Actes 8 - Mofa New Testament

¹ A pats nasa ta hüno a ta dzar ta mpi ndohi Zhiklè te kokwar Jérusalem, a ta venda gèƋ ta a kokwar Judée a Samarie tèlèba. Sèi ndohi sak ta ksar ta ɓai.

² A ndohi Zhiklè ta ra Etienne, a ta kuƋu a vata.

³ A Saul a ndzakaɓa mpi ndohi Zhiklè, a mdo a gi a gi a gai, a ngska ta ngurhi a ngwozi, a mpe ta a gi dangai.

⁴ A ndohi man ta venda gèƋ ta, to do, a ta nju ma Zhiklè.

⁵ A Philippe a mdo a kokwar ngiƋè te Samarie, a njè ta ma Kristi.

⁶ A ndohi ta fa na zlembaƋ a vata, a ta rka nrkedi man a gau.

⁷ Aman mèzhèɓhi ambaɓihia'a ta shkè auda te ndohi man a ga ta, a ta tsu lalau a vata; a ndohi man ta tèfè, a ndohi vedal kumba ta mbel ta.

⁸ A mwuffè mbia'a a zhè te kokwar sa.

⁹ Ndo ngiƋè a zhè te kokwar, nzlembaƋ na Simon, man a mbèh skwi hala'a, a ndzugor va, a ndohi Samarie tèlèba ta rzl ta a pa,

¹⁰ a ta pi dia'a, ko ndo nkèshè'a, ko ndo mbia'a tèlèba, a ta gaƌa: WuƋi Zhiklè mbia'a.

¹¹ Ta pu dia'a, te man ndo haha a mboh skwi a sam ta n'nzi a zhè.

¹² Aman ta co ma kokwar-Bi-Zhiklè, a nzlembaƋ Yèsu Kristi, a ndav, man Philippe a njè ta, a ngurhi a ngwozi ta gu baptême.

¹³ Simon baa ncoandav, angu baptême, a ngso va a Philippe. Aman a rka nrkedi a skwi man a gau, a nrzl na.

¹⁴ Aman ndohi sak te kokwar Jérusalem ta tsena'a, kokwar Samarie a nco ma Zhiklè, ta zlündo Pierre a Jean,

¹⁵ aman ta dò, a ta tsi rai a géƋ tenga'a, a ta da ngècè Mèzhèɓ Zhiklè nkezla'a.

¹⁶ Aman Mèzhèɓ Zhiklè nkezla'a a mshkè a géƋ tenga'a te kokwar Samarie di ɓai, ko staƋ, te man ta gu baptême sèi a nzlembaƋ Bi Yèsu.

¹⁷ A Pierre a Jean ta fa ta ri a géƋ, a ndohi Samarie ta ngots Mèzhèɓ Zhiklè nkezla'a.

¹⁸ Aman Simon a rka'a, Mèzhèɓ Zhiklè nkezla'a a mshkè, aman ndohi sak ta fu ri a gèƋ ndo, a ngaƋa:

¹⁹ Vavay wuƋi ba, aman i fi ri a gèƋ ndo; a nenga'a a woya a mpa ta sulai, a ngècè Mèzhèɓ Zhiklè.

²⁰ A Pierre a ngaƌa na: kinè a suli ngaya sèi da gedas na, a géƌ man ka huro, skwi man Zhiklé a via'a, ndo a ngècè a sulai.

²¹ Ka ngècè skwi haha azɓai, te man ndav ngaya nzura ka ɓai a sam Bi Zhiklè.

²² Gar haha sèi ka menkaƌa deɓa te mali ngaya, a ka tsi ri a Bi Zhiklè, gar a pra ka mali man ka hur arsa.

²³ Aman i rka'a, ka ndha a mèƌètèr nƌuzlekzleka'a, mali a ndzaw ka.

²⁴ A Simon a m'mbeƌa na a ma: Sèi kin tsi ri a Bi Zhiklè a gèƌ ga a ri kinè, a skwi man ka goƌ haha, ko staƌ da shkè a géƌ ga ɓai.

²⁵ A tenga'a man ta gu malwuƋai ma Bi Zhiklè, ta menkaƋa deɓa a kokwar Jérusalem, a ta njè ma mbela'a te kokwar Samarie tsaƋ tsaƋ.

²⁶ A gol Bi Zhiklè a ngaƋa na Philippe: SlambaƋa, a ko do man a dukwaƋ, a civèƋ man a shkè te Jérusalem, a nƋè Gaza, civèƋ hèshèkèƋ.

²⁷ A nenga'a a nslambaƌa, a mdo. A nrka ndo ngiƌè te Ethiopie, ntokotaslbai, ndo mɓer gi bai Candace ngwoza'a, te Ethiopie, ndo mɓer gi mèshèlè nenga'a ba, man a shkè a kokwar Jérusalem, aman a ntsi ri a Bi Zhiklè.

²⁸ A minè a deɓa a ngwai, a n'nza a kiki nenga'a, a njongo ma ndo nhadka ma Esaie.

²⁹ A Mèzhèɓ Zhiklè a ngaƋa na Philippe: Do a tsagi kiki sa!

³⁰ A Philippe a mhau, a ntsena ara man a jongo ma ndo nhadka ma Esaie, a ngaƋa: Ka tsena skwi man ka jèngè Ƌè?

³¹ A nenga'a a ngaƋa: I sun ko tema, man ndo a ngray ɓai? A mbaba na Philippe a kikai, a nzi a tsagi nenga'a.

³² Ma Ƌèlèwèr Zhiklè, man a jongo, na nta: Ta da nenga'a ara tambak man ta Ƌè a sam man ta zli daia'a a pa, ara tambak man ta zli mamlia'a.

³³ A m'manda gèƋ na a hai, a Zhiklè a nco kita nenga'a, a nco nshèffè nenga'a auda t'herkeda. Nslaha a ngréƋè tser nenga'a wa?

³⁴ A ntokotaslbai a ngaƋa na Philippe: Sèi ka gaƋayè, ndo nhadka ma a goƋ ma haha a géƋ ngè? A goƋ a géƋ va nenga'a Ƌè, Ƌè a géƋ ndo ngiƋè Ƌè?

³⁵ A Philippe a hüno a sam Ƌèlèwèr Zhiklè haha, a n'ngreda na ma mbela'a a géƋ Yèsu.

³⁶ Aman ta Ƌè a civèƋ, ta shkè a ma woyam; a ndo mɓer gi bai a ngaƋa: Na haha, iyam a zhè; ka gay baptême azɓi èhèmè?

³⁷ A Philippe a ngaƋa: Aman ka co a ndav ngaya tèlèba, ka slaha a ka gi baptême. A nenga'a a m'mbeƋa na a ma: I co a ndav ga: Yèsu Kristi, nenga'a kra Zhiklè.

³⁸ A nzlatseda kiki a hai, a ta suloma a iyam, cèw ba, Philippe a nda ntokotaslbai. A Philippe a n'nga na baptême.

³⁹ Aman ta shkè auda te iyam, Mèzhèɓ Bi Zhiklè a nco Philippe auda a sam di na, a ndo mber gi bai a nrka'a te deɓa'a asaɓai. Aman nenga'a a ndo a ma a civèƋ na a mwuffè.

⁴⁰ A Philippe a mshkè a kokwar Azot, aman a shèwèlƋè ma mbela'a te pa, te kokwarhi tèlèba, ha a ndikè a kokwar Césarée.