रोम सहरतोर 3 - माडिया गोंड पवित्र सास्त्रम

¹ (नावाङ इव पोल्‍लोन केंजिसि, मीट यहुदिरिर इद्रम ताल्ह्‌केरिर:) अह इतेके, यहुदिरोम आस बाताल पाय्दा? डायना रिवज कीस बाताल पाय्दा?

² (अस्के नना इनेनन: यहुदि मन्कल आसि डायना रिवज कीतोग़ इतेके,) पका पाय्दा दोर्किह्‌ता. मोदुल पोल्‍लो इद इतेके, देवुळि तना सास्त्रमतुन, माक यहुदिरिह्‌के ईस मता.

³ मति उय्तुर यहुदि मन्कलोर, तमा किरिया कीतपु, अद सास्त्रम वेहतप ताकोर. ओर अद्रम कीताह्‌कु, बह देवुळ वने, तना करल कीतपु, केवो आयग़ाया?

⁴ आयो! निटम कीयग़ाये. देवुळि! नीवा पोल्‍लो चुकवा सेतेम दिसग़ा. निमा नेयम कीयह्‌पा, नीवाय पोल्‍लो ताकग़ा, इनजोर रासतप लेह्‌का, सबेटोर जोल मतेक तेला, देवुळि सेतेमे मन्ह्‌ता.

⁵ उय्तुर तमा मन्कना बुदते इद्रम इनेर, “मावा पापमतेनाह्‌कु, देवुळि पका सेतेम दिसिह्‌ता. पापमता इद्रम पाय्दा आस्ता इतेके, देवुळि माक सिक्सा ईसि, सेतेमते नेयम केवो,” इनेर.

⁶ मति अद्रम इनदनद पका बय्तळ पोल्‍लो आंदु! देवुळि सेतेमते नेयम केवेक अचोन, पूरा बूममेटोरा बेद्रम नेयम कीयग़ा?

⁷ “माट लाग्वाङ कबस्क कीताह्‌कु, देवुळता सेतेम बेस-नेह्‌ना दिसिह्‌ता. अदिह्‌क तान्क एक्‍वा मान दोर्किह्‌ता. इतेके मावा पापमतेनाह्‌क, देवुळि बाराह्‌क मावा नेयम कीयग़ा?” इनजोर मीट ताल्ह्‌केरिर.

⁸ इद्रम विचर केवालोरु, “माट लाग्वाङ कबस्क कीसोर दाकल, अस्के देवुळतुह्‌क मान दोर्कसोर दायग़ा,” इन्ह्‌तोर. ओसो पोलुर वने अद्रमे काग़्हतह्‌तोर इनजोर, उय्तुर मावाङ कूदिङ दास्तोर. मति वेर कूदिङ अनवालोरिह्‌क, देवुळ सिक्सा ईयग़ा. वेर कतमतोरे अद सिक्साता लायक मन्ह्‌तोर.

इद बूमते कसुरलेवोग़ बोग़े इलेग़

⁹ पया बह कीयना? बह माट यहुदिरल, दुस्राङ जातिनोरिह्‌काय कमि कसुरतोरल मह्‌नला? आयो, इलवल! यहुदिर मनिर, यहुदि आयवोर मनिर, सबेटोरे पापमते मन्ह्‌तोर इनजोर, नना इंजेकेन मीक तेळियिह कीस मतन.

¹⁰ देवुळता सास्त्रम इद्रमे वेहतह्‌ता: सेतेमतोग़ बोग़े इलेग़, ओर्वोग़ वने इलेग़.

¹¹ तेळियतोग़ ओर्वोग़ वने इलेग़. देवुळतुन पुनदलाह बोग़े विचर केवोग़.

¹² सबेटोरे देवुळतग्डाहि लेसतोर. कतमतोर बेदे कबळतुह्‌क अरवोर. बेसता कबळ केवाल बोग़े इलेग़, ओर्वोग़ वने इलेग़.

¹³ ओर कयमुल तोडिनोरु, ओराङ वेंजेह्‌क अमेसा जोल वळ्ह्‌किह्‌ताङ, ओराङ तोडिने वळ्ह्‌कनाङ पोल्‍लोङ, तरसता वीसमलेह्‌काने मन्ह्‌ताङ.

¹⁴ ओराङ तोडिनाहि, सरपताङ ओसो कुळ्साताङ पोल्‍लोङ पेससोरेन मन्ह्‌ताङ.

¹⁵ दुस्रोरिन हव्कलाहि, पका सुर्निस आस्तोर.

¹⁶ ओर बेक अतेकाय, अग्डा सामनतुन बूळे कीसोर दास्तोर. दुस्रोरिन तिपल कीसोर दास्तोर.

¹⁷ दुस्रोरा संगे कलियिस, गूनमते मनदनदिन पुनोर.

