Colossiens 3 - Mofa New Testament

¹ Aman kin slambaƌkaƌauda a nda Yèsu Kristi, vawoy skwi nte géƌè'a, man Yèsu Kristi a zhè, a nza a pa te civèƌ ri mandi Zhiklè!

² Vahur skwi nte géƌè'a, skwi herkeda ka ɓai.

³ Aman kin mets kinè ma, nshèffè kinè n'ngheda te Kristi, te Bi Zhiklè.

⁴ Aman Kristi, nshèffè nga; aman a da gudko va a dai, kinè ba kin da gudko va a dai a nda nenga'a, a n'njèlè.

⁵ Gar haha vakeƋa na gèƋ a hai a skwi herkeda haha: mphömè, skwi nlizhè'a, mi skwi ambaɓia'a, ntétékè, ndo man a wèr va na genè (nara m'mbèh skwai);

⁶ a géƌ skwi sa, ndzoan Zhiklè a shkè a géƌ ndohi mèdègèƌ.

⁷ Kine ba kin gu arsa, aman kin nza te mali hala'a dai.

⁸ Aman antanta vajèkeda skwi haha: ngi ndav, ndzoan, shèwa, ndérƌe ndo, ngèƌè ma horai.

⁹ Kin tsokol ma a va kinè ɓai! Aman kin suƌko skwi hala'a a mizlinè nenga'a auda a va ma.

¹⁰ A kin feda ndo mɓua'a a va, man a n'nge kinè a ndo mɓua'a, man a sun skwi Zhiklè tèlèba.

¹¹ Gar haha ndo Grec, ndo Juif, ndo man ngwon n'ngela, ndo man ngwon n'ngel ɓai, ndo barbare, ndo Scythe, ɓèlè, kra ngwi ka ɓai, aman Kristi, tèlèba, te ndohi tèlèba.

¹² Gar haha kin ndohi man Zhiklè a mpar ta, ndohi nkezla'a, ndohi man a woy ta, vafeda skwi haha a va: nsi ndo te va, ndav nlüɓekwa'a, m'mènde gèƋ a hai, ndav amba, nzhèr skwia dai.

¹³ Valèɓèslè a va kinè, ngiƋè a sam ngiƋè, vapra malai, ngiƋè a ngiƋè, man ma a zhè te ndev kinè. Lèmèlèmè ara Bi Zhiklè a mpra kinè malai, vagu lèmèlèmè.

¹⁴ A géƋ skwi tèlèba, vafeda mwoy-ndo a va, nenga'a a humdè kinè a njèlèlè'a.

¹⁵ Gumi Kristi da gu bi te ndav kinè; Zhiklè a mbaba kinè a pa, te va staƋ. Vashüd gèƋ!

¹⁶ Vagu aman ma Kristi da zhè te ndav kinè a vata. Vaslebau a va kinè, vabüdo va kinè, a maya tsaƋ tsaƋ, a Psaumes a dimèsh, a dimèsh Mèzhèɓ, a nshid gèƋ a Zhiklè.

¹⁷ Skwi tèlèba man kin gia'a, ko a ma, ko a mizlinè, vagu tèlèba a nzlembaƌ Bai Yèsu Kristi. Vashüd gèƌ a Bab Zhiklè te nenga'a!

¹⁸ Kinè ngwozai, vafu gèƋ a ma bakihi kinè, ara man ambaba Bi Zhiklè!

¹⁹ Kinè ngurhai, vawoy ngwozi kinè a ndav kinè, kin gu ndav tengtenga'a a géƋ ta ɓai!

²⁰ Kinè wudahai, vatsena ma bab a mam kinè te skwi tèlèba; aman kin gi arsa, ambaba Bi Zhiklè.

²¹ Kinè babhai, kin poko ta gèƋ auda a wudahi ɓai, kin mbeƋama ta ndav ɓai!

²² Kinè ɓèlèlihai, vatsena ma babgihi kinè te skwi tèlèba. Vagu mizlinè a ndav amba, a sam di ndo genè ka ɓai, vagu te zlau Bi Zhiklè, ara man ambaba ta ndohi genè ka ɓai.

²³ Skwi tèlèba man kin gia'a, vagau a ndav tèlèba, ara man a Bi Zhiklè, a ndohi genè ka ɓai.

²⁴ Vasuna, kin ngècè skwi ntulè a sam Bi Zhiklè, ara skwi n'ndi gai. Vagu mizlinè Bi Yèsu Kristi!

²⁵ Ndo man a gi zura'a azɓai, a ngècè skwi lèmèlèmè ara man a gau. Zhiklè a pèr ndo mpèrè azɓai.