योहन 12 - माडिया गोंड पवित्र सास्त्रम

मरियाल येसुनु मान ईस्ता

¹ पया आवना पंडुमता आरुङ दियाङ मुनेने, येसु तनाङ कग़यवालोरा संगे बेतनि नाटे वासि, अगान मतोर. लाजर पेदिरतोन ओग़ हामुरताहि तेग़्किह कीस मतोग़, ओनगाने ओर मतोर.

² अगा कग़यवालोरेनाह्‌कु ओर जावा एहच मतोर, अस्के मार्ताल वांटिसींदु. ओसो लाजर येसुनाये बतते उदिस मतोग़.

³ अस्के मरियाल तनगा तीसामेंड लेह्‌का मतदु अतर्नेय तचि, येसुनाङ काल्कनगा वळता. (इद अतर्नेयु जटामासि इनदनद पोर्ह्‌काताहि पंडटदु, अद वेल्‍ला दाराता आंदु.) वळसि, तनाङ केल्कने ओनाङ काल्किन उम्चता, अस्के अद नेय लोनमेंड गमरेम पोस मता.

^4-5 ओर कग़यवालोरग्डाहि यहुदा इस्केर्योत इनवाल मतोग़ (ओग़े ओन कोंटेतोरा कयदे पोस एवाल मतोग़), ओग़ इतोग़, “इद अतर्नेयदुन वमतेके, वग़ोना वर्सामेटा पिसवग़ आवाल कोनि! तान वमिस, अव कोताङ गरिबतोरिह्‌क बाराह्‌कु एविर?” इतोग़.

⁶ (ओन्क गरिब लोकुरा पर्वा मन्ह्‌ता इन्जि, अह वळ्ह्‌कतोग़ इनदनद इले; मति ओग़ कले आंदोग़. ओनगा कोताना बट्वा मंदु, अद बट्वाते येसुना सेवातुह्‌क वाटटद दान-दर्ममतुन ओग़ कलिंदोग़, अदिह्‌क इह वळ्ह्‌कतोग़.)

⁷ पया येसु इतोग़, “मनि यहुदा, निमा तान वळ्ह्‌कमा. नावा हायनद कगो एवता इन्जि, नावा सेत्तातुन अतर्नेय ओकतपे, अद अह कीता.

⁸ केंजाट, गरिब लोकुर अमेसा मियगा मन्ह्‌तोर,(ओरिह्‌कु बेस्के तेला मीट दर्मम ईया पग़यकिर). मति नना अमेसा मियगा मनोन आयकन,” इन्जि इतोग़.

⁹ येसु अगा मन्ह्‌तोग़ इन्जि, वेल्‍लाटोर यहुदि लोकुरिह्‌क एर्का आता, एर्का आताह्‌कु ओर अगा वातोर. सिरप येसु अगा मन्ह्‌तोग़ इन्जि वावोर, मति हामुरताहि जीवा अरतोग़ लाजरिन वने, ओर ऊळलाह वातोर.

^10-11 मति पेर्मालोर पट आसि, लाजरिन वने हव्कलाह ऊळिंदुर. बाराह्‌क इतेके येसुना लोप्पा ओनाय साक्सितेनाह्‌क, वेल्‍लाटोर यहुदिर ओरिन विळ्सिसि येसुन नमिंदुर.

येरुसलेमते येसु डीसाते ओळियिह्‌तोग़

^12-13 इमा दिया पया येरुसलेम सहरते पंडुमतुह्‌कु वाता मुलु, येसु येरुसलेमते वास्तोग़ इनजोर केंजताह्‌कु, गजर मराताङ कोमाङ पोसि, ओन्क कदर ईयलाह सहरताह पलत पेसतोर. अह कीस केयसोर इतोर, “जोहर! देवुळबाबाना अदिकर पोस वावाल,इस्रयेलतोग़ राजाह्‌कु जोहर आयि!”

¹⁴ येसुह्‌क उंद गाळ्‍द दोर्कतस्के, ओग़ ताना पोग़ोन उदतोग़, उदिसि सहरतके वायलाह आतोग़.

¹⁵ इद्रमि सास्त्रमते मुने रासिस मतद पोल्‍लो इंजेके करल आता, अद इह मन्ह्‌ता: “ए येरुसलेमता लोकुरिर, मीट रेयमाटु! ऊळाट, मीवा राजाल गाळ्‍द पियोता पोग़ोन उदिस गूनमते वास्तोग़.”

¹⁶ इव गोटिङ येसुनाङ कग़यवालोरिह्‌क अद तूकने तेळियोङ आसि. मति इव गोटिङ येसुना लोप्पा सास्त्रमते मुने रासतव मताङ, ओसो अहे लोकुर ओन कीतोर, ओग़ पया डीसाते जीवा अरतस्के, कग़यवालोरिह्‌क तेना सीता वाता.

