Marc 14 - Mofa New Testament

¹ Njèkè m'mèn cèw, ga ngolala Pâque a movar man skwi nshégèrè a te di ɓai. A ndohi mvi skwi Zhiklè mbibihia'a, a malamhai ta woy maya, aman ta gshè Yèsu a maya ncèkèlma, aman ta keƌa'a.

² Aman ta gaƌa: Te ngolala ka ɓai, man ɓai ndohi ta da rubai.

³ Yèsu a zhè te Béthanie, te gi Simon, ndo hutsoƋ. Aman a ndu skwai, ngwoz ngiƌè a mshkè a gai, a koloba ɓurdi te rai, a ɓurdi mbela'a, nshum nenga'a a vata. A mpaslama na ma a koloba, a mbaƋa na burdi a gèƋ Yèsu.

⁴ Tengahi ngiƋè ta gu ndav, ta ɓüco ma, a ta goƌ a va ta: Ɓurdi haha ngedas na, amba Ƌè?

⁵ Dara man ta preda ma a suli 300.000, a ta va ta ndohi ntawassa'a. A ta gu ndav a géƌ ngwoza'a.

⁶ Aman Yèsu a ngaƌa ta: Vajèkeda ngwoz haha! Kin pra na zlau a va èhèmè? A ngu skwi man amba a sam ga.

⁷ Ndohi ntawassa'a ta zhè a sam kinè pèc pècèk. Aman kin woy a kin ga ta skwi man amba, kin slaha. Aman iyè, i nzi a sam kinè pèc pècèk azɓai.

⁸ Nenga'a a vau skwi man a slaha a via'a. A mfaƋay mbar a va, ga i metsi ga.

⁹ A vava i gaƋa kinè, t'herkeda tèlèba man ta da njè ma mbela'a, ta da gèƋè skwi man ngwoz haha a gau, a ta da hérè'a.

¹⁰ Judas Iscariot, staƋ te va 12, a ndo a sam ndohi mvi skwi Zhiklè mbibihia'a, aman a ga na ri a gèƌ a Yèsu.

¹¹ Aman ta tsena'a, ndav ta langlanga'a, a ta gaƌa na: Nga da va ka sulai. A Judas a woy maya, aman a ga na ri a gèƋ a Yèsu.

¹² Pats man ta ndi movar man skwi nshégèrè a te di ɓai, nshèlèkura'a, aman ta zli tambak Pâque, golahi Yèsu ta gaƋa na: Ka woya aman nga tila ka skwi n'ndi Pâque a ka ndia'a tema?

¹³ A nenga'a a nzlündo cèw te va golahi nenga'a, a ngaƋa ta: Vodo a kokwar mbia'a, a kin da zli gèƋ a ndo ngiƋè, a duzlak a gèƋ. Vadzodzora!

¹⁴ A sam man a Ƌè a pa, kin gaƋa na babgia'a: Ndo njèngè ma a gaƋa: Gi mbrok ga tema, aman nga ndi skwi n'ndi Pâque a nda golahi ga?

¹⁵ A nenga'a a da ngreda kinè gi mbia'a a géƋè'a, kolongwi te pa, tèlèba ntila amba. A sama'a i woya man kin tila nga skwi n'ndi Pâque.

¹⁶ A golahi Yèsu to do, a ta ndikè a kokwar, a ta ngots skwi tèleba, ara man Yèsu a gaƌa ta. A ta tila skwi n'ndi Pâque.

¹⁷ A dakwaƋ, Yèsu a mshkè a nda tengahia 12.

¹⁸ Aman ta nzahai a ta ndi skwi n'ndai, Yèsu a ngaƋa: I gaƋa kinè a vava, staƋ te jidev kinè, man nga ndi skwi a vna, a da gay ri a gèƋ.

¹⁹ A ta hüno a ta kuƋi te ndav, a ta gaƋa na staƋ staƋ: I Ƌè?

²⁰ Yèsua ngaƋata: StaƋte ndev 12, nenga'a man nga tèr ri a gandaf a vna.

²¹ Kra-ndo a Ƌè na, ara man ta windo te Ƌèlèwèr Zhiklè a géƋ nenga'a. Aman wobau a géƋ ndo man a ga na ri a gèƋ Kra-ndo. Dara'a man ta yoko ɓai.

²² Aman ta ndi skwi n'ndai, Yèsu a nco movar, te deɓ man a mpshè na ma, a ntsaka'a, a mva ta, a ngaƋa:

²³ Voco, na haha va ga. Te deɓa'a a nco kokwai, te deɓ nshid gèƋ, a mva ta, a ta su tèlèba te pa.

