1 Corinthians 1 - Mofa New Testament

¹ Paul, man Yèsu Kristi a mbaba na ndo sak na, ara man Zhiklè a woya'a, a Sosthène, kramam ga,

² a sam mpi ndohi Zhiklè te Corinthe, a sam ndohi man Yèsu Kristi a nkezla ndav ta, man Bi Zhiklè a mbaba ta a ndohi nkezla'a; a sam ndohi tèlèba, a sam tèlèba, man ta tsi ri a nzlembaƋ Bi nga Yèsu Kristi Bi tenga'a, Bi nga, cèw ba:

³ Pombai a nda kinè a gumai te Zhiklè, Bab nga, te Yèsu Kristi, Bi nga!

⁴ I shid gèƋ a Bi Zhiklè pèc pècèk a géƋ kinè, a géƋ pombi Zhiklè man kin ngotso te Yèsu Kristi.

⁵ Te nenga'a kin nda a ndohi mèshèlè te skwi tèlèba, te ma tèlèba, te skwi man kin sun tèlèba,

⁶ a ma malwuƌi Kristi a nza tara'a a sam kinè ma.

⁷ Aman a vava, skwi man Zhiklè a via'a, man kin ngatsa ɓi ba, azɓai, kinè man kin zhèr man Yèsu Kristi, Bi nga, a gudoko nga va a dai.

⁸ Nenga'a ba a ɓer kinè, aman kin nzi tara'a, ha skwi tèlèba nrufa ma, aman a pats Bi Yèsu Kristi ma a da az a géƋ kinè ɓai.

⁹ Aman Zhiklè nlèɓèslèa, nenga'a man a baba kinè, man kin humda a Yèsu Kristi, kra na, Bi nga.

¹⁰ Aman i fa kinè ma a gèƋ, dalahimam ga, a nzlembaƋ Yèsu Kristi, Bi nga: Valèmdè ma kinè pèc pècèk, vagu maya, skwi ngiƋè da kezla kinè gèƋ ɓai, aman vamba ma kinè, a ndav staƋ, a nhér gèƋ kinè staƋ.

¹¹ Aman ndohi Chloé ta menday ma a géƋ kinè, dalahimam ga, ta gaƋa: tengahi ngiƋè te ndev kinè ta bèzl va.

¹² I huro, aman ndo ngiƋè te ndev kinè a gaƌa: I ndo Paul; ngiƌè a gaƌa: I ndo Apollos; ngiƌè a gaƌa: I ndo Céphas; ngiƌè a gaƌa: I ndo Kristi.

¹³ Mè? Kristi nkezla te va Ƌè? Ta gezlala Paul a géƋ kinè Ƌè? Ta ga kinè baptême a nzlembaƋ Paul Ƌè?

¹⁴ I shid gèƋ a Zhiklè, a géƋ man i ga na baptême a ndo ngiƋè te ndev kinè ɓai, sèi Crispe a Gajus.

¹⁵ Ndo a slaha a ngèƋè azɓai, kin gu baptême a nzlembaƋ ga.

¹⁶ I ga na baptême a gi Stéphanas ba; gar i ga ta baptême a ndohi ngiƋè ba, i sun ɓai.

¹⁷ Aman Kristi a nzlindekay ɓai, aman i ga ta baptême a ndohai; a zlindekayè, aman i njè ma mbela'a; a ma maya ndo ngiƋè ka ɓai, aman wof ngézlèl Kristi man a ngots n'njèlè a vava.

¹⁸ Aman ma a géƋ wof ngézlèlè, nenga'a nrzlè a sam ndohi man ta ze ta; aman a sam nga, man nga mbela'a, nenga'a wuƌi Bi Zhiklè.

¹⁹ Aman ƌèlèwèr Zhiklè a gaƋa: I woy aman i gedassa maya ndohi maya; a maya ndohi nwosla'a i woy aman i kwola'a.

²⁰ Ndo maya kinè tema? Ndo man a slebau maya, ndo man a sun ncèmma t'herkeda, na tema? Zhiklè a n'ndeda maya herkeda a skwi nrzla ka ɓi dè?

²¹ Aman herkeda a maya na a slaha a nshin Bi Zhiklè a maya nenga'a azɓai. Gar haha ambaba Zhiklè, aman a ma mbela'a, man ta sla na nrzla, a mbel ta ndohi man ta co a ndav.

²² Ndohi Juif ta jhèƌè nrkedai; ndohi Grec ta jhèƌè ma maya.

²³ Aman nga njè Kristi—a vava Kristi, man ta gezlala'a, skwi nslafaƌama ta sak a ndohi Juif, man ta kèlèhi a pa, nrzlè a sam ndohi man Juif ka ɓai.

²⁴ Aman a sam tenga'a, man Zhiklè a mbaba ta auda te va'a, ndohi Juif a ndo­hi man Juif ka ɓai, cèw ba, a tenga'a Kristi wuƋi Zhiklè a maya Zhiklè.

²⁵ Ko man agassa Zhiklè nrzla, a fena maya ndo genè; ko man agassa wuƌi Zhiklè kèshkata genè, a fena wuƌi ndohi genè.

²⁶ Vahuro, dalahimam ga, ara Zhiklè a mbaba kinè: A mbaba ta ndohi kumba ɓai, man te nyakaƌ ta, ta ndohi maya. A mbaba ta ndohi kumba ɓai, man ndohi wuƌai a ndohi mbibihia'a.

²⁷ Aman Bi Zhiklè a nco skwi nrzla a sam di herkeda, aman a pa ta hori a di a ndohi maya a vna. A skwi man wuƌi na azɓai a sam di herkeda, Zhiklè a nco, aman a pa na hori a di a skwi man wuƌi na a zhè.

²⁸ A skwi man amba zura ɓai a sam di herkeda, a skwi man ndohi ta woya ɓai, a skwi ambalai, Zhiklè a nco, aman a pa na hori a di a skwi man ta sla na mbela'a.

²⁹ Gar haha, ndo da fu va ɓai a sam di Zhiklè, ko staƌ!

³⁰ Kinè a zhè te Yèsu Kristi a gèƌ Bi Zhiklè, aman Yèsu a ngi a maya nga, a ge nga a ndohi nzura'a, a kezla ndav nga, a preka nga auda;

³¹ gar haha, ara man ƌèlèwèr Zhiklè a gaƌa: Ndo man a woya a njégèr va, sèi a jégèr va a géƌ Bi Yèsu.