मत्याल 4 - माडिया गोंड पवित्र सास्त्रम

देयह्‌कना मुक्याल येसुना पट ऊळिह्‌ता

¹ अस्के देयह्‌कना मुक्यानेनाहि येसुना पट ऊळना गावले इन्जि, देवुळता जीवा ओनु पेळ्ह्‌कल बूमते ओसीता.

² पया अगा रेंड वीसाङ दियाङ, नग़्का-पियल उपस मताह्‌कु, येसुह्‌कु पकाय कग़्व वसता.

³ अस्के देयह्‌कना मुक्याल येसुना पट ऊळलाह, ओना एरे वास इता, “निमा देवुळता मग़निन मनाह्‌कु, इव बंडानु आरिङ मारियिह कीम,” इता.

⁴ मति ओग़ इतोग़, “आयो, मन्कल सिरपि तिनदनद तिंडटे पिसोग़ आस्तोग़, मति देवुळता तोडटाहि पेसनद, उंद-उंद पोल्‍लोतुन केंजतेकेन पिसनोग़, इद्रम देवुळता सास्त्रम मन्ह्‌ता,” इतोग़.

^5-6 पया देयह्‌कना मुक्याल ओनु पवित्र सहरतगा (इतेके येरुसलेमतगा) ओसि मंदिरता कुपोटगा ओन निल्पिह कीस इता, “निमा देवुळता मग़नन इनजोर इह्‌निन इतेके, इळ्न डेया! नीक बाराय आयो आयग़ा, बाराह्‌क इतेके: नीक काप आडना इन्जि, देवुळि तनाङ देवतुल्किन लोहतग़ा. नीवाङ काल्क चेट पेह्‌चनायो इन्जि, अव नीकु पोग़ोन तमाङ कय्कने एतनुङ, इद्रम सास्त्रम वेहतह्‌ता,” इनजोर देयह्‌कना मुक्याल इता.

⁷ अस्के तान येसु इतोग़, “आयो! (बय्तळ कबळ कीतेक तेला, देवुळ नाक पिसिह कीयग़ा, इद्रम इन्जि)बोग़े देवुळता पट ऊळनदायो, इह वने पवित्र सास्त्रम वेहतह्‌ता,” इन्जि इतोग़.

⁸ ताना पया देयह्‌कना मुक्याल येसुनु उंद पका बेरा मेटाकोकतगा ओता, ओसि ओन्कु दुनियाताङ सबे राजेह्‌क, ओसो अविस्कना सोबातुन तोहता.

⁹ तोहचि येसुन इता, “ऊळा, इव पूरा नावाङे आंदुङ. निमा नावाङ काल्क अर्सि नाक मोळ्कतिन इतेके, नना नीकु इव कतमे दिसनवु ईकन,” इता.

¹⁰ अस्के येसु तान इतोग़, “एय देयमतिन, निमा इग्डाहि विता, बाराह्‌क इतेके देवुळतुने मोळ्कना, तानाये माळना कीयना, इद्रम सास्त्रम वेहतह्‌ता.”

¹¹ पया देयह्‌कना मुक्याल ओन विळ्सिस अता. तेना पया ऊळाट, देवतुल्क अगा वासि, येसुना जीवातुन सितुर कीयलाह, ओसो ओना पिसवग़ता तिंडि ईसि, ओना सेवा कीताङ.

येसु गालिल पटटे देवुळता पोल्‍लो वेहतह्‌तोग़

¹² अस्के पया योहनिन जेल ओस मतोर इन्जि, येसु केंजतोग़. तेन केंजिसि, ओग़ यहुदा पट विळ्सिसि गालिल पटटे तना नाग़ नासरेत अतोग़.

¹³ पया नासरेत नाटुन विळ्सिस, कापेर्नाग़ मनदलाह अतोग़. इद नाग़ु गालिल सम्दुरकचुल मता, इद एरियातुन मुनेता कालमते जाबलुन-नाप्‍तलि इंदुर.