²⁴ A ngaƋa ta: Na haha pombaz ga, pombaz nderzlèma, man mbaƋahai a géƌ ndohi kumba.

²⁵ A vava i gaƋa kinè, anai i si barassa te deɓ anta asaɓai, ha pats man i da sia'a mɓua'a a nda kinè te kokwar Bi Zhiklè.

²⁶ Te deɓa'a man ta sla dimèsh psaume ma, to do ta a za oliviers.

²⁷ Yèsu a ngaƋa ta: A vaƋ haha kin da jekyè a pa tèlèba. Aman ta windo te Ƌèlèwèr Zhiklè: I keƋa ndo mɓér skwai, a tambakihi a ta ngezl ta.

²⁸ Aman i slambaƌkaƌauda te m'metsi ma, i Ƌè a ma kinè a kokwar Galilée.

²⁹ A Pierre a ngaƌa na: Aman ta jèke ka a pa tèlèba, iyè, i jèkè ka a pa azɓai.

³⁰ A Yèsu a ngaƌa na: I gaƌa ka a vava, a patsna, a vaƌ haha, ga ngarah a tsi da'ai cèw, ka da cèkèlma a géƌ ga sak makar.

³¹ Aman Pierre a tsi gèjau gené. Ko man i metsi ga a va ka, i cékèlma a géƌ ngaya azɓai. Tèlèba ta goƌa arsa.

³² Te deɓa'a to do a sam man ta baba na Gethsémané, a Yèsu a ngaƋa ta golahi nenga'a: Vanzahai, i da tsi rai.

³³ A nco Pierre, Jacques a Jean, a hüno man a gudzai, a hér zlau te gèƋ,

³⁴ a ngaƋa ta: Nlèyè a keƋyè a hi a vèvèƋ. Vanza haha, vanza a dai!

³⁵ Te deɓa'a a nco sak a ma kètè, a nkalda va na a hai, a ntsu rai. Aman a slaha, sam patsa'a do do auda a sam na.

³⁶ A ngaƋa: Abba, Bab ga, ka slaha skwi tèlèba, co kokwi haha auda a sam ga; aman ara man i woya ka ɓai, aman ara man ka, ka woya'a.

³⁷ A Yèsu a mshkè a sam golahi nenga'a, a n'ngats ta, ta nzhuna, a ngaƋa' na Pierre: Simon, ka nzhuna!

³⁸ Ka slaha ka nzi a dai a nda iyè kèshkataazɓi Ƌè! VanzaaƋai, vatsu rai, skwa da pe kinè a wi ɓai! Mèzhèɓ a woya a ngi amba, aman wuƋi ndo azɓai.

³⁹ A mdo na za'a, a ntsu ri arsa genè.

⁴⁰ A mshkè a deɓa za'a, a n'ngats ta, ta nzhuna. Ta zhingètè, nzhunè a di tenga'a. A ta sun ma man ta menda na ɓai.

⁴¹ A Yèsu a mshkè a deɓa mamakara'a, a ngaƋa ta: Antanta vanzhun ma! Vasok va! Dè'a! TiƋè sama ma! Na haha, ta va na Kra-ndo a ri a ndohi malihai.

⁴² VaslambaƋa, ngodokoya, na haha nenga'a man a gay ri a gèƋ a herdeka nga va.

⁴³ A nasa nasa, aman a gèƋè dai, Judas a mshkè, staƌ te va 12, a ndohi rèƋèƋè'a a nda nenga'a, a tsakwal, a gèƌ gaƋa. Ndohi mvi skwi a Zhiklè mbibihia'a a malamhai a ndohi nhala'a a nzlindeka ta.

⁴⁴ Ndo n'nga na ri a gèƋ Yèsu a n'ngreda ta ar haha: Ndo man i kelawa na ri a da'ai, nenga'a! Vagsa mbelembela, a kin da'a!

⁴⁵ Mshkè na, a nherda na va a Yèsu, a ngaƋa: Rabbi, a nkelawa na ri a da'ai.

⁴⁶ Te deɓa'a ta faha ri a Yèsu, a ta gso.

⁴⁷ StaƋ te ndev tenga'a man ta zhè a sama'a, a mpho kafahi gwèsh, a ntsahama na zlembaƋ a ɓèl bi ndohi mvi skwi a Zhiklè.

⁴⁸ A Yèsu a ngaƋa ta: Kin shkè a sam ga, ara man kin shkè a sam ndo metsar, a tsakwal, a géƋ gaƋa te rai, aman a kin gsyè Ƌè?

