1 Corinthians 5 - Mofa New Testament

¹ I tsena'a, mphömè a sam kinè a zhè, mphömè man ko ndohi nte deɓa ta gi azɓai: ndo man a cè ngwoz bab na.

² A kin fí va, a kin kuƋi azɓai, a kin cka ndo man a gu mali arsa auda te ndev kinè ɓai.

³ Aman iyè, ko iyè az a sam kinè ɓai, te mèzhèɓ i zhè a sam kinè. I sun kita man i da bazla na a gèƌ a ndo ngu arsa, te ndav ga, ara man i zhè a sam kinè.

⁴ A sam ɓicè va kinè a nzlembaƌ Bai Yèsu Kristi, i zhè a nda kinè te mèzhèɓ, a wuƌi Yèsu Bi nga,

⁵ a nga woy a nga va na ndo sa a ri a Sadan, a va na a gèƋèsh na; aman mèzhèɓ na da mbel na a pats Bai Yèsu.

⁶ Nfi va kinè, ambaɓai. Kin sun ɓi ƌè? Movar mbesla'a kèshkata a ɓesla movar tèlèba.

⁷ Gar haha, vapatseda movar mbesla'a halakai tèlèba auda, te deɓa'a kin ndi a movar mɓua'a, man movar mbesla'a a te di ɓai. Aman nga ba, nga ngots kra tambak Pâque, nenga'a Kristi, man ta zlama na da'ai a géƌ nga.

⁸ Gar haha nga, man nga gi ngolala, sèi nga gia'a a movar mɓesla'a halaki ka ɓai, a movar mɓesla'a man mali a skwi ambaɓia'a a te di ɓai, aman a movar man skwi nshégèrè a te di ɓai, a ndav nzura'a, te ma nzura'a.

⁹ I winda kinè te Ƌèlèwèr, kin humda va a ndohi mphömè ɓai!

¹⁰ I hur a gèƌ ndohi a civèƌ herkeda ka ɓai man ta gi mphömè, keda, metsar, vrai, aman kin woy a kin hümdè a tenga'a ɓai, sèi man kin jèkeda herkeda.

¹¹ Aman i winda kinè ma haha, aman kin humda va ɓai a ndo man kin baba na kramam kinè, man nenga'a ndo mphömè, ndo keda, ndo vrai, ndo nderƌe ndo, ndo njèjèr zom, ndo metsar. Kin ndau skwi a nda nenga'a ɓai!

¹² Mbezlè mali a gèƌ ndohi nte deɓa, ma ga ƌè? Mbèzlè kita a gèƌ ndohi nte ndev kinè, nasa ma kinè ka ɓi ƌè?

¹³ Zhiklè a gi kita ndohi nte deɓa. Vocko ndo man ambaɓai auda te ndev kinè!