¹⁸ देवुळतुह्‌क रेयिस मनदनद पोल्‍लोतुन, ओर मुर्तिय सीता केवोर, इनजोर वेहतह्‌ता.

¹⁹ इंजेके माक यहुदिरिह्‌के, देवुळि तनाङ अडोना सास्त्रम ईता इनजोर पुह्‌नल. इतेके सास्त्रमते रासतव इव पोल्‍लोङ, मावाय कसुरतुन तोहतह्‌ताङ. इद्रमलेह्‌का देवुळि नेयम कीयह्‌पा, तान बोग़े कसुरलेवोनन इनदा पग़वोग़. पूरा बूममेटोर तमाङ लाग्वाङ कबस्कनेनाह देवुळता मुनेह जबब्दर आयनुर.

²⁰ बाराह्‌क इतेके, अडोना इसबते ताकलाह ऊळतेके, बोग़े मन्कल देवुळता मुनेह सेतेमतोग़ आयोग़. मति इव अडोङे मावा पापमतुन, माक बेस पुन्पिह कीसीस्ताङ.

देवुळि लोकुरिन बेद्रम सेतेमतोर कीस्ता

^21-23 इद्रमि, यहुदिर आयिर, यहुदि आयवोर आयिर, सबेटोरे पापम कीतोर. कीताह्‌कु, देवुळताहि दोर्कनद मान, कदरतगा एवया पग़वोर. मति इंजेके, अडोङ माळवालेवा, मन्कलोरिन सेतेमतोर कीयलाहि, देवुळि ओरिह्‌क दुस्रा अग़ तयर कीता. अद अग़दा लोप्पा, मोसानाङ अडोना सास्त्रम, अहे देवुळता कबुरतोरा सास्त्रम वने, मुनेन वेहता. अद अग़ इद्रम मन्ह्‌ता इतेके, मन्कलोर येसु किर्स्तुन विस्वस कीतेके, देवुळि ओरिन सेतेमतोर इनजोर इन्ह्‌ता. विस्वस केवालोर बोरे मनिर, देवुळि ओरा जात-कुलमतुन ऊळवा, ओरिन सेतेमतोर इनदग़ा.

²⁴ किर्स्तु येसु मन्कलोरिन पापमताहि विळ्सिह कीतोग़, इद्रम देवुळि तना दयाते, मन्कलोरिन सेतेमतोर कीस्ता. इद पोल्‍लोतेनाह्‌क, मन्कलोर देवुळतुह्‌क बाताले ईयना गर्ज इले.

^25-26 मन्कलोर तना संगे गूनम आयना इनजोर देवुळि, येसुनु मावा पापमता सिक्सातेनाह्‌क मोक आयलाह, निल्पिह कीता. येसु तना जीवा ईसि, नेतुर पोहतोग़ इन्जि, माट विस्वस कीताह्‌कु, देवुळि माक सेतेमतोर इन्ह्‌ता. येसु वायनामुने, मन्कलोरिह्‌क ओरा पापमता सिक्सा देवुळि एवो. बाराह्‌क इतेके, पया येसु ओरा पापमतेनाह्‌कु, मोक अरयनोग़ इनजोर पुन्जि, देवुळि केपिंदु. इद्रमि, देवुळि सेतेमता मन्ह्‌ता, अहे येसुन विस्वस केवालोरिन, सेतेमतोर कीयनद मन्ह्‌ता इनजोर, माट इंजेक पुह्‌नल.

²⁷ अदिनेनाह्‌क इंजेक, नना अडोङ वेहतप ताकताह्‌कु, देवुळता मुनेह सेतेमतोनन आतन इनजोर, बोग़े पोग़यसोर तिरिय पग़वोग़. बह इतेके, माट विस्वस कीयनद इसबतेने, सेतेमतोरल आय्ह्‌नल, मावाङ कबस्कना इसबते आयो.

²⁸ इदे मोदुल पोल्‍लो माट काग़्हतह्‌नोम: अडोन माळतेक आयो, मति किर्स्तुना पोग़ोन विस्वस तासतेकेने, देवुळि माकु सेतेमतोर इन्ह्‌ता.

²⁹ (इद पोल्‍लो वने विचर कीस ऊळाटु,) देवुळि सिरप यहुदिराय देवुळिया? आयो! अदु यहुदिरा वने, यहुदि आयवोरा वने देवुळि.

³⁰ बह इतेके कतमतोरा उंदिय देवुळ मन्ह्‌ता. यहुदिर मनिर, यहुदि आयवोर मनिर, ओरा विस्वसता मेटेने, देवुळि ओरिन सेतेमतोर कीस्ता.

³¹ अह इतेके, माट अडोन माग़्ङतप लेह्‌का आतला? आयो! विस्वस कीतेकेने, देवुळता जीवा माकु अडोङ वेहतप ताकिह कीस्ता.