रोम सहरतोर 10 - माडिया गोंड पवित्र सास्त्रम

¹ मावोर विस्वसिरिर! नावा इस्रयेल लोकुरिन देवुळि पिसिह कीयि इनजोर, नावा पूरा जीवाताहि विचर कीसि, इद पोल्‍लोतेनाह्‌क देवुळतुन अमेसा पार्तना कीसोरेन मह्‌नन.

² देवुळतुन माळलाहि, ओरा पका जिद मन्ह्‌ता इनजोर, नना ऊळतन. मति ओर देवुळ वेहता अग़दुन पुनोर.

^3-4 बह इतेके, देवुळि लोकुरिन बेद्रम सेतेमतोर कीस्ता इनजोर, ओर पुनोर. पुनवाह्‌कु, ओरु मोसानाङ अडोङ केंजिसि ताकतेके, देवुळि माक सेतेमतोर इनदग़ा इनजोर, विचर कीस्तोर. मति किर्स्तु मयेनाह्‌क मोक आसि, पाळ्नाङ अडोन मारिह कीसि, अद अग़दुन बंद कीतोग़. कीसि, लोकुर सेतेमतोर आयलाहि, विस्वसता अग़ तोहतोग़. मति इद अग़दे, इस्रयेलतोर ताकोम इन्ह्‌तोर.

देवुळि तन्क केयवालोर सबेटोरिने पिसिह कीस्ता

⁵ सास्त्रमतेमोसाल बह रासतोग़ इतेके, बोर बोर अडोङ माळसोरे पिसलाह ऊळिह्‌तोर, ओरिह्‌क सबे अडोन, बेदिने चुकवालेवा माळ पोयतग़ा.

^6-8 मति बोर बोर विस्वस कीसि सेतेमतोर आयलाह ऊळिह्‌तोर, ओरा लोप्पा मोसाल इद्रम वेहतोग़ इतेके, देवुळता पोल्‍लो नियगा मन्ह्‌ता, इतेके नीवा जीवातगा, नीवा तोडटगा मन्ह्‌ता. अदिनेनाह्‌क “माक पिसिह केवाल किर्स्तुन ततलाहि देवुळदीपतगाबोग़ तग़्ङ पग़यनोग़?” इनजोर इनमाटु. बह इतेके किर्स्तु कुदि माक पिसिह कीयलाहि, इद बूमतगा वातोग़. अद्रमे ओसो “किर्स्तुन हामुरताह तेग़्किह कीयलाह, हानादीपते बोग़ रेग पग़यनोग़?” इनजोर वने मीट इनमाटु; बह इतेके, देवुळिये किर्स्तुन हामुरतग्डाह तेग़्किह कीता. अदिनेनाह्‌क देवुळता मुनेह सेतेमतोर आयलाह, माक बाताले कीया पोयो, सिरप विस्वस कीयना अचोने. इंजेके माट इद कबुरतुन पोकुर कीयलाह आतोम.

⁹ अद कबुर इद्रम इतेके, येसुये नावा सामि इनजोर, निमा नीवा तोडटे कबुल आसि, देवुळि ओन हामुरतग्डाहि जीवा अर्हता इनजोर, नीवा जीवाताहि विस्वस कीतेक अचोन, देवुळि नीक पिसिह कीयग़ा.

¹⁰ बोग़े आयि, आपुना जीवाताहि विस्वस कीतेकेने, ओग़ देवुळता मुनेह सेतेमतोग़ आस्तोग़. अद्रमे आपुना तोडटे कबुल आतेकेने, ओग़ तना पापमता सिक्साताहि पिसिह्‌तोग़.

¹¹ देवुळता सास्त्रमतगा वने, इद्रम रासतद मन्ह्‌ता: “किर्स्तुन विस्वस केवाल बोग़े मनेग़, ओग़ मेसेह्‌ने आयोग़ आयनोग़.”

¹² विस्वस केवालोर यहुदिर मनिर, ओसो बोर दुस्रा जाततोर मनिर, कतमतोरा सामि इतेके येसुये! ओन केयवालोर सबेटोरिन, ओग़ पका बेस ऊळिह्‌तोग़.

¹³ बोर बोर सामिनु दया कीम इनजोर केयिह्‌तोर, ओर सबेटोर पिसनुर, इनजोर रासतद मन्ह्‌ता.

¹⁴ मति बोर लोकुर किर्स्तुन विस्वस केवोर, ओर बह केयेर? ओरिह्‌क ओना पोल्‍लोतुन बोग़े एव्सिह केवालेवा, ओर बह विस्वस केवेर? ओरगा बोग़े अनवालेवा, किर्स्तुना कबुर बह एवयग़ा?

¹⁵ लोहवालोर लेवेके, ओरगा बोग़ दायनोग़? अदिनेनाह्‌क देवुळता सास्त्रमतगा इद्रम रासतद मन्ह्‌ता: बेसता कबुरतुन तवालोर वायनदिन ऊळिसि, बेचोन गिर्दा वास्ता! इनजोर देवुळता कबुरतोग़ यसयाल वेहतोग़. अद्रमे देवुळि तना कबुरतोरिन पोकुर कीयलाहि लोहताये.

¹⁶ मति केंजतोरग्डाहि उच्वुर अद बेसता कबुरतुन विस्वस केवोर. इदिने यसयाल इतोग़, “ए सामि! माट वेहतद कबुरतुन बोग़ाय विस्वस कीतोग़ा?” इनजोर इतोग़.

¹⁷ इद्रमलेह्‌का लोकुर किर्स्तुना बेसता कबुरतुन केंजतेकेने, विस्वस कीया पग़यह्‌तोर. बोग़ाय अद कबुरतुन पोकुर कीतेकेने, ओर केंजिह्‌तोर.

¹⁸ पया इस्रयेल लोकुर इद कबुरतुन केंजोरा? आयो, ओर केंजतोरे. देवुळता सास्त्रमतगा इद्रम रासतद मन्ह्‌ता: ओरा कबुर पूरा बूममेंड एवता. ओरा पोल्‍लो दुनियाता कोड एवनाह पोकुर आता, इनजोर रासतद मन्ह्‌ता. अद्रमे ओर निटम केंजतोरे.

¹⁹ केंजिसाय ओरिह्‌क तेळियोया? तेळियह्‌ताये! मुनेन मोसाना सास्त्रमते रासतपु, देवुळि इस्रयेल लोकुरिन इद्रम इता: “दुस्राङ जातिनोरिह्‌क बर्कत ईसि, मीवा जीवा कर्वनाह कीकन. नाक पुनवोरिह्‌क देय्वा ईसि, मियगा कोटुल पुटिह कीकन,” इनजोर देवुळि इता.

²⁰ मोसाना पेग़्केडोग़ यसयाल, (दुस्राङ जातिनोरा लोप्पा रासिह्‌पा,) देवुळता दीराते इद्रम रासतोग़: नाक पर्ह्‌कवोरु, नाक दोर्किह कीतोर. नाक पुनदलाह ऊळवोरु, नाक पुनदलाह आतोर, इनजोर रासतोग़.

²¹ इस्रयेल लोकुरा लोप्पा बार, देवुळि इद्रम इता: “नयगा मल्स वायिर इनजोर, वेल्‍लाय जोम ओरा अग़ ऊळतन. मति ओर कैंगम आसि, नावा पोल्‍लोतुन केंजोर,” इता, इनजोर यसयाल रासतोग़.