¹⁴ अह आतस्के, वेल्‍लाङ वर्साङ मुने, यसयाल इनवाल देवुळता कबुरतोग़, बेद कबुर वेहच मतोग़, अद करल आता:

¹⁵ योर्दन बेरेटा अबर बाजे मनदनद, गालिल सम्दुरकचुदा जाबलुन-नाप्‍तलिना बूमते, गालिल इनदनद यहुदि आयवोरा बूमते

¹⁶ ईकळते उदतपु पापमते मतोरु, देवुळता बेरा वेह्‌च ऊळनुर. बेगा लोकुर देवुळता जीवालेवा हातप मन्ह्‌तोर, अगाने ताना वेह्‌च दींचग़ा.

¹⁷ अस्केडाहि देवुळता पोल्‍लो येसु वेहता बोटटोग़: “देवुळि मन्कलोरगा राजेम कीयनद कगो एवयलाह आता. अदिह्‌क मीटु मीवा पापमताहि मिळ्न्दिसि, देवुळतके वाटु,” इद्रम वेग़ वेहन्दोग़.

मुनेतोर येसुनाङ कग़यवालोरु

¹⁸ उंदि दिया येसु गालिल सम्दुरकचुलिये ताकसोर अनेके, सिमोनि, आंद्रेयाल वेर तमोग़ इर्विरिन ऊळतोग़ (सिमोनना दुस्रा पेदिरि पत्रु मता). वेर मीन्क पोयवालोरु, तमाङ वदिङ सम्दुरलोप्पा आहन्दुर.

¹⁹ येसु अस्के ओरिन इतोग़, “दट नावा संगे. मीट इचानाह मीन्क पोयंदिर, मति इंजेके मीटु मन्कलोरिन नयगा तवालोरिर आयकिर, अद्रम नना मीक कीकन, वाटु,” इतोग़.

²⁰ इदिन केंजिसि, वदिन अगान विळ्सिसि, वेर तमोग़ इर्वुर येसुना संगे अतोर.

²¹ अग्डाहि पेसिस मुनेह अनेके, ओसो जेबेदि इनवानाङ इर्वुर मग़्कु, याकुबि ओसो ओर्वोग़ योहनि, वेर दिसतोर. वेरु तमा तपेना संगे ओडातगा उदिसि, तमाङ वदिन ओर्कुल कीयलाह आसि. ओरिन वने “नावा संगे वाट,” इनजोर येसु केयतोग़.

²² केयतस्के चट्‌नेन वेरु ओडातुन, तमा तपेन अगान विळ्सिसि, येसुना संगे अतोर.

येसु दुकिनोरिन सव्रे कीस्तोग़

²³ पया ओराङ पार्तनाताङ लोह्‌कनगा देवुळता पोल्‍लो काग़्हचोरे, देवुळि लोकुरगा राजेम कीयनदिना लोप्पा बेसता कबुर पोकुर कीसोरे, अहे लोकुराङ सबे रोगह्‌किन, दुकिनु सव्रे कीसोरे, पूरा गालिलमेंड येसु तनाङ कग़यवालोर बार तिरियतोर.

²⁴ येसुनाङ कीताङ कबस्क पूरा सुरिया पटमेंड आबुर आताङ. अस्के सबे रीतिनाङ रोगह्‌कने ऊटेम आस मतोरु, कुर्मुटटप आतोरु, पटापुटा नोयनद दुकतोरु ओसो देयह्‌क पोयतोरु, कुळ्न्दिल रोगह्‌कनोरु, कय्क-काल्क वाग़तोरु, इद्रम सबे रोगह्‌कनोरिन येसुनके ततोर. ततस्के येसु सबेटोरिन सव्रे कीसीतोग़.

²⁵ पया गालिल, दाकपालिस, यहुदा, योर्दन बेरेटा अबरता बूमि, इव पटिनाहि, अहे येरुसलेम सहरताहि लोकुर, गोह्‌डिनाङ गोह्‌डिङ येसुना पयाह अंदुर.