwèlè a géƌ iyam mbia'a, a gèƌ herkeda tèlèba, aman kin bidè ko staƌ genè ba a civèƌ kinè. Te deɓa'a, aman kin ngots ma, kin geda a ndo ambaɓia'a a fena kinè, man a dè dè vogwa kita.

¹⁶ Woba kinè, kin ndohi ncè ta ma ndohai, man kin rka di ɓai! Kin gaƌa: Ndo man a mbaƌa a nzlembaƌ gi Zhiklè, m'mbèƌè nenga'a ambalai. Aman ndo man a mbaƌa a guro te gi Zhiklè, sèi a gi ara m'mbèƌ na.

¹⁷ Nrzlavahai! Mandazlihai! Nfena mè, guro ƌè, ƌè gi Zhiklè man a gi guro a skwi nkezla'a ƌè?

¹⁸ Kin gèƌè za'a: Ndo man a mbaƌa a nzlembaƌ sam mvi skwi a Zhiklè, m'mbèƌè nenga'a ambalai. Aman ndo man a mbaƌa a skwi man ta va na Zhiklè, man a zhè a pa, sèi a gi ara m'mbèƌ na.

¹⁹ Mandazlihai! Nfena mè, skwi man ta va na Zhiklè ƌè, ƌè sam mvi skwi a Zhiklè man a gi skwi man ta va na Zhiklè a skwi nkezla'a ƌè?

²⁰ Ndo man a mbèƌè a nzlembaƌ sam mvi skwi a Zhiklè, a mbèƌè a nzlembaƌ nenga'a, a nzlembaƌ skwi tèlèba man a géƌè'a ba.

²¹ A ndo man a mbèƌè a nzlembaƌ gi Zhiklè, a mbèƌè a nzlembaƌ nenga'a, a nzlembaƌ skwi man a n'nza te pa ba.

²² Ndo man a mbèƌè a nzlembaƌ zhiklè, a mbèƌè a nzlembaƌ sam n'nzi Bi Zhiklè, a nzlembaƌ nenga'a man a n'nza a pa ba.

²³ Woba kinè, malamhai a ndohi pharisie! Kinè ndohi n'ngwèdè ndo! Kin vi skwi staƋ te va kula, ko te va skwi nkèshèa; a kin jèkeda ma mbia'a te ma kita Zhiklè, ara: kita, nsi ndo te va, ncè a ndav. Aman agassa kin gi skwi haha, a kin jèka ma mbia'a te ma kita Zhiklè ɓi ba.

²⁴ Kinè ndohi ncè ta ma ndohai, man kin rka di ɓai! Kin dègèlè skwi nkèshèa auda te va skwi n'ndai, a skwi mbia'a man a ndèrè a ndo, kin ndi a hwaƋ.

²⁵ Woba kinè, malamhara ndohi pharisie, kinè ndohi n'ngwèdè ndo! Kin pènè deɓ kokwi a gandaf, aman hwaƋ kokwi n'ndha a skwi metsar, a skwi ntétékè.

²⁶ Kinè ndohi pharisie man kin rka di ɓai! Vapana hwaƋ kokwi a gandaf, ko deɓa ba a pènè.

²⁷ Woba kinè, malamhai a ndohi pharisie, kinè ndohi n'ngwèdè ndo! Kinè lèmèlèmè ara gi dzavai, man slalia a pa. T'uda ta rka ara man amba, aman t'hwaƋa'a n'ndha a vatasl nckondo a skwi nlizhè'a tsaƌ tsaƌ.

²⁸ Kinè lèmèlèmè! A sam di ndohai, a deɓa'a kinè ara ndohi nzura'a. Aman ndav kinè n'ndha a ncèkèlma a mphömè.

²⁹ Woba kinè, malamhai a ndohi pharisie, kinè ndohi n'ngwèdè ndo! Aman kin ri gi dzavi ndohi nhadka ma, a kin til gi dzavi ndohi nzura'a mbelembela,

³⁰ kin gaƋa: Man a matsa nga zhè a nda bababhi nga, ar nga mba ma a nda tehga'a a nga bazl ta ndohi nhadka ma ɓai.

³¹ Gar haha kin ngreda va kinè auda a ri kinè, a kin gaƋa: Nga wudahi ndohi man ta bazl ta ndohi nhadka ma.

³² Anai, varufa skwi man babhi kinè ta gau!

³³ Zhüzhokihai! Wud tsebarhai! Kin da hi kinè auda a sam vogwa kita a maya mè?

³⁴ Gar haha i zlinde ta ndohi nhadka ma, a ndohi man ta sun maya, a ndohi man ta sun Ƌèlèwèr Zhiklè, a sam kinè. Matrhia'a kin da bazl ta, a kin da gezlal ta, matrihia'a kin da ndah ta a mènèwèƋ te gi njèngè ma Zhiklè kinè, a kin dzam ta te kokwar te kokwar.

³⁵ Pombaz ndohi nzura'a tèlèba na gèƌ kinè, a hinè a sam pombaz Abel, ndo nzura'a, ha ndè a pombaz Zacharie, kra Barachie, man kin keƌa'a a ma gi Zhiklè, a sam mvi skwi a Zhiklè.

³⁶ A vava i gaƌa kinè, kita haha tèlèba a di a shkè a géƌ verzi ndohi haha.

³⁷ Jérusalem, Jérusalem, man ka bazl ta ndohi nhadka ma, man ka kal ta ndohi man Zhiklè a nzlinde ta a sam ngaya, a kwa! Sak ngama, man i woy a i ɓic ta wudahi ngaya a sam ga, ara wotsak, man a ɓic ta wudahi na a hwaƋ kelpasl na. Kin woya ɓai.

³⁸ Na haha, ta da jèkede gi kinè a dikai.

³⁹ Aman i gaƋa kinè: Anai kin da rkayè asaɓai, ha pats man kin da gaƋa: Nga slébèrdè nenga'a man a shkè a nzlembaƋ Bi Zhiklè!