1 Corinthians 2 - Mofa New Testament

¹ ba, dalahimam ga, aman i do a sam kinè, i do a ma mbia'a, a maya mbia'a ka ɓai, aman a i ngreda kinè ma malwuƌi Zhiklè.

² I gaƌa i njè skwi ngiƌè a sam kine azɓai, sèi man Yèsu Kristi staƌgenè, nenga'a man ta gezlala'a.

³ I nza a sam kinè ara ndo mbia ka ɓai, i nza a sam kinè a zlau, a ngudzi mbia'a,

⁴ a i gaƌa kinè ma, a i njè kinè ma Zhiklè, a ma kumba ka ɓai, ara maya ndohi herkeda; aman i ngreda wuƌi Mèzhèɓ Zhiklè auda,

⁵ a géƌ man verzi skwi man kin co a ndav, maya ndohi herkeda ka ɓai, aman wuƌi Zhiklè.

⁶ Ma man i gèƌè'a, nenga'a ba ma maya a sam ndohi njèlèlè'a; aman maya ndohi herkeda a bihi herkeda sata man ta da ndiv ta ka ɓai.

⁷ Aman i gèƋè ma maya Zhiklè, man n'ngheda a sam di ndohai, man herkeda nge di ɓai.

⁸ Nenga'a, ko bihi herkeda haha ta sun ɓai. Aman a matsa ta suna, ar ta gezlala Bi n'njèlè ɓai.

⁹ Aman a gau, ara man Ƌèlèwèr Zhiklè a gaƋa: Skw i man di ndo a rka ɓai, a zlembaƋ ndo a tsena ɓai, skwi man a nshkè a ndav ndo di ɓai, skwi man Zhiklè a tila ta ndohi man ta woya'a.

¹⁰ Aman a sam nga, Zhiklè a n'ngra nga a Mèzhèɓ nenga'a: Mèzhèɓ a wuzhè skwi tèlèba, ko skwi Zhiklè nthwaƌa ba.

¹¹ Nsun skwi te ndav ndo wa, sèi Mèzhèɓ ndo man a zhè te ndav na kla! Lèmèlèmè ndo azɓai, man a sun Zhiklè, sèi Mèzhèɓ Zhiklè staƋgenè.

¹² Nga ngatsa Mèzhèɓ herkeda ka ɓai, aman Mèzhèɓ man a shkè te Bi Zhiklè, aman nga slaha nga sun skwi man Zhiklè a mva nga te pombi nenga'a.

¹³ A nga ngreda skwi Mèzhèɓ haha a ma ndohi man ta ngots Mèzhèɓ Zhiklè; nga gèƋè azɓai a maya ndohai, aman ara Mèzhèɓ Zhiklè a senda nga.

¹⁴ Ndo te nyakaƋ na a sun Mèzhèɓ Zhiklè ɓai, a sla na skwi nrzla'a, a slaha a nshinè ɓai. Skwi Mèzhèɓ Zhiklè, ta cinè sèi a Mèzhèɓ Zhiklè.

¹⁵ Aman ndo man Mèzhèɓ Zhiklè te ndav, a ƌèl skwi tèlèba. Aman gèƌ va na, ta slaha nƌèl nenga'a ɓai.

¹⁶ Nsun skwi man Bi Yèsu a hèrè'a wa, nwoya a nslebda na wa? Aman nga, nga ngots nhèrgèƌ Kristi.