तीतुस 1 - माडिया गोंड पवित्र सास्त्रम

सुरुताङ पोल्‍लोङ

^1-4 तीतुस, नना पोलुनन, देवुळता कय इळ्न मन्जि, येसु किर्स्तुना बळयिनन, नीक इद सीटि रासलाह आतन. माट इर्वल उंदिय पोल्‍लोतुन विस्वस कीताह्‌कु, निमा नावा निटम मग़ना लेह्‌कान आतिन. देवुळबाबानाहि ओसो माक पिसिह केवाल किर्स्तु येसुनाहि नीक सुकमि, देय्वा दोर्कसोर मनि! नना अमेसाता पिसमुळता आसातेनाह्‌क, येसुना सेवा कीय्ह्‌नन. देवुळ आचतोर मन्कलोर विस्वसते बेर्सना, अहे देवुळता अग़दे ओसीयनद सेतेमतुन पुनदना इन्जि, येसुसामि नाक बळयि इनजोर निल्पिह कीतोग़. इद पिसमुळतुन देवुळ आचतोर मन्कलोर दोर्किह कीयनुर इनजोर, बूमतुन पुटिह केवस्केन, देवुळि पोल्‍लो विळ्सता; देवुळि बेस्केन जोल वळ्ह्‌को. मति इंजेके देवुळि तना कगोते, तना पोल्‍लोतुन पेसिह कीता. माक पिसिह कीयनद देवुळि, तना पोल्‍लोतुन पोकुर कीयनद कबळतुन, नावा कयदे ईसि, नाक उकुम ईता.

मुक्यालोरिन निल्पिह कीयनद पोल्‍लो

⁵ करेते इनदनद तोग़-देसेमतगा पिसिस मतद कबळतुन बेस-नेह्‌ना ओर्कुल कीकिन, ओसो सबे नाह्‌कनगा विस्वसिरा मुडुन ताकिह कीयलाहि, मुक्यालोरिन निल्पिह कीकिन इनजोर वेहचि, नना नीक करेते देसेमतगा विळ्सिस वातन. इद्रम कीम इनजोर, मुनेन नीक उकुम ईतन.

⁶ इद्रमतोर मन्कलोरिन मुक्यालोर इन्जि निल्पिह कीम: ओर बाताले कसुर दोर्कवप मनदना, दुस्राङ बेविस्किने ऊळवा उंदिय मुतेन पोस मनवालोर, ओराङ पिलाङ-पेकोर विस्वसिर मनदना, ओरु लजालेवा करब कबस्क केवालोर, कैंगम आयवालोरु इनजोरे, ओरिन बोग़े इनवोग़ मनदना. (अद्रमतोर मन्कलोर मतेक अचोन, ओरिन विस्वसिरा मुक्यालोरइनजोर, निल्पिह कीम.)

⁷ विस्वसिरा मुडुन ताकिह केवाल मन्कल, देवुळता लोतुन ताकिह केवाना लेह्‌कान आंदोग़. अदिह्‌क ओग़ बाताले कसुर दिसवोग़, कैंगम आयवोग़, केनेन ओङ आयवोग़, कल लोटि आयवोग़ु, जग्ळम केवोग़ु, कोताना लालुस केवोग़ मनदना गावले.

⁸ अहे ओसो बोराय ओना लोन वातेके बेस ऊळवाल, बेसता पोल्‍लोतुन विचर केवाल, बेस बुद कीसि तिरियवाल, सेतेमते मनवाल, देवुळतुह्‌क रेयसोर मनवाल, कुदतुन आव्रे केवाल मनदना गावले.

⁹ येसुनाङ बळयिर काग़्हतद बेस्केन चुकवद कबुरतुन बेस-नेह्‌ना पोस मनवाल मनदना. अस्केन चुकवाङ पोल्‍लोन काग़्हचि, केंजवालोरिह्‌क दीरा ईया पग़यह्‌तोर, ओसो सेतेम पोल्‍लोतुन पास्कवालोर मन्कलोरिन सुद्रे कीया पग़यह्‌तोर.

जोल काग़्हवालोरा पोल्‍लो

¹⁰ नना इद्रम बाराह्‌क रासिह्‌नन इतेके, करेते तोग़-देसेमतगा कैंगम आयवालोर वेल्‍लाटोर मन्ह्‌तोर. अहे उगसताङ वेहतह्‌तोर, ओसो मन्कलोरिन नाळेह कीस्तोर. उच्वुर यहुदि विस्वसिर कोनि, इद्रम पका कीस्तोर. ओर बह इन्ह्‌तोर इतेके, सबेटोर विस्वसिर डायना रिवज कीयना इनजोर इन्ह्‌तोर.

¹¹ इद्रमलेह्‌का ओप्पवव पोल्‍लोन काग़्हचि, वेल्‍लाङे लोह्‌कनोरिन लेसिह कीस्तोर. लाग्वा कबळते कोताङ कमय कीयलाह, इद्रम कीस्तोर. इद्रमताङ ओप्पवव पोल्‍लोङ काग़्हवालोरिन, केमेन कीयना गावले.

¹² करेते देसेमतोग़ ओर्वोग़ सेह्‌नाल, तनाय देसेमतोर मन्कलोरिन इद्रम वेहतोग़: “करेतेतोर मन्कलोर जोलहालोरु, जन्वरता बुदतोरु, लंडालोरु, उळ्बेर,” इतोग़.

^13-14 ओग़ सेह्‌नाल वेहतद पोल्‍लो निटमे. अदिनेनाह्‌क यहुदिर वेहतनव उगसताङ पीटोन, सेतेमतुन पास्कवालोरा उकुमतुन केंजवा, सेतेम काग़्हमुळतुन पोस नमिर इनजोर, विस्वसिरिन तेर्हचोर मन!

¹⁵ देवुळता मन्कलोरिह्‌क सबे तिनदलाह पोलिह्‌ता. मति पापमते करब आसि, किर्स्तुन विस्वस केवा मनवालोरिह्‌क, बाताले पोलो. ओराङ विचर्क करबे, अहे ओरा नेह्‌ना-लाग्वदिन पुनदनद बुद वने करबे!

¹⁶ देवुळतुन पुतोम इनजोर, सबेटोरा मुनेह ओर वेहतह्‌तोर. मति ओर जोल कीयलाह आतोर इनजोर, ओराङ कबस्क तोहतह्‌ताङ. ओर देवुळतुह्‌क एग़्ङ वानाह मन्ह्‌तोर, ओर ताना पोल्‍लोतुन केंजवोर आंदुर, अहे बेदे बेसता कबळतुह्‌क ओजोर.