¹⁷ येसु लाजरिन गुमयाताहि केयिसि जीवा अर्हतह्‌पा बोर लोकुर ऊळतोर, ओरु अह आतदिना लोप्पा साक्सि ईंदुर.

¹⁸ येसु इद सीना तोहतोग़ इन्जि, तेना साक्सि केंजताह्‌कु, लोकुर ओन कलियलाह वातोर.

¹⁹ अदिनेनाह्‌क परुसिर तमतमाय इतोर, “ऊळाटु, मावा ताको रो, माट आरेम आतल गोतो. कतमतोर ओनाय पयाह दायलाह आतोर!” इतोर.

येसु तना हायना-हामुरतुन वेहतह्‌तोग़

²⁰ पंडुमते मोळ्कलाह वातोर लोकुरग्डाह उय्तुर युनानि जाततोर वने मतोर.

²¹ ओरु गालिल पटटा बेत्‍सेदा नाटेनोग़ पिलिप, वेनगा वासि इतोर, “दादा, येसुन माट कलियलाह वातोम,” इतोर.

²² इद पोल्‍लो पिलिप वासि, पत्रुना तमोग़ आंद्रेयान वेहतोग़. पया इर्वुर कलियिस वासि, येसुन वेहतोर.

²³ अस्के येसु तनाङ कग़यवालोरिन इतोग़, “इंजेके मान्वना नडुम पुटटोना डीसा तोहतनद कगो एवता.

²⁴ इह केंजाट, नना सेतेम वेहतह्‌नन, (नावा जीवा) गोह्‌कना विजालेह्‌काडा. विजा नेदगा अरयह्‌ता, मिंजिह्‌ता, अस्के अद मोन्ह्‌टिसि वेल्‍ला पंटा ईस्ता. मति विजा नेदगा अरवेके, अद वग़ये मन्ह्‌ता, पंटा वावो.

²⁵ अद्रमलेह्‌काने बोर इद दुनियाते तमा जीवातुन पिसिह कीयलाह ऊळिह्‌तोर, ओर अमेसाता जीवातुन पोहतह्‌तोर. मति बोर बारा इद दुनियाते तमा जीवातुन पर्वा केवोर, ओरा जीवा अमेसातुह्‌क पिसग़ा.

²⁶ बोर नावा सेवा कीयलाह ऊळिह्‌तोर, ओर नावाङ कग़यिर. बेगा नना मनदकन, अगा नावा सेवा केवालोर वने मनदनुर. बोर नावा सेवा कीयनुर, ओरिन नावा बाबाल कदर ईयनोग़.

²⁷ इंजेके नावा जीवा चुहेम आयो. नना बाताल इनदकन? ‘नावा तिपल आयनद कगो वामाकि, तेनग्डाह नाक पिसिह कीम, बाबा,’ इद्रम इनदकना? आयो, इद्रम इनोन, मति इद कगोतेनाह्‌के, नना इद बूमतगा वातन.

²⁸ बाबा, नीवा डीसातुन निमा तोहा!” इन्जि येसु इतोग़. अह इतस्के, पोग़ोटा बूमताहि आल्का केंज वाता, “नना नावा डीसातुन तोहतन, ओसोवने तोहतकन.”

²⁹ आल्कातुन केंजिसि, अगा निच मतोर लोकुर उय्तुर इतोर, “बूम गुळ्न्जता, रा!” उय्तुर बारा इतोर, “आयो, देवतुले ओना संगे वळ्ह्‌कता.”

³⁰ अस्के येसु ओरिन इतोग़, “इद आल्का नयेनाह्‌क आयो, मति मियेनाह्‌क आता.

³¹ दुनियातुन नेयम कीयनद वेला इदे मन्ह्‌ता. इदे वेला दुनियातुन राजेम कीयनदु (देयह्‌कना मुक्याल) आरेम आयग़ा.

³² नाक नेदाहि गुटातगा पोग़ोन तेहतस्के, नना नयके सबेटोरिन ओंडे कीकन,” इन्जि येसु इतोग़.

³³ तना बेद हामुरते हायना मतोग़, अदिन वेहतलाह ओग़ अह वळ्ह्‌कतोग़.

³⁴ अदिह्‌क पया लोकुर ओन ताल्ह्‌कतोर, “देवुळ लोहवाल पिसिह केवाल अमेसा मनदनोग़, इद्रम इनजोर अडोना सास्त्रमताह माट केंजतोम. इतेके निमा माक माने-मन्कना नडुम पुटटोनु, गुटातगा पोग़ोन तेहतना इन्जि, बह इह्‌निन? वेग़ ‘माने-मन्कना नडुम पुटटोग़’ बेद्रमतोग़ आंदोग़?” इन्जि इतोर.

³⁵ अस्के येसु ओरिन इतोग़, “ओसो गय्के नावा वेह्‌च मियगा मनदग़ा. ईकळ आयनामुनेने, वेह्‌च मनेकेने वेह्‌चते ताकाटु. बाराह्‌क इतेके बोग़ ईकळते ताकिह्‌तोग़, ओग़ बेगा दास्तोग़, अद ओन्क तेळियो.

