Actes 17 - Mofa New Testament

¹ Aman ta bozl ndev kokwar Amphipolis a Apollonie, ta do a kokwar Thessalonique man gi njèngè ndohi Juif te pa.

² Ara man Paul a gia pèc pècèk, a mdo a sam ta a gai, a nslebda ta ƌèlèwèr Zhiklè a pats nshèk va, pats nshèk va, sak makar,

³ a nsenda ta, a ngreda ta, ara man sèi skwa a dza na Kristi, ara man a nslambaƌkaƌauda te m'metsai nƋèzl, a ngaƌa: Yèsu haha, man i njè kinè, nenga'íi Kristi.

⁴ Matrhia'a te ndev tenga'a ta basla gèƌ, a ta humda a Paul a Silas; ndohi Grec ba kumba, man ta gu zlau Zhiklè, a ngwozi ndohi mbibihia'a ba kumba kètè.

⁵ Aman ndohi Juif ta gu srak, a ta hul fali ndohi ngiƌè, a ta ɓic ta, a ta rubu te kokwar, a ta shkè a ma gi Jason, a ta woy a ta de ta Paul a Silas a sam ndohi kokwar.

⁶ Aman ta ngats ta ɓai, ta ngazlda Jason a kramamhi ngiƌè kètè a sam ndohi mbibihia'a te kokwar, a ta goƌ a wuƌai: Ndohi man ta dzulvaƌa herkeda telèba; ta a haha!

⁷ A Jason a nhel ta a gai, ta tèlèba ta gi skwi man ambaba bi Cèsar azɓai, a ta gaƌa: bi ngiƌè azɓai, sèi Yèsu!

⁸ A fali ndohi sa ta poko ta geƌ auda a ndohai, a ndohi mbibihia'a te kokwar, aman ta fu zlembaƋ a ma haha.

⁹ A Jason a ndohi ngiƋè ta pul gèƋ a ndohi mbibihia'a, a ta pre ta.

¹⁰ Nkézhèw sam langa, kramamhi ta fèda ta ma a nda Paul a Silas tsam tsam a kokwar Bérée. Aman to do a pa, to do a gi njèngè ndohi Juif.

¹¹ Aman nlèɓèslè ndohi Bérée a fena man a ndohi te kokwar Thessalonique. Ta woy a ta tsena ma Zhiklè, a ta war te delèwèr Zhiklè a nciƋ sam a ncid sam, aman ta rka'a: arsa a vava Ƌè?

¹² Ta kumba te ndev tenga'a, ndohi Grec kumba, ngurhi a ngwozihi ndohi mbibihia'a, ta co a ndav.

¹³ Aman ndohi Juif te kokwar Thessalonique ta tsena'a, Paul a njè ta ma Zhiklè te kokwar Bérée ba, ta shkè, a ta poko ta gèƋ auda. A ndohi te pa.

¹⁴ A kramamhi ta feda na ma Paul tsam tsam a ma iyam mbia'a. A Silas a Timothée ta nza te pa.

¹⁵ A ndohi man ta feda na ma Paul, a ta da'a a kokwar Athène; a ta shkè a deɓa, aman ta menda ta ma Paul a nda Silas a Timothèe, ara man a gaƋa ta: vowashkè a sam ga tsam tsam!

¹⁶ Aman Paul a zhèr ta te kokwar Athène, ndav nenga'a a hubètè, aman a rka kokwar Athène tèlèba, n'ndha a vrai a skwi mbèh skwai.

¹⁷ A njè ta ndohi Juif a ndohi man verzi ta tsaƋ, man ta tsu ri te gi njèngè ma Zhiklè, a ndohi kumba, a ncid sam a nciƋ sam.

¹⁸ A ndohi épicurie a ndohi stoirie, ta gu ma a nenga'a, a ta gaƋa: Ndo tsaval ambali haha a war mè? Matrhia'a ta gaƋa: Ara man a woya a senda nga, a til ma zhiklè mɓua'a a hai (aman a njè ta ma Yèsu, a ma nslambaƋkaƋauda te m'metsai).

¹⁹ A ta co, a ta da'a a sam kita, a ta gaƌa: Ka woy a ka ngra nga ma ngaya mɓua'a man ka njè haha ƌè?

²⁰ Ka hadka nga ma mɓua'a a zlembaƌ nga, a nga woya a nga sun verzia'a.

²¹ Ndohi Athène tèlèba, a ndohi man ta zhè te kokwar Athène a mbrok ta nza'a, ta woy a ta tsena ma mɓua'a a ta gèƋè ma mɓua'a genè.

²² A Paul a nzlatsa te ndev sam kita, a ngaƋa: Kinè ndohi Athène, i rka, aman kin hér Zhiklè kumba.

²³ I beza a civèƋ, a i rka gi njèngè ma Zhiklè te kokwar kinè, a i ngots sam man kin va na skwi a Zhiklè man ta windeda pa: A Zhiklè man nga sun ɓai. Anai i njè kinè nenga'a, man kin tsi ri a nenga'a, man kin sun ɓai.

²⁴ Bi Zhiklè man a gu herkeda a skwi tèlèba te pa, nenga'a Bi giƋfèk a herkeda, a nzi te gi m'mbèh skwi azɓai, man ri ndo a ngau.

²⁵ Ri ndo a wara na di azɓai, ko skwi mèmè; aman nenga'a a vi nshèffè a mèzhèɓ a ndo tèlè, a skwi tèlè.

²⁶ A nenga'a a ngu aman te goƋozlom staƋ, verzi ndohi tèlèba ta zlèzlèmè a géƋ herkeda, a pa ta kuma a sam n'nzi tenga'a.

²⁷ Ta zhè aman ta woy Zhiklè, a ta slaha ta shin nenga'a, a ta slaha ta ngècè'a. Na haha, nenga'a az dra a sam ndo staƋ staƋ te ndev nga ɓai.

²⁸ Aman te nenga'a nga zhè, nga giƋè va, a nga nzi a nshèffè, lèmèlèmè ara ndohi mwinƋè dimèsh kinè kètè man ta gaƌa: Nga verzi nenga'a.

²⁹ Aman nga verzi Zhiklè, sèi nga hurokona ɓai, Zhiklè lèmèlèmè ara skwi man ta gu a guro a verzhègenè a kwa, man ndohi ta roma a maya ta.

³⁰ Zhiklè a hér pats man kin sun nenga'a ɓai, ani asaɓai. Aman antanta a ngaƋa ta ndohi tèlèba, a sam herkeda tèlèba, aman ta ngwèƋè ndav ta, a ta tsi rai.

³¹ A vava, pats ngiƋè man a woya'a, a da gi kita ndohi herkeda tèlèba zura'a. Ndo staƋ man a fedahai a ngia'a. Aman a slambaƋdekaƋauda te ndev ndohi m'metsa'a, a ngreda nga, a da gi arsa a vava.

³² Aman ta tsena ma nslambaƋkaƋauda te ndev ndohi m'metsa'a, ndohi ngiƋè ta ngwossaha, ndohi ngiƋè ta gaƋa: Nga woy a nga cinè ma ngaya haha a va'a.

³³ A Paul a njèke ta arsa,

³⁴ A ndohi ngiƋè ta dzodzora, ta co Zhiklè a ndav. Te va tenga'a Denys, staƋ te ndev ndohi kita, a ngwoz ngiƋè, nzlembaƋ na Damaris, a ndohi ngiƋè a nda tenga'a.