⁴⁹ Pèc pècèk i nza a sam kinè, a i senda kinè tegi Zhiklè, aman kin gsiyè ɓai. Aman skwi a gi ara man Ƌèlèwèr Zhiklè a gaƋa.

⁵⁰ Te deɓa'a tèlèba ta jèkeda, a ta hu ta.

⁵¹ Gola staƌ a ndzodzora, jampi a va genè. A ta gso.

⁵² Aman nenga'a a mpra ta maslaka na a rai, a mhu na aƋai.

⁵³ A ta da Yèsu a sam bi ndohi mvi skwi a Zhiklè, a sam man ndohi mvi skwi a Zhiklè mbibihia'a tèlèba ta ɓiceda va a pa, a ndohi nhala'a a malamhai.

⁵⁴ A Pierre a ndzodzor te deɓa dra, a n'nzahai a nda ndohi mizline te gala bi ndohi mvi skwi a Zhiklè, aman a dzi vogwa.

⁵⁵ A ndohi mvi skwi a Zhiklè mbibihia'a, a ndohi kita tèlèba, ta hèsh malwuƌi a gèƌ Yèsu, aman ta slaha ta keƌa'a. Aman ta ngatsa ɓai.

⁵⁶ Aman ndohi tsaƌ tsaƌ ta goƌ ma malwuƌi ncèkèlma a gèƌ Yèsu, a malwuƌi tenga'a nhumda ɓai.

⁵⁷ Tengahi ngiƌè ta slambaƌa, a ta tsokol ma a géƌ nenga'a, a ta gaƌa:

⁵⁸ Nga tsena ara man a gaƌa: I woya man i mbeƌda gi Zhiklè haha aussa, man ri ndo a ngau, a i da rèm ngiƌè te m'mèn makar, gi man ri ndo a ngu ka ɓai.

⁵⁹ Ko ar haha malwuƌi tenga'a nhumda ɓai.

⁶⁰ Te deɓa'a bi ndohi mvi skwi a Zhiklè a nslambaƋa te ndev nhèyèndo, a ndzhoƋo Yèsu: Ndohi haha ta gi ma a géƌ ngaya, ka mbeƋi a pa azɓi Ƌè?

⁶¹ Aman Yèsu a nza tètè, a m'mbeƋa ta a ma ɓai. Bi ndohi mvi skwi a Zhiklè a ndzhoƌo za'a: Ka Kristi, kra Zhiklè man ta slébèrƋè'a ƌé?

⁶² A Yèsu a ngaƌa na: I nenga'a. A kin da rka Kra-ndo, n'nza te ri mandi Zhikle, a di a shkè te zhiklè te va vanai.

⁶³ Te deɓa'a bi ndohi mvi skwi a Zhiklè a nkuratseda maslaka nenga'a aussa, a ngaƋa: Kos nga woy malwuƋi za ƌe?

⁶⁴ Kin tsena'a, a dérdé Zhiklè. Kin hur kè? Tèlèba ta phomda a kita m'metsai.

⁶⁵ A tengahi ngiƌè ta njfa na slèslèɓ a dai, ta pizlèma na dai, a ta ƌutso, a ta gaƌa na: Ani haha, hodko ma! Nduts ka wa? A golahi ndohi mvi skwi a Zhiklè ta tsama na bazlazlam.

⁶⁶ Aman Pierre a zhè te gi nte goƋok te gala, dem mizlinè bi ndohi mvi skwi a Zhiklè staƌ a mshkè.

⁶⁷ Aman a rka Pierre, a dzi vogwa, a mpa na dai, a ngaƌa: Ka ba, kin nza a nda Yèsu te Nazareth!

⁶⁸ Pierre a ntsokol ma, a ngaƌa: I sun ɓai, i sun skwi man ka woya a ka gaƌayè a haha ɓai. Te deɓa'a a mdo auda a dzaudzau.

⁶⁹ A dem massa, man a rka'a, a nhüno za'a, a ngaƌa ta ndohi a di vogwa tèlèba: Ndo haha staƌ te va golahi ndo sa!

⁷⁰ A Pierre a ntsokol ma za'a. Te deɓ kètè tengahi man ta zhè, ta gaƌa na Pierre za'a: Halau, ka te va ndohia'a; da'ai ngaya ara ndo Galilée.

⁷¹ A Pierre a hüno a ngèƌè, a m'mbaƌa: I sun ndo man kin gèƌè haha ɓai!

⁷² A nasa nasa ngarah a ntsu da'ai macccèwa'a. A ma Yèsu a nhaka na gèƌ a Pierre, man a ngaƌa na: Ga ngarah a tsi da'ai macecèwa'a, ka cèkèlma a gèƌ ga, sak makar a nhur a vata, a nkuƌau.