³⁶ मीट नावा वेह्‌चते ताकवालोरिर आयना इन्जि, मियगा नावा वेह्‌च मनेकेने, अद वेह्‌चतुन नमतपु, (नावाङ पोल्‍लोङ केंजिसि, अहलेह्‌का ताकाटु.)” येसु इचोक गोटिङ वळ्ह्‌किसि, ओरग्डाह पेसिस अतोग़, अन्जि ओरिह्‌क पता अरवाहि कुस्क्ने मकिस मतोग़.

लोकुर येसुन नमोर आस्तोर

³⁷ ओरा मुनेह इचोटाङ बामिह कीयनाङ सीनाङ येसु तोहतोग़; तेला मति ओग़ देवुळ लोहतोग़ पिसिह केवाल आंदोग़ इन्जि ओर नमोर.

³⁸ ओर नमवाह्‌कु, यसयाल इनवाल मुने रासतदु देवुळता कबुर करल आता. अद रासतद कबुर इह मन्ह्‌ता: ए सामि, माट वेहतद कबुरतुन बोग़ाय विस्वस कीतोग़ा? ओसो बोग़ाय देवुळबाबाना लावतुन ऊळतोग़ा?

³⁹ ओर बाराह्‌कु नम पग़वोर, अदिन वने यसयाल रासिस तासतोग़, अद इह मन्ह्‌ता:

⁴⁰ ओर तमाङ कोंडाने ऊळनायो, ओरिह्‌क तमा बुदते नावा पोल्‍लो तेळियनायो ओर नयके सव्रेम आयलाह मल्स वायनायो इन्जि, नना ओराङ कोंडान तोववाह कीतन, ओरा बुदतुन गळ्स कीतन. इन्जि देवुळ इन्ह्‌ता.

⁴¹ (देवुळता दळ्मि ओना पोग़ोन अरताह्‌कु,) यसयाह्‌कु येसुना डीसा दिसता, अदिह्‌क ओग़ु येसुना लोप्पा इद्रम आयना मन्ह्‌ता इन्जि, मुने वळ्ह्‌किस मतोग़.

⁴² इद्रम मन्ज तेला, पेदा मन्कलोर वने वेल्‍लाटोरे, येसुन (तमा जीवाते) नमतोर. मति माकु मोळ्कनगा कलियलाह एवोर आयनुर इन्जि, परुसिरिन रेयिसि, देवुळ लोहतोग़ पिसिह केवाल येसुये आंदोग़ इनजोर, कबुल केवोर.

⁴³ बाराह्‌क इतेके, देवुळतेनाह दोर्कनद कदरतुह्‌काय एक्‍वा, ओरिह्‌कु मन्कलोरेनाह दोर्कनद कदर बेस आता.

⁴⁴ अस्के येसु बेरा आल्काते केयिस इतोग़, “बोर नाक नमिह्‌तोर, ओर नाक वग़ोने नमोर मति, करलते नाक लोहतोग़ बाबान वने नमतप आस्तोर.

⁴⁵ अहे बोर नाक ऊळिह्‌तोर, ओरु नाक लोहतोग़ बाबान ऊळतप मन्ह्‌तोर.

⁴⁶ नाक नमसोर मनवाल बोग़े आयि, ईकळते मनदनदायो इन्जि, नना वेह्‌चता लेह्‌का दुनियाते वातन.

⁴⁷ “बोर नावाङ गोटिङ केंजिस अहलेह्‌का तिरियोर, ओरा नेयम नना केवोन. नना इतेके दुनियातोरा नेयम कीयलाह वावोन, मति दुनियातोरिन पिसिह कीयलाह इद बूमते वातन.

⁴⁸ बोर नाक कोंटे कीसि, नावाङ पोल्‍लोङ केंजोर, ओरा नेयम कीयनद उंद मन्ह्‌ता: बेद पोल्‍लो नना वेहतन, अद पोल्‍लोते ओर तिरियतोरो, तिरियोरो, अद इसबते ओरा नेयम आयग़ा.

⁴⁹ नना इद्रम बाराह्‌क वेहतह्‌नन इतेके, नना नावाय विचरताङ पोल्‍लोङ वळ्ह्‌कोन; मति नना बाताल इनदना मन्ह्‌ता, ओसो बाताल वळ्ह्‌कना मन्ह्‌ता, अदिन नाक लोहतोग़ बाबाल, ओग़े नाक उकुम ईस वेहतोग़.

⁵⁰ ओना उकुम अमेसाता पिसमुळतके ओसीस्ता, इद नाक एर्काय मन्ह्‌ता. अदिनेनाह्‌क बाबाल नाक बह वळ्ह्‌कलाह वेहतोग़, अद्रमे नना वळ्ह्‌किह्‌नन,” इनजोर येसु इतोग़.